Read Oku Luk 23 Bible Online

Luk 23 - Oku bible

Luk 23

¹Ghene lòò naa ghel əbjim è ndu nɛ̀ Jesus se Bailɛt,

²è me kɛɛte se yɛ toy əbnəə ɛ wen əbghun suuye ge: Ghɛs nè yɛn biɛ vin nɛ əb fəmse ghele ghɛsen suuye ge ghàà ghene yɛ lake shile se əbfon ə Lûm. Əb nè suuye sɛy ge yi lu Vi wɛ Feyine nè Yiosen nɛ lu əbfon.

³Bailɛt bif se wen ge: Lu wɛ̀ əbfon ə ghele Juus-a? Əb fise ge: Ke lu ka wɛ̀ suuyen.

⁴Bailɛt suuy se ghele mbiy se ghɛ́ ntaŋlee ghene kenone ghel kii ge: Mɛ báà yɛn kejas ə wel vin.

⁵Dî ghene soote se Bailɛt ketaan ge: Əb ghane nɛɛye ge ghele yɛ taa ketuu, dinte əbnəə wen nɛ̂ vi ɛylake Judea ɛyjim. Əb nè kɛɛte ɛ Galilee, se lu nɛ əb gwiymen è chin so se fɛn.

⁶Bailɛt yio dî ɛ leghɛ è bif ge: Wel vin chèmè lu wele Galilee-a?

⁷Se lu ka əb keelen ge Jesus lòò ɛ kelik nɛ ke lu ɛ ɛyshaa ɛysak nə Helod, əb me suuy ge ɛ́ liɛ wen è ndu so se Helod. Nè lu əbliy fo nɛ Helod lu ɛ Jolesalem.

⁸Helod yɛn Jesus, è se saŋle naa se ŋaŋ bek feteete fɛ əb nè yionmen kum wen. Əb nè lô se ki shii se əbtəm se yɛne wen è me se kwaate ge əb nɛɛy əbnəə əbchio əbyúméné é yi yɛn.

⁹Əb me se bifte əbnəə se Jesus naa se ɛydio, əb jia ben.

¹⁰Ghele mbiy se ghɛ́ ntaŋlee ghene ghel ghɛ ɛ́ nè dinten tesak ə Moses nè lô se tiy fo suuye ketaan ge Jesus lu nɛ əb jas.

¹¹Helod ghene ghel ɛyghoŋ nə wene se foo ngɛk se wen ɛ jii ɛybee, buu wen, è lafse wen nɛ̀ ndəy sejuŋe, è kase tinse wen se Bailɛt.

¹²Se kɛ̀ɛ̀tè kechii fo, Helod ghene Bailɛt me kase se lu sunse. Ghene nè báà se fəye fo se mbiy.

¹³Bailɛt me jaŋte ghele mbiy se ghɛ́ ntaŋlee, nɛ̀ chɛɛse, gese nɛ̀ ghel ɛjime,

¹⁴è suuy se ghene ge: Ghɛn kè gwiy nɛ̀ wel vin se mɛ è suuy ge əb nɛɛye nɛ ghele taa ketuu. Mɛ liimen ɛ wen ə kenəə ɛ ghɛn ɛyshiɛ è jia yɛn kejas ə wen.

¹⁵Helod kè báà yɛn sɛy kejas ə wen. Ghan kenəə kɛ ke kè nɛɛyen əb kase fise wen se ghɛsen. Əb báà nɛɛy kenəə kɛ lòó ɛ́ yúy wen se ten.

¹⁶Fene mɛ suuy, ɛ́ nəkse wen kɛn nəksen è vəse.

¹⁷Ɛ́ nè sɛɛ lóó yiɛ Kechii Ɛyboyse, Goveno yɛ lu se fəyse wele nchak se ghele.[6]

¹⁸Ghel ghi me chìntèn ɛjim è waame ge: Mɛyse wen mɛysen, è fo Balabbas se ghɛs.

¹⁹Balabbas lu wel nɛ əb nè ndu nchak bek ge əb nè lu ɛ məme kenon kɛ ke nè losen əbchio ge ɛ́ bak ɛysak, gese nɛ̀ ka əb nè yuyen wel.

²⁰Bailɛt me gese suŋnen se kenone ghel kii bek ge əb nè ki shii se vəse Jesus,

²¹Ka əb suŋnen dî ghene sɛy waame ge: Bante wen se kentam, bante wen se kentam.

²²Əb gese suŋnen ge kaŋ ɛtal bife ge: Kejas ə wel vin lu ghɛ? Mɛ báà yɛn kenəə kɛ əb jasen kɛ lòó ɛ́ yúy wen se ten. Mɛ suuy ɛ́ nəkse wen è vəse.

²³Ghel ghii waame kɛn ketaan ketaan se Bailɛt ge: Ɛ́ lu se bante Jesus se kentam. Kɛ ghene me fɛl.

²⁴Bailɛt me chiase ɛysak ge ɛ́ yúy Jesus ka ghene nè kɛŋen.

²⁵Əb nè fəyse wel wɛ əb nè nduun nchak nɛ əb nè ndu bek ka əb nè luun ɛ məme kenon kɛ ke nè losen əbchio ɛ ntɛk ge ɛ́ bak ɛysak, gese ka əb nè yuyen wel, è me fo Jesus ge ɛ́ yúy ka ghene nè kɛŋen.

²⁶Ghel ɛyghoŋe me liɛ Jesus əbliy nɛ̂ fo, è se nduu se bante, è loo ndu, ghene ghe wele wɛ̂ Silen əblee konen nɛ ɛ́ toŋte ge Simon, nɛ əb kfəəy əbkwak. Ghene me koo wen è kan əb bɛɛy kentam ə Jesus è se jumte nduu nɛ̀ wen.

²⁷Ghele nè lô se jumte nduu nɛ̀ Jesus naa se ɛydio. Əbkiy ɛlee nè lu ɛ kenon fo toŋnene gese koosen ɛysen se wen.

²⁸Jesus benle è suuy se ghene ge: Əbkiy ghɛ Jolesaleme, ghàà ghɛn yɛ diy mɛ, ghɛn yɛ diy ngeŋ ə sɛn gese diye ghon ə ghɛn.

²⁹Bek ge əbliye gwiye wɛ ghele nɛ̂y yɛ suuy ge: Jofe kɛ əbkiy ghɛ luun əbkan, nɛ̀ ghɛ ɛ́ nè báà bii wán gese nɛ̀ ghɛ ɛ́ nè báà yi nyoŋse wán.

³⁰Ɛ́ nɛ̂y loo lu əbliy fo é ghele yɛ suuy se tetaŋe ge: Ghɛn fɛyke ɛ ghɛs əbtuu, suuye se kfənse ge: Ghɛn chite ghɛs.

³¹Ghele lɛ mome əbnəə ka vine nɛ fekake bɛɛy fezəə, é ke nɛy yɛ lu lɛɛy əbliy wɛ fe yumenmen?

³²Ɛ́ se nduu nɛ̀ Jesus di, nɛ ɛ́ liɛ ghel ɛlee ɛbaa, nɛ lu ghel nɛ ɛ́ nè fɛy ɛysak, ge ɛ́ ndu è yuy ghene ghe Jesus.

³³Ghene nɛy ndu è chin ɛ kelik nɛ ɛ́ toŋte ge: Kevəf ə ketuu, è me bante Jesus se kentam, gese nɛ̀ ghel ghii ghɛ ɛ́ nè fɛyen ɛysak, əblee ɛ Jesus ə ɛybee əbkoy əbtaa, nɛ̀ əblee ɛybee əbkoy əbkiye.

³⁴Jesus nɛy loo è suuy ge: Ba ə wom, lɛyse kejas ə ghen bek ge ghene báà se ke kenəə kɛ ghene nɛɛyen. Ghel ghii mak kaŋ se keele jii yɛ ghene giate ndəyse Jesus ɛ ten.

³⁵Kenone ghele se tiy fo kiye, nɛ chɛɛse buu wen suuye ge: Əb nè ghane boyse ghel, əb boyse yi ngeŋ ə wen ɛ lefɛ əb luun Vi wɛ Feyine nè Yiosen, ka əb nè choken!

³⁶Ghel ɛyghoŋe se buu sɛy wen, è kokte è fo əmnduk nɛ əm ngwɛymen se wen,

³⁷suuye ge: Boyse ngeŋ yiɛ ɛ lefɛ wɛ̀ luun əbfon ə ghele Juus.

³⁸Ɛ́ me nyak ŋwaale è base se Jesus ə ketuu kentam nɛ ɛy suuy ge: Vin lu əbfon ə ghele Juus.

³⁹Wel əblee se məme ghel ghɛ ɛ́ nè fɛyen ɛysak, ɛ́ bante ghene ghe Jesus, sɛ́y me se tɛyle wen suuye ge: Wɛ̀ lɛ báà se lu Vi wɛ Feyine nè Yiosen-a? Boyse ngeŋ ə yiɛ, è boyse sɛy ghɛs.

⁴⁰Wele vidi kɛy wen è bif ge: Wɛ̀ báà se fane Feyin-a? Ghɛsen nɛ̀ ghe wel vin kuo ɛykuo ɛymok.

⁴¹Ke lu ɛ titiy ge ghɛsoo kuo, bek ge ghɛsoo kuo keghoo kɛsoo, nɛ wel vin kuo kɛ wene se lólò.

⁴²Əb suuy di è me suuy ge: Jesus, nɛ̂y kuume mɛ əbliy wɛ wɛ̀ se saken əbfon ə viɛ.

⁴³Jesus suuy se wen ge: Mɛ suuye kenəə kɛ əbluuy se wɛ̀ ge ghɛsoo nɛ̂y yɛ lu ɛ kelik ɛyzəəte lan.

⁴⁴Nɛy se lu ka chuy tiysen, mbi sasen è fin naa ɛyjim, è nɛy kase se laane nɛ chuy se make mbàŋse.

⁴⁵Chuy liime di, ndəy sɛ ɛ́ nè keŋen ɛybuu so ɛ ndaa-ɛykokse Feyin nɛy loo è basen əbwaŋ əbbua.

⁴⁶Jesus nɛy lòò è toŋ ɛ giɛ ɛytaa ge: Ba ə wom, mɛ vii keyioy kom nɛ lu ɛ wɛ̀ keghoo. Əb suuy di è me mɛy.

⁴⁷Ketuu ɛyghoŋ kɛ ke nè tiyen fo yɛne əbnəə wɛ əb ganen, nè lô fo ɛykokse se Feyine suuye ge: Ke lu se əbluuy ge wel vin nè lu wele titiy.

⁴⁸Ngose wel yɛ ɛy nè luun fo kiye, yɛn əbnəə wɛ əb ganen, è vii əmwɛm è se koosen ɛysen kfəəye.

⁴⁹Əbnəə vin nè gane dì, nɛ ghel ɛjim ghɛ ɛ́ nè looten keen Jesus gese nɛ̀ əbkiy ghɛ ɛ́ nè lòòn ɛ wen ɛybam ɛ Galilee nè lu fo nɛ ɛ́ teem kɛ ghene əbtəm è se kiye.

⁵⁰Wel əblee nè lu nɛ ɛ́ toŋte ge Josɛf, nɛ lu wel ɛ wɛ̂ ntɛke ghele Juus yɛ Alimatea. Əb nè lu wel əbjuŋ, nɛɛye kɛn ka Feyine kɛŋen, nɛ əb nè gese chiyte əbliy wɛ Feyine nɛ̂y yɛ sak əbfon ə wen. Chèmè lu ka əb nè luun wel əblee ɛ ndaa nsak nə ghele Juuse, əb nè báà vii keghoo ə wen se əbnəə wɛ ɛ́ nè diom è lɛm, nɛ̀ wɛ ɛ́ nè nɛɛyen se yuye Jesus.

⁵¹

⁵²Əb ndu è yɛn Bailɛt è lon ge əb fo ɛygvən ə Jesus se yi.

⁵³Əb lon di, ɛ́ beeme, əb me ndu è səkse ɛygvən ə Jesus yi, è bate ɛ ndəy sefɛɛ, è ndu nyiŋse se ɛysɛy ɛylee nɛ ɛ́ chuf ɛ ɛyghok, nɛ̀ ɛ́ nè bɛɛy ghàà gvəəme wel ɛ ten.

⁵⁴Kechii nɛ̂ ki nè foo se kechii ɛybame, nɛ ke se mɛye, nɛ̀ əbliy ɛybame se shi se kɛɛte.

⁵⁵Əbkiy ghii ghɛ ghene ghe Jesus nè lòòn ɛ Galilee, ndu ɛ Josɛf ɛybam è yɛn ɛysɛy, è gese yɛn ka ɛ́ gvəəmen Jesus.

⁵⁶Ghene kfəəy, è siyse əbyiósén ɛygvən, nɛ əb lu ɛ tenkii tenkii. Kechii ɛybame nɛy kwɛn, ghene yese se zə̀ə̀lè ka ɛysake nè dinen.