Read Oku Mak 14 Bible Online

Mak 14 - Oku bible

Mak 14

¹Nɛy se lu nɛ se bɛɛse əbchii əbbua ka ɛ́ yɛ yiɛ Kechii Ɛyboyse, əbliy wɛ ɛ́ nè sɛɛ yiɛ keban kɛ tóó ghàà feshik è kaŋ, ghele mbiy se ndaa-ɛykokse Feyine nɛ̀ ghɛ ɛ́ nè dinten tesak me se kɛŋe jii yɛ ɛ́ nyiake è koo Jesus ɛ ten è yuy.

²Ghene loo kɛŋ dì, è suuy ge lòó jia yɛ lu ɛ kechii keghakene fɛ ghele lose əbchio.

³Nɛy se lu əbliy fo, nɛ Jesus lu ɛ ntɛke Betani ɛ ndaa nə Simon wɛ əb nè yimen yaf nɛ̀ kensaase. Ghene loo yiɛ, əbvii əblee lii è gwiy ki febel, nɛ keyiósén əbkaa əbtaa lu ɛ ten nɛ ɛ́ naay kɛn nɛ̀ nad. Əb chok nchile ten, è báà keyióséne ten ɛ Jesus ə ketuu.

⁴Ke yaf ghel ɛlee, ghene se vəke suuy ge: Əb nyable nɛ̀ keyiósén kine lɛ bek ghɛ?

⁵Kè lòó ɛ́ feene keyiósén kin se denalii ɛyviɛ ɛytal è gia əbkaa ten se ghɛ́ ketane. Ɛ́ me se yole wen naa ɛ jii ɛytaa.

⁶Jesus me suuy ge: Ghɛn vəse wen nyiaŋ, ghɛne foo ngɛk se wen bek ghɛ? Əb di nɛɛy nɛ lu naa kenəə kejuŋe se mɛ.

⁷Ghɛne ghele ketane lu əbliy əbjim nɛ lòó ghɛn giamten ghene naa ɛ leghɛ wɛ ghɛne kɛŋen, dî nɛ mɛ jia nɛ̂y yɛ lu ghɛsen əbliy əbjim.

⁸Əb nɛɛy kenəə kɛ kè lòó əb nɛɛy. Əb bàà keyiósén kin ɛ mɛ əbghun se siyse əbghun ə wom ka ɛ́ nɛ̂y gvəəme.

⁹Ghɛn yɛ ke se əbluuy ge, naa ghááy wɛ ɛ́ náà yɛ fekte sakghɛ əbjuŋ ɛ ketuu ntiɛ lu nɛ ɛ́ náà yɛ suuy kenəə kɛ əbvii vin nɛɛyen, se yɛ kuume wen.

¹⁰Judas Iskaliot wɛ wel əblee ɛ məme ghon-ɛyfɛl nə Jesus ghɛ njio-sebaa ɛyvəm me ndu se ghele mbiye se ghɛ́ ntaŋlee ge ghene ghene siyse jii yɛ yi nɛ̂y din Jesus é ɛ́ koo.

¹¹Ghene yio kii nɛ̂ kine, è se saŋlee, è me kak ge ɛ́ nɛ̂y fo əbkaa se wen. Judas me se kɛŋe jii yɛ əb nɛ̂y din Jesus, é ɛ́ koo.

¹²Nɛy loo lu ɛ kechii kɛ́ mbiye əbliy ɛyyiɛ keban kɛ tóó ghàà feshik è kaŋ, nɛ ko lu kechii kɛ ɛ́ nè sɛ́ɛ̀ sɛ́ɛ̀ ntaŋle yɛ wan-njiɛ yɛ yíɛ́ Kechii Ɛyboyse so, ghon-ɛyfɛle nə Jesuse bif se wen ge: Wɛ̀ kɛŋe ge ghɛs ndu è fɛl əbfua-əbyíɛ́ne wɛ wɛ̀ nɛ̂y yiɛ Kechii Ɛyboyse so ghááy?

¹³Əb me tum ghon-ɛyfɛl nə wen ɛbaa suuye se ghene ge: Ghɛn lii è ndu ɛ məm ɛ ntɛk. Ghɛne loo lii, é ghɛne ghe wel konen nɛ əb bɛɛy ntone moo, é ghɛn me yɛ nduu ɛ wen ɛybam.

¹⁴Əb ndu è lii ɛ ndaa, ghɛn suuy se ba ə ndaa fo ge: Ndinte bife ge: Ɛybee ndaa yɛ ghene ghon-ɛyfɛl nə yi nɛ̂y yiɛ əbfua-əbyíɛ́ne Kechii Ɛyboyse ɛ ten sɛ yaay-a?

¹⁵É əb me din ɛybee ndaa yɛ ɛyyio ɛyghuy ɛyghuy nɛ ɛ́ loote siyse, nɛ kefaa kejime shi kebaaten, é ghɛn me fɛl əbfua-əbyíɛ́ne nə ghɛsen fo.

¹⁶Ghon-ɛyfɛl ghii lòò, è lii ndu ɛ ntɛk fo, è yɛn əbnəə əbjim nɛ əb lu kɛn ka Jesus kè suuyen, è fɛl əbfua-əbyíɛ́ne ɛyyiɛ Kechii Ɛyboyse fo.

¹⁷Nɛy loo lu ɛ likfəəy, Jesus ghene ghon-ɛyfɛl ghɛ njio-sebaa ɛyvəm gwiy.

¹⁸Ghene ghene loo yiɛ, əb suuy ge: Mɛ suuy əbluuy se ghɛn ge, wel əblee ɛ ghɛne məme nɛy feene mɛ, wel nɛ ghɛse wen yiɛ ɛ leenen.

¹⁹Kenəə tene me kɛɛte se foo ngɛk se ghene se ŋaŋ, ghene me se bife femok femok ge: Lu mɛ-a? Lu mɛ-a?

²⁰Jesus fise ge: Lu wel əblee se ghɛn ghɛ njio-sebaa nɛ lu wel wɛ ghɛse wene chəken keban se mbas əbsiy əbmok.

²¹Wanwel shi se kuo kɛn ka ɛ́ nyaken ɛ ŋwaale-Feyin, dî nɛ ngɛk ɛytaa lu se wel vi wɛ əb feenen mɛ. Nɛ nè lòó ke yɛ jof ge, ɛ́ jia bii wel nɛ̂ vin naa se nkan.

²²Ghene loo yiɛ dì, Jesus liɛ ntuke keban, è bɛ̀ɛ̀lè Feyin, è bɛkte, è fo se ghon-ɛyfɛl nə wene, è suuy ge: Ghɛn ko, kine lu əbghun ə wom.

²³È me liɛ əbbom əmnduk, è bɛ̀ɛ̀lè Feyin, è fo se ghene, ghene ghel ɛjim nəə.

²⁴Əb suuy se ghene ge: Lu əmnduŋ mə mom mɛ kum kelek [kefɛɛ]; əm lɛŋ bek ghel se ɛydio.

²⁵Mɛ suuy əbluuy se ghɛn ge: Mɛ jia bo yî kase nəə əmnduk min se chin se ka mɛ yî yɛ nəə kefɛɛ ɛ məme ɛysak nə Feyine.

²⁶Ghene me yem njàŋ ɛykokse se Feyine, è me fəy è se koke ɛ kfən koo Olif.

²⁷Jesus me suuy se ghene ge: Ghɛn ghel ɛjime nɛ̂y nyiŋ è vəse mɛ ka ŋwaale-Feyin suuyen ge: “Feyine nɛ̂y yuy nchiy-bvəyse é bvəy sejime takle.”

²⁸Dî nɛ Feyine nɛ̂y lose mɛ se ɛykuo é mɛ lòò è ndu se Galilee ɛ ghɛne mbiy.

²⁹Bita suuy se wen ge: Ghele chèmè nyiŋ wɛ̀ naa ɛjim, é mɛ jia nyiŋ.

³⁰Jesus me suuy se Bita ge: Kɛ́ əbluuye, kɛn nɛ ntəke lan, lumngvəə nɛ̂y yɛ ghan ge əb toŋ kaŋ ɛbaa nɛ wɛ̀ maamen mɛ kaŋ ɛtal.

³¹Bita gese suuy ketaan ketaan ge: Chèmè lu nɛ mɛ nɛ̂y kuo ghɛsoo, é mɛ jia maa wɛ̀. Ghel ɛjime chinten è suuy kɛn dì.

³²Jesus ghene ghon-ɛyfɛl nə wene me ndu ɛ kelik kelee nɛ ɛ́ toŋte ge Getsemane, əb suuy se ghene ge: Ghɛn diom fɛn, é mɛ ndu è jem.

³³Əb me liɛ Bita, nɛ̀ Jɛms gese nɛ̀ Joon ghene ghene ndute. Ketuu toŋ wen, ɛytem ə wene se chiŋe naa se ŋaŋ.

³⁴Əb me suuy se ghene ge: Kenəə kelee foo ngɛk ɛ mɛ ɛytem nɛ lòó ke yuy mɛ. Ghɛn gok fɛn è yɛ chiy.

³⁵Əb ndute ɛ mbiy se ɛylaay, è nyiim ɛ ntiɛ è se jeme ge: Loo lu nɛ Feyine bukse ngɛk shin é se chia, Əb bukse.

³⁶Əb gese jem ge: Bàá, Ba ə wom, lòó wɛ̀ nɛɛy əbjim. Nɛɛy ge, ghàà mɛ nəə əbbome ngɛkse fɛn dî nɛ ghàà nɛɛy ɛ mɛ ɛykoŋ, nɛɛy nɛ lu ɛ wɛ̀ ɛykoŋ.

³⁷Jesus jem è loo fiile, è yɛn nɛ ghon-ɛyfɛl nə wen ghɛ ɛtal ghii buune, è bif se Bita ge: Simon, ghɛne buune-a? Kè lòó ghɛn jia yɛ kek kɛn naa se chuy ɛymok-a?

³⁸Ghɛn yɛ chiy, gese jeme ka ghɛne jia lii se məme ɛymomse. Ɛyteme koŋe se yɛ nɛɛy ɛyfɛl ɛyjuŋe dî nɛ əbghune kwene.

³⁹Əb kase ndu è se jeme kɛn ɛ jii yɛ əb kè jemenmen ɛ ten.

⁴⁰Əb mɛyse ɛyjem, è kase fiile ghaa ghon-ɛyfɛl nə wen ghii nè luun, è gese yɛn nɛ ghene ko bo buunee, bek ka mbuunese nè diilen ɛ ghene ɛshiɛ naa se ŋaŋ. Ghene nè báà se ki kenəə kɛ bo suuy se wen ghɛy.

⁴¹Əb kase gwiy ge kaŋ ɛtal è suuy se ghene ge: Ghɛn ko bo tɛse buune-a? Ke kwɛnmen. Əbliye kwɛnmen wɛ ɛ́ din Wanwel ge ghele mbeese koo.

⁴²Ghɛn loole é ghɛsen yɛ ndu, wel wɛ əb feenen mɛ se gwiye.

⁴³Ka Jesus suŋnen dì ɛ leghɛ, Judas wɛ nè luun wel əblee ɛ məme ghon-ɛyfɛl ghɛ njio-sebaa ɛyvəm me mii fo. Əb nè lu ghene kenone wele, nɛ tum ghele mbiye se ndaa-ɛykokse Feyin, nɛ̀ ghɛ́ ɛydinte tesake gese nɛ̀ chɛɛse. Ghene nè ki fiakse gese nɛ̀ əbbule.

⁴⁴Nè lu dì nɛ Judase suuymen se kenone wel ki ge: Wel wɛ mɛ nɛ̂y baamé è chakte lu wen wɛ ghɛne kɛŋen. Ghɛn koo wen è yɛ ndu so toknen fɛ əb nyiŋ.

⁴⁵Judas mii fo dì ɛ leghɛ, è chia è teem ɛ Jesus ɛyshiɛ, è chakte wen ge: Ndinte! È me baamé wen.

⁴⁶Ghel ghii me koo Jesus è ghal wen ketaan.

⁴⁷Wel əblee wɛ əb nè tiyen fo sasen è guf fiak ə wen se əbkuu è gwɛl kekos se ketuu se ghɛ́ ntaŋlee so, è kɛf ketuule.

⁴⁸Jesus me bif se ghene ge: Ghɛn bɛ̀yten fiakse gese nɛ̀ əbbule ka ɛ́ jume nɛ lu əbchoŋ se gwiy se koo mɛ-a?

⁴⁹Ghɛsen nè lu kechii nɛ̀ kechii nɛ mɛ dinte əbnəə se ghele ɛ ndaa-ɛykokse nɛ ghɛn koo wiy mɛ. Dî nɛ kenəə kin gan se lunse kenəə kɛ ke luun ɛ ŋwaale-Feyin.

⁵⁰Ghon-ɛyfɛl nə wene ɛjim me maay wen è nyiŋke.

⁵¹Wándɛ nsum əblee se nduu ɛ Jesus ɛybam nɛ əb lim əbkoye ndəyse, ɛ́ koo wen,

⁵²dî əb soole è vəse ndəyse wen shi, è nyiŋ kenchokele.

⁵³Ɛ́ me liɛ Jesus è ndu nɛ̀ wen se ndaa nə ketuu se ghɛ ntaŋlee ghaa ghele mbiy se ndaa-ɛykokse Feyin, nɛ̀ chɛɛse, gese nɛ̀ ghɛ́ ɛydinte tesake nè konen.

⁵⁴Ɛ́ loo ndu, Bita se nyiake nduu ɛ ghene ɛybam, dî baksen wiy se ghene, è ndu naa è chin ɛ ntetembɛy nə ketuu se ghɛ ntaŋlee, è diom ghene ghe ghele nchiye è se yósê əbvəs.

⁵⁵Ghele mbiy se ghɛ́ ntaŋlee, ghene ghel ɛjim ghɛ ɛ́ nè luun ɛ ɛydiom fo, me se kɛŋe kenəə kɛ toy ɛ Jesus əbghun ɛ́ yúy wen, è chèmè jia yɛn ghɛy.

⁵⁶Ghel se ɛydio nè lô teem è se toye əbnəə ɛ Jesus əbghun, dî nɛ kelee konen wiy nɛ̀ kelee.

⁵⁷Ghel ɛlee teem è yia əbbuam kum Jesus ge:

⁵⁸Ghɛs nè lô yio nɛ əb suuye ge: Mɛ nɛ̂y sakte ndaa-ɛykokse yɛ baklen ghel, é əbchii lun əbtal é mɛ kase baklé ɛylee nɛ báà bakle ghel.

⁵⁹Ghene suuy dì kesuŋnen ə ghene ko gese chèmè jia konen.

⁶⁰Ketuu se ghɛ́ ntaŋlee me loole, è teem ɛ ghen ɛshiɛ, è bif se Jesus ge: Wɛ̀ lɛ ki kenəə se suuy ɛ kenəə kɛ ghel ghine suuyen kum wɛ̀-a?

⁶¹Jesus gok ɛ chichi, è jia suuy kenəə. Ketuu se ghɛ́ ntaŋlee ki gese bif se Jesus ge: Lu wɛ̀ Vi wɛ Feyine nè Yiosen wɛ wán ə Feyin Fɛ ɛ́ koksen-a?

⁶²Əb fise ge: Lu mɛ, nɛ ghɛn ghel ɛjim yî yɛn Wanwel nɛ əb diom ɛ ɛybee əbkoy əbtaa nə Feyine, Wɛ Ba-Əbtaawe-Əbjim; è gese yɛn nɛ əb gwiye ɛ məme mbàke sɛ ɛyyio.

⁶³Ketuu se ghɛ́ ntaŋlee yio dî è me sas ndəyse wen nɛ̀ ngeŋ wen, è suuy ge: Lòó ɛ́ jia bo yɛ kɛŋe kenəə kɛŋen kum wen.

⁶⁴Ghɛn lu nɛ ɛ́ yio sɛy ka əb tɛyen Feyin. Ghɛne kwaate ge ɛ́ nɛɛy lɛɛy nɛ̀ wen? Ghel ɛjime me suuy ge əb lu nɛ əb fɛy nsak nɛ ɛ́ lu se yuye wen.

⁶⁵Ghel ɛlee kɛɛte se yɛ tio teliɛ ɛ wen əbghun, ɛ́ kul ɛshiɛ ə wen, è se kfənle wen suuye ge, əb chio ge sɛ kfənle ndɛ wen-a? Ghele nchiye me liɛ wen è se tɛle nduu so.

⁶⁶Se lu nɛ Bita bo bɛɛy ɛ ntetembɛy fɛy ka əb diom, wan əbvii əblee se məme ghon ɛkiye ghɛ ɛ́ nè fɛ́len se ketuu se ghɛ́ ntaŋlee kokte è gwiy,

⁶⁷è yɛn Bita nɛ əb yose əbvəs, è soo ɛyshiɛ ɛ wen əbghun, è suuy ge: Wɛɛ wɛ̀ sɛy nè lu ghɛne ghe wele wɛ̂ Nazalet vi wɛ Jesus.

⁶⁸Əb se maa, suuye ge: Mɛ báà se ke kenəə kɛ wɛ̀ suuyen. Əb suuy dì, è lòò se fo, è chia è teem ɛ əbchio kebuk. [Ɛ leghɛ lumngvəə me toŋ].

⁶⁹Wándɛ əbvii vi gese yɛn wen fo, è me gese se suuye se ghel ghɛ ɛ́ nè tiyen fo ge: Vin lu wele ngoo nə Jesus əblee.

⁷⁰Bita gese maa. Se moote kɛn lɛ, ghel ghɛ ɛ́ nè tiyen fo ghi me suuy se Bita ge: Wɛ̀ lu kɛn naa wele ngoo nə Jesus əblee bek ge wɛ̀ lu wele Galilee.

⁷¹Bita me lek ge: Lòò yɛ lu nɛ mɛ yia əbbuam, Feyine mak ngɛk se mɛ ketuu. Mɛ báà se ke wel wɛ ghɛne suŋnen kum wen.

⁷²Kɛn se əbliy lumngvəə gese toŋ ge kaŋ ɛbaa, Bita me kuume ka Jesus nè suuyen se wen ge: Lumngvəə nɛ̂y yɛ ghan ge əb toŋ kaŋ ɛbaa, nɛ wɛ̀ maamen mɛ kaŋ ɛtal. Əb kuumen dì è me kɛ̀sèn nɛ̀ ɛydiye.