Read Oku Luk 17 Bible Online

Luk 17 - Oku bible

Luk 17

¹Jesus suuy se ghon-ɛyfɛl nə wene ge: Əbnəə wɛ əb nɛɛyen nɛ ghele nɛɛye mbeese tiy se gwiy, dî nɛ lòn lu se wel wɛ əb lɛɛsen wel ge əb nɛɛy mbee.

²Lòó ke yɛ lu kejuŋ se wen ɛ lefɛ ɛ́ chəŋen ɛytiye keban ɛ wen ə kendoŋ, è tin se jio ɛyghuy chia ka əb yɛ lu se nɛɛy ge wel se ɛtɛlɛɛ ghine nɛɛy mbee.

³Ghɛn toknen. Loo lu wan-no ə viɛ nɛɛy mbee, wɛ̀ kwanten wen. Əb kubsen ɛytem ə wen, wɛ̀ lɛyse mbeese wen.

⁴Əb cheme nɛɛy mbee se wɛ̀ kaŋ saamba se kechii, è gwiy se wɛ̀ kaŋ saamba è suuy ge: Mɛ kubsenmen ɛytem ə yom, fene wɛ̀ tiy se lɛyse mbeese wen.

⁵Ghɛ ntum nə Jesuse nɛy loo è suuy se wen ge: Báàba, giamten ghɛs é ghɛs loote fo ɛytem se Feyine.

⁶Báàba me fise ge: Ghɛn kè boy se yɛ lu nɛ ɛ́ fó ɛytem se Feyine naa kɛn se ɛylaay ka ɛyshiɛ ngose fekak ɛylaytene, fene lòó ghɛn suuy se ndaa fekak yin ge: Məəke è lii, è yiɛte ngeŋ ə yiɛ ɛ məme jio ɛyghuy; é fe me nɛɛy kɛn ka ghɛn suuyen.

⁷Wel lɛ lu ɛ ghɛne məm wɛ əb kiin wel ɛyfɛl, əb yese è lem, kene əb yese è kiynen se bvəyse è kfəəy, é əb suuy se wen ge: Gwiye chikiy chikiy è diom è yɛ yiɛ-a?

⁸Ɛngaŋ! Lɛ lòó wɛ̀ sɛ́y jia suuy se wen ge: Fɛle əbfua-əbyíɛ́ne nə mɛ, è mak ndəy sejuŋe, è me chiase əbfua-əbyíɛ́ne se mɛ é mɛ yíɛ́ è nəə nɛ wɛ̀ geese yɛ yiɛ-a?

⁹Lɛ lòó wel nɛ̂ vi bɛɛle wel ɛyfɛl nə wen se ɛyfɛl nɛ̂ yin yɛ əb kè làmen əb fɛl-a?

¹⁰Ko lu sɛ̂y ka kɛne luun. Ghɛne nɛ̂y nɛɛy əbnəə əbjim wɛ ɛ́ làmen ge ghɛn nɛɛy, ghɛn suuy kɛn ge: Ghɛs lu ghel ɛyfɛle ghɛ nchɛke, ghɛse nɛɛy kɛn kenəə kɛ ghɛs luun se nɛɛy.

¹¹Jesus nɛy loo ndu ɛ Jolesalem è se chia jii əbkwiy nə Samalia ghene Galilee.

¹²Se lu ka əb nè nduunmen è loo lii ɛ ntɛk ɛylee, è baksen ghel ɛyvəm nɛ ɛ́ yafe nɛ̀ kensaase. Ghene me teem ɛ əbtəm,

¹³è se jaŋe ketaan ge: Jesus, Babɛy, ko koosen ɛysen se ghɛs.

¹⁴Jesus yɛn ghene è suuy se ghene ge: Ghɛn ndu è din ngeŋ ə sɛn se ghɛ́ ntaŋlee. Ghene loo ndu, è me yɛn ge ghene bonenmen.

¹⁵Ghene yɛn dì, wel əblee ɛ ghene məm me kase fiile è se kokse Feyin ɛ giɛ ɛytaa.

¹⁶Əb ndu è təm ɛləy ɛ Jesus ɛyshiɛ è se foo ɛykokse se wen. Wel nɛ̂ vin nè lu wele wɛ̂ Samalia.

¹⁷Jesus me suuy ge: Ɛ́ lɛ kè báà chuk ghel ɛyvəm-a? Ghɛ buumoke ghááy?

¹⁸Gwiy kɛn wele ketum vin ge yi kokse Feyin-a?

¹⁹Jesus bif dì è me suuy se wel vi ge: Loole, è yɛ ndu nɛ̀ fiɛ, wɛ̀ bonenmen bek ka wɛ̀ foon ɛytem se mɛ.

²⁰Ghele kenone Falisee ɛlee nɛy loo è bif se Jesus ge ɛysak ə Feyin sɛ nɛ̂y gwiy ɛ leghɛ-a? Əb fise ge: Ɛysak ə Feyin nɛ̂y loo gwiy é kefaa jia din.

²¹Nɛ wele jia yi suuy ge: Yɛn-a! Əb vine, kene ge: Əb vii dii, bek ge ɛysak ə Feyin lu ɛ ghel ə tetem.

²²Əb me suuy se ghon-ɛyfɛl nə wene ge: Əbliye gwiye wɛ ghɛne nɛ̂y yɛ shii se yɛne Wanwel cheme kɛn se kechii kemok, è jia yɛn.

²³Ghele nɛ̂y yɛ suuye se ghɛn ɛ əbliy fo ge: Yɛn-a, əb vii dii kene ge əb vine! Ɛ́ loo suuy dì ghàà ghɛn ndu fo.

²⁴Mɛ suuy lɛ bek ge, Wanwele nɛ̂y loo fiile, ɛ́ yɛn nɛ ke lu ka ɛyghuu sɛɛ liak, ɛyyio ban è kal è tas.

²⁵Dî nɛ əb chia mbiy è yɛn ngɛk ɛ əbnəə se ɛydio, é ghele ghɛ́ ntem fɛne maa wen.

²⁶Kɛn ka ke nè yi ganen ɛ əmchii nə Noa, Wanwele nɛy loo gwiy, é əbnəə yɛ gan.

²⁷Ghele nè lô se yíɛ́, nəə gese fiisen əbjen se chin se kechii kɛ Noa nè liin se kenək keghakene. Jio naa lun è yuyte ghel ɛjim ghɛ ɛ́ nè wiyen ɛ kenək fɛy.

²⁸Əbnəə náà gan kɛn ka əb nè yi ganen ɛ əmchii nə Lot. Ghene nè lô se yíɛ́, nəə, kamnen əbwɛy, yiɛte əbfua gese bakle ndaase.

²⁹Naa se lu ɛ kechii kɛ Lot nè lòòn se Sodom, Feyine səkse əbvəs ghene kefuu əbvəs ka gwiye ɛyghuu dì, əb nyok ghene ghel ɛjim.

³⁰Lu ka ke yî yɛ lu ɛ kechii kɛ Wanwele yɛnsen ɛ ten.

³¹Yî loo lu ɛ kechii fo, wele yɛ lu ɛ ketuu ndaa, nɛ əbfua ə wene lu ɛ məme ndaa, ghàà əb səəke ge yi liɛ, ghɛɛ-ghɛɛ ka yî yɛ lu nɛ wel lu ɛ ɛylem, ghàà əb kfəəy.

³²Ghɛn kuume kenəə kɛ ke nè ganen se wiy ə Lot.

³³Naa ndɛ wɛ əb luŋen se babte ɛychii ə wen é náà lɛy ɛyghene, nɛ naa ndɛ wɛ əb lɛyen ɛychii ə wen é náà kiile ɛychii.

³⁴Mɛ suuy se ghɛn ge: Ɛ́ náà loo lu ɛ ntək fo, yɛ lu nɛ ghele lu əbkun ɛbaa é Feyine liɛ əblee, è vəse əblee se fo.

³⁵Əbkiye náà yɛ guo keban ɛbaa, é Feyine liɛ əbmok, è vəse əblee se fo.

³⁶Ɛluumene náà yɛ lu əbkwak ɛbaa é Feyine liɛ əblee è vəse əblee se fo.[3]

³⁷Ghon-ɛyfɛl nə wene me bif se wen ge: Báàba, əbnəə nɛ̂ vin yî gan ghááy? Əb fise ge: Lòó wɛ̀ keele bene fɛ kenkuo kefaa luun, se əmngum-ngume ka əb yɛ kaame fo.