Read Oku Luk 18 Bible Online

Luk 18 - Oku bible

Luk 18

¹Jesus me maa ngan yin se ghon-ɛyfɛl nə wene, se dinte se ghene ge ghene lu se yɛ jem əbliy əbjim bole wiy.

²Əb nè kɛɛte ge: Wel ɛysak əblee nè lô se lu ɛ ntɛk ɛylee, fane wiy Feyin, ngvəmle wiy ghel;

³nɛ wiy-nkfə əblee chii ɛ ntɛk fo. Əb nè lóó əb yɛ nduu se wel ɛysak vi lone wen ge: Kiy wɛ̀, fii mɛ se ɛghoo nə wel əbbaanese nə mɛ.

⁴Nè lu se əbtəm nɛ wel ɛysak vi bene wiy, è nɛy loo è suuy se ngeŋ ə wen ge: Chèmè lu ka mɛ fanen wiy Feyin, ngvəmle wiy ghel,

⁵mɛ tenen nsak ə wen bek ka əb fóon ngɛk san se ŋaŋ, buu dì é əb nɛ̂y yuy mɛ nɛ̀ ɛygwiye wene yɛ ŋaŋe.

⁶Jesus maa di, è suuy ge: Ghɛn lɛ lu nɛ ɛ́ yio kenəə kɛ wel ɛysak əbbee vin suuyen-a?

⁷Feyine lɛ jia nɛ̂y ben nsake ghel ghɛ əb chokenmen ge ghɛ́ wene ghɛ ɛ́ toŋen se wen nɛ̀ nchuy, nɛ̀ ntəke ge əb giamten ghene-a? Lɛ lòó əb nɛ̂y yɛ sekte sekten se giamten ghene-a?

⁸Mɛ suuy se ghɛn ge: Feyine nɛ̂y fiɛlé fiɛ́lén, è ben nsak ə ghen. Wanwel lɛ nɛ̂y loo gwiy, è baksen ghel ɛ ketuu ntiɛ fɛn ghɛ ɛ́ samsen se Feyine-a?

⁹Jesus maa sɛy ngan ɛylee se ghel ghɛ ɛ́ kwaaten ge ghene lu ghel ɛjuŋe, nyayse ghel ɛlee nyaysen ge:

¹⁰Ghel ɛbaa nè lô kok ɛ ndaa-ɛykokse se jem, əblee nè lu wele Kenone Falisee, nɛ əblee lu wel ɛyfii shile.

¹¹Wele Kenone Falisee vi kokte, è teem wen nyiŋ è se jeme kum ngeŋ ə wen ge: Mɛ bɛ́ɛ̀lè wɛ̀ Feyine bek ge mɛ báà se lu ka ghel ɛlee. Mɛ choŋe wiy, nɛɛye wiy mbee, liɛ wiy əbkiy ə ghel, naa ɛŋaŋ ɛŋaŋ mɛ wiy ka wel ɛyfii shile vin.

¹²Mɛ bame əbfua-əbyíɛ́ne kaŋ ɛbaa se əbwɛy, mɛ giate əbfua ə wom əblik ɛyvəm, mɛ fo kelik kemok se wɛ̀.

¹³Wel ɛyfii shile vi teem ɛ ɛybam ɛybam, è jia cheme lose ketuu se kiye Feyin, soo ketuu, è vii əmwɛm è suuy ge: Koosen ɛysen sane Feyine bek ge mɛ lu wele mbeese.

¹⁴Mɛ suuye se ghɛn ge wel ɛyfii shile vi nè chio se wen ə ndaa lu kelanen ɛ ɛyshiɛ nə Feyine chia wele kenone Falisee vi. Bek ge Feyine nɛ̂y səkse naa ndɛ wɛ əb yion əbghun, è lose naa ndɛ wɛ əb liɛn ngeŋ ə wen ɛ ntiɛ.

¹⁵Ghel ɛlee nè gwiy nɛ̀ ghon ɛtɛlɛɛ ge Jesus kum nɛ̀ keghoo nzəətee. Ghon-ɛyfɛl nə wene yɛn, è sɛ́y se yole ghene yolen.

¹⁶Jesus me jaŋ ghone ten è suuy ge: Ghɛn vəse é ghene gwiy se mɛ, ghàà ghɛn se jum ghene bek ge Feyine koŋe ghel ghɛ ɛ́ liɛn ngeŋse ghen ka ghon ɛtɛlɛɛ.

¹⁷Mɛ suuye əbluuy se ghɛn ge: Naa ndɛ wɛ əb báà beeme ɛysak ə Feyin ka wán əbtɛlɛ, jia yî lii se ten.

¹⁸Wele mbiy əblee nɛy bif se wen ge: Ndinte, wɛ̀ lu wel əbjuŋ. Lòó mɛ nɛɛy ghɛ se geese kiile ɛychii yɛ ɛy jia yî mɛy?

¹⁹Jesus fise ge: Lu bek ghɛ wɛ wɛ̀ toŋten mɛ ge wel əbjuŋ. Wel əbjuŋ báà se lu buu kɛn Feyin wen nyiŋ.

²⁰Wɛ̀ ke nchil sɛ ge: “Ghàà liɛ wiy ə wel, ghàà yuy wel, ghàà yɛ choŋ, ghàà toy kenəə ɛ wel əbghun, ngvəmle ba ə viɛ ghene no ə viɛ-a.”

²¹Wel vi suuy ge: Mɛ nè se lɛme tesak tin tejim se kɛ̀ɛ̀tè se əmtɛlɛ.

²²Jesus yio kii nɛ̂ kine, è suuy se wen ge: Kenəə bɛɛy kemok kɛ lòó wɛ nɛɛy. Ndu, è feene əbfua ə viɛ əbjim, è fo əbkaa ten se ghɛ ketane, è me yɛ jumte ɛybam ə yom, wɛ nɛɛy di é wɛ̀ me yɛ ki əbghaake ɛyyio.

²³Əb yio dì è soo ketuu bek ka əb nè kiin ɛykɛŋ naa se ŋaŋ.

²⁴Jesus kiy wen è suuy ge: Ketaa ka wel wɛ əb kiin ɛykɛŋ se ŋaŋ lii se kelik ɛysak nə Feyine.

²⁵Ke bonen se nyam fenkok se chia ɛ kebuke tas chia ka wel əbghaken yɛ lu wel əblee ɛ məme ɛysak nə Feyine. [4]

²⁶Ghel ghɛ ɛ́ nè yion suuy ge: Ke lòò è yɛ lu dì, fene naa boy ndɛ?

²⁷Jesus fise ge: Kenəə kɛ ke ghaken ghel lu nɛ lòó ke jia ghak Feyin.

²⁸Bita me suuy ge: Yɛn-a! Ghɛs vəsemen əbnəə ə wɛs əbjim è se jumte ɛybam ə yiɛ.

²⁹Jesus me suuy se ghene ge: Mɛ suuye əbluuy se ghɛn ge: Wel wiy wɛ əb vəsen kebɛy ə wen, kene wiy ə wen, kene ghone-no ə wen, kene ba ə wen ghene no ə wen, kene ghon ə wen bek kelik ɛysak nə Feyine,

³⁰é əb náà buu se kiile əbdione ɛ mbi fɛn gese nɛ̀ ɛychii yɛ ɛy jia yî mɛy ɛ mbi yɛ ɛy gwiyen.

³¹Jesus nɛy lòò è liɛ ghɛ ntum nə wen ghɛ njio-sebaa ɛyvəm ghene ghene bak əbghun, əb suuy se ghene ge: Kiy mba! Ghɛsen se koke ɛ Jolesalem ghaa əbnəə əbjim wɛ ghele ntum nə Feyine nè nyakenmen kum Wanwele nɛ̂y kwɛn.

³²Ɛ́ nɛ̂y fo wen se ghel ghɛ báà se lu ghele Islael, ɛ́ buu wen, è tɛyle wen, è tio teliɛ ɛ wen ɛykek.

³³Ɛ́ nɛ̂y tɛl wen, è yuy, é əbchii lun əbtal, əb kase loole se ɛykuo.

³⁴Ghon-ɛyfɛl ghi jia keele əbnəə wɛ əb suuyen. Ghene nè báà keele əbnəə wɛ tene bek ka Feyine nè leten se ghene.

³⁵Jesus nɛy loo bɛɛte Jeliko, è yɛn kenfef nɛ ke diom ɛ ɛyghaŋe jii è se lone əbfua.

³⁶Ke yio ka kenone ghele chian, è bif ge sɛ gane ghɛ-a?

³⁷Ɛ́ suuy se wen ge: Chia Jesuse wɛ̂ Nazalet.

³⁸Əb me jaŋ ketaan ge: Jesus wɛ wán Əbfon wɛ David, koosen ɛysen se mɛ.

³⁹Ghel ghɛ ɛ́ nè nduun ɛ mbiy se wamnen wen suuye ge: Yɛɛ lu ɛ chichi. Əb sɛ̂y gese jaŋ ketaan ge: Wan Əbfon wɛ David, koosen ɛysen se mɛ!

⁴⁰Jesus teem è suuy ge, ɛ́ gwiy nɛ̀ wen se yi, ɛ́ gwiy so, Jesus bif se wen ge:

⁴¹Wɛ̀ kɛŋe ge mɛ nɛɛy ghɛ se wɛ̀? Əb fise ge: Báàba, mɛ kɛŋe se yɛ yɛn əblik.

⁴²Jesus me suuy se wen ge: Yɛɛ yɛne əblike. Ɛytem yɛ wɛ foon san nɛɛymen wɛ̀ bonen.

⁴³Ka Jesus suuyen dî ɛ leghɛ, ɛshiɛ kenfef ki me yìàse, əb se jumte ɛybame Jesus foo ɛykokse se Feyine.