Read Oku Mak 6 Bible Online

Mak 6 - Oku bible

Mak 6

¹Jesus me lòò se fo, è ndu se ghene ntɛk, ghene ghon-ɛyfɛl nə wene.

²Nɛy loo lu ɛ kechii ɛybam, əb se dinte əbnəə se ghele ɛ ghene ngay ɛyjem. Ghel se ɛydio ghɛ ɛ́ nè yioten ka əb dinten se lu nɛ̀ əbchíò əbyúméné kante ge: Wel vin liɛ vine wɛ əbnəə ghááy? Əb liɛ ghááy əbfee vine? Yɛn ɛynkii əbnəə əbchio əbyúméné wɛ əb nɛɛyen.

³Əb lɛ wiy kamenda wɛ wán ə Mɛɛle-a? Jɛms nɛ̀ Joses, nɛ̀ Simon gese nɛ̀ Judas lɛ báà se lu ghone-no ə wen-a? Jɛmtese wene lɛ báà se chii ghɛsen nɛ̀ ghene fɛn-a? Ghene ghɛynen dì, è me tunse wen.

⁴Jesus me suuy se ghene ge: Ɛ́ sɛɛ ngvəmle wele ntum nə Feyine əblik əbjim buu kɛn ɛ ghene ntɛk, nɛ̀ se ghene ɛykfəə gese nɛ̀ se ghene ɛyshaa ndaa.

⁵Ɛ́ tunse wen dì, əb jia nɛɛy əbnəə əbchio əbyúméné fo, buu kɛn ghel ɛyafkene lɛ ɛ sek ghɛ əb nè lɛmen ɛghoo ɛ ghene əbtuu nɛ ghene bonene.

⁶Əbghune bɛɛme wen bek ka ghene nè báà fo ɛytem se wen. Əb nɛy me lòò, è se jɛle ɛ ntɛke sɛ nseŋ foo dinte əbnəə se ghele.

⁷Jesus nɛy me tooy ghon-ɛyfɛl ghɛ njio-sebaa ɛyvəm è tum ghene ɛbaa ɛbaa, è fo əbtaawe se ghene ge ghene yɛ jume tefim so.

⁸Əb loo tume ghene è chiise se ghene ge: Ghɛne loo ndu ɛyjɛl yin, ghàà wel liɛ kefaa ka əbfua-əbyíɛ́ne, ka kebam, gese nɛ̀ əbkaa ɛ wene kebam. Wel lu se liɛ kɛn mbàŋ,

⁹dî è tuŋte guose ɛvəə, è jia liɛ ndəy selee.

¹⁰Əb gese suuy se ghene ge: Ghɛne lii naa ɛ ndaa ɛykɛ, ghɛn yɛ chii kɛn ɛ ten se chin se ka ghɛne nɛ̂y lòò se ntɛk fo.

¹¹Yɛ lu wɛ ge ghele jia fiisen ghɛn naa ghááy, è jia yiote kenəə kɛ ghɛne suuyen, ghɛne loo lòò se ntɛk fo, ghɛn tɛte kebvəl se ghɛn ə ɛvəə ka əbchəyte se din ge kenəə kɛ ghene nɛɛyen báà jof.

¹²Ghene me lòò, è se fekte nduu nɛ̀ kenəə ə Feyine se ghele ge ghene kubsen tetem ə ghen.

¹³Ghene se jume tefim se ɛydio se ghele ɛyghun, yiose ghel ɛyafkene se ɛydio nɛ̀ əmngvəlme gese chuke ghene.

¹⁴Ghele yionen è kal nɛ̀ ɛyghel ə Jesuse əblik əbjim, əbfon wɛ Helod yio sɛy. Ghel ɛlee se suuye ge: Wel vin lu kɛn naa Joon Nfoo Moo ka əb kasen loole se ɛykuo, nɛ ghɛy kenəə kɛ ke nɛɛyen ge əb yɛ ki əbtaawe se yɛ nɛɛye əbnəə əbchio əbyúméné lɛ.

¹⁵Ghel ɛlee sɛ́y se suuye ge əb lu Elija, nɛ ɛlee suuye ge əb lu wele ntum nə Feyin ka wɛ̂ əmməən əblee.

¹⁶Helod yio əbnəə nɛ̂ vin, è suuy ge: Lu Joon wɛ mɛ nè tenen ketuu ə wen ka əb kasen loole se ɛykuo.

¹⁷Nè lu dî nɛ Helod nè suuymen ɛ́ koo Joon è vii se nchak bek Helodias wɛ wiy ə Filib wɛ wán-no ə Helod, wɛ Helod nè fəysen è se ki.

¹⁸Helod nè fəyse dî Joon se suuye se wen ge: Nchile báà beeme ge wɛ̀ fəyse wiy ə wan-no ə viɛ.

¹⁹Kii nɛ̂ kine nɛɛy, Helodias se ki ɛytem ɛybee kum Joon, è se lɛme ge yi yuy wen dî è jia se ki jii.

²⁰Nè lu dì, nɛ Helod ngvəmle Joon, tɛɛke wen, ke ge əb lu wel əbjuŋ, chii ka Feyine kɛŋen. Helod nè lóó yio kenəə kɛ Joon suuyen, ke yɛ foo ngɛk se wen naa se ŋaŋ, dî nɛ əb ko koŋe se yɛ yiote.

²¹Helodias nɛy me kiile nsan ɛ kechii kɛ Helod nè jaŋen ghel ɛtaa ghɛ ghene ghene nè saken ɛylak, nɛ̀ əbtuu ɛyghoŋe gese nɛ̀ ghel ɛghakene ghɛ́ Galilee ge ɛ́ gwiy è yiɛ kechii kɛ ɛ́ nè biin yi ɛ ten.

²²Ɛ́ loo yiɛ, wan ə Helodias əbvii lii è gwiy, è bin kebin, ke jof Helod ghene ghel ɛyghane, əb me suuy se wan vi ge: Bif naa ghɛ kɛ wɛ̀ koŋen é mɛ fó se wɛ̀,

²³è me laa kelek ge: Naa ghɛ kɛ wɛ̀ bifen, chèmè lu kengianen ɛylak nə mɛ, é mɛ fó.

²⁴Wan ten me fəy se bɛy, è bif se no ə wen ge: Mɛ bif ghɛ? Əb fise ge: Bif ketuu ə Joon Nfoo Moo.

²⁵Əb me fiɛlé fiɛlén è lii kɛn se əbliy, è suuy se əbfon ge: Mɛ kɛŋe ge wɛ̀ fó ketuu Joon Nfoo Moo se mɛ ɛyshɛn kɛn ɛ leenen.

²⁶Əbfon jia se saŋle naa se nkan, dî è jia se ki jii se tun bek kelek kɛ əb kè laanmen ɛ ɛyshiɛ nə ghel ɛyghan nə wene.

²⁷Əb me tum wel ɛyghoŋ wɛ əb nè chiyen ntok kɛn se əbliy ge əb ndu è gwiy nɛ̀ ketuu ə Joone. Əb ndu ɛ ndaa nchak è ten ketuu ə Joon,

²⁸è gwiy so ɛyshɛn, è fo se əbfon, əb fó se wan, əb ndu è fo se no ə wen.

²⁹Ghon-ɛyfɛl nə Joon nɛy yio kenəə ten, è gwiy, è liɛ ɛygvəne wen è ndu è gvəəme.

³⁰Ghɛ́ ntume nɛy kase fiile, è fiɛl se Jesus əbnəə əbjim wɛ ghene nè nɛɛyen, gese nɛ̀ wɛ ghene nè dinten se ghele.

³¹Se lu ka ghele nè gwiyen gese lòòn se ɛydio se ɛydio nɛ ghene ki wiy jii se yiɛ, Jesus me suuy se ghene ge: Ghɛsen ndu ɛ kelik kɛ ke luun nyiaŋ è yɛ lu ghɛsen-ghɛsen é ghɛn zəəlé.

³²Jesus ghene ghon-ɛyfɛl nə wene me lii kenək kɛn ghene-ghene è ndu ɛ kelik kɛ ke luun nyiaŋ.

³³Ghene loo lòò, ghel se ɛydio yɛn, è keele ge lu ghene, ghele me fəy ntɛk sejim, è nyiŋe ndu nɛ̀ kevəə, è chin se ghaa əb nè nduun nɛ ghene geese yɛ gwiy.

³⁴Jesus gwiy è se fəye se kenək è yɛn feliɛ wel, ketuu lum wen bek ge ghene nè lu ka bvəyse-njiɛ sɛ ghàà nchiy. Əb me kɛɛte se yɛ dinte əbnəə se ghene se ɛydio.

³⁵Nɛy se lu nɛ əbtəke se jiɛ, ghon-ɛyfɛl nə wene kokte è gwiy è suuy se wen ge: Əbliye chiamen, nɛ ghɛsen lu fɛn ɛ əbkwak.

³⁶Lame é ghele giabsen è lii è ndu ɛ teghaŋ əbkwak gese nɛ̀ se ntɛke sɛ keleŋ fɛne è yun əbfua-əbyíɛ́ne nə ghen.

³⁷Jesus suuy se ghene ge: Ghɛn fó əbfua-əbyíɛ́ne se ghene se ghɛne ngeŋ. Ghene me bif ge: Ke dine ge ghɛs ndu è yun keban se denalius ɛyviɛ ɛybaa, è fo, é ghene yiɛ-a?[1]

³⁸Jesus suuy se ghene ge: Ghɛn chia è kiy ge ntukse kebane sɛ lu se sek-a? Ghene kiy, è gwiy è suuy ge se lu setan nɛ̀ səə sebaa.

³⁹Jesus me lam ghene ghel ɛjim diom ɛ ɛykfəkfə ɛ ngoose ɛ ngoose.

⁴⁰Ghene me diom ɛ ngoose ɛ ngoose, nɛ ngoo selee lu ghel əbviɛ nɛ selee lu ghel əmmtan.

⁴¹Əb me liɛ ntukse keban sɛ setan shi nɛ̀ səə sɛ sebaa shi è kiy ɛyyio, è bɛ̀ɛ̀lè Feyin, è bɛkte keban ki, è fo se ghon-ɛyfɛl nə wene ge ɛ́ giate se ghele. Əb ko gese fo səə shi, ɛ́ giate se wel əbjim.

⁴²Wel əbjim yiɛ è kul.

⁴³É baate ɛykfəke keban nɛ̀ yɛ səəse, ɛy lun nkaase njio-sebaa ɛyvəm.

⁴⁴Se ghel ghɛ ɛ́ nè yiɛn keban nɛ̂ ki lu nɛ ɛluumene lu nkam setan.

⁴⁵Kɛn se əbliy Jesus suuy se ghon-ɛyfɛl nə wene ge: Ghɛn lii se kenək è diaŋ ɛ njine Betsaida se mbiy. Əb me yese lam ngose wel yi giabsen.

⁴⁶Əb chakte ghene è me kok ɛ kfən se jem.

⁴⁷Kebɛye se fine nɛ ghene bo bɛɛy nɛ̀ kenəke ɛ fetetene jio, nɛ Jesus lu ɛ kfən wen nyiŋ.

⁴⁸Əb yɛn ka ghene luŋen, nɛ jii wiy bek əbfiɛf wɛ əb nè chian gwiyen jii ghaa ghene nè nduun. Əbtəke nɛy se tenen gwiye, Jesus se jɛle gwiye ɛ ketuu moo se baksene ghon-ɛyfɛl nə wen è se kiye se tosene ghene tosen.

⁴⁹Ghene yɛn ka əb jɛ́len gwiyen ɛ ketuu moo è se kwaate ge lu nkfəsay, è se toŋe,

⁵⁰bek ge ghene nè yɛn wen è se fane naa se ŋaŋ. Əb suuy se ghene kɛn se əbliy ge: Ghɛn kul ɛyteme, lu mɛ Jesus, ghàà ghɛn yɛ fan.

⁵¹Əb suuy dì è lii se kenək, əbfiɛf vi me buu, ghene se loote lu nɛ̀ əbchíò əbyúméné,

⁵²bek ge ghene nè báà keele kenəə kɛ kum ntukse keban, bek ka tekwaate ə ghene nè luun tetəm.

⁵³Ghene diaŋ se njine vii è me fəy ɛ Gennesalet, è chəŋ kenək.

⁵⁴Se lu ka ghene nè fəyen gwiyen se kenək ɛ leghɛ, ghele me keele Jesus,

⁵⁵è nyiŋnen è kal ntaam ten ɛyjim, è se buŋe ghel ɛyafkene ɛjim nduu so se naa ghááy ghaa ɛ́ nè yion ge əb lu.

⁵⁶Əb nè loo ndu naa ghááy, kene ɛ ntɛk ɛylayten, kene ɛyghaken, kene ɛyghaŋ əbkwak, ghele ko yɛ gwiy nɛ̀ ghel ɛyafkene nyiŋse əblik əbwɛy, è me yɛ beŋte Jesus ge əb ko vəse ɛ́ ghene kum ɛyghaŋe ndəyse nə wen. Naa ndɛ se kume, me bonene.