Read Oku Mak 8 Bible Online

Mak 8 - Oku bible

Mak 8

¹Ko se lu əmchii fo, feliɛ wele gese kaame ɛ Jesus ɛybee, ki wiy kefaa se yiɛ. Jesus jaŋ ghon-ɛyfɛl nə wen, è suuy ge:

²Mɛ koosen ɛysen se ghel ghine bek ge ghɛse ghene shi se əbchii əbtal, nɛ ghene bo ki wiy kefaa se yiɛ.

³Mɛ lòò, è suuy ge ghene yɛ kfəəy se jeŋ, é jeŋ mak ghene ɛ jii bek ge ghene ɛlee lòò əbtəm.

⁴Ghon-ɛyfɛl nə wene me bif se wen ge: Lòó ghɛsen liɛ ghááy keban kɛ yiɛse ghel ghin so, nɛ ghɛsen lu əbkwak?

⁵Jesus me bif ge: Ghɛn ki ntukse keban se sek? Ghene fise ge: Se lu saamba.

⁶Əb me lam ghel ghii diom se ntiɛ. Əb liɛ ntukse keban sɛ saamba shi, è bɛ̀ɛ̀lè Feyin, è bɛkte, è fo se ghon-ɛyfɛl nə wene ge ghene giate se ghel ghii. Ghene me giate.

⁷Nè lu dî nɛ ghon-ɛyfɛle ki səə se laykene se ɛylaay. Jesus bɛɛle Feyin se seghene, è suuy ge ghene giate sɛy se ghel ghii.

⁸Wel əbjim yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, nkaase saamba se lunken.

⁹Ghele nè lu fo ka nkam sekɛɛk di.

¹⁰Jesus nɛy tinse ghel ghi ge ghene yɛ kfəəy, ghene ghon-ɛyfɛl nə wene me lii se kenək kɛn se əbliy è se diaŋe se ntaam Dalmanuta.

¹¹Ghele kenone Falisee gwiy è kɛɛte se yɛ beke mbek ghene ghe Jesus, gofe wen, suuye ge əb nɛɛy kenəə əbchio əbyúméné se din ge əbtaawe ə wene lòò se Feyine.

¹²Əb shom ɛ wen ɛytem, è suuy ge: Lu bek ghɛ wɛ ghele ghɛ́ ntem fɛne shiin kenəə əbchio əbyúméné? Mɛ suuy əbluuy se ghɛn ge kenəə əbchio əbyúméné di wiy kɛ Feyine nɛɛy se ghel ghine.

¹³Əb vəse ghene se fo, è lii se kenək, è diaŋ se njine vii.

¹⁴Nè lu dî nɛ ghon-ɛyfɛle lɛysen se liɛ keban, è se ki kɛn ntuke keban ɛymok ɛ kenək.

¹⁵Jesus me tef ghene ge: Ghɛn yɛ toknen kum feshike ghele kenone Falisee gese nɛ̀ fɛ Helode.

¹⁶Ghon-ɛyfɛl nə wene yio dî, è me se kantê ge: Tam fene əb suuy lɛ bek ka ghɛsen báà se ki keban.

¹⁷Jesus me keele kenəə kɛ ghene kanten è bif ge: Lu bek ghɛ wɛ ghɛne kanten kum kenəə keban kɛ ghɛne báà se ki? Ke dine ge ghɛne yɛne əbnəə chəysen wiy. Ɛytof ə yɛne bɛɛy ɛytəm-a?

¹⁸Ghɛn ki ɛshiɛ, yɛne wiy əblik-a, ki əbtuule, yio wiy əbnəə-a? Ghɛn bo kuume wiy-a?

¹⁹Nè lu əbliy wɛ mɛ nè bɛkten ntukse keban setan è yiɛse ghel nkam setan so, ghɛn nè baate əbmbɛkele ten əb lun nkaa se sek? Ghene fise ge: Əb nè lu nkaase njio-sebaa ɛyvəm.

²⁰Mɛ yiɛse ghel nkam sekɛɛk nɛ̀ ntukse keban saamba, ghɛn baate əbmbɛkele ten əb lun nkaa se sek? Ghene fise ge: Əb lun nkaase saamba.

²¹Əb me bif se ghene ge: Ghɛne yɛne əbnəə vin lɛ chəysen wiy-a?

²²Ghe Jesus nɛy ndu è chin ɛ Betsaida, ghel ɛlee gwiy nɛ̀ kenfefe se Jesus è se lone ge əb ko kum wen.

²³Jesus me ghal keghoo ə kenfef ki, ghene wen fəynen ntɛk: Jesus tio ɛyliɛ se wen ə ɛshiɛ, è lɛm keghoo ɛ wen ɛykek è bif ge: Wɛ̀ lɛ yɛne əblik-a?

²⁴Əb kiy ɛyyio, è suuy ge: Mɛ yɛne ghel ge life life, di-a ka lu əmkak ka əm jɛ́len.

²⁵Jesus gese lɛm ɛghoo se wel vi ɛshiɛ, əb kiy əblik ketaan, ɛshiɛ wene yiase, əb se loote yɛne əblik.

²⁶Jesus me suuy se wen ge: Yɛɛ kfəəye, dî nɛ ghàà chèmè lii se ntɛk.

²⁷Jesus ghene ghon-ɛyfɛl nə wene me lòò, è se nduu ɛ ntɛke sɛ keleŋe Saesalea Filibi, əb bif se ghon-ɛyfɛl nə wene ge: Ghele suuye ge mɛ lu ndɛ?

²⁸Ghene fise ge: Ghel ɛlee suuye ge, wɛ̀ lu Joon Nfoo Moo, nɛ ɛlee suuye ge, wɛ̀ lu Elija, nɛ̀ ɛlee suuye ge wɛ̀ lu wele ntum nə Feyine əblee wɛ əbməən.

²⁹Əb me bif ge: Ghɛne suuye kɛne ge mɛ lu ndɛ? Bita fise ge: Wɛ̀ lu Vi wɛ Feyine nè Yiosen.

³⁰Jesus me chiise se ghene ge: Ghàà wel yî suuy kenəə kɛ kum mɛ nɛ̂ kin se wel.

³¹Jesus me kɛɛte se yɛ dinte əbnəə se ghon-ɛyfɛl nə wene ge: Wanwel tiy se yɛne ngɛk se ŋaŋ, é chɛɛse ghene ghele mbiye se ghɛ́ ntaŋlee gese nɛ̀ ndintese tesake tunse wen. Ɛ́ yuy wen, é əbchii chia əbtal é əb loole se ɛykuo.

³²Əb nè suuy əbnəə ten se ghene ɛ tɛtɛ. Bita me liɛ wen ghene wen bak əbghun, əb me se yole Jesus.

³³Jesus benle è kiy ghon-ɛyfɛl nə wen, è wam Bita ge: Loo se mɛ ɛybee, wɛ̀ lu Satan! Ɛykwaate yiɛ lu yɛ́ wele, nɛ wiy yɛ́ Feyine.

³⁴Jesus me jaŋ ngose wel yi, nɛ̀ ghon-ɛyfɛl nə wene è suuy ge: Naa ndɛ wɛ əb kɛŋen se yɛ jumte ɛybam ə yom lu se yɛne ngeŋ ə wen ka kefaa lólò, se bɛɛye kentam ə wen se yɛ jɛl so ɛ mɛ ɛybam.

³⁵Bek ge naa ndɛ wɛ əb kɛŋen se babte ɛychii ə wene náà lɛy ɛyghene, nɛ naa ndɛ wɛ əb lɛyen ɛychii ə wen bek mɛ gese nɛ̀ sakghɛ əbjuŋ lu nɛ əb náà yɛ ki ɛychii.

³⁶Lòó sɛk yɛ lu ghɛ se wel ɛ lefɛ əb kiilen ketuu ntiɛ kejim, è lɛy ɛychii ə wen?

³⁷Kefaa lɛ lu kɛ lòó wel fó se ten ɛychii ə wen so-a? Ke wiy.

³⁸Naa ndɛ wɛ əb ghuumen mɛ gese ghuumen giɛ ə som ɛ mbi fɛn yɛ ghele tunsenmen Feyin, è se nɛɛye əbnəə əbbee ɛ ten lɛ, lu vi di wɛ Wanwele yî ghuumen se wen ɛ əbliy wɛ əb gwiyen ɛ əbghaake nə ba ə wen, nɛ̀ nchiyse-ndaa nə Feyine se lanene.