Read Oku Mak 16 Bible Online

Mak 16 - Oku bible

Mak 16

¹Kechii ɛybame chia, Mɛɛle Magdalene, gese nɛ̀ Mɛɛle wɛ no ə Jɛms nɛ̀ Salome yun əbyióséne keləm kejuŋe se ndu se yiose ɛygvəne Jesus so.

²Se lu ɛ bvəse bvəse kɛn ka chuye tóòn ɛ kechii kɛ́ mbiye se əbwɛy, ghene ndu əbchio ɛysɛy.

³Ghene loo ndu, è se kante ge sɛ nɛ̂y se biŋse ndɛ ɛytiy se chakse se əbchio ɛysɛy se ghɛn-a?

⁴Ghene ndu, è chin fo, è loo kiy, è yɛn nɛ ɛ́ biŋsemen lum ɛytiy wɛ̂ ten è chakse se əbchio ɛysɛy fo.

⁵Ghene me lii se ten, è yɛn wándɛ nsum nɛ əb diom ɛ ɛybee əbkoy əbtaa nɛ əb mak ndəy sefəfene, əbghune bɛɛme ghene.

⁶Wándɛ nsum vi suuy se ghene ge: Ghàà ghɛn yɛ fan. Mɛ ke ge ghɛne kɛŋe Jesus wɛ̂ Nazalet wɛ ɛ́ nè banten se kentam. Əb báà se lu fɛn, əb kè loolemen se ɛykuo. Ghɛn yɛn kelik kɛ ɛ́ nè nyiŋsen wen ɛ ten.

⁷Ghɛn ndu è suuy se ghon-ɛyfɛl nə wene gese nɛ̀ Bita ge: Əb se nduu ɛ Galilee ɛ ghɛne mbiy ghaa ghɛne nɛ̂y yɛn wen, kɛn ka əb nè suuyen se ghɛn.

⁸Əbkiy ghi fəy se ɛysɛy fɛy, è se nyiŋe, chiŋe gese lu nɛ̀ əbchíò əbyúméné, è jia suuy kenəə se wel bek ka ghene nè fanen. [

⁹Əbkiy ghi me ndu se Bita ghene ghel ɛyjɛl nə wene, è fekte əbnəə əbjim əbtəm əbtəm wɛ wándɛ nsum vi kè suuyen se ghene.

¹⁰Se ɛybame ten Jesus se wene ngeŋ tum ghon-ɛyfɛl nə wen ge ɛ́ ndu əblik əbjim ɛ mbi nɛ̀ sakghɛ ə Feyin wɛ əb jia yî mɛy, sakghɛ wɛ əb fóon ɛyboy yɛ ɛy jia yî mɛy.] [JII ƐYDIA YƐ ŊWAALE MAKE LƏYSEN Jesus din ngeŋ ə wen se Mɛɛle Magdalene (Mat 28.9-10; Jn 20.11-18) Se lu ɛ bvəse bvəse ɛ kechii kɛ́ mbiye se əbwɛy, Jesus loole se ɛykuo, è kɛɛte din ngeŋ ə wen se Mɛɛle Magdalene wɛ əb nè jumen tefim saamba ɛ wen əbghun. Mɛɛle ndu è fekte se ghon-ɛyfɛl nə Jesus bene fɛ ghene nè luun, soo ketuu, diye.

¹¹Ghene yio ge Jesus shi əbtaa, gese nɛ̀ ge əb kè lô yɛn wen, dî è jia beeme kenəə ten.

¹²Jesus nɛy gese din ngeŋ ə wen ɛ jii ɛylee ndun se ghon-ɛyfɛl nə wen ɛlee ɛbaa nɛ ghene lii nduu əbkwak.

¹³Ghene me fiile è ndu è fekte se kembɛke ghele ngoo, dî ghene jia beeme.

¹⁴Jesus nɛy me din ngeŋ ə wen se ghon-ɛyfɛl nə wen ghɛ njio ɛymok ɛyvəm, nɛ ghene yiɛ, è yol ghene bek, ka ghene nè báà fo ɛytem se wen, gese taa ketuu, ka ghene nè báà beeme ge ghel ghɛ ɛ́ nè yɛnen wen suuye əbluuy.

¹⁵Əb me suuy se ghene ge: Ghɛn jɛl mbi ɛyjim è fekte sakghɛ əbjuŋ se wel əbjim.

¹⁶Naa ndɛ wɛ əb yion, è fo ɛytem, è fii moo náà boy, dî nɛ wel yio è jia fo ɛytem, é əb náà lɛy.

¹⁷Ghel ghɛ ɛ́ foon ɛytem nɛ̂y yɛ ki əbchəyte vin ge; ghene nɛ̂y yɛ jume tefim ɛ əbtaawe ɛyghel nə mɛ, suŋnen telam tefɛɛ

¹⁸Wele ghal yio, kene əb nəə nlik, é kenəə jia kooy se wen. Ghene nɛ̂y yɛ lɛm ɛghoo ɛ ghel ɛyafkene əbtuu, nɛ ghene bonene.

¹⁹Báàba Jesus suŋnen ghene ghon-ɛyfɛl nə wen è mɛyse, Feyine me liɛ wen ɛ ɛyyio, əb diom ɛ wen əbkoy əbtaa.

²⁰Ghon-ɛyfɛl nə wene me se jɛle əblik əbjim fekte sakghɛ əbjuŋ. Báàba se giamten ghene se din ge kenəə kɛ ghene suuyen lu əbluuy, nɛ ghene gese nɛɛye əbnəə əbchio əbyúméné.]