Read Oku Luk 13 Bible Online

Luk 13 - Oku bible

Luk 13

¹Se lu əbliy fo, ghel ghɛ ɛ́ nè luun fo me se fiɛle se Jesus kum ghele Galilee ghɛ Bailɛt nè yuyten nɛ ɛ́ taŋle ntaŋle.

²Jesus bif ge: Ghɛn lɛ kwaate ge ghele Galilee nɛ̂ ghi nè lu ghele mbeese chia ghele Galilee ɛlee bek ka ghene nè kuon ɛ jii ghan-a?

³Ɛngaŋ, mɛ suuy se ghɛn ge ghɛn jia kubsen tetem ə tɛn, é ghɛn ghel ɛjim náà kuoke kɛn ka ghene.

⁴Moo ghɛne kwaate ge ghel ghɛ njiose-ɛyfaame ɛyvəm ghɛ ndaa nè kɛɛsen, è yuytê ɛ Siloam nè ki njio ɛ ghene keghoo chia ghele Jolesalem ɛlee-a?

⁵Ɛngaŋ, mɛ suuy se ghɛn ge ghɛn jia kubsen tetem ə tɛn, é ghɛn ghel ɛjim náà kuoke kɛn ka ghene.

⁶Jesus me maa ngan yin se ghene ge: Wel əblee nè lô yiɛte fekake fig ɛ wen ɛylem, è naa se nduu ge yi koy fig ɛ fekak fɛy, è jia yɛn kefaa ɛ ten.

⁷Ka əb báà yɛn dî è me suuy se wel wɛ əb nè toknen nɛ̀ ɛyleme ge: Shi nguk setal ka mɛ gwiyen se koye fetam ɛ fekak fɛn yɛne wiy kefaa. Gwɛle, fe jefse ntiɛ jefsen.

⁸Wel vi me fise ge: Babɛy, ko vəse se nguk əbful. Mɛ chɛk ɛyshaa ten, è vii shia se ten.

⁹Yɛ lu ɛ nguk wɛ əb gwiyen fe koom, é ke jof, fe jia koom ɛ́ me gwɛl.

¹⁰Nɛy se lu ɛ kechii ɛybam kelee, Jesus se dinte əbnəə se ghele ɛ ngay ɛyjem ɛylee,

¹¹nɛ əbvii əblee lu fo nɛ keyioy ɛyfime makmen gon se wen əbghun se nguk njiose-ɛyfaame ɛyvəm. Əb nè lu nɛ əb ngvəlenmen ɛ jii yɛ lòó əb jia bo jɛl ɛ titiy.

¹²Jesus yɛn wen, è toŋte, əb fəy è gwiy, əb suuy se wen ge: No ə wom wɛ̀ boymen se wɛ̀ ɛyyaf fɛy,

¹³è me lɛm ɛghoo wen se əbvii vi əbghun, əb loole è teem ɛ titiy kɛn se əbliy, è se kokse Feyin.

¹⁴Wele mbiy wɛ̂ ngay ɛyjem fo yɛn ka Jesus chuken wel ɛ kechii ɛybam, ke tɛn wen, əb suuy se ghele ge: Əbchii ɛyfɛle lu ntuufe. Ghɛn nɛ̂y yɛ gwiy nɛ ɛ́ chuke ghɛn nɛ lu əbchii nɛ̂ fɛn, ghàà ghɛn yɛ gwiy nɛ lu əbchii ɛybam.

¹⁵Báàba suuy se wen ge: Wɛɛy nfefse shine! Lɛ loo lu ɛ kechii ɛybam, ghàà wel se ghɛn liɛ na wen kene kembɛɛybiy ə wen, se keben è ndu so se nəəse-a?

¹⁶Əbvii vin lu wel ɛykfəə nə Ablaham wɛ Satan nè kulen se nguk njiose-ɛyfaame ɛyvəm, bef ghɛ ka mɛ chuken wen ɛ kechii ɛybam?

¹⁷Əb suuy dì, kenghuumene koo ghele əbbaanese nə wen ɛjim, dî nɛ ndio ghel saŋle naa se ŋaŋ kum əbnəə əbchio əbyúméné wɛ əb nè nɛɛyen.

¹⁸Jesus me bif ge: Ɛysake Feyin lu ka ghɛ? Kefaa kɛ lòó mɛ feksen so lu ghɛ?

¹⁹Ɛy lu ka feshiɛlese ngos əmkak yɛ wel nè maken ɛ wen ɛylem, fe fəy è kuy è se lu fekak feghuye, əmnənme se tane gwiye, bakle ndaase ghen ɛ ɛytame ten.

²⁰Əb me gese bif ge: Lòó mɛ fek ge ɛysake Feyine lu ka ghɛ-ɛ?

²¹Ɛy lu ka ɛyshiɛ feshik yɛ əbvii nè liɛn è too kɛlse əmnkfeŋ setal so, feshik fi jɛl kebane ten naa kejim.

²²Jesus nɛy me lòò è se jɛle nduu ɛ ntɛk se ghakene nɛ̀ se tɛlɛɛ, dinte nduu nɛ̀ əbnəə se ghele, chia nduu ɛ Jolesalem.

²³Wel əblee bif se wen ge: Báàba, ɛ́ náà boyse kɛn ghel se ɛylaay-a? Jesus suuy se ghene ge:

²⁴Ghɛn mom ketaan se lii jii əbchio ndaa əblaytene, mɛ suuy se ghɛn lɛ bek ge, ghel se ɛydio náà yɛ mom se lii, é ke ghak ghene.

²⁵Ɛ́ nɛ̂y yɛ lu əbliy wɛ ba ə ndaa loolen se ɛyyio, è tɛk ndaa, é ghɛn teem ɛ bɛy, è yɛ kfənte əbchio ndaa, lone ge: Bay, dise əbchio ndaa se ghɛs. Dî əb fise ge: Mɛ báà se ke ghaa ghɛn lòòn.

²⁶É ghɛn me kɛɛte è yɛ toyle ge: Ghɛsen nè yíɛ́ gese nəə. Wɛ̀ nè lô se dinte chia nɛ̀ əbnəə ɛ ghɛse ntɛk.

²⁷Dî əb gese fise ge: Mɛ báà se ke ghaa ghɛn lòòn; Ghele mbeese ghine, ghɛn loo se mɛ əbchio ndaa,

²⁸Ghɛne náà yɛn Ablaham, nɛ̀ Ayzek, nɛ̀ Jakob gese nɛ̀ nfekte sejim ɛ kelik əbfon nə Feyine, nɛ ɛ́ tɛktemen ghɛn se bɛy bene fɛ ghɛne yɛ toŋnen, kfəle ɛsoŋ.

²⁹Ghele yî lòò tebuulese mbi tejim è gwiy, è liɛ əblik ə ghen bene ghene diom è yɛ yiɛ əbliy ɛysak nə Feyine.

³⁰Yɛn-a! Ghel ɛlee ghɛ ɛ́ luun ɛybam é yî yɛ lu ghɛ mbiye, nɛ̀ ghel ɛlee ghɛ ɛ́ luun ɛ mbiye yi yɛ lu ɛybam.

³¹Kɛn ɛ əbliy fo ghele kenone Falisee ɛlee gwiy è suuy se Jesus ge: Loo se fɛn, è ndu əmchin bek ge Helode kɛŋe se yuye wɛ̀.

³²Əb fise ge: Ghɛn ndu è teefe se ɛynseme tene ge: Lu lan nɛ̀ likebvəchi nɛ mɛ jume tefim gese chuke ghel, nɛ əbchii loo lun əbtal é mɛ mɛyse ɛyfɛl ə yom.

³³Dî nɛ ke lu ɛ shii ge mɛ yɛ ndu ɛ mbiy lan, nɛ̀ likebvəchi, nɛ̀ ka ɛ́ yesen, bek ge ke báà se lu ɛ titiy ge wele ntum nə Feyine kuo nɛ wiy ɛ Jolesalem.

³⁴O Jolesalem, Jolesalem! Ghɛne yútê ghele ntum nə Feyine gese təmle ghel ghɛ Feyine tumen se ghɛn nɛ̀ ɛtiye. Lu kaŋe sek wɛ mɛ momen ge mɛ baate ghone ghiɛ ka no ngvəə zəten ghon ɛ wen ə ɛyshaa ghàà dî wɛ̀ jia beeme.

³⁵Yɛn-a! Feyine maaymen ndaa-ɛykokse nə wɛ̀, ɛy se lu ɛyyum. Mɛ suuy se wɛ̀ ge wɛ̀ jia bo nɛ̂y gese yɛn mɛ se chin ka wɛ̀ nɛ̂y suuy ge: Ke lu kejuŋ se wel wɛ əb gwiyen ɛ ɛyghel nə Báàba Feyin.