Read Oku Mak 15 Bible Online

Mak 15 - Oku bible

Mak 15

¹Əbtəke bvəs è yio, ghele mbiye se ghɛ́ ntaŋle, nɛ̀ chɛɛse, nɛ̀ ghɛ́ ɛydinte tesake gese nɛ̀ ghel ɛysak ɛlee konen è chio ntaŋ è kul Jesus, è liɛ è ndu so se Bailɛt.

²Bailɛt bif se wen ge: Lu wɛ̀ əbfon ə ghele Juus-a? Əb fise ge: Lu ka wɛ̀ suuyen.

³Ghele mbiye se ghɛ́ ntaŋlee me se toye əbnəə ɛ Jesus əbghun se ɛydio.

⁴Bailɛt gese bif se wen ge: Wɛ̀ báà se ki kenəə se suuy-a? Yio yi əbnəə wɛ ɛ́ toyen wɛ̀ so.

⁵Jesus cheme jia suuy kenəə ghɛy, kii nɛ̂ kine nɛɛy Bailɛt se lu nɛ̀ əbchíò əbyúméné.

⁶Ɛ́ nè sɛɛ lóò yiɛ Kechii Ɛyboyse, Bailɛt yɛ lu se fəyse wele nchak wɛ ghele bifen ge əb fəyse.

⁷Nè lu əbliy fo nɛ wel əblee lu ɛ nchak nɛ ɛ́ toŋte ge Balabbas nɛ̀ ngoo ə wen nɛ lu ghene ghɛ ɛ́ nè losen əbchio ge ɛ́ bak ɛysak, è gese yuyte ghel.

⁸Ngos wel nɛy kaame, è suuy ge Bailɛt nɛɛy ka əb nè sɛɛ nɛɛye,

⁹əb bif se ghene ge: Ghɛne kɛŋe ge mɛ fəyse əbfone ghele Juus se ghɛn-a?

¹⁰Bailɛt nè bife di, bek ka əb nè lô yɛn ge ghele mbiy se ghɛ́ ntaŋlee nè gwiy nɛ̀ Jesus se yi nɛ ɛ́ ghɛk kɛn wen ghɛken.

¹¹Dî ghɛ́ ntaŋlee bɛyse ghel ge ɛ́ suuy é Bailɛt fəyse nɛ lu Balabbas se ghene.

¹²Bailɛt gese bif se ghene ge: Ghɛne kɛŋe ge mɛ nɛɛy lɛɛy nɛ̀ wel wɛ ghɛne toŋten ge əbfon ə ghele Juus?

¹³Ghene waame ge: Bante wen se kentam!

¹⁴Bailɛt bif ge: Jas ə wen lu ghɛ? Ghene gese waame ketaan ketaan ge: Bante wen se kentam!

¹⁵Bailɛt se kɛŋe ge ghele yɛ saŋle, è me fəyse Balabbas se ndaa nchak se ghene, è suuy ɛ́ tɛl Jesus ɛ leghɛ, əb me fo ge ɛ ndu yi è bante se kentam.

¹⁶Ghel ɛyghoŋ ghi me liɛ Jesus, è lii nɛ̀ wen se məme ntok nə Bailɛt, è tooy kembɛke ghel ɛyghoŋ.

¹⁷È lafse wen nɛ̀ ndəy se baŋene, è lim kenjoonjoŋ ka ketaandoŋ è sooy se wen ə ketuu.

¹⁸Ghene me kɛɛte se yɛ bune wen ge: Ghɛse bune wɛ̀ əbfon ə ghele Juus.

¹⁹Ɛ́ se tɛle ketuu ə wen nɛ̀ mbàŋ, tio teliɛ ɛ wen əbghun, təme ɛləy ɛ wen ɛyshiɛ buu wen ge ɛ́ bune.

²⁰Ghene buu Jesus è mɛyse, è chok ndəyse tefon shi se wen əbghun è kase mak sɛ́ wene, è liɛ wen è se nduu so se bante se kentam.

²¹Ghene loo ndu, è konen ghene ghe wele wɛ́ Silen əblee nɛ ɛ́ toŋte ge Simon nɛ əb kfəəye əbkwak. Simon vin nè lu ba Alesanda ghene Lufus. Ɛ́ me kan Simon bɛɛy kentam ə Jesus.

²²Ghene ndu nɛ̀ Jesus se kelik kelee nɛ ɛ́ toŋte ge Golgota, (nɛ ɛyghel yɛ Golgota yin lu ge kelike kevəfe ketuu);

²³è fo ɛynkii əmnduk əmlee se Jesus ge əb nəə, nɛ ɛ́ fis nɛ̀ kegii kelee nɛ ɛ́ toŋte ge Mee dî əb jia nəə.

²⁴Ɛ́ bante wen se kentam, è liɛ ndəyse ə wen, è mak kaŋ se yɛn ge ɛ́ sɛ giate lɛɛy-a?

²⁵Ɛ́ nè bante wen se kentam ɛ chuy buumok ɛ bvəse bvəse,

²⁶è me nyak kenəə è base se wene ketuu kentam ge njio ə wen. Kenəə nɛ̂ kin nè lu ge: Vin lu əbfon ə ghele Juus.

²⁷Ɛ́ gese bante ɛchoŋ ɛbaa se əmntam ɛ Jesus ɛyghaŋ, əblee ɛybee əbkoy əbtaa nɛ̀ əblee se ɛybee əbkoy əbkiye.

²⁸[Ɛ́ bante dì, kenəə kɛ ɛ́ nè nyaken ɛ ŋwaale-Feyin ge: “Ɛ́ nè taŋ wen ghene ghele mbeese” me kwɛn].

²⁹Ghel ghɛ ɛ́ nè chian jii fo me se mɛkte əbtuu ə ghen tɛyle wen suuye ge: Aa! Wɛ̀ ne bee ge wɛ̀ sakte ndaa-ɛykokse, è kase baklé se əbchii əbtal,

³⁰Giamten yi ngeŋ ə yiɛ è səəke se kentam.

³¹Ghele mbiy se ghɛ́ ntaŋlee nɛ̀ ndintese tesake ko se buu sɛy wen suuye ge: Əb nè giamten ghel ɛchine dî nɛ lòó əb jia giamten ngeŋ ə wen.

³²Vi wɛ Feyine nè Yiosen lu əbfon ə ghele Islael, səəke yi se kentam ɛ leenen é ghɛs yɛn è fo ɛytem se wɛ̀. Ghel ghɛ ɛbaa ghɛ ɛ́ nè banten ghene ghe Jesus ko se tɛyle wen sɛy.

³³Nɛy se lu ka chuy tiysen, mbi sasen è fin naa ɛyjim, è fin dî se chuy setal.

³⁴Se lu ɛ chuy setal Jesus toŋ ɛ giɛ ɛytaa ge: Eloi, Eloi, Lama Sabatani, nɛ lu ge: Feyin ə Fome, Feyin ə Fome, Wɛ̀ maay mɛ lɛ bek ghɛ?

³⁵Ghel ɛlee ɛ məme ghel ghɛ ɛ́ nè tiyen fo yio, è me se suuye ge: Yɛn-a, əb se jaŋe Elija.

³⁶Wel əblee ɛ ghene məm nyiŋ è ndu, è liɛ kuncha, è chəə se kengwɛy əmnduk, è sooy se ketuu mbàŋ, è lose se Jesus ge əb nəə, è se suuye se ghele ge: Ghɛsen chiyte ge Elija sɛ gwiy è səkse wen se kentam-a?

³⁷Jesus nɛ̂y toŋ ɛ giɛ ɛytaa, è me mɛy.

³⁸Ndəy sɛ ɛ́ nè keŋen ɛybuu ɛylanene so ɛ ndaa-ɛykokse me basen əbwaŋ əbbua se lòò ɛ ɛyyio se səəke se chin ɛ ntiɛ.

³⁹Ketuu ghel ɛyghoŋ kɛ ke nè tiyen ɛ Jesus əbghune kentam yɛn jii yɛ əb kuon ɛ ten è suuy ge: Wel vin nè lu kɛn naa wán ə Feyin se əbluuy!

⁴⁰Nè lu dî nɛ əbkiy ɛlee teem ɛ əbtəm è se kiye. Əbkiy ɛlee ɛ məme əbkiy nɛ̂ ghan nè lu Mɛɛle Magdalene, nɛ̀ Salome gese nɛ̀ Mɛɛle wɛ no ə Joses ghene Jɛms əbtɛlɛ.

⁴¹Əbkiy nɛ̂ ghin nè jɛle ɛ Jesus ɛybam ɛ əbliy wɛ əb nè luun ɛ Galilee giamten wen. Əbkiy ɛlee ghɛ ghene nè koken ɛ Jesus ɛ ɛybam ɛ Jolesalem nè lu sɛy fo.

⁴²Əbtəke nɛy loo jiɛ, Josɛf wɛ̂ Alimatea gwiy. Əb nè lu wel əblee ɛ məm nə chɛɛse, nɛ ghele ngvəmle wen, nɛ əb gese chiyte ɛysak ə Feyin. Kechii nɛ̂ kin nè lu kechii ɛybaate, nɛ lu kechii kɛ ke nè fóon se kechii ɛybame. Josɛf me kul ɛytem è lii ɛ ntok, è suuy ge Bailɛt fó ɛygvəne Jesus se yi.

⁴³

⁴⁴Bailɛt se lu nɛ̀ əbchíò əbyúméné se yio ge Jesus kè kuomen, è me jaŋ ketuu se ghɛ́ ɛyghoŋe è bif se wen ge sɛ lu əbluuy ge Jesus kè kuomen-a?

⁴⁵Bailɛt yio dì, è me suuy se Josɛf ge əb ndu è səkse ɛygvəne Jesus.

⁴⁶Josɛf me yun əbkoye ndəyse, è səkse ɛygvəne Jesus, è lim se ten è me vii se ɛysɛy yɛ ɛ́ nè chufen ɛ ɛyghok, è me biŋse ɛytiy è chite əbchio ɛysɛy so.

⁴⁷Nè lu dî nɛ Mɛɛle Magdalene ghene Mɛɛle wɛ no ə Joses lu fo kiye ghaa ɛ́ gvəəmen Jesus.