Read Oku Luk 22 Bible Online

Luk 22 - Oku bible

Luk 22

¹Əbliy ɛyyiɛ keban kɛ tóó ghàà feshik è kaŋ, wɛ ɛ́ ko nè toŋten sɛy ge wɛ ɛyboyse, me se baksene.

²Ghele mbiy se ghɛ́ ntaŋlee nɛ̀ ghɛ ɛ́ nè dinten tesake me se kɛŋe ge sɛ lòó ɛ́ jɛl lɛɛy se geese yuye Jesus-a? Bek ka ghene nè fanen ngose wel yɛ ɛy nè lóó ɛy yɛ lu ɛ Jesus ɛybee.

³Satan me lii se ɛytem nə Judas wɛ ɛ́ nè toŋten ge Iskaliot, wɛ nè luun wel əblee ɛ məme ghon-ɛyfɛl nə Jesus ghɛ njio-sebaa ɛyvəm.

⁴Əb me ndu è yɛn ghele mbiy se ghɛ́ ntaŋlee, ghene əbtuu se ghel ghɛ ɛ́ chiyen ndaa-ɛykokse Feyin, ghene ghene se siyse jii yɛ əb nɛ̂y din Jesus ɛ́ koo.

⁵Ghene yio kii nɛ̂ kine, è se saŋlee, è me lɛm ge ɛ́ nɛ̂y fo əbkaa se wen.

⁶Judas me beeme, è se kɛŋe jii yɛ lòó əb din Jesus ɛ́ koo nɛ ghele ke wiy.

⁷Kechii kɛ ɛ́ sɛɛn wán keyak ɛ ten ɛ əbliy ɛyyiɛ keban kɛ too ghàà feshik, è kaŋ ki nɛy kwɛn.

⁸Jesus me tum Bita ghene Joon, è suuy se ghene ge: Ghɛn ndu è siyse əbfua-əbyíɛ́ne ɛyyiɛ Kechii Ɛyboyse, é ghɛsen nɛ̂y yiɛ.

⁹Ghene me bif se wen ge: Kelik kɛ wɛ̀ koŋen ge ghɛs fɛl əbfua-əbyíɛ́ne nɛ̂ vin ɛ ten lu ghááy?

¹⁰Əb suuy se ghene ge: Yɛn-a! Ghɛne loo lii ɛ ntɛk, é ghɛne ghe wel konen nɛ əb bɛɛy nton ə moo. Ghɛn ndu ɛ wen ɛybam è lii ɛ ndaa yɛ əb lii ɛ ten,

¹¹è suuy se ba ə ndaa fo ge: Ndinte bife ge ɛybee ndaa nə ghel ɛyghane yɛ ghene ghe ghon-ɛyfɛl nə yii nɛ̂y yiɛ Kechii Ɛyboyse ɛ ten se yaay-a?

¹²É əb me din kelik se ghɛn nɛ ke ghake ge ɛybee ndaa yɛ ɛyyio nɛ ɛ́ loote siyse, é ghɛn me fɛl əbfua-əbyíɛ́ne ten fo.

¹³Ghene me lòò è ndu ɛ ntɛk fo, è yɛn əbnəə əbjim nɛ əb lu kɛn ka Jesus kè suuyen, è fɛl əbfua-əbyíɛ́ne ɛyyiɛ Kechii Ɛyboyse fo.

¹⁴Əbliye nɛy kwɛn, Jesus ghene ghe ghɛ ntum nə wene me diom kelik kemok se yɛ yiɛ.

¹⁵Əb suuy se ghene ge: Mɛ kè lô se loote ki shii ge ghɛsen yiɛ Kechii Ɛyboyse kin nɛ mɛ geese yɛne ngɛk.

¹⁶Mɛ suuye se ghɛn ge: Mɛ jia bo yî yiɛ əbfua-əbyíɛ́ne nɛ̂ vin se chin ka kenəə kɛ kum əbghene nɛy kwɛn ɛ əbliy wɛ Feyine saken.

¹⁷Əb me liɛ əbbom əmnduk, è bɛ̀ɛ̀lè Feyin è suuy ge: Ghɛn ko è giate è kal è konen.

¹⁸Ghɛn yɛ ke ge mɛ jia bo yî nəə əmnduk min se chin ka ɛysak ə Feyine yî gwiy.

¹⁹Əb liɛ keban, è bɛ̀ɛ̀lè Feyin è bɛkte è fo se ghene, è suuy ge: Kine lu əbghun ə wom wɛ mɛ fó bek ghɛn. Ghɛne yese, ghɛn yɛ nɛɛye ɛ jii ghan se yɛ kuume mɛ.

²⁰Ghene mɛyse ɛyyiɛ, əb liɛ əbbom əmnduk, è jɛl kɛn so ɛ jii nɛ̂ ghan è suuye ge: Əmnduk min lu kelek kefɛɛ ke kum əmnduŋ mə mom mɛ əm lɛŋen bek ghen.

²¹Dî mba, nɛ wel wɛ əb nɛ̂y din mɛ ɛ́ koo lu fɛn, yiɛ ghɛse wen kɛl ɛymok.

²²Wanwele nɛ̂y kuo ka Feyine nè kakenmen, dî nɛ lòn lu se wel wɛ əb nɛ̂y din wen ɛ́ koo.

²³Ghene me kɛɛte è se kante se ghene ngeŋse ge sɛ lu ndɛ ɛ ghene məm wɛ əb nɛ̂y mom kenəə nɛ̂ kin-a?

²⁴Ghene me gese kɛ̀ɛ̀tè se yɛ bek ge sɛ lu ndɛ ɛ ghene məm wɛ əb chian ghel ɛjim-a?

²⁵Jesus me suuy se ghene ge: Tefon əbtume ki əbtaawe se yɛ sake ghele ghen, nɛ̀ ghel ghɛ ɛ́ saken ghel kwante ghele ten ge ɛ́ yɛ toŋte ghene ge ngiamtense.

²⁶Dî nɛ ke báà se lu se yɛ lu dî se ghɛn. Wel wɛ əb chian ghel ɛjim ɛ ghɛne məm lu se yɛ lu ka wán əbtɛlɛ, nɛ̀ wel ɛ mbiy lu se yɛ fɛl Ka wándɛ.

²⁷Wel wɛ luun ketuu lu ndɛ? Wel wɛ əb diom, ɛ́ gwiy nɛ̀ əbfua-əbyíɛ́ne se wen moo wel wɛ əb gwiyen so-a? Lɛ báà se lu wel wɛ əb diom, ɛ́ gwiy nɛ̀ əbfua-əbyíɛ́ne se wen-a? Dî nɛ mɛ fɛle ɛ ghɛne məm Ka wándɛ.

²⁸Ghɛn lu ghel ghɛ ɛ́ kulen ɛytem, è gok ghɛsen ɛ mɛ ɛymomse.

²⁹Mɛ me se foo əbtaawe ɛysak se ghɛn kɛn ka Ba ə wom nè foon se mɛ.

³⁰Mɛ yî loo sak əbfon ə wom, é ghɛsen yɛ yíɛ́ gese nəə kelik kemok, é ghɛn kok kabase, è yɛ sake tekfəə ghele Islael tɛ njio-sebaa ɛyvəm.

³¹Jesus nɛy lòò è mbaate Bita ge: Simon, Simon, Satan lonmen jii se fɛfte ghɛn ka wel fɛfte ɛsaŋ.

³²Dî nɛ mɛ lu nɛ mɛ jem se wɛ̀ Simon ge Feyine nɛɛy é wɛ̀ teem ketaan ghɛne wen. Ɛ́ nɛ̂y loo lu ɛ əbliy wɛ wɛ̀ kasen è fiile se mɛ é wɛ̀ giamten ghone-no viɛ.

³³Bita fise ge: Báàba mɛ lu kebaaten se lii ɛ nchak ghɛsoo, se gese se kuo ghɛsoo.

³⁴Jesus suuy se wen ge: Bita, mɛ suuy se wɛ̀ ge kɛn nɛ̀ ntəke lan lumngvəə nɛ̂y yɛ ghan ge əb toŋ nɛ wɛ̀ maamen mɛ kaŋ ɛtal.

³⁵Əb me gese suuy se ghene ge: Nè lu əbliy wɛ mɛ nè tumen ghɛn ghàà əbkaa, ghàà kebam, ghàà guose ɛvəə, ghɛn nè lô tan kefaa? Ghene fise ge: Aay, wel nè báà tan.

³⁶Əb suuy se ghene ge: Kɛ́ leenene lu nɛ wel ki əbkaa əb liɛ, wele yɛ ki kebam əb liɛ, wele jia yɛ ki fiak, əb feene ndəyse kenton nə wen è yun fiak.

³⁷Mɛ suuy se ghɛn ge: Kenəə kɛ ɛ́ nè nyakenmen ɛ ŋwaale-Feyin kum mɛ lu se kwɛn. “Ɛ́ nè nyak ge: Ɛ́ nè chinten wen ghene ghele mbee.”

³⁸Ghene me suuy ge: Yɛn-a Báàba, fiakse shi fɛn sebaa. Jesus fise ge: Ke kwɛn di.

³⁹Jesus me lòò è kok ɛ kfən Olif ghaa əb nè lóó əb yɛ kok; ghon-ɛyfɛl nə wen kok ghene ghene.

⁴⁰Ghene kok è chin fo ɛ leghɛ əb suuy se ghene ge: Ghɛn yɛ jem fɛ ɛymomse nɛɛy é wel fɛy.

⁴¹Əb suuy di, è me vəse ghene è chia è ndute se ɛylaay, è təm ɛləy, è se jeme ge:

⁴²Ba ə wom, fii əbbome ngɛk vin se mɛ, ɛ lefɛ wɛ̀ koŋen. Dî nɛ lòó wɛ̀ nɛɛy kɛn ka wɛ̀ kɛŋen, ghàà nɛɛy nɛ lu ka mɛ kɛŋen.

⁴³Nchiy-ndaa-Feyin me səəke ɛyyio, è nɛɛy əb se ki əbtaawe.

⁴⁴Əb nè yio ɛylum se ŋaŋ, è me se jeme naa ketaan nɛ kezəksen ə wene chemke se ntiɛ ka əbmal əmnduŋ.

⁴⁵Əb mɛyse ɛyjem, è kase ndu ghaa ghon-ɛyfɛl nə wene kè luun, è yɛn nɛ ghene buune buunen bek nkwaate sɛ ŋaŋe.

⁴⁶Əb me bif se ghene ge: Lu bek ghɛ wɛ ghɛne buunen? Ghɛn loole, è yɛ jem fɛ ɛymomse nɛɛy é wel fɛy.

⁴⁷Ka Jesus suŋnen dî ɛ leghɛ kenone ghele fəy è gwiy fo, nɛ wel əblee ɛ məme ghɛ́ ntume ghɛ njio-sebaa ɛyvəm wɛ ɛ́ nè toŋten ge Judas dine jii. Əb kokte gwiy ɛ Jesus ɛybee è baamé wen.

⁴⁸Jesus me suuy ge: Judas, wɛ̀ baamé Wanwel ka wɛ̀ chakte chakten se din ge ɛ́ ko-a?

⁴⁹Ghon-ɛyfɛl nə Jesus keele kenəə kɛ ke loo è gan, è me bif ge: Báàba, ghɛs gwɛte nɛ̀ fiakse-a?

⁵⁰Wel əblee ɛ ghene məm me gwɛl kekos se ketuu se ghɛ́ ntaŋlee è kɛf ketuule kɛ əbkoy əbtaa.

⁵¹Jesus kɛy ge: Ke kwɛn di! È me kum ketuule wel vi, ke seese əbghun se fo.

⁵²Jesus me suuy se ghele mbiy se ghɛ́ ntaŋlee, nɛ̀ ghel ɛfɛ́lene ghɛ ndaa-ɛykokse Feyine gese nɛ̀ chɛɛ sɛ se kè gwiyen se koo wen ge: Ghɛn gwiy nɛ̀ fiakse gese nɛ̀ əbbule ge ɛ́ koo mɛ nɛ mɛ lu əbchoŋ-a?

⁵³Ghɛsen nè lóó ɛ́ yɛ lu ɛ ndaa-ɛykokse Feyine əbchii əbjim nɛ ghɛn koo wiy mɛ. Dî nɛ əbliy ə wɛne kwɛnmen, nɛ lu ɛ kediak nɛ mbi nfiine.

⁵⁴Ghene me koo Jesus è loo ndu nɛ̀ wen se bɛy nə ketuu se ghɛ́ ntaŋlee, Bita se nyiake gwiye kɛ wene naa əbtəm.

⁵⁵Se lu ka ɛ́ nè kwaayenmen əbvəs ɛ ɛyfume ntetembɛy fo, Bita me gwiy è diom ghene ghele è se yósê.

⁵⁶Wándɛ əbvii əblee wɛ əb nè fɛ́len ɛ bɛy fo yɛn ka Bita diom ɛ əbghun əbvəs, è loote kiy, è suuy ge: Wel vin nè lu sɛy ghene wen.

⁵⁷Bita maa, è suuy ge: Əbvii, mɛ báà se ke wen.

⁵⁸Se moote kɛn lɛ wel əblee gese yɛn Bita è suuy se wen ge: Wɛ̀ lu sɛy wele ngoo nə Jesus. Bita fise ge: Əbluumen, mɛ wiy wel əblee.

⁵⁹Se lu ka keleŋ əbliy nè chian, wel əblee gese suuy ketaan ge: Ke loote lu se əbluuy ge wel vin lu wele ngoo nə Jesus bek ge əb lu wele wɛ̂ Galilee.

⁶⁰Dî Bita fise ge: Əbluumen, mɛ báà se ke kenəə kɛ wɛ toylen kin. Lumngvəə me toŋ kɛn se əbliy nɛ əb bo suŋnene.

⁶¹Báàba benle è soo ɛyshiɛ ɛ Bita əbghun, əb me kuume kenəə kɛ əb kè suuyen ge: Kɛn nɛ ntəke lan, lumngvəə nɛ̂y yɛ ghan ge əb toŋ nɛ wɛ̀ maamen mɛ kaŋ ɛtal.

⁶²Əb kuume di, è fəy ndu jii bɛy è kɛ̀sèn nɛ̀ ɛydiye.

⁶³Ghel ghɛ ɛ́ nè chiyen Jesus ghi me se buu Jesus gese tɛle.

⁶⁴Ghene kul ɛyshiɛ ə wen, è tɛl wen, è suuy ge: Chio ge sɛ tɛl ndɛ wɛ̀-a?

⁶⁵Ghene nè lô gese suuy əbnəə əbyafene se wen naa se ɛydio.

⁶⁶Əbtəke bvəs è yio, chɛɛ sɛ ɛylak foo, nɛ̀ ghele mbiy se ghɛ́ ntaŋlee gese nɛ̀ ghel ghɛ ɛ́ nè dinten tesak konen, è liɛ Jesus è ndu so se ghene ɛytiye nsak è suuy ge:

⁶⁷Loo lu nɛ lu wɛ̀ wel wɛ Vi wɛ Feyine nè Yiosen, wɛ̀ suuy se ghɛs. Əb fise ge: Mɛ suuy se ghɛn é ghɛn jia beeme kenəə kɛ me suuyen.

⁶⁸Nɛ̀ mɛ bif ɛybif se ghɛn é ghɛn jia fise.

⁶⁹Dî nɛ se kɛ̀ɛ̀tè ɛ leenen lu nɛ Wanwele nɛ̂y diom ɛ əbkoy əbtaa nə Feyine, Wɛ Ba-Əbtaawe-Əbjim.

⁷⁰Ghene ghel ɛjim bif ge: Ke dine ge wɛ̀ lu wán Feyin-a? Əb fise ge: Ke lu ka ghɛn suuyen.

⁷¹Ghene me suuy ge: Ghɛsen bo shii wiy wel ɛyshiɛ. Ghɛsen yiomen kenəə kɛ ke fəyen ɛ wen əbchio.