Read Oku Mak 7 Bible Online

Mak 7 - Oku bible

Mak 7

¹Nɛy se lu ɛ kechii kelee, ghele kenone Falisee gese nɛ̀ ghɛ́ ɛydinte tesak ɛlee ghɛ ɛ́ nè lòòn ɛ Jolesalem kaame ɛ Jesus ɛybee,

²è yɛn nɛ ghon-ɛyfɛl nə wen ɛlee yiɛ nɛ̀ ɛghoo se gvən, nɛ ɛ́ báà suu ɛ ndee ɛylak.

³[Ghele Juus, tete-tete ghɛ́ kenone Falisee, sɛɛ jia yiɛ əbfua-əbyíɛ́ne nɛ ɛ́ báà suu ɛghoo ɛ ndee ɛylak, ghɛɛ-ghɛɛ ka ɛbàá ɛbàá ghene nè dinen se ghene;]

⁴nɛ̀ wel nè lòò əbwɛy è kfəəy, ghàà əb yiɛ kefaa buu ge əb suute əblik ɛ ndee ɛylak, gese lɛme nchil selee se ɛydio ka sɛ se nè dinen ge ɛ́ yɛ suu əbfua ka ɛybom, nɛ̀ ntonse gese nɛ̀ əmnkunme nɛ̀ ɛysiye.

⁵Ghele kenone Falisee ghii, nɛ̀ ndintese tesak shii me bif se Jesus ge: Lu bek ghɛ wɛ ghon-ɛyfɛl nə wɛ̀ báà se chii ka ɛbàá ɛbàá ə ghɛsene nè chiin, sɛ́y yiɛ nɛ̀ ɛghoo se gvən?

⁶Jesus fise se ghene ge: Nfekte yɛ Ezaya nè suuy se əbluuy ge ghɛn lu nfefsese, ghɛn ko nɛɛye kenəə kɛ əb nè nyaken ge Feyine suuye ge: “Ghel ghine kokse mɛ se əbchio nɛ̀ ghene báà fo ɛytem se mɛ.

⁷Ɛykokse yɛ ghel ghine fóon se mɛ lɛye se lólò, bek ge ghene liɛ əbnəə wɛ lɛmen ghel, dinte se ghele ge lu nchil ə som.”

⁸Lu ɛyghɛl ka ghɛn maayen nchilse Feyin, è se lɛme nɛ lu sɛ ghele.

⁹Ghɛn loote ke jii ɛytof yɛ maay nchilse Feyin ɛ ten ka ghɛne yɛ lɛme ndee ɛylak nə ghɛn!

¹⁰Moses nè suuy ge: Wel ngvəmle ba ə wen ghene no ə wen, nɛ naa ndɛ suŋnen kebee kum ba ə wen kene no ə wen fene ɛ́ yuy wen yuyen.

¹¹Se lu se ghɛn nɛ ghɛn suuy ge, wel ki kefaa kɛ kè lòó əb giamten ba ə wen so kene no ə wen, è suuy ge lu Kolban (nɛ lu ge shi kɛ Feyine),

¹²fene əb jia bo yɛ lu se giamtene ba ə wen kene no ə wen.

¹³Ghɛne dinte əbnəə ə wɛn wɛ tene se ghele dì, nɛɛy nɛ kenəə ə Feyine nduu se kefaa lólò, gese nɛɛy əbnəə əblee ka əbghene naa se ɛydio.

¹⁴Jesus me gese jaŋ ghel ghi è suuy se ghene ge: Ghɛn yiote kenəə kɛ mɛ suuy se ghɛn ghel ɛjim, è keele.

¹⁵Kefaa wiy kɛ ke liin liin ɛ wel ə əblɛɛ kɛ ke besen wel, kefaa kɛ ke besen wel lu kɛ ke fəyen fəyen.

¹⁶Wel wɛ əb kiin əbtuule se yio, əb yio.

¹⁷Əb nɛy lòò, è vəse ghel ghi è kfəəy se ndaa, ghon-ɛyfɛl nə wene bif se wen ge ngan yin sɛ suŋnen kum ghɛ-a?

¹⁸Əb bif se ghene ge: Ɛytof ə yɛne lu sɛy ɛytəm-a? Ghɛne báà se ke ge kefaa kɛ ke liin liin ɛ wel əbghune báà se bese wen-a?

¹⁹Ke lu dî bek ge ke lóó ghàà ke lii nɛ lu ɛytem, ke lii nɛ lu əblɛɛ, wel nɛy me kfəl. [Əb nè suuy dì se din ge əbfua-əbyíɛ́ne əbjime jofe.]

²⁰Əb gese suuy ge: Kenəə kɛ ke fəyen fəyen ɛ wel əbghun lu keghene kɛ ke besen wel,

²¹Ke lu dî bek ge lu wel ə məm, dii ɛ wel ɛytem ghaa wel loo əb yɛ ki tekwaate tebee, me jaŋe kenjaŋ, choŋe əbchoŋ, yuyte ghel, liɛ əbkiy kene ɛlum ə ghel,

²²semte əbfua ghel, ki nchiinen ɛybee, lɛɛse ghel, momle kemomle, ghɛke kenghɛk, bese teghel ə ghel, kokse əbghun, gese nɛɛy əbnəə əbyume.

²³Əbnəə əbbee nɛ̂ vin əbjim lóo ɛ wel ɛytem me bese wel.

²⁴Jesus nɛy lòò se fo, è ndu ɛ keleŋe Taya ghene Sidon, è bɛ̀ɛ̀ ɛ ndaa ɛylee fo, è jia se koŋe ge wel keele ge lɛɛ ghaa yi luun, dî ghele ko keele.

²⁵Əb ndu dì ɛ leghɛ, əbvii əblee nɛ fewane wen fekiye ki ɛyfim ɛ wen əblɛɛ, yio ge əb lu fo, è gwiy è təm ɛləy ɛ wen ɛyshiɛ.

²⁶Əb təm ɛləy ɛ Jesus ɛyshiɛ dì, è se beŋte wen ge əb jum ɛyfim se wan ə vi əblɛɛ. [Əbvii nɛ̂ vin nè lu wele ketum nɛ ɛ́ nè bii wen ɛ Foenisia ɛylake Silia.]

²⁷Jesus me suuy se wen ge: Kɛ mbiye lu ge ɛ́ yiɛse ghon, bek ge ke báà jof ge ɛ́ liɛ əbfua-əbyíɛ́ne nə ghone è mak se buose.

²⁸Əb soote ge: Báàba, dî nɛ buose loo se yɛ biŋte ɛykfək əbfua wɛ ghone yiɛn nɛ ɛy chemkee ɛyshaa ketatan.

²⁹Jesus me suuy se wen ge: Ghensen suuy wɛ dì fene lòó wɛ̀ yɛ kfəəy, ɛyfime tene fəymen se wan ə viɛ əblɛɛ.

³⁰Əb me kfəəy è yɛn wan nɛ əb nyiŋ ɛ əbkun nɛ ɛyfim yi fəymen se wen əblɛɛ.

³¹Jesus nɛy me lòò se keleŋe Taya, è tosen jii Sidon ge yi fiile se kechem keghuye kɛ Galilee, è me chia jii mə Ntɛk-Sɛ-Ɛyvəm.

³²Əb chin fo, ghele gwiy nɛ̀ wel əblee se wen nɛ lu kechichi nɛ əb ke wiy se suŋnen, è se beŋte wen wɛ Jesus ge əb ko kum wen.

³³Jesus liɛ wel vi, ghene wen fəynen se ghele məm, əb vii ghon ɛghoo se wele ten əbtuule, è tio ɛyliɛ, è kum keleeme ə wele ten so.

³⁴Əb kum dì, è kiy ɛyyio, è shom, è suuy se wele ten ge: Efata, nɛ lu ge, dise əbghune.

³⁵Əbtuule ə wel vi me dise, keleeme wene yayte, əb kɛɛte se yɛ suŋnen kejuŋ.

³⁶Jesus me chiise se ghene ge: Ghɛn yɛ ke se fiɛle kenəə ten se wel ghɛy; əb se chiise naa lɛɛy nɛ ɛ́ sɛ́y mɛyse saŋse nduu so nduun.

³⁷Ghel ɛjim ghɛ ɛ́ nè yion se lu nɛ̀ əbchíò əbyúméné suuye ge: Əbnəə əbjim wɛ əb nɛɛyen lu əbjuŋ, əb nɛɛye naa nɛ ghel ghɛ ɛ́ yion wiy əbnəə yio, nɛ ghɛ ɛ́ suŋnen wiy, suŋnene.