Read Oku Luk 5 Bible Online

Luk 5 - Oku bible

Luk 5

¹Nɛy se lu ɛ kechii kelee Jesus se tiy əbghune jio ɛyghaken yɛ ɛ́ nè toŋten ge Gennesalet, ngose wel kaame ɛ wen ɛybee è se yiote kenəə ə Feyin.

²Əb yɛn əbnək əbbua nɛ əb lu əbghune jio fo, nɛ ghel ghɛ ɛ́ nè kóòn səəse so fəykemen è se suu əmlam mə ghen.

³Jesus me lii se kenək kɛ nè luun kɛ́ Simone, è suuy se wen ge əb loo se shif è lite so se jio. Jesus me diom ɛ məme kenək fɛy è se dinte əbnəə se ghel ghii.

⁴Əb dinte è mɛyse è me suuy se Simon ge: Lite ndu nɛ̀ kenəke se jio, é ghɛn mak əmlam mə mɛn è koo səəse.

⁵Simon fise ge: Babɛy, ghɛse chî fɛl ketaan ntək əbful è jia koo kefaa, bek ka suuyen wɛ̀, mɛ mak əmlam se jio.

⁶Ghene me mak, è koo səəse se ɛydio è loo guf, əmlam mə ghen me se teenee.

⁷Ke ghak, ghene kwayte ghele ngoo nə ghen ghɛ ɛ́ nè luun ɛ kenək kelee ge ghene gwiy è giamten ghene. Ghene gwiy, ghene ghene fəyse səəse se ɛydio è vii se ghene əbnək, əb lunke è me se səəke se jio.

⁸Simon Bita yɛn kenəə kɛ ke ganen, è me təm ɛləy ɛ Jesus ɛshiɛ è suuy se wen ge: Báàba, lòò se mɛ ɛybee, bek ge mɛ lu wele mbeese.

⁹Əb nè suuy di bek ge ghene ghele ngoo nə wene nè lu nɛ̀ əbchíò əbyúméné kum səə sɛ ghene kè koon se ɛydio.

¹⁰Ghele ngoo nə wen ghɛ Jɛms ghene Joon, ghɛ ghon ə Zebedee se lu sɛ̂y nɛ̀ əbchíò əbyúméné. Jesus me suuy se Simon ge: Ghàà yɛ fan, se kɛ̀ɛ̀tè ɛ leenen wɛ̀ nɛ̂y yɛ koo nɛ lu ghel.

¹¹Ghene yio di, è me fəy nɛ̀ əbnəke ghene se jio è vəse se shif, è se jumte nduu nɛ̀ wen.

¹²Nɛy se lu əbliy əblee nɛ Jesus lu ɛ ntɛk ɛylee, wel əblee wɛ kensaase nè yiɛnmen əbghun ə wen əbjim, yɛn wen è nyiim ɛ wen ɛyshiɛ, è təm ɛykek ə wen se ntiɛ, è se lone wen suuye ge: Báàba loo lu nɛ wɛ̀ koŋe, wɛ̀ nɛɛy é mɛ bonen.

¹³Jesus nase keghoo ə wen è kum wele ten so, è suuy ge: Mɛ koŋe; bonen! Kɛn se əbliy, kensaase kɛ́ tene me laane se wen ə əbghun.

¹⁴Jesus me chiise se wen ge: Ghàà suuy naa se wel, dî nɛ wɛ̀ ndu è din ngeŋ ə yiɛ se wele ntaŋle, è taŋle ntaŋle ka ɛysake Mosese dinen ge wɛ̀ bonen wɛ̀ taŋle ka əbchəyte se din se ghele.

¹⁵Ka Jesus chiisen se wen di, sakghɛ kum wen sɛ̂y me saanken naa se ŋaŋ, feliɛ wele me se kaame se yɛ yiote ɛyyiɛke wen gese kɛŋe ge əb chuk teyaf ə ghen.

¹⁶Jesus ko se lóó əb sosen è ndu əbkwak se yɛ jem.

¹⁷Jesus nɛy se dinte əbnəə ɛ kechii kelee, nɛ ghele kenone Falisee ghene ghel ghɛ ɛ́ nè dinten tesak ə Moses diom fo. Ghene nè lòò ɛ ntɛk sejime sɛ Galilee nɛ̀ Judea, gese nɛ̀ Jolesalem. Əbtaawe Baye nè lu se wen ge əb yɛ chuke ghel so.

¹⁸Ka əb dinten dî ɛ leghɛ, ghel ɛlee gwiy nɛ wel se wen nɛ ɛ́ buŋ ɛ əbtɛl, nɛ ɛybee əbghun nə wen ɛylee kuonmen, è se luŋe se lii nɛ̀ wen se nyiŋse ɛ Jesus ɛyshiɛ,

¹⁹è jia se ki jii se chia bek ngose wel yɛ ɛy nè luun fô. Ghene me kok ɛ ketuu ndaa fo è bɛyte kelik, è səkse wen ɛ ten ɛ ghele feteten, è nyiŋse ɛ Jesus ɛyshiɛ, nɛ əb ko bo bɛɛy ɛ əbtɛl.

²⁰Jesus yɛn jii yɛ ghene foon ɛytem se Feyine ten, è suuy ge: Sun yom, mɛ lɛysemen mbee ə shiɛ.

²¹Ghɛ́ ɛydinte tesake gese nɛ̀ ghɛ́ kenone Falisee me se kante se ghene ngeŋse ge: Biɛ vin lu ndɛ wɛ əb tɛylen Feyin? Wel wɛ lòó əb lɛyse mbeese ghel lu kɛn Feyin.

²²Jesus me keele əbnəə wɛ ghene nè kwaaten è bif ge: Ghɛn ki tekwaate ɛ ghɛne tetem bek ghɛ?

²³Kɛ ke bonen se suuy lu kine? Ɛ́ lɛysemen mbee ə shiɛ, moo loole è yɛ jɛl-a?

²⁴Dî nɛ mɛ din se ghɛn ge Wanwel ki əbtaawe ɛ ketuu ntiɛ se lɛyse mbeese ghel. Əb suuy di, è me suuy se wel əbləmen vi ge: Mɛ suuye se wɛ̀ ge: Loole è liɛ əbtɛl ə viɛ è yɛ kfəəy.

²⁵Wel vi me tum è loole kɛn se əbliy ɛyshiɛ nə ghel ghii è liɛ əbfua wɛ əb kè nyiŋen ɛ ten è se kfəəye, foo ɛykokse se Feyine.

²⁶Ghel ɛjime se lu nɛ̀ əbchíò əbyúméné, chiŋe, foo ɛykokse se Feyine suuye ge: Ghɛs lu nɛ ɛ́ yɛn mbɛm lan.

²⁷Jesus nɛy me lòò è loo ndu, è yɛn wel wɛ əb nè fiin shile, nɛ ɛyghel ə wene lu ge Levi, nɛ əb diom ɛ wen ə kelik ɛyfɛl, è suuy se wen ge: Gwiy ɛ́ lòò.

²⁸Levi me loole, è vəse əbfua ə wen əbjim è se jumte ɛybame Jesus.

²⁹Levi nɛy me se tale Jesus ɛ wen ə ndaa naa jii ɛytaa. Feliɛ ghel ɛyfii shile ghene ghel ɛlee se nəse fo nəsen gese yiɛ ghene ghene.

³⁰Ghele kenone Falisee ghene ghel ghɛ ɛ́ nè dinten tesak ə Moses yɛn di, è se vəke bife se ghon-ɛyfɛl nə Jesus ge: Lu bek ghɛ wɛ ghɛne yiɛn gese nəən ghɛne ghɛ́ ɛyfii shile gese nɛ̀ ghele mbeesee?

³¹Jesus fise se ghene ge: Ghel ghɛ ɛ́ luun əbghun əbtaa shii wiy wel əbchuken. Shii kɛn ghel ɛyafkene wel əbchuken.

³²Mɛ báà gwiy se tiyse nɛ lu ghel ɛjuŋe, mɛ gwiy se tiyse ghel ɛbee ge ghene kubsen tetem ə ghen.

³³Ghene me suuy se Jesus ge: Ghon-ɛyfɛl nə Joon naa nɛ̀ ghɛ́ kenone Falisee, lóó ɛ́ yɛ bam əbfua-əbyíɛ́ne, jeme, dî nɛ ghiɛ yíɛ́ kɛn yiɛn gese nəə əbliy əbjim.

³⁴Jesus fise ge: Lɛ lòó ghele ndu əbjen é wɛ̀ lɛm ghene se jeŋ nɛ lum əbvii lu ghene ghene-a?

³⁵Dî nɛ əbliye gwiye wɛ ɛ́ nɛ̂y fii lum əbvii se ghene, é ghene yɛ bam əbfua-əbyíɛ́ne əmchii fo.

³⁶Jesus gese maa ngan yin se ghene ge: Lòó wel jia sas ndəy sefɛɛ è bal ndəy seməə so, bek ge əb nɛɛy di, fene əb bese ndəy sefɛɛ besen, nɛ kensase tene cheme jia kwɛnten ghene ndəy seməə.

³⁷Lu ɛyghɛl ka lòó wel jia kuune əmnduk əmbol ɛ kefaa əmnduk nɛ ke se jɛse[1] bek ge əb nɛɛy di é əmndukme ten nɛy loo taa è nɛɛy é kefaa tene bvəs, é əmndukme lɛy se lólò, é kefaa tene gese lɛy se lólò.

³⁸Ɛngaŋ, ɛ́ lu se yɛ vii əmnduk əmbol nɛ lu ɛ kefaa əmnduk kefɛɛ.

³⁹Lu ɛyghɛl ka lòó wel wɛ əb kè se nəən əmnduk əmntaa jia yɛ koŋ əmnduk əmbol, bek ge ɛysuuy wene lu ge: Əmnduk əmntaa jofe chia əmbol.