Read Oku Luk 14 Bible Online

Luk 14 - Oku bible

Luk 14

¹Nɛy se lu ɛ kechii ɛybam kelee, Jesus ndu se yiɛ ɛ ndaa nə wele mbiy nə Falisee əblee. Ghel ghɛ ɛ́ nè luun fo me tam ɛshiɛ è se kiye wen.

²Yɛn kɛn ka ɛ́ nɛɛyen dì nɛ wel əblee tiy ɛ wen ɛyshiɛ, nɛ əb yafe nɛ̀ ŋwɛf.

³Jesus me bif se ghɛ́ ɛydinte tesake gese nɛ̀ ghɛ́ Kenone Falisee ge: Ɛysake beeme ge ɛ́ chuk wel ɛ kechii ɛybam moo ɛngaŋ-a?

⁴Ghene sɛ́y gok ɛ chichi. Jesus me ghal wel vi, è chuk, è suuy se wen ge əb yɛ kfəəy.

⁵Jesus me bif se ghene ge: Lu ndɛ ɛ ghɛne məm wɛ əb lòòn, è yɛ ki wán kene nyam, ɛy too se ɛybee moo ɛ kechii ɛybam, é əb jia fəyse chikiy?

⁶Ghene jia se ki kenəə se suuy.

⁷Jesus nɛy yɛn ka ghele gwiyen liɛn əblik əbtaa se geese diom ɛ ten, ɛ ndaa nə wele Kenone Falisee vi, è me maa ngan yin se ghel ɛjime ge:

⁸Wel bee wɛ̀ nɛ̀ əbjene, wɛ̀ ndu, ghàà wɛ̀ diom ɛ kelik ketaa, bek ge lòó yɛ lu nɛ ba əbjen kè lô bee wel əblee so wɛ əb chian wɛ̀. Wɛ̀ lòò è diom nɛ lu ɛ kelik ketaa,

⁹é wel wɛ əb kè jaŋen ghɛn gwiy, è suuy se wɛ̀ ge: Loole é wel vin diom, é wɛ̀ loo nɛ̀ kenghuumene è liɛ ketiɛ kɛ nchɛke.

¹⁰Ɛ́ náà jaŋ wɛ̀ se kenəə mba, wɛ̀ ndu, wɛ̀ diom nɛ lu ɛ kelike kɛ nckɛke, ka ba kenəə nɛ̂y gwiy è suuy se wɛ̀ ge: Sun ə yom, gwiye è diom ɛ kelik kejuŋe. Ke gan dì, é wɛ̀ yɛ ki ɛyvəm ɛ ɛyshiɛ nə wel əbjim fo.

¹¹Ghɛn yɛ ke ge lose ndɛ ngeŋ ə wen fene Feyine yî səkse wen, səkse ndɛ ngeŋ ə wen fene Feyine yî lose wen.

¹²Jesus me suuy se wel wɛ əb kè jaŋen wen ge: Wɛ̀ loo jaŋe ghel ge ɛ́ gwiy è yiɛ əbfua-əbyíɛ́ne, ghàà wɛ̀ jaŋ sun ə shiɛ, kene ghone-no ə viɛ, kene ghele ndaa nə ghɛn, kene ɛbaa əmkaa ghɛ ɛ chiin báksen se wɛ̀. Wɛ̀ jaŋ ghene é ghene nɛ̂y kase jaŋ wɛ̀ è seese əbfua ə viɛ.

¹³Wɛ̀ loo lu se yiɛse ghel, wɛ̀ bee nɛ lu ghɛ ketane, nɛ̀ ghel ɛləmmene ka ghɛ ɛ́ ngɛsen ngɛsen, gese nɛ̀ əbnfefe,

¹⁴é Feyine nɛ̂y mɛ bose wɛ̀, bek ka ghel nɛ̂ ghine lòó ɛ́ jia seese əbfua ə viɛ. Ɛ́ yî yɛ lu ɛ kechii kɛ ghel ghɛ ɛ́ nè nɛɛyen əbnəə wɛ Feyine koŋen loolen se ɛykuo, é Feyine me lak wɛ̀.

¹⁵Jesus suuy dì ɛ leghɛ, wel əblee wɛ ghene ghene nè yiɛn me bente ge: Ke lu kejuŋ se wel wɛ əb yî yiɛ ɛ kelik ɛysak nə Feyine.

¹⁶Jesus me fiɛl se wen ge: Wel əblee nè lô se baate se yiɛse ghel, è me bee ghel naa se ɛydio.

¹⁷Əbliye tene nɛy kwɛn, əb tum wel ɛyfɛl nə wen ge əb ndu è suuy se ghel ghɛ əb nè been ge: Ghɛn gwiy, əbfua əbjime shi əbbaaten.

¹⁸Əb ndu è teefe ɛ leghɛ, ghene me kɛɛte se yɛ lone jii femok femok. Wele wɛ̂ mbiy suuy ge: Mɛ ne lô yun ɛylem, nɛ̀ mɛ lu se ndu se kiynen. Kiy wɛ̀ ghàà ghɛn yɛ ghame mɛ.

¹⁹Əb yɛn əblee, əb suuy ge: Mɛ chî yun naase ɛylem nə mɛ ɛyvəm nɛ mɛ se shike se mom. Kiy wɛ̀, ghàà ghɛn yɛ ghame mɛ.

²⁰Əb yɛn əblee, əb suuy ge: Mɛ kooy wiy ə wom kɛn ɛ əbchii fɛn, nɛ loo mɛ jia gwiy.

²¹Wel ɛyfɛl vi fiile è fekte ɛyjɛl ə wen se ba-ɛyfɛl nə wen. Babɛy vi yio ke yaf wen naa se ŋaŋ, əb gese tum wel ɛyfɛl nə wen vi ge: Ndu ɛ jiise naa sejim ɛ məme ntɛk chikiy chikiy, è gwiy nɛ̀ ghɛ́ ketane, nɛ̀ ghel ɛləmmene ka əbnfefe nɛ̀ ɛngɛsene.

²²Əb ndu, è gwiy, è suuy ge: Babɛy, mɛ jɛlmen ka wɛ̀ kè suuyen, kelike gese bɛɛse.

²³Ba ɛyfɛl vi me gese suuy se wen ge: Ndu ɛ leenen è jɛl jii setaa gese nɛ̀ əbfiaŋe, è lam é ghele gwiy, ka ndaa ə yome lun.

²⁴Mɛ suuy se ghɛn ge, wel wiy ɛ məme ghel ghɛ mɛ nè been se mbiy ghi wɛ əb nɛ̂y ləmte əbfua-əbyíɛ́ne nə mɛ.

²⁵Jesus se nduu nɛ feliɛ wele chem ɛ wen ɛybam, əb benle è suuy se ghene ge:

²⁶Naa ndɛ wɛ əb gwiyen se mɛ, è jia yɛ koŋe mɛ chia ka əb koŋen ba ə wen ghene no ə wen, koŋe wiy mɛ chia ka əb koŋen wiy ə wen nɛ̀ ghon ə wene, koŋe wiy mɛ chia ka əb koŋen ghone-no ə wen, gese koŋe wiy mɛ chia naa ka əb koŋen ngeŋ ə wen, lòó əb jia yɛ lu wán-ɛyfɛl nə mɛ.

²⁷Naa ndɛ wɛ əb gwiyen ɛ mɛ ɛybam è jia yɛ lu kebaaten se bɛɛy kentam ə wen se yɛ jɛl so ɛ mɛ ɛybam, lòó əb jia yɛ lu wán-ɛyfɛl nə mɛ.

²⁸Wele ghɛn lɛ kɛŋe se bakle ndaa ɛyghaken, é əb jia chia mbiy è feknen ge yi sɛ ki əbkaa əbkwɛnen ka lòó yi baklé so é ɛy mɛy-a?

²⁹Əb jia feknen dì, è vii kɛn ketiɛ, è jia bàklè ndaa, é ghel ɛjim ghɛ ɛ́ yɛnen me yɛ chɛke wen,

³⁰suuye ge: Biɛ vin chî kɛɛte kebakle, ke ghak wen.

³¹Kene əbfon lɛ kè ki ghel ɛyghoŋ nkam ɛyvəm è taame ɛyghoŋ se əbfon əblee nɛ əb ki ghel ɛyghoŋ nkam əmbaa, é əb jia kɛɛte è diom, è kwaate ge sɛ lòó ghel ə ghii ghɛ nkam ɛyvəm noo ghɛ nkam əmbaa-a?

³²Əb loo kiynen, ke ghak, é əb tum ghel ɛ́ ndu è yɛn əbfone vi di nɛ əb bo bɛɛy naa əbtəm è beŋte é kenəə tene chia.

³³Ke me se lu ge naa ndɛ ɛ ghɛne məm wɛ əb báà fəyse ɛytem se wen ə əbfua wɛ əb kiin əbjim, è yɛ jumte mɛ, lòó əb jia yɛ lu wán-ɛyfɛl nə mɛ.

³⁴Kéné ghɛn ke ge fengwaŋe lu kefaa kejuŋe, dî nɛ fe lòò è jia yɛ lem, fene jii wiy yɛ lòó ɛ́ nɛɛy é fe kase lem.

³⁵Fe loo è jia gese yɛ lem, fene shi kefaa lólò nɛ̀ lòó ɛ́ səs kɛn səsen bek ge fe báà cheme gese jof se ɛylem, nɛ lòó fe jia bo nɛɛy é kelike bol. Naa ndɛ wɛ əb kin əbtuule se yio, əb yio.