Read Oku Mak 3 Bible Online

Mak 3 - Oku bible

Mak 3

¹Nɛy se lu əbliy əblee Jesus ndu ɛ ngay ɛyjem, nɛ wel əblee lu fo nɛ keghoo ə wene kuomen.

²Ghel ɛlee ghɛ ɛ́ nè kɛŋen ge ɛ́ kooy kenəə kɛ ɛ́ toy wen so me tam ɛshiɛ è se kiye wen ge əb sɛ chuk wel vi ɛ kechii ɛybam-a?

³Jesus me suuy se wel wɛ keghoo ə wene nè luun kekuon vi ge: Gwiye fɛn.

⁴Jesus me bif se ghene ge: Kɛ ɛysake kɛŋen ge ɛ́ nɛɛy ɛ kechii ɛybam lu njuŋ moo lu mbee-a, se boyse moo se yuy-a? Dî ghene gok ɛ chichi.

⁵Əb se kiye kale nɛ̀ ghene nɛ ɛytem ə wene like nɛ əb yafse se ghene bek ka tetem ə ghene chiilen. Əb me suuy se wel vi ge: Nate keghoo ə kiɛ. Əb nate, ke me bonen.

⁶Ghele kenone Falisee fəy kɛn se əbliy, è ndu è baksen ghel ɛyfɛl nə Helod, ghene ghene se chio ntaŋ kum jii yɛ ɛ́ yuy Jesus ɛ ten.

⁷Jesus ghene ghon-ɛyfɛl nə wene me lòò è ndu ɛ kechem keghuye kɛ Galilee, feliɛ ghele Galilee gese nɛ̀ ghɛ́ Judea lòò ɛ wen ɛybam.

⁸Ɛlee nè lòò ɛ Jolesalem, nɛ̀ Idumea, ɛlee lòò ɛ jine jio Joldan, ɛlee lòò ɛ keleŋe Taya ghene Sidon. Feliɛ wel fin nè yio əbnəə wɛ əb nè nɛɛyen è me se gwiye se yɛne wen.

⁹Əb me suuy se ghon-ɛyfɛl nə wene ge ghene gwiy nɛ̀ kenəke se yi bek ngose wel yɛ ɛy luun, buu dì, é ɛy yiike yi.

¹⁰Ɛ́ nè faanten dì bek ge, əb nè chukmen ghel se ɛydio, ghel ɛyafkene ɛjime me se ŋiɛme chia nduu se kume wen.

¹¹Ghel ghɛ ɛyfime nè luun ɛ ghene əmlɛɛ se yɛne wen naa ɛ leghɛ, fɛye ɛ wen ɛyshiɛ toŋe ge: Wɛ̀ lu wán ə Feyin!

¹²Jesus chiise ketaan se ghene ge ghene yɛ ke se nɛɛy nɛ wel yio kenəə kɛ kum yi.

¹³Jesus me lòò è kok ɛ kfən è jaŋte ghel ghɛ əb nè kɛŋen, ghene gwiy,

¹⁴əb me chokte ghel njio-sebaa ɛyvəm è chio ɛyghel se ghene əbghun ge ghɛ́ ntume, ka ghene yɛ lu ghene yi, nɛ yi tume nɛ ghene fekte kenəə ə Feyin,

¹⁵gese kiile əbtaawe se yɛ jume tefim so.

¹⁶Ghele ntum ghɛ njio-sebaa nɛ̂ ghi ghɛ əb nè chokten lu ghine ge: Simon wɛ əb nè toŋten ge Bita

¹⁷nɛ̀ Jɛms ghene wan-no ə wene Joon ghɛ ghon ə Zebedee ghɛ əb nɛ̀ chion ɛyghel se əbghun gho ge Boanages, [nɛ ɛyghel yine lu ge ghɛ ɛ́ taan ka ɛyghuu ɛybualene,]

¹⁸nɛ̀ Andole, nɛ̀ Filib, nɛ̀ Baltolomew, nɛ̀ Matio, nɛ̀ Ntomas, nɛ̀ Jɛms wɛ wán ə Alfaeus, nɛ̀ Taddaeus, nɛ̀ Simon wɛ əb nè luŋen nɛ̀ ketume,

¹⁹gese nɛ̀ Judas Iskaliot wɛ əb nè feenen Jesus.

²⁰Jesus nɛy kfəəy se ndaa, feliɛ wele gese kaame fo ɛ jii yɛ ghene ghon-ɛyfɛl nə wene nè báà se ki jii se yiɛ.

²¹Ghel ə wene yio, è me ndu se liɛ wen bek ge ɛ́ nè se suuye ge əb wiy ɛ wen ɛytof.

²²Ghɛ́ ɛydinte tesak ɛlee ghɛ ɛ́ nè lòòn ɛ Jolesalem è chio me se suuye kɛ́ ghene ge: Beelzebul gese nɛ̀ əbfon ɛyfim bɛɛmen ɛ wen əbghun, əb me se jume tefim se ghel əbghun nɛ̀ əbtaawe nɛ foo ghene.

²³Jesus me mbaate ghene è suŋnen se ghene ɛ nganse ge: Lɛ lòó Satan jum Satan-a?

²⁴Ghele lòò ɛ ketum è giabsen ɛ əbnkakten ɛ əbnkakten, è yɛ noo ngeŋse ghen, é ke jia teem.

²⁵Ɛyshaa ndaa giabsen ɛ əbnkakten ɛ əbnkakten è yɛ noo ngeŋse ghen, é ɛy jia teem.

²⁶Nɛ Satan lòò, è yɛ noo ngeŋ ə wen fene əb giabsenmen nɛ əb jia bo teem, nɛ ɛyshas ə wene banmen.

²⁷Di lòó wel jia kol ndaa ə wel əbtaa, è liɛ əbfua ə wen buu ge əb chia mbiy è kul wen se geese liɛ.

²⁸Mɛ suuy əbluuy se ghɛn ge: Feyine náà lɛyse mbeese ghel sejim, nɛ̀ ndiy sɛ ghene tɛylen wen so.

²⁹Dî nɛ əb jia yî lɛyse sɛ wel wɛ əb tɛylen Keyioy Kelanene bek ge əb lu nɛ əb nɛɛy mbee yɛ ɛy jia yî mɛy.

³⁰Əb nè suuy kii nɛ̂ kine bek ge ɛ́ nè suuye ge əb lu wel ɛyfim.

³¹No ə Jesus ghene ghone-no ə Jesus me gwiy, è teem ɛ bɛy, è tum wel ge əb toŋte wen.

³²Nè lu dì nɛ ngose wel diom ɛ wen ɛybee, ɛ́ me suuy se wen ge: Yɛn-a, no ə viɛ ghene ghone-no ə viɛ lu ɛ bɛy kɛŋe se yɛne wɛ̀.

³³Jesus bif ge: No ə wom ghene ghone-no ə wome lu ghe ndɛ?

³⁴Əb bif dì, è kiy, è kal nɛ̀ ghel ghɛ ɛ́ nè luun ɛ wen ɛybee, è me suuy ge: Lɛɛ no ə wom ghene ghone-no ə wome!

³⁵Naa ndɛ wɛ əb nɛɛyen kenəə kɛ Feyine kɛŋen lu wan-no ə wom nɛ gese lu no ə wom.