Read Oku Luk 4 Bible Online

Luk 4 - Oku bible

Luk 4

¹Joon fo moo se Jesus ɛ jio Joldan, əb se fiile nɛ Keyioy Kelanene lun se wen ɛytem. Keyioy Feyine nè lô liɛ wen è ndu so əbkwak.

²Satan momse wen se əbchii əmkɛɛk. Ɛ məm əbchii fɛn əb nè báà yiɛ kefaa; əbchii tene chia, jeŋ me se yafe wen.

³Satan me suuy se wen ge: Lòò è yɛ lu ge wɛ̀ lu wán ə Feyin, wɛ̀ bense ɛytiy yin se keban.

⁴Jesus fise ge: Ke lu kenyaken ɛ ŋwaale-Feyin ge: “Wele báà se chii kɛn se əbfua-əbyíɛ́ne.”

⁵Satan kok nɛ̀ Jesus è din telak tejim ɛ ketuu ntiɛ se wen kɛn se əbliy,

⁶è suuy se wen ge: Mɛ fó əbtaawe se wɛ̀, é wɛ̀ yɛ sake ketuu ntiɛ nɛ̂ kin kejim, é əbghaake tene yɛ lu viɛ. Ɛ́ nè fomen se mɛ, nɛ lòó mɛ fó naa se ndɛ wɛ mɛ koŋen.

⁷Lòó mɛ fó se wɛ̀ ɛ lefɛ wɛ̀ koksen mɛ.

⁸Jesus fise se wen ge: Ke lu kenyaken ɛ ŋwaale Feyin ge: “Wel lu se yɛ kokse nɛ lu kɛn Bay Feyin; nɛ̀ əb gese lu se yɛ fɛl kɛn se wen.”

⁹Satan me gese liɛ wen è ndu so se Jolesalem, è kokse wen se kegwɛs ə ndaa-ɛykokse è suuy ge: Loo lu ge wɛ̀ lu Wán ə Feyin, wɛ̀ chak se ntiɛ é mɛ yɛn,

¹⁰bek ge ke lu kenyaken ɛ ŋwaale Feyin ge: “Feyine náà suuy se nchiyse-ndaa nə wene ge ghene yɛ chiye wɛ̀.”

¹¹Ɛ́ nè gese nyak ge: “Ghene náà koo wɛ̀ nɛ̀ ɛghoo ə ghene fɛ wɛ̀ fɛy è kfən kevəə ə kiɛ se ɛytiy.”

¹²Jesus fise se wen ge: Ke lu kenyaken ɛ ŋwaale Feyin ge: “Ghàà wel yi momse Báàba wɛ Feyin ə wen.”

¹³Satan momse Jesus ɛ jiise ghan sejim è mɛyse, è lòò se wen ɛybee, è ndu è se chiyte se ka nsan ɛylee nɛ̂y yɛnsen.

¹⁴Jesus me kase fiile se Galilee, nɛ Keyioy Kelanene lun se wen ɛytem, foo əbtaawe se wen. Sakghɛ wɛ kum wen kal ketume ten naa kejim.

¹⁵Əb se dinte əbnəə se ghel ɛ ngayse ɛyjeme sɛ́ foo, nɛ ghel ɛjime bente wen.

¹⁶Əb ndu se Nazalet ghaa ɛ́ nè liyen wen; se lu ɛ kechii ɛybam, əb ndu se ngay ɛyjem, ka əb nè sɛɛ nduu. Əb nɛ̂y lòòle è teem se jaŋe ŋwaale-Feyin.

¹⁷Ɛ́ me fo ŋwaale se wen yɛ wele ntum nə Feyine wɛ Ezaya nè nyaken. Əb yayte è yɛn kelik kɛ ɛ́ nè nyaken ɛ ten ge:

¹⁸“Keyioy ə Báàba lu ɛ məm nə mɛ, bek ge əb nè yiosemen mɛ, è tum ge mɛ yɛ fekte sakghɛ əbjuŋ se ghele ketane. Əb nè tum mɛ ge, mɛ gwiy è fekte se ghel ghɛ ɛ́ kooten ɛyghoŋ ge ɛ́ shi se fəyse ghene se nchak, è fekte se əbnfefe ge, ɛ́ shi se yìàse ɛshiɛ ə ghen, è gese fekte se ghii dii, ghɛ ɛ́ nəksen ghene ge, ghene shi se boy se ngɛkse,

¹⁹è gese fekte ge əbliye kwɛnmen, wɛ Baye boyse ghel ə wen.”

²⁰Jesus jaŋ di, è me kaale ŋwaale ten è kase fo se wel wɛ əb nè foon se wen, è diom se ketiɛ, ghel ɛjim ɛ ngay ɛyjem fo tuŋ ɛshiɛ ɛ wen əbghun.

²¹Əb me se suŋnen se ghene ge: Giɛse Feyin sɛ ghɛn yion shin kwɛntenmen lan vin.

²²Wel əbjim wɛ əb nè yion, nè lô se suŋnen kejuŋ kum Jesus, lu nɛ̀ əbchíò əbyúméné kum əbnəə wɛ əb fəyen ɛ wen əbchio. Ghene me se bife ge: Vin lɛ wiy wán ə Josɛf-a?

²³Əb me suuy se ghene ge: Ɛymaanene báà se lu ge ghɛne maa ngan yin se mɛ ge: Wel əbchuken, chuk ngeŋ ə yiɛ; əbnəə əbchio əbyúméné wɛ wɛ̀ nè nɛɛyen ɛ Kabanaum, nɛɛy yi sɛ̂y əbghene fɛn ɛ wɛ̀ ntɛk.

²⁴Əb me gese suuy ge: Kɛ́ əbluuye, mɛ suuy se ghɛn ge, wele ntum nə Feyine báà se lu wɛ lòó ɛ́ ngvəmle wen ɛ ghene ntɛk.

²⁵Kɛ́ əbluuye, mɛ suuy se ghɛn ge, əbkiy ə nkfə nè lu se ɛydio ɛylak Islael fɛn ɛ əbchii nə Elija. Ɛyghuu nè báà se gwiye ɛylak ɛyjim se nguk setal nɛ̀ njoŋ ntuufe, jeŋ ɛytaa koo ɛylak yin ɛyjim.

²⁶Dî nɛ Feyine nè báà tum Elija se wiy ə nkfə əblee ɛylak fɛn. Əb sɛ̂y nè tum wen se wiy ə nkfə wɛ̂ Zalefat ɛ ketume Sidon.

²⁷Nè lu əmchii nə wele ntum nə Feyine wɛ Elisha, ghel ghɛ ɛ́ nè yafen nɛ̀ kensaase ɛylake Islael fɛn nè dio naa se ŋaŋ, dî Elisha jia chuk wel əbmok ɛ ghene məm. Əb sɛ̂y chuk nɛ lu wele wɛ̂ ketume Silia wɛ ɛ́ nè toŋten ge Naaman.

²⁸Ghel ghɛ ɛ́ nè luun ɛ ngay ɛyjem yiote əbnəə nɛ̂ vin əb yaf ghene naa ɛ jii ɛlee ndun.

²⁹Ghene loole se ntiɛ kaŋ ɛymok, è liɛ Jesus è təntən nɛ̀ wen, è ndu è yakte nɛ̀ wen ɛ ketuu koŋ əbtaŋ wɛ́ nè baklen ketume ten ɛ ten, kwaate ge ghene biŋse wen se koŋ.

³⁰Dî əb kase benle è chia ɛ ghele məm, è se nduu ɛynduu wen.

³¹Jesus me chio ɛ ntɛk yɛ Kabanaum ɛ Galilee. Se lu ɛ kechii ɛybam əb se dinte əbnəə se ghene.

³²Əbchio yum ghel kum jii yɛ əb nè dinten əbnəə ɛ ten bek ge kesuŋnen ə wene nè ki əbtaawe.

³³Nè lu ɛ ngay ɛyjem fo, wel əblee wɛ əb nè kiin keyioy ɛyfim ɛ wen ə ɛytem me se toŋe naa ɛ giɛ ɛytaa bife ge:

³⁴Aa Jesuse wɛ̂ Nazalet, wɛ̀ kɛŋe se jɛl lɛɛy se ghɛs? Wɛ̀ gwiymen se mɛyse ghɛs-a? Mɛ ke wel wɛ wɛ̀ luun əbghen. Wɛ̀ lu wel əblanen nə Feyine.

³⁵Jesus wam ge: Yɛɛ lu ɛ chichi è fəy se wel vi ɛytem. Ɛyfim yi mak wele ten se ntiɛ ɛ ghele məm, è fəy se wen ɛytem nɛ ɛy báà lɛmse wen.

³⁶Ghel ghii ɛjim me se lu nɛ̀ əbchíò əbyúméné, kante se ghene ngeŋse ge, sɛ lu ɛynkii giɛ sekɛ shin-a? Suuye ge: Əb ki əbtaawe gese nɛ̀ kediake kɛ əb kanten əbyioy ɛyfim so nɛ əb fəye se ghele tetem.

³⁷Sakghɛ wɛ kum Jesus me kal ɛybee ketume yɛ́ tene naa ɛyjim.

³⁸Jesus lòò se ngay ɛyjem fo, è ndu ɛ Simon ə ndaa bene fɛ əb nè yɛnen no əbchii nə Simon nɛ əb yafe nɛ̀ kenchɛm ketaa. Ghene me se lone ge əb chuk wen.

³⁹Əb me chia è teem ɛ əbvii vi ketuu è kwanten kenchɛm ki, ke vəse wen, ɛ leghɛ əb loole è se giate əbfua-əbyíɛ́ne se ghene.

⁴⁰Se lu əbliy wɛ chuy nɛ soyen, ghel ɛjime ghɛ ɛ́ nè kiin ghel ɛyafkene me gwiyke nɛ̀ ghel ə ghene ghɛ ɛ́ nè kiin naa tenkii teyaf tekɛ. Jesus se lɛme ɛghoo ɛ naa ndɛ ketuu nɛ əb bonen kɛn bonen.

⁴¹Naa tefime se fəye ɛ ndio ghel ə tetem toŋe ɛ giɛ ɛytaa ge: Wɛ̀ lu wán ə Feyin! Dî Jesus kwanten ghene, è jia beeme ge ghene suŋnen, bek ge ghene nè ke ge əb lu Vi wɛ Feyine nè Yiosen.

⁴²Əbtəke yio Jesus lòò è ndu se əbkwak. Ghele yese è se kɛŋe wen naa se ɛydio. Se lu ka ghene nè yɛnen wen, ghene me se mome ge ghàà əb gese vəse ghene.

⁴³Əb sɛ̂y fise ge: Mɛ lu se yɛ fekte sakghɛ əbjuŋ wɛ kum ɛysak əbfon ɛyyio ɛ ntɛk selee sɛy, bek ge ghɛy kenəə kɛ ɛ́ nè tumen mɛ ge mɛ yɛ nɛɛy.

⁴⁴Ghɛy kenəə kɛ əb nè ghanen ɛylake Judea ɛyjim fekte ɛ ngayse ɛyjem sejim.