Read Oku Luk 12 Bible Online

Luk 12 - Oku bible

Luk 12

¹Se lu ka Jesus nè suuyen əbnəə vi, ngose wel kaame ɛ wen ɛybee ɛ nkamse ɛ nkamse è loo faanten, ɛlee se jɛɛle ɛlee. Əb me kɛɛte è se suŋnen nɛ lu se ghon-ɛyfɛl nə wen ge: Ghɛn yɛ toknen kum feshike ghele kenone Falisee. Ghene lóó ɛ́ yɛ fefse fefsen, nɛ kenɛɛye ghene jɛle ɛ ghele məm ka feshike jɛl ɛ keban kɛ too è kaŋ.

²Ghɛn yɛ ke ge chəm wiy yɛ ɛy yî buu ghàà bvəsen, nɛ̀ kenəə kenlete wiy kɛ ɛ́ yî buu ghàà yɛ ke.

³Ke me se lu ge, naa ghɛ kɛ ghɛne suuyen ɛ nfiine lu nɛ ɛ́ yî yio ɛ chuy ɛybanen. Nɛ̀ kii dii kɛ ghɛne chəmten ɛ məme ndaa lu nɛ ke yî fəy əbkwak.

⁴Sun ə some, mɛ suuye se ghɛn ge, ghàà ghɛn yɛ fane ghii dii ghɛ lòó ɛ́ yúyté nɛ lu kɛn kechak əbghun nə wel, dî nɛ lòó ghene jia bo nɛɛy kenəə kelee se wen.

⁵Mɛ din se ghɛn wel wɛ ghɛn luun se yɛ fan. Ghɛn yɛ fan nɛ lu Feyin wɛ əb kiin əbtaawe se yuye kechak əbghun, gese ki əbtaawe se make wel se kemboo əbvəs. Mɛ me se suuye ge, ghɛn yɛ fane wen.

⁶Ghɛn yɛ ke ge, ka ɛ́ chèmè feenen əmnjoŋtekule əmmtan se əbkaa nɛ kechine tene wiy, lu nɛ Feyine lɛysen wiy felee ɛ ten naa femok.

⁷Chèmè lu nəŋ sɛ se luun ɛ ghɛn əbtuu fene Feyine ke ge se sɛ lu se sek-a. Ghàà ghɛn yɛ fan bek ge, ghɛn ki kelik ɛyshiɛ nə Feyine chia əmnən nɛ̂ min naa se ɛydio.

⁸Mɛ suuy se ghɛn ge, naa ndɛ wɛ əb beemen ɛ ɛyshiɛ nə ghele ge yi lu wel ə wom, lu nɛ Wanwel yî beeme wen sɛy ɛ ɛyshiɛ nə nchiyse-ndaa nə Feyine.

⁹Dî nɛ naa ndɛ wɛ əb maan mɛ ɛyshiɛ nə ghele lu nɛ mɛ yî maa sɛy wen ɛ ɛyshiɛ nə nchiyse-ndaa nə Feyine.

¹⁰Naa ndɛ wɛ əb suŋnen nɛ̀ ɛybame kum Wanwel lu nɛ Feyine nɛ̂y lɛyse se wen; dî nɛ naa ndɛ wɛ əb yian əbbuam kum Keyioy Kelanene lu nɛ Feyine jia yî lɛyse se wen.

¹¹Ke gan ge, ɛ́ ndu nɛ̀ ghɛn ɛ ngayse ɛyjem ge ɛ́ sak, kene ɛyshiɛ nə ghel ghɛ ɛ́ saken ketum, ghàà ghɛn yɛ fan ge, ghɛne sɛ nɛ̂y tɛɛke lɛɛy ngeŋ ə sɛn-a, kene suuy gee ghɛ-a?

¹²Bek ge, Keyioy Kelanene nɛ̂y din kenəə kɛ ghɛn luun se suuy ɛ əbliy fo.

¹³Wel əblee ɛ məme ngose wel fo me suuy se Jesus ge: Ndinte, lam é wan-no wom gia əbfua wɛ ba ə wɛs nè kuon, è lɛm se ghɛs, è fo wome.

¹⁴Jesus kase fise se wen ge: Wel vin, mɛ se wel wɛ əb tenen nsak ə sɛn gese gia əbfua ə wɛn lu nɛ nè lɛm ndɛ?

¹⁵Jesus me se suŋnen nduu ɛ mbiy se ghene ghel ɛjim, suuye ge: Ghɛn kiy, ghɛn yɛ toknen se yɛ lu ghele keŋwɛy naa ɛ jii ɛykɛ. Wele báà se chii nɛ lu bek əbfua wɛ əb kiin, koŋ əb yɛ dio naa lɛɛy.

¹⁶Əb me maa ngan yin se ghene ge: Wel əbghaken əblee nè lô se ki ɛylem, ɛy fəyse əbfua-əbyíɛ́ne naa se ɛydio.

¹⁷Əb diom è kwaate se wene ngeŋ ge: Mɛ jɛl lɛɛy, nɛ kelike wiy kɛ mɛ baate əbfua-əbyíɛ́ne nə mɛ ɛ ten.

¹⁸È moote, è me suuy ge: Mɛ keelemen kenəə kɛ mɛ nɛɛy. Mɛ kase sak techia ə tom, è baklé teghakene, è me yɛ baate əbfua-əbyíɛ́ne gese nɛ̀ əbfua ə wom əblee ɛ ten.

¹⁹É mɛ nɛɛy dì, è me suuy se ngeŋ ə yom ge: Wel, wɛ̀ baatemen əbfua-əbyíɛ́ne əb kwɛn ka lòó wɛ̀ yiɛ se ngukse se ɛydio. Diome! Yɛɛ yiɛ, nəə gese saŋlee.

²⁰Dî, Feyine suuy se wen ge: Kengoo! Mɛ nɛ̂y kase fii keyioy ə kiɛ kɛn nɛ̀ ntəke lan, é yɛ ki ndɛ əbfua nɛ̂ vin wɛ wɛ̀ baaten?

²¹Jesus me se ləysen suuye ge: Di lɛɛ ka ke nɛ̂y gan se ghel ghɛ ɛ́ bááten ɛykɛŋ se ngeŋse ghene, dî è jia se ki kefaa ɛyshiɛ nə Feyine.

²²Jesus me suuy se ghon-ɛyfɛl nə wene ge: Mɛ suuye se ghɛn ge, ghàà ghɛn yɛ fof kum kefaa kɛ yiɛ se geese yɛ chii, gese nɛ̀ ndəy sɛ yɛ mak se əbghun.

²³Bek ge, ɛychii chia əbfua-əbyíɛ́ne, nɛ̀ əbghune chia ndəyse.

²⁴Ghɛn liɛ nfek se əbgaa, əb sɛɛ jia lem əbfua-əbyíɛ́ne, kaa wiy, ki wiy techia, ki wiy ɛyŋwak; dî nɛ Feyine yiɛse ghene. Ghɛn ki kelik ɛyshiɛ nə Feyine chia ghene!

²⁵Lɛ lòó wel se ghɛn gise kentime əbliy se wen ɛychii ge yî ka yi fofen-a?

²⁶Ka fenəətese ka fine ghaken ghɛn se nɛɛy, nɛɛy ghɛ ge ghɛn yɛ fof kum əbnəə əblee?

²⁷Ghɛn liɛ nfek se əbgii ka əb lóó əb yɛ buse jof. Əb sɛɛ jia fɛl, baa wiy ndəyse. Dî nɛ mɛ suuy se ghɛn ge, chèmè nè lu əbfon wɛ Solomon wɛ əb nè lafen lɛɛy, fene ɛylaf ə wene nè báà jof è mɛy kegii kelee.

²⁸Feyine lɛ lafse əbgii wɛ əb kuyen ɛ əbkwak lan, yɛ lu ɛ likebvəchi nɛ ɛ́ kwaaymen, é ghɛn yɛ kwaate ge lòó əb lafse lɛɛy ghɛn? Ghɛn fo ɛytem se Feyine kɛn se ɛylaay lɛ lɛɛy!

²⁹Ghàà ghɛn lɛm ɛytem se yɛ kwaate kɛn ge ɛ́ sɛ yiɛ ghɛ è gese nəə ghɛ-a? Ke fɛ ghɛn yɛ fof ɛ əbnəə nɛ̂ ghan ghɛy.

³⁰Bek ge, əbtume wɛ̂ mbi fɛne əbjime lɛme tetem ə ghen nɛ lu əbfua nɛ̂ ghàn. Ba ə wɛn ke ge ghɛne shii əbfua nɛ̂ vin.

³¹Ghɛn yɛ luŋ nɛ lu se kiile keleŋ ɛ məm ɛysak nə Feyine, é əb náà fo əbfua nɛ̂ vin se ghɛn əbjim.

³²Ghɛn ghɛ ɛ́ laayen se ghɛne kenon, ghàà ghɛn yɛ fan, bek ge Ba ə wɛn saŋle se fo kelik se ghɛn ɛ wen ə məme ɛysak.

³³Ghɛn feene əbfua ə wɛn, è fo əbkaa ten se ghɛ ketane. Ghɛn kiile əbbuam əbkaa se ngeŋ ə sɛne wɛ lòó əb jia yî bukte. Ghɛn lɛm əbfua ə wɛn nɛ lu ɛyyio bene fɛ lòó kefaa jia kum, bek ge lòó əbchoŋ jia yɛn, nɛ̀ lòó babvəlese jia laa.

³⁴Ke lu dî bek ge ɛykɛŋ ə wele lóó lu ghááy, ɛytem ə wene yɛ lu fo.

³⁵Ghɛn siyse ngeŋ ə sɛn è yɛ lu kebaaten. Ghɛn chək əbkaaken ə wɛn,

³⁶è yɛ lu ka ghel ghɛ ɛ́ chiyten ba-ɛyfɛl nə ghen ge əb fiile se ghaa əbjen, ka əb nɛ̂y gwiy, è kfənte əbchio ndaa ɛ leghɛ, é ghene me dise.

³⁷Ke nɛ̂y yɛ lu kejuŋ se ghon-ɛyfɛle ghii dii ghɛ ba-ɛyfɛle nɛ̂y loo gwiy è yɛn nɛ ghene keke. Mɛ suuy se ghɛn se əbluuy ge, əb nɛ̂y siyse ngeŋ ə wen è suuy é ghene diom é əb giate əbfua-əbyíɛ́ne se ghene.

³⁸Ke nɛ̂y yɛ lu kejuŋ se ghon-ɛyfɛl nɛ̂ ghi ɛ lefɛ ba-ɛyfɛl nə ghen gwiyen nɛ̀ ɛyteme ntəke, kene nɛ lum ngvəə toŋmen, è yɛn nɛ ghene bo kekee.

³⁹Ghɛn lu se yɛ ke ge, ba ə ndaa kè ke əbliy wɛ əbchoŋe nɛ̂y gwiy ɛ ten, é əb jia vəse ndaa ə wen ge əbchoŋ kol è lii se ten.

⁴⁰Ghɛn yɛ lu sɛ̂y kebaaten bek ge: Wanwele nɛ̂y gwiy ɛ əbliy wɛ ghɛne báà se ke ge əb gwiye.

⁴¹Bita me bif se Jesus ge: Báàba, wɛ̀ maa ngan yin kɛn se ghɛs moo wɛ̀ maa se ghel ɛjim-a?

⁴²Báàba me fise ge: Wel wɛ əb toknen nɛ̀ ɛyfɛle, suuye əbluuy se ba-ɛyfɛl nə wen, gese tofe lu ndɛ? Lu wel vi wɛ ba-ɛyfɛle nɛ̂y lɛm ɛ ketuu nə ghel ɛyfɛl nə wen ge, əb yɛ yiɛse ghene ɛ əbliy əbjuŋe.

⁴³Ke nɛ̂y yɛ lu kejuŋ se wel ɛyfɛl nɛ̂ vi wɛ ba-ɛyfɛle nɛ̂y kase yɛ fiile è yɛn nɛ əb fɛle ɛyfɛl ə wen.

⁴⁴Mɛ suuye se ghɛn se əbluuye ge, ba-ɛyfɛle nɛ̂y lɛm wen ge əb yɛ toknen nɛ̀ əbfua ə wene naa əbjim.

⁴⁵Ke sɛ̂y yɛ lu ge, wel vi suuy se ngeŋ ə wen ge: Ba ɛyfɛl nə mɛ lalenmen se gwiy. Suuy di, è me yɛ tɛle ghel ɛyfɛl ɛluumene nɛ̀ ɛkiye, yiɛ gese nəə əmnduk nɛ əm koo wen,

⁴⁶é ba-ɛyfɛl nə wen nɛ̂y gwiy ɛ kechii kɛ əb báà se chiyte wen, ɛ əbliy wɛ əb kè báà se ke ge əb gwiye, è nyable nɛ̀ wen, è tinse əb ndu è yɛ lu ghene ghel ghɛ ɛ́ báà fo ɛytem se Feyine.

⁴⁷Wel wɛ ɛ́ lɛmen ge əb yɛ toknen nɛ̀ ɛyfɛle, əb se ke ge lɛɛ ka lòó yi nɛɛye, dî è jia se nɛɛye kenəə kɛ ba-ɛyfɛl nə wene kɛŋen, lu nɛ ba-ɛyfɛl nə wene nɛ̂y tɛl wen naa se ŋaŋ.

⁴⁸Dî nɛ naa ndɛ wɛ əb kè báà se ke kenəə kɛ əb nɛɛy, è nɛɛy kenəə kɛ lòó ɛ́ tɛl tɛlen, lu nɛ ɛ́ nɛ̂y tɛl wen kɛn se ɛylaay. Ghɛn keele ge, naa ndɛ wɛ ɛ́ foonmen əbdione se wen, ko lu wen wɛ lòó ɛ́ bif əbdione so; nɛ̀ naa ndɛ wɛ ɛ́ viinmen əbdione se wen ə keghoo, ko lu se wen wɛ ɛ́ nɛ̂y bif ge əb fó se ɛydio.

⁴⁹Jesus gese se suuye se ghon-ɛyfɛl nə wene ge: Mɛ nè gwiy se kwaay əbvəs ɛ ghele məm ɛ ketuu ntiɛ fɛn è se sɛye ge wel liɛ ge, əb kè se baalee.

⁵⁰Ɛ́ lu se vii mɛ se ngɛkse ka wɛ̀ yɛ gee ɛ́ vii ɛ moo, nɛ buu ge, kenəə nɛ̂ kin gan, é ɛytem ə yome jia yɛ lu ɛyzəəte.

⁵¹Ghɛne kwaate ge mɛ nè gwiy ɛ ketuu ntiɛ fɛn se fo əmnyiaŋ-a? Ɛngaŋ, mɛ nè gwiy nɛ lu nɛ̀ əbngiabsene.

⁵²Se kɛɛ ɛ leenen lu nɛ ghele nɛ̂y loo lu ɛyshaa-ndaa ɛtan, ɛ́ giabsen, ghàà ghɛ ɛtale yɛ fəy fo ghene ghɛ ɛbaa, nɛ̀ ghɛ ɛbaa fəye wiy fo ghene ghɛ ɛtale.

⁵³Ghene nɛ̂y yɛ lu ɛgiabsen, nɛ bay fəye wiy fo ghene wan ə wen əbluumen, nɛ̀ wan nɛ̂ vi fəye wiy fo ghene ba ə wen. No ə wan jia nɛ̂y yɛ fəy fo ghene wan ə wen əbvii, nɛ wan nɛ̂ vi fəye wiy fo ghene nyii. No ə lume jia nɛ̂y yɛ fəy fo ghene wiy ə wan wen, nɛ wiy wán fəye wiy fo ghene no lum nə wen.

⁵⁴Jesus gese suuy se ngose wel yi ge: Ghɛne yɛn nɛ mbàkse loole jii ghaa chuye soyen ghɛn suuy kɛn se əbliy ge, ɛyghuu shi se gwiy, ke nɛy yɛ lu kɛn dì.

⁵⁵Ghɛne yɛn əbfiɛf nɛ əb chia koke koken, ghɛn me suuy ge, əblike yɛ kfəm, ke nɛy me yɛ lu kɛn di.

⁵⁶Ghɛn ghɛ ɛ́ fefsen fefsen, ghɛne kiye ɛyyio, è kiy ntiɛ, ɛ́ keele kenəə kɛ ke luun se gan, se lu bek ghɛ wɛ ghɛne báà se ke kenəə kɛ ke luun se gan ɛ əbliy ghan?

⁵⁷Lu bek ghɛ wɛ lòó ghɛn jia keele kenəə kɛ ke luun ɛ titiy se ghɛne ngeŋse.

⁵⁸Ke gan ge, wel gham wɛ̀ è liɛ è yɛ ndu so se wele-nsak, wɛ̀ mom ketaan se yɛn ge ghɛne wen lu nɛ ɛ́ siyse nɛ bo bɛɛy ɛ jii, buu dî əb guf wɛ̀ è ndu so se wel ɛytenen nsak, é wel ɛytenen nsak vii wɛ̀ ɛ keghoo nə wele nchil, é wele nchil me vii wɛ̀ se nchak.

⁵⁹Mɛ suuy se ghɛn ge, lòó wɛ̀ jia nɛ̂y fəy se fo buu ge wɛ̀ lak njio nɛ̂ yi ɛy mɛy lɛ ɛyjim.