Read Oku Luk 21 Bible Online

Luk 21 - Oku bible

Luk 21

¹Jesus mak ɛshiɛ è yɛn ka ghɛ əmkaa viin tefoo ə ghen se kekaŋe kɛ ndaa-ɛykokse.

²Əb yɛn sɛy ka wiy-nkfə əblee, nɛ lu wele ketan chemsen ɛshiɛ əbkaa ɛbaa se kekaŋ fo.

³Əb me suuy ge: Mɛ suuye əbluuy se ghɛn ge, wiy-nkfə wɛ luun wele ketan vin lu nɛ əb fó è chia kɛ wel əbjim foon.

⁴Wel əbjim ke bɛse fefafa ɛ məme əbdione foo, dî əbvii vin ka chèmè luun wele ketan lɛ, kfəte kebam ə wen è fo, nɛ shi mɛy-mɛy ə wen dì.

⁵Ghon-ɛyfɛl nə wen ɛlee se bensen ɛtiy ghɛ ɛ́ nè bomen ndaa-ɛykokse so gese nɛ̀ əbfua əbjuŋe əblee wɛ ghele nè foon se Feyine, Jesus me suuy ge:

⁶Əbliye gwiye wɛ̀ ɛ́ nɛ̂y sakte ndaa-ɛykokse yin yɛ ghɛne nəmlen, é ɛytiy ɛylee jia yɛ nyiŋ ɛ ɛylee ketuu.

⁷Ghene bif se wen ge: Ndinte, əbnəə vine naa gan ɛ leghɛ? Əbchəyte wɛ əb naa din ge əbnəə vin shi se gan, lu əb kɛ?

⁸Jesus fise ge: Ghɛn yɛ toknen fɛ wel náà lɛɛse ghɛn. Ghele naa fəy se ɛydio è lɛɛse ghel nɛ̀ ɛyghel ə yome suuye ge: Lu mɛ mboyse, gese suuye ge: Əbliye kwɛnmen. Ghàà ghɛn naa yiote se ghene.

⁹Ghɛne náà yio ge ɛyghoŋe lu, gese nɛ̀ ge ghele bo yionen wiy, ghàà ghɛn yɛ fan. Əbnəə vine lu se naa se gan, dî nɛ báà se lu ge mbi se mɛye kɛn se əbliy.

¹⁰Əb me gese suuy se ghene ge: Ghel ɛylak ɛylee náà yɛ noo ghel ɛylak ɛylee, nɛ̀ əbfon ghene ghel ə wen təme ɛyghoŋ ghene ghe əbfon əblee ghene ghel ə wene.

¹¹Ntiɛ naa yɛ shiken ketaan ketaan, nɛ̀ jeŋ ghene teyafe yuyte ghel ɛ əblik əblik. Əbchəyte əbnəə əbchio əbyúméné náà yɛnsen ɛ ɛyyio se fanse ghel.

¹²Nɛ əbnəə vine geese gan lu nɛ ɛ́ nɛ̂y koo ghɛn è nyable so, è sak ghɛn ɛ ngayse ɛyjem è tinse se nchak. Ɛ́ nɛ̂y liɛ ghɛn é ghɛn teem ɛ tefone ghene ghɛ ɛysake ɛyshiɛ bek mɛ.[5]

¹³Kine nɛ̂y yɛ lu nsan yɛ ghɛne chia ɛ ten è fekte kenəə ə Feyin se ghene.

¹⁴Ghɛn ghal tetem ə tɛn è jia yɛ kwaate ge ghɛn sɛ nɛ̂y suuy gee ghɛ ɛytiy ə nsak-a?

¹⁵Bek ge mɛ náà fo ghɛn nɛ giɛse ɛytof, é mbanen ə sɛne jia yɛ lu kekwɛnten se tunse kenəə kɛ ghɛne suuyen.

¹⁶Ghel ghɛ ɛ́ naa fo ghɛn se mbanen ə sɛne lu ɛbaa ə ghɛn ghene ɛnoo ə ghɛne, nɛ̀ ghone-noo ə ghɛne, nɛ̀ ghele ndaa nə ghɛne gese nɛ̀ sun ə sɛne. Ghene náà nɛɛy ɛ́ koo ghɛn ɛlee è yuytê.

¹⁷Ghel ɛjime náà yɛ bane ghɛn bek mɛ.

¹⁸Dî nɛ nəŋ ketuu ɛymok nə wel se ghɛne jia yî lɛy se nkan.

¹⁹Ghɛn teem yi ketaan, é ghɛn naa kiile ɛyboy.

²⁰Ghɛne naa yɛn nɛ ghɛ ɛyghoŋe gim Jolesalem è kaale è tas ghɛn yɛ ke ge shi əbliy wɛ ɛ́ sakte fo.

²¹Ke náà gan di, é ghel ghɛ ɛ́ luun ɛ Judea nyiŋke, è kok se kfənse, é ghɛ ɛ́ luun ɛ ntɛk fo fəyke, é ghɛ ɛ́ luun ɛ ntɛkse jia ndu fo.

²²Mɛ suuy lɛ bek ge əbliye tene nɛ̂y yɛ lu əbliy wɛ Feyine mak ngɛk se Islael se nɛɛy ge əbnəə wɛ ɛ́ nè nyakenmen ɛ wen ə ŋwaale kwɛn.

²³Ke yi yɛ bef se əbkiy ghɛ ɛ́ luun nɛ̀ əmlɛɛme gese se əbkiy ghɛ ɛ́ kiin ghon ɛbole ɛ keleŋ əbliy fo. Feyine nɛ̂y yafse ɛytem se wel əbjim ɛ Islael é ghel ɛjim ɛ ketuu ntiɛ yɛn ngɛk ɛytaa.

²⁴Ɛ́ naa gwɛte ɛlee gwɛten, è koote ɛlee è vii se nchak ɛ əbtum əbchine. Ghel əbtume naa nəkse Jolesalem se chin ka əbliye ghene nɛ̂y kwɛn.

²⁵Ɛ́ náà loo lu ɛ əbliy fo, é əbnəə əbbɛɛmene gan se chuy, nɛ̀ njoŋ gese nɛ̀ əmjesme. Telak tejim ɛ ketuu ntiɛ náà yɛ ki ngɛkse, nɛ̀ wel əbjim fane jii yɛ jio se ghakene dəmken gese loolee.

²⁶Ghele náà yɛ fan, chiŋe bek ge ghene kwaate ge əbnəə əbtaa shi se gan ɛ mbi bek ge ɛ́ nɛy yɛ lu dî nɛ Feyine shike əbfua wɛ əb luun ɛ ɛyyio.

²⁷Ɛ́ me yɛn nɛ Wanwel gwiye ɛ məme mbàkse nɛ̀ əbtaawe gese nɛ̀ əbghaakee.

²⁸Ghɛne naa yɛn ka əbnəə vin kɛɛten se gan, ghɛn teem è lose əbtuu ə wɛn bek ge Feyin shi se tene ghɛn.

²⁹Jesus me maa ngan yin se ghene ge: Ghɛn kiy kegvəm gese nɛ̀ əmkak əmlee.

³⁰Ghɛne yɛn nɛ əm se tooke, ghɛn me keele ge ɛyghuu shi se guo.

³¹Lu ghɛɛ-ghɛɛ ka ghɛne náà yɛn əbnəə vin nɛ əb se gane ghɛn me keele ge əbliy ɛysak nə Feyine se baksene.

³²Mɛ suuy əbluuy se ghɛn ge, ghele ghɛ́ ntem fɛne jia naa kuo è mɛy nɛ əbnəə vin əbjime báà gan.

³³Ɛyyio ghene ntiɛ náà mɛy dî é giɛse ə some jia naa shiken.

³⁴Ghɛn toknen, buu dì, é tetem ə tɛne lun nɛ əbnəə ka ɛyyiɛ yɛ ŋaŋe, ɛynəə, nɛ̀ nkwaatese ɛychii yɛ́ fɛne, é kechii tene náà koo ghɛn ka ketâm dì.

³⁵Mɛ suuy lɛ bek ge ke naa gwiy ka ketâm kɛ ke koo wel əbjim ɛ ketuu ntiɛ.

³⁶Ghɛn yɛ lu kebaaten əbliy əbjim jeme ge Feyine boyse ghɛn se əbnəə ghan, é ghɛn nɛy yɛ lu kekwɛnten se teem ɛyshiɛ nə Wanwel.

³⁷Jesus se dinte əbnəə se ghele ɛ ndaa-ɛykokse əbchii əbjim, loo lu ɛ likfəəy əb lòò è kok se chii ɛ kfən kekoo Olif.

³⁸Nè loo lu ɛ bvəse bvəse, ghel ɛjim kaale ɛ ndaa-ɛykokse se yɛ yiote se wen.