Read Oku Luk 24 Bible Online

Luk 24 - Oku bible

Luk 24

¹Se lu ɛ kechii kɛ mbiye se əbwɛy, əbkiy ghii ndu nɛ̀ əbyióséne ngvəəme wɛ ghene nè siysen vi se ɛysɛy naa ɛ bvəse bvəse.

²Ghene chin fo è yɛn nɛ ɛ́ biŋsemen ɛytiy, ɛy lòò se əbchio ɛysɛy fo.

³Ghene lii se ɛysɛy fɛy è sɛ́y jia yɛn ɛygvən ə Báàba Jesus.

⁴Kenəə tene loo foo ngɛk se ghene, ɛ leghɛ ghel ɛbaa teem è gwiy ɛ ghene ɛybee nɛ ndəyse ghene njante ka ɛyghuu ɛyliakene.

⁵Əbkiy ghii fan è ngvəkte è təm tekek ə ghen se ntiɛ, ghel ghii suuy se ghene ge: Lu bek ghɛ wɛ ghɛne kiyen wel nɛ əb lu əbtaa ɛ məme ghel ɛkuone.

⁶Əb báà se lu fɛn, əb loolemen se ɛykuo. Ghɛn kuume kenəə kɛ əb nè suuyen se ghɛn nɛ ghɛne ghene bɛɛy ɛ Galilee.

⁷Əb nè suuy ge: Ɛ́ lu se naa se vii Wanwel se ɛghoo nə ghele mbeese, é bante wen se kentam, əbchii lun əbtal, əb kase loole se ɛykuo.

⁸Ghene me kuume kenəə kɛ Jesus nè suuyenmen,

⁹è nɛy lòò se bene ɛysɛy fo, è fiile è ndu è fiɛl əbnəə əbjim wɛ əb kè ganen se ghon-ɛyfɛl nə Jesus ghɛ njio ɛymok ɛyvəm gese nɛ̀ se ghel ɛlee.

¹⁰Əbkiy nɛ̂ ghin nè lu Mɛɛle Magdalene, nɛ̀ Joanna gese nɛ̀ Mɛɛle wɛ no ə Jɛms, gese nɛ̀ əbkiy ɛlee. Ghene nè gwiy è suuy əbnəə nɛ̂ vin se ghɛ́ ntume.

¹¹Dî ghene se kwaate ge əbkiye ten suuye kenəə nɛ ke wiy, è jia beeme.

¹²Bita me tum è loole, è nyiŋ è ndu se əbchio ɛysɛy, è ngvəkte è yɛn nɛ lu kɛn ndəy sɛ ɛ́ nè limten ɛygvən ə Jesus so ka se nyiŋen, è lòò, è se kfəəye kante ge sɛ kè gan ghɛ-a?

¹³Ko se lu kɛn ɛ kechii fo, ghon-ɛyfɛl nə Jesus ɛlee ɛbaa lòò ɛ Jolesalem è se nduu ɛ ntɛk nɛ ɛ́ toŋte ge Emmaus. Əbtəme ntɛk yin se Jolesalem nè lu ka tetaŋ saamba dì.

¹⁴Ghene loo ndu è se fiɛle əbnəə nɛ̂ vin əbjim wɛ əb ganen.

¹⁵Ghene se fiɛle kante dì ɛ leghɛ, Jesus se wen ə ngeŋ baksen è gwiy nɛ̀ ghene, ghene ghene se nduu.

¹⁶Dî nɛ kefaa bukse ɛshiɛ ghen, ghene jia keele ge kè lu wen.

¹⁷Əb bif se ghene ge: Lu ghɛ kɛ ghɛne jɛ́len, fiɛlen, ghɛynen lɛ? Ghene me teem fo ɛysen ɛysen.

¹⁸Wel əblee ɛ ghene məm nɛ ɛ́ toŋte ge Kleobas fise se wen ge: Lu kɛn wɛ̀ wel ɛyghan ɛ Jolesalem wɛ əb báà se ke əbnəə wɛ əb ganen ɛ əbchii fɛn-a?

¹⁹Əb bif ge: Əbnəə əbkɛ? Ghene me se suuye se wen ge: Lu əbnəə wɛ kum Jesus wɛ̂ Nazalet, wɛ nè luun ntum ə Feyin. Əb nè nɛɛye əbnəə əbchio əbyúméné, fekte əbfektene, nɛ Feyine bente wen, nɛ ghele bente sɛ̂y.

²⁰Ghele mbiy se ghɛ́ ntaŋlee gese nɛ̀ ghel ghɛ ɛ́ saken ghɛs nè lô fo wen ge ɛ́ chiase ɛysak ge ɛ́ yúy, ɛ́ me bante se kentam.

²¹Ghɛs sɛ́y bo nè kwaate ge lu wen wɛ əb nɛ̂y fəyse ghele Islael se ngɛkse. Báà mɛy kɛn kii nɛ̂ kine, shi əbchii ɛ leenen əbtal se ka əbnəə vine ganen.

²²Se baksen se keghene, əbkiy ɛlee ɛ ghɛs ə ngoo kè suuy kenəə əbchio əbyúméné se ghɛs. Ghene kè ndu əbchio ɛysɛy ɛ bvəse bvəse lan,

²³è jia yɛn ɛygvən ə wen, è kase fiile è gwiy è se suuye ge ghene kè lô yɛn nchiyse-ndaa nə Feyine ɛy suuy ge əb bo bɛɛy əbtaa.

²⁴Ghele ngoo nə ghɛs ɛlee ndu ɛ bene ɛysɛy fo, è yɛn nɛ ɛy lu kɛn ka əbkiy ghii kè suuyen dì, è jia yɛn wen.

²⁵Jesus me suuy se ghene ge: Ghɛne ngoole ghɛ lɛ. Ke taa se ghɛn se beeme əbnəə əbjim wɛ ghele ntum nə Feyine nè suuyen bek ghɛ?

²⁶Vi wɛ Feyine nè Yiosen lɛ nè báà se lu se yɛne ngɛk shin se gee se yɛ yio əbjuŋ əbghaake nə wen-a?

²⁷Jesus me jɛmte əbnəə əbjim wɛ ɛ́ nè nyaken kum ngeŋ ə wen ɛ ŋwaale-Feyin. Əb nè kɛɛte nɛ̀ ŋwaale sɛ ɛynyake Moses è me diaŋten è ndu nɛ̀ sɛ́ ghele ntum nə Feyine naa ɛjim.

²⁸Ghene ghene ndu è loo bɛɛte ɛ ntɛk yɛ ghene nè nduun ɛ ten Jesus se nɛɛye ka əb chia chian.

²⁹Ghene beŋte wen ge: Kiy wɛ̀, ghɛsen ko ndu è chii, bek ka shiin ɛ likfəəy, nɛ əbtəke se jiɛ. Əb me ndu ge ghene ghene chii.

³⁰Nɛy se lu ka əb nè diom se yɛ yíɛ́ ghene ghene, əb liɛ keban, è bɛ̀ɛ̀lè Feyin è bɛkte, è fo se ghene.

³¹Ɛshiɛ ə ghene me laane, ghene se keele ge kè lu Jesus, ɛ leghɛ əb me liime è lɛy.

³²Ghene se kante ge: Tetem ə tɛso lɛ kè báà se fuo ka ɛ́ kwaay əbvəs ɛ ten ɛ əbliy wɛ əb kè suŋnen se ghɛsoo ɛ jii-a, gese dinte kenəə kɛ ŋwaale-Feyine suuyen-a?

³³Ghene kante dì, è me loole kɛn se əbliy è kase fiile se Jolesalem, è yɛn ghon-ɛyfɛl ghɛ njio ɛymok ɛyvəm bene fɛ ghene ɛlee nè kaamen kelik kemok,

³⁴è se suuye ge: Ke lu se əbluuy nɛ Báàba loolemen se ɛykuo. Simon kè lô yɛn wen.

³⁵Ghon-ɛyfɛl ghɛ ɛbaa ghii me fiɛl se ghene əbnəə wɛ əb kè ganen se ghene ɛ jii, gese nɛ̀ ka ghene kè keelen Jesus ɛ əbliy wɛ əb kè bɛkten keban.

³⁶Ghene se fiɛle di ɛ leghɛ, Jesus me sasen, è fəy ɛ ghene məm è suuy se ghene ge: Nyiaŋ yɛ lu se ghɛn.[7]

³⁷Ghene se fane naa se ŋaŋ, chiŋe gese kwaate ge ghene yɛn nɛ lu nkfəsay.

³⁸Əb bif se ghene ge: Foo ghɛ ngɛk se ghɛn? Ghɛne maanen mɛ bek ghɛ?

³⁹Ghɛn kiy ɛghoo ə ghom gese nɛ̀ ɛvəə ə ghome, é ghɛn yɛn ge lu mɛ nɛ̀ ngeŋ ə yom. Ghɛn momte əbghun ə wom, é ghɛn keele bek ge nkfəsay sɛɛ jia ki njia əbghun nɛ̀ əbvəfe ka ghɛn yɛnen nɛ mɛ ki lɛ.

⁴⁰Əb suuy di, è din ɛghoo wen gese nɛ̀ ɛvəə wene se ghene.

⁴¹Ɛysaŋlee nè lô lun se ghene tetem, əbchio yum ghene ɛ jii yɛ ghene nè báà se ke jii yɛ lòó ɛ́ beeme. Jesus bif se ghene ge: Ghɛn lɛ ki kefaa keyíɛ́ne fɛn-a?

⁴²Ɛ́ liɛ kentime səə ɛynyoken è fo se wen,

⁴³Əb fii è kfəl, ghene yɛn.

⁴⁴Əb me suuy se ghene ge: Əbnəə vin wɛ əb kooyen lu wɛ mɛ nè suuyen se ghɛn ɛ əbliy wɛ mɛ nè bɛɛyen ghɛsen. Mɛ nè suuye ge: Əbnəə əbjim wɛ ɛ́ nè nyaken kum mɛ ɛ ŋwaalese nə Moses, nɛ̀ wɛ nè nyaken ghele ntum nə Feyine gese nɛ̀ wɛ ɛ́ nè nyaken ɛ ŋwaale Salm kum mɛ lu se kwɛn.

⁴⁵Əb suŋnen di, è me yɛm ɛytof ə ghen ka ghene keele kɛ ke luun ɛ ŋwaale-Feyin,

⁴⁶è me suuy se ghene ge: Ɛ́ nyak ɛ ŋwaale-Feyin ge: Vi wɛ Feyine nè Yiosen lu se naa se yɛne ngɛk se kuo, é əbchii chin əbtal əb loole se ɛykuo.

⁴⁷Ke gese se lu ge, ɛ́ lu se nɛy se kɛ̀ɛ̀tè ɛ Jolesalem se yɛ fekte əbtum əbjim ɛ mɛ ɛyghel ge, ghele kubsen tetem ə ghen é Feyine lɛyse mbeese ghen.

⁴⁸Ghɛn lu ghel ghɛ ɛ́ yɛnen əbnəə vin wɛ ə́b kooyen.

⁴⁹Yɛn mba! Mɛ nɛ̂y tinse nkakma yɛ Ba ə wom nè kaken ghɛn so. Se lu nɛ ghɛne gok è yɛ lu ɛ ntɛk fɛn se chin se əbliy wɛ Feyine nɛ̂y tinse əbtaawe wɛ əb lòòn ɛ ɛyyio se ghɛn.

⁵⁰Əb suuy di è me liɛ ghene, ghene ghene fəy se ntɛk fo, è ndu è loo bɛɛte Betani, əb me lose ɛghoo ə wen, è bose ghene.

⁵¹Əb se bose ghene ɛ leghɛ, è me lòò, Feyin liɛ wen è kokse se ɛyyio.

⁵²Ghene ngvəmle wen, è yese è kase fiile se Jolesalem, nɛ ɛ́ lun nɛ̀ ɛysaŋle ɛyghakene,

⁵³è me se yese lu ɛ ndaa-ɛykokse Feyin, foo ɛykokse se Feyine.