Read Oku Mak 12 Bible Online

Mak 12 - Oku bible

Mak 12

¹Jesus me se suŋnen se ghene ɛ nganse ge: Wel əblee nè lô dise ɛyleme əmtam mɛ ɛ́ sɛɛ naay əmnduk so, è təm kengɛy kale so, è tim ɛybee yɛ ɛ́ yɛ jɛɛle əmtam ɛ ten nɛ əmndukme fəye, è gese bàklè kebaŋ kɛ wele nchiy yɛ diom ɛ ten. È vii ghel se ten, è lòò è ndu ɛyjɛl ɛ ketum kelee.

²Əbliy ɛykoy əmtame nɛy kwɛn, əb tum wel ɛyfɛl nə wen əblee ge əb ndu, è fii mii mɛ əmtam se ghel ɛylem ghii.

³Ghene faŋ wen è tɛl, è jum, əb fiile ɛghoo ɛyum.

⁴Əb gese tum wel ɛyfɛl əblee, ɛ́ tɛl, è lɛmse ketuu ə wen, è gese choksen wen.

⁵Ba ɛylem vi gese tum wel ɛyfɛl nə wen əblee, ɛ́ yúy vi nɛ̂ vin yuyén. Əb tinse ɛlee, ɛ́ nyable so kɛn ɛ jii fo, è tɛl ɛlee, è yuyte ɛlee yúytén.

⁶Wel bɛɛse əbmok nɛ lu wán ə wen wɛ əb nè koŋen se ŋaŋ. Əb ləysen tum wan ten è suuy ge: Ɛ́ nɛ̂y ngvəmle wán ə wom.

⁷Ghel ghii yɛn wan vi ka əb gwiyen è suŋnen kal ge: Vii lu nyiɛ ndaa nə ba ɛylem. Ghɛsen yuy wen, è yof ɛyleme ten!

⁸Ghene faŋ wen, è yuytê, è mak ɛygvən ə wen se ɛybame kengɛy.

⁹Jesus mɛyse è bif ge: Ke gan dì, é ba ɛylem fo nɛ̂y nɛɛy lɛɛy? Mɛ suuy se ghɛn ge: Əb nɛ̂y gwiy, è yuyte ghel ghi, è vii ghel ɛchine se ɛyleme ten.

¹⁰Ghɛne bɛɛy ghàà jaŋ kelike ŋwaale-Feyine kɛ ɛ́ nyaken ge: Ɛytiy yɛ ghɛ́ kembome nè maayen, shi ɛyghene yɛ ɛ́ tomen ɛybuu ndaa so-a?

¹¹Kenəə nɛ̂ kin lu nɛ fɛl Báàba Feyin, ghɛsen se yɛne nɛ ke chia kediak ə kɛ́sen.

¹²Ghele mbiy ghɛ ɛylak fo keele ge Jesus maa ngan yi bek ghene è me se kɛŋe se koo wen, dî è fan ngose wel yɛ ɛy nè luun fo, è me lòò è vəse wen se fo.

¹³Ɛ́ nɛy me tum ghele kenone Falisee ɛlee gese nɛ̀ ghele Helod ɛlee ge ɛ́ ndu è yɛ gofe Jesus nɛ̀ tebife.

¹⁴Ghene ndu, è suuy ge: Ndinte, ghɛs ke ge wɛ̀ suuye əbluuy, fane wiy wel, kene lu naa ndɛ, dine wiy əmndun-ndun, gese dinte nɛ lu kenəə kɛ Feyin kɛŋen ge ghele yɛ nɛɛy. Ke lɛ lu ɛ titiy ge ghɛs yɛ lake shile se əbfon ə Lûm moo ɛngaŋ-a?

¹⁵Ghɛs yɛ lak moo ɛ́ jia yɛ lak-a? Jesus keele ge ɛ́ gofe yi gofen è bif se ghene ge: Ghɛne momse mɛ bek ghɛ? Ghɛn gwiy nɛ̀ əbkaa kekas é mɛ yɛn.

¹⁶Ɛ́ gwiy so, è fo se wen, əb bif ge: Lu ketuu ndɛ gese nɛ̀ ɛyghel ə ndɛ ɛ lɛ̂? Ghene fise ge: Lu kɛ́ əbfone.

¹⁷Jesus me suuy se ghene ge: Ghɛn fó kɛ́ əbfone se əbfon, è fo kɛ́ Feyine se Feyine. Əbchio yum ghene kum əbnəə wɛ əb nè suuyen.

¹⁸Ghele Saddusee ɛlee gwiy se Jesus, nɛ lu ghel ghɛ ɛ́ suuyen ge ghele jia yî loole se ɛykuo, è bif se wen ge:

¹⁹Ndinte, Moses nè nyak ɛ ghɛsene nchil ge: Wel kuo è vəse əbvii ghàà ghon, fene wan-no ə wel əbkuon lu se lɛm əbvii ten é ghene wen yɛ bii ghon ge ghɛ́ wel əbkuone.

²⁰Ghone-nyii ɛlee nè lô se lu saamba, wɛ ngɛsewel kiile əbvii è naa kuo nɛ ghene wen bɛɛy ghàà yɛ ki ghon.

²¹Kenkumtene lɛm əbvii vi, è kuo ghàà wan, ɛybam ə wene lɛm, ke gan kɛn dì.

²²Ghene ghɛ ghel saamba kuo ɛjim nɛ ɛ́ báà lɛm wan. Se ɛybam, əbvii vi kuo sɛy.

²³Feyine náà lose ghel se ɛykuo, é əb yɛ lu wiy ə ndɛ nɛ ghene nè liɛmen wen se əbvii ghel ɛjim?

²⁴Jesus fise ge: Ghɛne nduu nɛ̀ ɛybame bek ge ghɛne báà se ke kenəə kɛ ke luun ɛ ŋwaale-Feyin gese ke wiy əbtaawe Feyin.

²⁵Feyine náà lose ghel se ɛykuo, ɛ́ yɛ lu ka nchiyse-ndaa nə Feyine luun ɛ ɛyyio, è jia yɛ chii ka əbvii ghene lum.

²⁶Ka ghɛne maanen ge Feyine náà lose ghel se ɛykuo, ke dine ge ghɛne bɛɛy ghàà jaŋ kenəə kɛ Moses nè nyaken kum fekak fɛ əbvəse nè báálen ɛ ten? Feyine nè suuy se wen ge: Mɛ lu Feyin ə Ablaham nɛ̀ Ayzek gese nɛ̀ Jakob.

²⁷Feyine dì báà se lu Feyin ə ghel ɛkuone, Əb lu Feyin ə ghel ɛchiinee. Ghɛne jase naa se ŋaŋ.

²⁸Wel əblee ɛ ngoo nə ghɛ́ ɛydinte tesake yio ka Jesus ghene ghel ghii se beken mbek yi dì, è yɛn ka Jesus fisen əbnəə kejuŋ, è kokte, è gwiy, è bif se wen ge: Nchil yɛ ɛy chian nchil sejim lu ɛykɛ?

²⁹Jesus fise ge: Nchil yɛ ɛy chian nchil sejim lu yin ge: Ghele Islael, ghɛn yióté, Báàba wɛ Feyine ə Fɛsen lu kɛn wen Báàba wen nyiŋ.

³⁰Wɛ̀ lu se yɛ koŋe Bay Feyin nə wɛ̀ nɛ̀ ɛytem ə yiɛ ɛyjime, nɛ̀ keyioy ə kiɛ kejime, nɛ̀ ɛykwaate ə yiɛ ɛyjime gese nɛ̀ kediak ə kiɛ kejime.

³¹Kenkumte nchile lu ge: Wɛ̀ lu se yɛ koŋe wel wɛ əb báksen se wɛ̀ kɛn ghɛɛ-ghɛɛ ka wɛ̀ koŋen ngeŋ ə yiɛ. Nchile báà gese se lu yɛ ɛy chian nchil sɛ sebaa shin.

³²Ndinte tesak yi me suuy se Jesus ge: Ndinte, wɛ̀ suuy ɛ titiy ge Feyine lu kɛn Báàba wen nyiŋ nɛ̀ Feyin felee wiy.

³³Ke lu sɛy ɛ titiy ka wɛ̀ suuyen ge: Wel lu se yɛ koŋe Feyin nɛ̀ ɛytem ə wen ɛyjime, nɛ̀ ɛykwaate ə wen ɛyjime gese nɛ̀ kediak ə wen kejime, gese lu se yɛ koŋe wel wɛ əb báksen se wen kɛn ghɛɛ-ghɛɛ ka əb koŋen ngeŋ ə wen. Nchil shine chia ɛyfô ɛyjim yɛ nyok ka ntaŋle se Feyine.

³⁴Jesus keele ge əb fise nɛ̀ ɛytofe, è suuy se wen ge: Wɛ̀ lu ɛ nchiɛ ɛ nchiɛ se fiisen ɛysak ə Feyin. Se ɛybame ten, wel jia gese mom ge yi bif ɛybif se Jesus.

³⁵Jesus nɛy loo dinte əbnəə se ghele ɛ ndaa-ɛykokse è bif ge: Ke ghan lɛɛy nɛ ndintese tesake yɛ suuy ge Vi wɛ Feyine nè Yiosen lu wan ə David?

³⁶Keyioy Kelanene nè lô nɛɛy David se wen ə ngeŋ suuy ge: Bay nè suuy se Báàba ə wom ge: Diom ɛ mɛ ɛybee əbkoy əbtaa Se chin ka mɛ nɛ̂y nyiŋse mbanen ə shiɛ é wɛ̀ tom ɛvəə ə ghiɛ ɛ ghene əbtuu.

³⁷David se wene ngeŋ nè toŋte Vi wɛ Feyine nè Yiosen ge Báàba, ke ghan lɛɛy ge əb yɛ lu wán ə David. Ngose wel yióté əbnəə wɛ Jesus nè suuyen, è se koŋe.

³⁸Jesus se ndinte əbnəə se ghele suuye ge: Ghɛn yɛ bààme ghɛ́ ɛydinte tesake. Ghene koŋe se yɛ kaale nɛ ɛ́ mak dale seghakene, koŋe ge ɛ́ yɛ chakte ghene nɛ̀ ɛyvəme əblik əbwɛy.

³⁹Ghene lóó ɛ́ yɛ koŋ se diom ɛ əblik əbtaa ɛ ngayse ɛyjem. Loo lu əblik ɛyyiɛ əbjen ghene ko yɛ koŋ se diom kɛn əblik əbtaa.

⁴⁰Ghene lóó ɛ́ lɛɛse əbkiy-nkfə, è fii əbfua ə ghen, fefse jeme tejem tedia. Feyine náà mak ngɛk yɛ ɛy taan è chia se ghene.

⁴¹Jesus nɛy diom ɛ əbghune kekaŋ ə Feyin, è se kiye ka ghele gwiyen, viin ɛyfoo ə ghen se kekaŋe Feyin. Ghɛ́ əmkaa se ɛydio se gwiye yine əbkaa yinen.

⁴²Wiy-nkfə əblee nɛ lu wele ketan gwiy kɛ́ wene, è chemse ɛshiɛ əbkaa ɛbaa se kekaŋ fo. Nɛ lu kɛn nini ɛyful.

⁴³Jesus jaŋte ghon-ɛyfɛl nə wen, è suuy se ghene ge: Mɛ suuye əbluuy se ghɛn ge: Wiy-nkfə wɛ wele ketan vin lu nɛ əb fó ɛyfô è chia wel əbjim wɛ əb viin ɛyfô ə wen ɛ kekaŋ nə Feyine fɛn lan.

⁴⁴Wel əbjim kè bɛse fefafa ɛ məme əbdione foo, dî nɛ əbvii vin ka chèmè luun wele ketan lɛ, kfəte kebam ə wen è fo, nɛ shi mɛy-mɛy ə wen dì.