Read Oku Mak 9 Bible Online

Mak 9 - Oku bible

Mak 9

¹Jesus gese suuy se ghon-ɛyfɛl nə wene ge: Mɛ suuy əbluuy se ghɛn ge ghel ɛlee tiy ɛ məm fɛn nɛ ɛ́ jia yî kuo nɛ ɛ́ báà yɛn ka Feyine gwiyen nɛ̀ əbtaawe ə wene se yɛ sak.

²Əbchii chia ntuufe, Jesus liɛ Bita nɛ̀ Jɛms gese nɛ̀ Joon, ghene ghene kok se ketuu kfən ɛydia ɛylee è se lu fo kɛn ghene-ghene, ɛ leghɛ, əbghun ə Jesus me kubsen kɛn ɛ ghene ɛyshiɛ.

³Ndəyse wene me se njantee, fəfe chia ɛybvəə, naa chia ka lòó wel suu ndəyse ə wen ɛ mbi fɛn é se yɛ kek.

⁴Ghene yɛn nɛ Elija ghene Moses tiy fo suŋnene ghene ghe Jesus.

⁵Bita me suuy se Jesus ge: Ndinte, ke lu kejuŋ ka ghɛs luun fɛn, lam é ghɛs baklé əmtaa əmtal, viɛ nɛ̀ wɛ Moses gese nɛ̀ wɛ Elija.

⁶Bita nè suuy dî bek ge ghene ghɛ ghon-ɛyfɛl nè fane naa se ŋaŋ, əb jia se ke kenəə kɛ lòó əb suuy.

⁷Mbàkse gvəm è chite ghene, giɛ ɛylee fəy è gwiy ɛ məme mbàkse fo ge: Vin lu wán ə wom wɛ mɛ koŋen naa se ŋaŋ, ghɛn yɛ yio se wen.

⁸Ghon-ɛyfɛl ghii loo kiy ɛ leghɛ, è jia gese yɛn wel fo buu kɛn Jesus.

⁹Ghene nɛy loo chio se kfən, Jesus chiise se ghene ge: Ghàà ghɛn nɛ̂y fiɛl kenəə kɛ ghɛn kè yɛnen se wel buu ge nɛy yɛ lu nɛ Wanwele loolemen se ɛykuo.

¹⁰Ghene me gok so ɛ ghene məm, è ko se kante ge, se lòòle se ɛykuo sɛ lu gee ghɛ-a?

¹¹Ghene me bif se Jesus ge: Lu bek ghɛ wɛ ghɛ́ ɛydinte tesake suuyen ge Elija tiy se nɛ̂y se kɛ̀ɛ̀tè se gwiy,

¹²Jesus fise ge: Elija lu se kɛ̀ɛ̀tè se gwiy se siyse əbnəə əbjim é əb kase yɛ lu əbfɛɛ. Lu bek ghɛ wɛ ɛ́ nyaken ɛ́ ŋwaale-Feyin ge Wanwele nɛ̂y yɛn ngɛk se ŋaŋ, é ghele nyable nɛ̀ wen?

¹³Mɛ suuy se ghɛn ge Elija nè gwiymen, ghele jef nɛ̀ wen ɛ ghene jii kɛn ka ɛ́ nè nyakenmen kum wen.

¹⁴Ghe Jesus chio è baksen ghon-ɛyfɛl ɛlee, è yɛn nɛ ngose wele kaame ɛ ghen ɛybee nɛ ghene ghe ndintese tesak selee beke mbek.

¹⁵Ghel ghii yɛn Jesus, ɛ leghɛ əbchio yum ghene naa se ŋaŋ, ghene me nyiŋ è ndu, è chakte wen.

¹⁶Əb bif se ghon-ɛyfɛl nə wene ge: Ghɛne ghel ghine kè beke ghɛ?

¹⁷Wel əblee ɛ kenon fo fise ge: Ndinte, mɛ kè gwiy nɛ̀ wan ə wom se wɛ̀ bek ka əb kiin ɛyfim nɛ ɛy nɛɛy əb jia se suŋnene.

¹⁸Naa ɛ leghɛ wɛ ɛyfime tene losen wen, ɛy mak wen se ntiɛ, kefəfeye yɛ fəy ɛ wen əbchio, nɛ əb kfəle ɛsoŋ gese tabte tabten. Mɛ kè lô suuy ge ghon-ɛyfɛl nə wɛ̀ jum, ghene mom lòlò.

¹⁹Jesus me suuy se ghene ge: Ghɛne ghɛ ntem fɛne báà fo ɛytem se Feyine. Ghɛne kɛŋe ge mɛ nɛ̂y yɛ lu ghɛsen se chin lɛɛy? Ghɛne kɛŋe ge mɛ nɛ̂y təəte ghɛn se chin lɛɛy? Gwiye nɛ̀ wan ten se mɛ.

²⁰Ɛ́ me gwiy nɛ̀ wen se Jesus. Ɛyfim yi se yɛne gwiye nɛ̀ Jesus ɛ leghɛ, è mak wan se ntiɛ, əb se biŋlee, nɛ kefəfəye fəye əbchio.

²¹Jesus bif se ba ə wan ten ge: Ɛyfim yine chiimen ɛ wan əbghun se əbtəm lɛɛy. Əb fise ge: Kɛɛ se wan əbtɛlɛ.

²²Ɛy lóó ɛy yɛ makle wen se əbvəs gese nɛ̀ se moo, kɛŋe se yuy yuyen. Loo lu nɛ lòó wɛ̀ nɛɛy kenəə, wɛ̀ koosen ɛysen se ghɛs è giamten.

²³Jesus me suuy se wen ge: Ge loo lu nɛ lòó wɛ̀ nɛɛy kenəə-a? Kenəə di lòó ke jia ghak wel wɛ əb foon ɛytem se Feyine.

²⁴Əb suuy di ɛ leghɛ, ba ə wan vi me jaŋ è suuy ge: Mɛ lu nɛ mɛ fó ɛytem se Feyine, giamten é mɛ loote fo!

²⁵Jesus yɛn nɛ ngose wel se lunte lunten, è me kwanten ɛyfim yi ge: Ɛyfim yɛ ɛy nɛɛyen ge ghàà wan vin yɛ suŋnen gese yio wiy əbnəə, mɛ suuy se wɛ̀ ge, fəy è jia yî kase fiile se wen əbghun.

²⁶Ɛyfime tene toŋ ɛ giɛ ɛytaa, è mak wan ɛ jii ɛybee, è me fəy se wen əbghun. Wan se nyiŋ fo ka kenkuo wel. Ndio ghel me se suuy ge əb kuomen.

²⁷Jesus me ghal keghoo ə wen è lose əb loole è teem.

²⁸Jesus nɛ̂y lii se ndaa, ghon-ɛyfɛl nə wene bif se wen nɛ lu kɛn ghene ghene ge: Lu bek ghɛ wɛ ghɛs kè momen lolo se jum ɛyfime ten?

²⁹Əb fise ge: Lòó wel jia jum ɛynkii ɛyfim ka yine buu kɛn ge əb jem è gese bam əbfua-əbyíɛ́ne.

³⁰Jesus ghene ghon-ɛyfɛl nə wene loo se fo è tosen ɛ Galilee. Jesus nè báà se koŋe ge wel keele ghaa ghene luun,

³¹bek ge əb nè dinte əbnəə se ghon-ɛyfɛl nə wene suuy ge: Ɛ́ nɛ̂y din Wanwel é ghele koo è yuy, dî əbchii chin əbtal é əb kase loole se ɛykuo.

³²Ka Jesus suuyen dî ghene jia keele kenəə kɛ əb suuy dî è se fane se bif.

³³Ghene ndu è chin ɛ Kabanaum, è nɛy loo lu ɛ ndaa, əb bif se ghene ge: Ghɛn kè jɛle beke gee ghɛ ɛ jii?

³⁴Ghene me gok ɛ chichi bek ge ghene kè jɛle ɛ jii beke mbek ge sɛ lu ndɛ ketuu ɛ ghene məm-a?

³⁵Jesus diom, è me toŋte ghon-ɛyfɛl ghɛ njio-sebaa ɛyvəm è suuy se ghene ge: Naa ndɛ wɛ əb kɛŋen se yɛ lu wele mbiy tiy se səkse ngeŋ ə wen se yɛ fɛl se wel əbjim.

³⁶Əb suuy di, è liɛ wan əbtɛlɛ, è tiyse ɛ ghene ɛyshiɛ, è baamé è suuy se ghene ge:

³⁷Naa ndɛ wɛ əb fiisen wán ka vin bek mɛ lu nɛ əb fiisen nɛ lu mɛ, nɛ naa ndɛ wɛ əb fiisen mɛ báà fiisen kɛn mɛ, əb fiisen nɛ lu wel wɛ əb nè tumen mɛ.

³⁸Joon me suuy ge: Ndinte, ghɛs ne lô yɛn wel nɛ əb jume ɛyfim nɛ̀ əbtaawe ɛyghel nə wɛ̀, è se suuy ge ghàà əb se mom bek ge əb ne wiy wele ngoo nə ghɛsen.

³⁹Jesus suuy ge: Ghàà ghɛn yɛ tun, bek ge, wele báà se lu wɛ əb nɛɛyen əbnəə əbchio əbyúméné əbtaawe ɛyghel nə mɛ wɛ lòó əb nɛ̂y kase yɛ suŋnen kebee kum mɛ.

⁴⁰Wel wɛ əb baken wiy ghɛsen, toke ghɛsen token.

⁴¹Mɛ suuy əbluuy se ghɛn ge: Naa ndɛ wɛ əb foon əbbome moo se ghɛn bek ka ghɛn luun ghele ngoo nə Christ, jia náà buu se kiile əbmakte wen.

⁴²Jesus gese suuy ge: Shi ge wel nɛɛy é wel se ɛtɛlɛɛ ghine ghɛ ɛ́ foon ɛytem se mɛ nɛɛy mbee, é ke yɛ jof se wen ge ɛ́ chəŋ ɛytiye keban ɛyghuye ɛ wene kendoŋ, è tin se kechem keghuye.

⁴³Loo lu keghoo kiɛ lobte wɛ̀ ge wɛ̀ nɛɛy mbee, wɛ̀ ten è maay. Ke jofe se wel se lii ɛychii yɛ ɛy jia yî mɛy ki keghoo kemok chia ka əb yɛ ki ɛghoo ɛbaa è lii nɛ lu kemboo əbvəs wɛ əb fuon əbliy əbjim.

⁴⁴[Lu fo nɛ kóòle sɛ se kfəlen ghene kuo wiy, nɛ əbvəs wɛ əb nyoken ghene liime wiy].

⁴⁵Yɛ lu ge kevəə ə wele nɛɛy é əb nɛɛy mbee, əb ten. Ke jofe se wel se lii ɛychii yɛ ɛy jia yî mɛy ki kevəə kemok chia ka əb yɛ ki ɛvəə ɛbaa ɛ́ mak wen se kemboo əbvəs.

⁴⁶[Lu fo nɛ kóòle sɛ se kfəlen ghene kuo wiy, nɛ əbvəs wɛ əb nyoken ghene liime wiy]

⁴⁷Ɛyshiɛ ə yiɛ lòò è yɛ lofte wɛ̀ ge wɛ̀ nɛɛy mbee, yɛ jof ge wɛ̀ mɛn. Ke jofe se wel se lii se ɛysak nə Feyine ki kɛn ɛyshiɛ ɛymok chia ka əb yɛ ki ɛshiɛ ɛbaa ɛ́ mak wen se kemboo əbvəs.

⁴⁸Lu fo nɛ kóòle sɛ se kfəlen ghene kuo wiy, nɛ əbvəs wɛ əb nyoken ghene liime wiy.

⁴⁹Əbvəse náà nɛyte wel əbjim kɛn ka fengwaŋe sɛɛ nɛyte mbase ntaŋle.

⁵⁰Fengwaŋe lu kefaa kejuŋe dî nɛ fe lòò è jia gese yɛ lem, é jii jia bo yɛ lu yɛ wɛ̀ nɛɛy é fe kase yɛ lem. Ghɛn me yɛ lem yi ka fengwaŋ, è yɛ chii kejuŋ ghɛne ghele.