Read Oku Mak 5 Bible Online

Mak 5 - Oku bible

Mak 5

¹Ghene me diaŋ jio è chin ɛ njine vii nɛ shi ɛylake Gelasa.

²Jesus se fəye se kenək ɛ leghɛ, è konen ghene wel əblee nɛ əb lòò ɛ ngvəəmese. Wele ten nè ki ɛyfim,

³chii ɛ ngvəəmese, wel nè wiy wɛ nè lòó əb kul wen chèmè nɛ̀ nchakse.

⁴Ɛ́ nè sɛɛ kule wen nɛ̀ nchakse ɛykoy gese nɛ̀ se ɛvəə, əb teene nchake sɛ ɛykoye è gese tente əbnkùm se ɛvəə. Wel nè wiy wɛ nè lòó əb taa è chia wen.

⁵Əb nè lóó əb yɛ ghanle ɛ ngvəəmese nɛ̀ se kfənse, nɛ̀ ntəke nɛ̀ nchuy toŋe gwɛte ngeŋ ə wen nɛ̀ ɛtiye.

⁶Əb nè yɛn Jesus bo bɛɛy naa əbtəm, è nyiŋ, è ndu è təm ɛləy ɛ wen ɛyshiɛ,

⁷è toŋ ɛ giɛ ɛytaa ge: Jesus wɛ Wán ə Feyin Fɛ Fe ngaŋten è chia, wɛ̀ kɛŋe se jɛl lɛɛy nɛ̀ mɛ? Mɛ lone wɛ̀ ɛ Feyine ɛyghel ge ghàà wɛ̀ nyable nɛ̀ mɛ!

⁸Əb nè suuy dì bek ka Jesus kè suuyenmen ge: Ɛyfime, fəy se wel vin əbghun!

⁹Jesus me bif se wen ge: Ɛyghel ə yiɛ lu ndɛ? Əb fise ge: Ɛy lu ge feliɛ, bek ge ghɛs lu se ɛydio.

¹⁰Əb se beŋte Jesus ketaan ketaan ge ghàà əb jum ghene se ntaam fo.

¹¹Nè lu dì nɛ ngoo nkfəənyamse yiɛ əbghune kfən ɛylee fo.

¹²Tefim tii me beŋte Jesus ge: Tinse ghɛs é ghɛs ndu è like se nkfəənyam shii əmlɛɛ.

¹³Əb bééme, te me fəyke se wel vi əblɛɛ, è ndu, è like se nkfəənyam shi əmlɛɛ. Se me foonten, è biŋle è chio ɛ koŋ, è chakle se kechəm keghuye è kuoke. Nkfəənyamse ten nè lu ka nkam sebaa dî.

¹⁴Ghel ghɛ ɛ́ nè chiyen ngoo nkfəənyamse yi nyiŋke è ndu è se fekte sakghɛ ten se ghele ɛ ntɛk fo nɛ̀ se keleŋ fo. Ghele me fəyke è gwiy se yɛne kenəə kɛ ke ganen.

¹⁵Ghene gwiyke se ghaa Jesus nè luun, è yɛn wel vi wɛ ngoo ɛyfim nè foon ngɛk se wen, nɛ əb diom fo, nɛ əb makmen ndəyse, è se lu ɛ wen ɛytof, ghene me se fane.

¹⁶Ghel ghɛ ke nè ganen nɛ ghene yɛnen kenəə kɛ ke kè ganen se wel wɛ əb nè kiin tefim, gese nɛ̀ se nkfəənyamse, me se fekte se ghele.

¹⁷Ghene me kɛɛte se yɛ beŋte Jesus ge əb ko lòò se ghene keleŋ.

¹⁸Jesus loo lii se kenək, wel wɛ ɛyfime nè fóon ngɛk se wen se beŋte ge ghene wen yɛ ndu.

¹⁹Jesus tun, è sɛ́y suuy se wen ge: Kase kfəəy, è fekte se ghel ə ghiɛ ka Báàba koosen ɛysen se wɛ̀, è suuy kenəə kɛ əb nɛ̀ɛ̀yèn se wɛ̀.

²⁰Wele ten me lòò è se jɛle ntɛk se ghakene sɛ́ nseŋ foo dii Ntɛk-Sɛ-Ɛyvəm fekte kenəə kɛ Jesus nɛ̀ɛ̀yèn se wen, ghel ɛjime yio è se lu nɛ̀ əbchíò əbyúméné.

²¹Nɛy se lu ka Jesus nè liin kenək è kase diaŋ se njine vii, ngose wel kaame è wen ɛybee əbghune jio fo.

²²Wel əblee gwiy fo nɛ ɛyghel ə wene lu ge Jailus, nɛ lu wel se ghele mbiye ngay ɛyjem yɛ́ ntɛk fo, è yɛn Jesus è chia, è təm ɛləy ɛ wen ɛyshiɛ,

²³è se beŋte wen ketaan suuye ge: Fewane fom fekiye se kuo. Kiy wɛ̀ ko gwiy è lɛm ɛghoo ə ghiɛ ɛ wen ə ketuu é əb bonen, è yɛ chii.

²⁴Ghene Jesus me lòò, è se nduu, ngose wel me lòò è se yiike nduu nɛ̀ wen.

²⁵Əbvii əblee se lu ɛ kenon fo nɛ shi se nguk njio-sebaa ɛyvəm ka əb nè yɛ́nen əbliy ə wen, əb yɛ gwiy naa se ŋaŋ.

²⁶Əb nè lô yɛn ngɛk ɛ ɛghoo nə ghɛ́ nchuke se ɛydio, jefse əbfua ə wen naa əbjim, dî è jia bonen, ɛyyaf ə wen sɛ́y se taa taan.

²⁷Əb nè yiomen feteete fɛ kum Jesus, è me chem ɛ ngoo fɛy, è kokte è gwiy ɛ wen ɛybam, è kum ndəyse wen.

²⁸Əb nè kume dì suuye ɛ wen ɛytem ge: Mɛ chèmè kum kɛn ndəyse wen, é mɛ ko bonen.

²⁹Əb kum ndəyse Jesus ɛ leghɛ, ɛyyaf ə wene bonen, əb yio ɛ wen əbghun ge yi bonenmen.

³⁰Jesus keele kɛn se əbliy ge kediake nchuke lu nɛ ke fəy ɛ yi əbghun, è benle, è bif se ghele ge: Kum ndɛ ndəy ə som?

³¹Ghon-ɛyfɛl nə wene fise ge: Wɛ̀ yɛne nɛ ngose wel yiike gwiye nɛ̀ wɛ̀ ko gese bife ge sɛ kum ndɛ wɛ̀-a?

³²Jesus ko se kiye kale se keele wel wɛ əb kumen wen.

³³Əbvii vi keele kenəə kɛ ke ganen se wen è se chiŋe fane, è me gwiy è təm ɛləy ɛ Jesus ɛyshiɛ, è fiɛl kenəə kejim se wen.

³⁴Jesus me suuy se wen ge: Wan ə wom, ghal ɛyteme. Ɛytem yɛ wɛ̀ foon se Feyine nɛɛymen wɛ̀ bonen.

³⁵Se lu nɛ Jesus bo suŋnen se əbvii vi, ghel ɛlee mii fo nɛ ɛ́ lòò ɛ ndaa nə Jailus wɛ ketuu ə ngay ɛyjim, è suuy se wen ge: Wan ə viɛ vi kuomen, nɛ ghàà gese yɛ jefse ndinte.

³⁶Jesus bukle se kenəə kɛ ghene nè suuyen, è suuy se ketuu se ngay ɛyjem ki ge: Ghàà yɛ fan, fó kɛn ɛytem se mɛ.

³⁷Jesus jia beeme ge wel yɛ gwiy ɛ ghene ɛybam buu kɛn Bita ghene Jɛms nɛ̀ Joon wɛ wan-no ə Jɛms.

³⁸Se lu əbliy wɛ ghene nè nduun è chin ɛ bɛy nə ketuu se ngay ɛyjem kii, Jesus yɛn nɛ ghele buke buken, toŋnen ketaan, make giɛ ɛykuo.

³⁹Jesus me lii se ndaa è bif se ghene ge: Ɛybuk yin nɛ̀ ɛytoŋ yine lu yɛ́ ghɛ-ɛ? Wan vine báà kuo, əb buune buunen.

⁴⁰Ghene me se buu wen buun, əb jum ghene ghel ɛjim se ndaa, è liɛ ba ə wan ghene no ə wan gese nɛ̀ ghel ghɛ ghene ghene kè luun, ghene ghene lii è ndu ghaa wan kè nyiŋen.

⁴¹Əb ghal keghoo ə wen, è suuy se wen ge: Talita kumi, nɛ lu ge: Wan əbvii loole ɛyyio.

⁴²Əb loole kɛn se əbliy è se jɛle. Əbchio yum ghene naa se ŋaŋ. [Wan nɛ̂ vin nè lu nguk njio-sebaa ɛyvəm].

⁴³Jesus chiise se ghene ge ghàà ghene fiɛl kenəə ten se wel ghɛy, è gese suuy ge: Ghɛn fo kefaa é əb yiɛ.