Read Oku Luk 8 Bible Online

Luk 8 - Oku bible

Luk 8

¹Se moote Jesus me lòò è se jɛle lii ɛ ntɛk seghakene nɛ̀ ntɛk se tɛlɛɛ, fekte nduu nɛ̀ sakghɛ əbjuŋ wɛ kum ɛysake Feyin. Əb nè lu ghene ghon-ɛyfɛl nə wen ghɛ njio-sebaa ɛyvəm,

²nɛ̀ əbkiy ɛlee ghɛ əb nè jumen əbyioy əbbee se ghene ɛyghun è gese chuk teyaf tɛ ghene nè kiin. Nè lu ɛ məm əbkiy fo nɛ Mɛɛle wɛ ɛ́ nè toŋten ge Magdalene wɛ Jesus nè jumen tefim saamba se wen əbghun lu.

³Əbkiy ɛlee nè lu Joanna wɛ wiy ə Chuza, wɛ wel ɛyfɛl nə Helod, nɛ̀ Susanna gese nɛ̀ əbkiy ɛlee naa se ɛydio. Əbkiy ghin nè giamten Jesus ghene ghon-ɛyfɛl nə wene kɛn ɛ ghene əbbuam.

⁴Nɛy se lu ka feliɛ ghele, nɛ̀ ghel ɛlee ghɛ ɛ́ lòòn ɛ ntɛk ɛ ntɛk nè gwiyenmen se Jesus, əb maa ngan yin se ghene ge:

⁵Wel nè lô shik se make ngos ə wen, è loo mak, ɛylee chemke ɛ beelese ɛ́ se jɛɛle chia ɛ ketuu ten, əmnənme gwiy è yiɛ.

⁶Ɛylee chemke ɛ chuchukse, è kɛɛte se kuy è me yoble bek ka ɛy nè báà se ki moo.

⁷Ɛylee chemke ɛ məme kenjoonjoŋ è se kuye, kenjoonjoŋe me tooke è kuy è chite.

⁸Ɛylee chemke nɛ lu ɛ ntiɛ ɛyjuŋ, è kuy è bus, ketuu kemoke se foo ɛshiɛ ɛsaŋ əbviɛ. Jesus maa ngan yi, è mɛyse, è jaŋ è suuy ge: Naa ndɛ wɛ əb kiin əbtuule se yio, əb yio.

⁹Ghon-ɛyfɛl nə Jesus bif se wen ge, ngan nɛ̂ yin sɛ dine ghɛ-a?

¹⁰Əb fise ge: Feyine nɛɛymen ghɛn se ke əbnəə wɛ əb luun ɛ kenlete kum ɛysak ə wen. Dî nɛ mɛ suŋnen se ghel ɛchine ɛ nganse ka ghene chèmè kiyen ɛ́ jia yɛ yɛn, è chèmè yiote ɛ́ jia yɛ yio.

¹¹Ngan nɛ̂ yine dine ge: Ngos lu kenəə ə Feyin.

¹²Nɛ̀ ngos yɛ ɛy nè chemken ɛ beelese lu ghele ghii ghɛ ɛ́ yion kenəə ə Feyin, Satan me gwiy è fəyse se ghene tetem, fɛ ghene báà beeme è boy.

¹³Nɛ̀ ngos yɛ ɛy nè chemken ɛ chuchukse lu ghele ghii ghɛ ɛ́ yion kenəə ə Feyin, è fiisen nɛ̀ ɛysaŋlee nɛ ke báà lii se ghene ə tetem, ghene fo ɛytem kɛn se feleeŋese əbliy, ɛymomse gwiy ɛ leghɛ ghene me fɛyke.

¹⁴Nɛ̀ ngos yɛ ɛy nè chemken ɛ məme kenjoonjoŋ lu ghele ghii ghɛ ɛ́ yion kenəə ə Feyin, è beeme, è loo chii kok, əbnəə ka ɛyfof, nɛ̀ ɛykɛŋe, nɛ̀ kedɛŋe me jefse ghene fɛ ghene taa.

¹⁵Dî nɛ ngos yɛ ɛy nè chemken ɛ ntiɛ ɛyjuŋ lu ghele ghii ghɛ ɛ́ yion kenəə ə Feyin, è fiisen, è ghal ketaan, nɛ̀ ɛytem ɛyjuŋe è gese kul ɛytem, ke me gwiy nɛ̀ əbnəə əbjuŋe.

¹⁶Wele sɛɛ jia chəke kekaaken, əb kfəəse ɛyshaa keghen, kene əb lɛm se ntinkun. Wele sɛɛ chək əb tom nɛ lu ɛ ketatan bene fɛ wele liin ɛ ndaa əb yɛn ɛyban.

¹⁷Kenəə wiy kɛ ɛ́ leten kɛ ɛ́ jia yî din ɛ ngɛngɛ, nɛ kenəə gese wiy kɛ ɛ́ chiten kɛ ɛ́ jia yî keele, è fəyse è gwiy so əmlanen.

¹⁸Ke me se lu ge ghɛn toknen nɛ̀ jii yɛ ghɛne yioten əbnəə ɛ ten, bek ge naa ndɛ wɛ əb kiin kefaa lu nɛ Feyine nɛ̂y gise. Nɛ̀ naa ndɛ wɛ əb báà se ki lu nɛ Feyine nɛ̂y fii kɛ ɛylaye kɛ əb kwaaten ge yi ki.

¹⁹Kɛn əbliy nɛ̂ fo no ə Jesus ghene ghone-no ə Jesuse gwiy ge ɛ́ yɛn wen, dî ke jia se bonen se ghene se chin bene fɛ əb nè tiyen bek ngose wel yɛ ɛy nè luun fo.

²⁰Wel əblee suuy se wen ge: No ə viɛ ghene ghone-no ə viɛ tiy ɛ bɛy kɛŋe se yɛne wɛ̀.

²¹Əb fise ge: No ə wom gese nɛ̀ ghone-no ə wome lu ghel ghɛ ɛ́ yion kenəə ə Feyin, nɛɛy ka ke dinen.

²²Naa se lu ɛ kechii kelee Jesus suuy se ghon-ɛyfɛl nə wene ge: Ghɛsen diaŋ se njine jio se vəəy. Ghene me lii se kenək è se diaŋe.

²³Ghene loo diaŋ, Jesus me se buunee. Mfəme me sasen è fəy è se lose jio, nɛ moome lii se kenək fo, ke me se keke ka kenəə gan se ghene.

²⁴Ghene chia ghaa əb kè buunen è se yɛme wen suuye ge: Babɛy! Babɛy! Ghɛsene kuo ɛ jio fɛn. Jesus kamke è se loole gwiye ɛ leghɛ, è kɛy mfəme yi gese nɛ̀ moo mɛ əm kè loolen mi. Əbnəə tene buu kɛn se əbliy, əblike se lu nyiaŋ.

²⁵Əb me bif se ghene ge: Ɛytem yɛ ghɛn foo se Feyine lu ghááy? Ghene me se fane, əbchio yum ghene, ghene se kante se ngeŋse ghene ge: Vin lu ndɛ wɛ əb fóon ɛysak se mfəme gese nɛ̀ moome nɛ ə́b yio wen?

²⁶Ghene me diaŋ è chin ɛ njin fo, ɛybee ɛylak yɛ ɛ́ nè toŋten ge Gelasa, yɛ ɛy nè luun ɛ njine Galilee se vəəy.

²⁷Jesus fəy se kenək è se tome gwiye nɛ̀ kevəə ɛ shife jio è konen ghene wel əblee nɛ ɛyfime lu əblɛɛ gho, nɛ əb nè lòò ɛ məme ntɛk. Wele ten nè shi se əbtəm nɛ əb báà mak ndəyse, è jia se chii ɛ ndaa, chii nɛ lu ɛ ngvəəmese.

²⁸Əb yɛn Jesus è me toŋ è fɛy ɛ wen ɛyshiɛ è zəəme ketaan ge: Jesus wɛ wán ə Feyin fɛ fe ngaŋten chia, wɛ̀ kɛŋe se nɛɛy ghɛ san? Kiy wɛ̀ ghàà nyable nɛ̀ mɛ.

²⁹Əb nè zəəme dì bek ka Jesus kè kɛyenmen keyioy ɛyfim yɛ ɛy nè luun ɛ wen əblee ge ɛy fəy. Ɛyfime tene nè lóó ɛy yɛ make wen ɛ kaŋ ɛ kaŋ. Ɛ́ chèmè nè kule wen nɛ̀ nchakse ɛghoo gese nɛ se ɛvəə è yɛ chiy naa lɛɛy, əb ko teene nchakse teenen, ɛyfime me guf wen è ndu kɛn so əbkwak.

³⁰Əb suuy dì Jesus bif se wen ge: Ɛyghel ə yiɛ lu ndɛ? Əb fise ge: Ɛy lu ge Feliɛ. Əb nè suuy dì, bek ge tefime tene nè liimen ɛ wen əblɛɛ nɛ lòó ɛ́ jia taŋ è buk.

³¹Tefim ti me beŋte Jesus ge ghàà əb tinse ghene se əbvəs.

³²Nè lu dî nɛ ngoo nkfəənyamse yiɛ əbghune kfən ɛylee fo. Tefim ti me lon Jesus ge əb vəse ghene, é ghene ndu è liike se nkfəənyam shii əmlɛɛ. Əb me beeme.

³³Tefim ti me fəyke se wel vi əblɛɛ è ndu, è liike se nkfəənyam shii əmlɛɛ, se me foonten, è chio, è chin ɛ ketuu koŋ è chakle se kechəm keghuye è kuoke.

³⁴Ghel ghɛ ɛ́ nè chiyen ngoo ə nkfəənyamse yi yɛn kenəə kɛ ke ganen, è me nyiŋke è ndu è se fekte ɛ məme ntɛk fo, gese nɛ̀ se keleŋ fo ge lɛɛ kenəə kɛ ghene yɛnen.

³⁵Ghele me fəyke è gwiy se yɛne kenəə kɛ ke ganen. Ghene gwiyke è baksen se ghaa Jesus nè luun è yɛn wel vi nɛ əb diom ɛ Jesus ɛyshiɛ, nɛ əb makmen ndəyse è se lu ɛ wen ɛytof, ghene me se fane.

³⁶Ghel ghɛ ke nè ganen nɛ ghene yɛne me fekte se ghene jii yɛ Jesus kè chuken wel ɛyfim vi ɛ ten.

³⁷Ghele ghɛ́ keleŋe Gelasa fo ɛjim me beŋte Jesus ge əb lòò se ghene ntɛk, bek ge ghene nè fane naa se ŋaŋ. Əb me lii se kenək se yɛ lòò.

³⁸Wel wɛ ɛyfime kè fəyen se wen əblɛɛ vi beŋte Jesus ge ghene wen yɛ ndu. Jesus tun è suuy se wen ge:

³⁹Fiile è kfəəy è fekte kenəə kɛ Feyine nɛɛyen se wɛ̀. Wel vi lòò, è lii è ndu ɛ məme ntɛk è se fekte əbnəə wɛ Jesus nɛɛyen se wen.

⁴⁰Nɛy se lu ka Jesus kasen diaŋ se njin ghaa ngose wel nè luun, ghene fiisen wen naa kejuŋ, bek ka ghene nè chiyten wen.

⁴¹Wel əblee gwiy fo nɛ ɛyghel ə wene lu ge Jailus, nɛ lu wele mbiy ɛ ngay ɛyjeme yɛ ntɛk fo, è chia è təm ɛləy ɛ Jesus ɛyshiɛ è se lone wen ge əb ko ndu-a ɛ yi ə ndaa,

⁴²bek ge kenjoŋe wan nə wen əbvii wɛ əb nè bɛɛyen kɛn nguk njio-sebaa ɛyvəm se kuo. Jesus loo ndu, ngose wel yi me se yiike wen.

⁴³Əbvii əblee se lu ɛ kenon fo nɛ shi nguk njio-sebaa ɛyvəm ka əb nè yɛnen əbliy, əb yɛ gwiy naa se ŋaŋ, bo tenen wiy, nɛ əb ghanmen è mɛyse əbfua ə wen əbjim ɛ ndaase kefuu, wel buu se chuke wen.

⁴⁴Əbvii ten kokte è ndu ɛ Jesus ɛybam, è nase keghoo, è kum ɛyghaŋe ndəyse nə wen so, ɛ leghɛ, ɛyyaf ə wene me mɛy.

⁴⁵Jesus bif ge: Kum ndɛ mɛ? Ghel ɛjime maa. Bita me suuy ge: Babɛy, yɛn jii yɛ ghele kaamen yiiken gwiyen nɛ̀ wɛ̀ ɛ ten, wɛ̀ se bife ge sɛ kume ndɛ wɛ̀-a lɛɛy?

⁴⁶Jesus suuy ge: Wel lu nɛ əb kum mɛ, nɛ mɛ lu nɛ mɛ yio ka əbtaawe fəyen ɛ mɛ əbghun.

⁴⁷Əbvii vi yɛn ge Jesus ke kenəə kɛ yi kè nɛɛyen, è se fane, chiŋe naa se ŋaŋ, è me gwiy, è təm ɛləy ɛ Jesus ɛyshiɛ, nɛ wel əbjim yɛne. È me din shii wɛ əb kè kumen Jesus se ghene, è gese suuy ka əb kè bonen kɛn se əbliy.

⁴⁸Jesus me suuy se wen ge: Wan ə wom, ghal ɛyteme. Ɛytem yɛ wɛ̀ foon se Feyine nɛɛymen wɛ̀ bonen.

⁴⁹Se lu nɛ Jesus bo suŋnen se əbvii vi, wel əblee lòò ɛ ndaa nə Jailus wɛ wele mbiy ngay ɛyjim vi, è se gwiye, è me suuy se wen ge: Wan ə viɛ vi kuomen nɛ̀ ghàà gese yɛ jefse ndinte.

⁵⁰Jesus yio, è suuy se Jailus ge: Ghàà yɛ fan, fó ɛyteme san, é wan ə viɛ bonen.

⁵¹Jesus nɛy ndu è chin ɛ Jailus ə ndaa, è jia beeme ge wel lii se ndaa buu kɛn Bita, nɛ̀ Joon, nɛ̀ Jɛms gese nɛ̀ ba ə wan ghene no ə wan.

⁵²Nè lu dî nɛ ghele kè se toŋnene, buke ɛykuo. Jesus me suuy ge: Ghɛn ghusen, əb bɛɛy ghàà kuo. Əb buune buunen.

⁵³Ghene me se chɛke Jesus chɛken, bek ge ghene nè ke ge wan ten kè kuomen.

⁵⁴Jesus chia ghaa wan vi nè nyiim, è ghal wen se keghoo, è suuy ge: Wán, loole.

⁵⁵Ɛ leghɛ, keyioy ə wan vi me kase fiile se wen əbghun. Əb tum, è loole se ɛyyio. Jesus me suuy ge ɛ́ kɛŋ kefaa fo é əb yíɛ́.

⁵⁶Ba ə wan ghene no ə wan yɛn kenəə ten, əbchio yum ghene, dî Jesus chiise se ghene ge ghàà ghene nɛ̂y fekte kenəə kɛ ke ganen se wel.