Read Oku Luk 9 Bible Online

Luk 9 - Oku bible

Luk 9

¹Jesus nɛy tooy ghɛ́ ntum nə wen ghɛ njio-sebaa ɛyvəm, è fo kediak ghene əbtaawe se ghene ge ghene yɛ jume tefim, gese chuke teyaf,

²è me tum ghene ge, ghene ndu è yɛ fekte kenəə kɛ kum ɛysak ə Feyin, è gese yɛ chuke ghel ɛyafkene.

³Əb nè lô suuy se ghene ge: Ghɛne loo ndu ɛyjɛl yin ghàà wel liɛ kefaa ka mbàŋ, kene kebam, kene əbfua-əbyíɛ́ne, kene əbkaa, chèmè nɛ̀ ndəy selee.

⁴Ghɛne lii naa ɛ ndaa ɛykɛ, ghɛn yɛ chii kɛn ɛ ten se chin ka ghɛne nɛ̂y lòò se ntɛk fo.

⁵Yɛ lu ge ghele jia fiisen ghɛn naa ghááy, ghɛne loo lòò se ntɛk fo, ghɛn tɛte kebvəl se ghɛn ə ɛvəə, ka əbchəyte se din ge kenəə kɛ ghene nɛɛyen báà jof.

⁶Ghene me lòò è se lii nduu ntɛk nɛ̀ ntɛk, fekte nduu nɛ̀ sakghɛ əbjuŋ gese chuke ghel ɛyafkene əblik əbjim.

⁷Helod wɛ əb nè saken keleŋe Galilee, yio əbnəə əbjim wɛ əb nè chian, ə́b se foo ngɛk se wen, bek ge ghel ɛlee nè suuye ge: Ɛ́ kasemen lose Joon wɛ əb nè fóon moo se ghele, se ɛykuo.

⁸Nɛ ghel ɛlee suuye ge lu Elija ka əb kasen è gwiy, nɛ ɛlee suuy kɛ́ ghene ge lu wele ntum nə Feyine wɛ̂ əmməən əblee ka əb kasen è loole se ɛykuo.

⁹Helod me se kante ge: Mɛ nè tenmen ketuu ə Joon, vin se lu ndɛ wɛ mɛ yion əbnəə vin kum wen. Əb kante dì è me vii viin ge yi ko lu se yɛne wen.

¹⁰Ghɛ́ ntum nə Jesus ghii nɛy kase se fiile ɛ leghɛ, è me fiɛl se wen ka ɛyjɛl ə ghene nè luun naa ɛyjim. Jesus me liɛ ghene, ghene ghene bak əbghun, è fəy è ndu ɛ ntɛk ɛyghaken ɛylee nɛ ɛ́ toŋte ge, Betsaida.

¹¹Ghele keele, è me jumte ndu nɛ̀ wen. Əb fiisen ghene, è se fekte kenəə kɛ kum ɛysak ə Feyin se ghene, è gese se chuke ghel ghɛ ɛ́ nè shiin nchuk.

¹²Əbtəke loo jiɛ, ghɛ́ ntum ghɛ njio-sebaa ɛyvəm ghii kokte è gwiy è suuy se wen ge: Lam é ghele giabsen è ndu se ntɛke sɛ keleŋ fɛne gese nɛ̀ se teghaŋ əbkwak, ka lòó ghene kiile əblik əbchiine gese nɛ̀ əbfua-əbyíɛ́ne bek ge ghɛsen lu fɛn ɛ əbkwak.

¹³Jesus suuy se ghene ge: Ghɛn fó əbfua-əbyíɛ́ne se ghene se ghɛne ngeŋ. Ghene me suuy ge: Ghɛs ki kɛn ntukse keban setan nɛ̀ səə sebaa. Ke loo lu dì é ke yɛ din ge ghɛse ndu è yun əbfua-əbyíɛ́ne se ngose wel yin ɛ jii ɛykɛ?

¹⁴Ghene nè suuye dì bek ge, kɛn ɛluumen nè lu fo ka nkam setan di. Jesus me suuy se ghon-ɛyfɛl nə wene ge: Ghɛn suuy é ghene diom è ndu wel əmmtan-əmmtan.

¹⁵Ghene suuy dì, wel əbjim me diom.

¹⁶Jesus liɛ ntukse keban sɛ setan shii gese nɛ̀ səə sɛ se baa shii è kiy ɛyyio è bɛ̀ɛ̀lè Feyin è bɛkte, è me fo se ghon-ɛyfɛl nə wene ge ghene gia se ghele.

¹⁷Ghel ɛjime yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, əb lun nkaase njio-sebaa ɛyvəm.

¹⁸Se lu ka Jesus nè jemen wen nyiŋ ɛ kechii kelee nɛ lu kɛn ghene ghon-ɛyfɛl nə wene, əb bif se ghene ge: Ghele suuy ge mɛ lu ndɛ?

¹⁹Ghene fise ge: Ghel ɛlee suuye ge wɛ̀ lu Joon Nfoo Moo, nɛ ɛlee suuye ge wɛ̀ lu Elija, nɛ ɛlee ko suuy ge wɛ̀ lu wele ntum nə Feyine wɛ əmməən ka əb kasen è loole se ɛykuo.

²⁰Əb me bif ge: Ghɛne suuye kɛne ge mɛ lu ndɛ? Bita fise ge: Wɛ̀ lu Vi wɛ Feyine nè Yiosen.

²¹Jesus chiise se ghene ge, ghàà wel yi suuy kenəə ten se wel.

²²Əb ko gese suuy ge: Wanwel tiy se yɛne ngɛk ɛ jiise se ɛydio, é chɛɛse ghene ghele mbiye se ghɛ́ ntaŋlee gese nɛ̀ ndintese tesake tunse wen, ɛ́ yúy wen, é əbchii lun əbtal, é əb loole se ɛykuo.

²³Əb me suuy se ghel ɛjime ghɛ ɛ́ nè luun fo ge: Naa ndɛ wɛ əb kɛŋen se yɛ jumte ɛybam ə yom lu se yɛne ngeŋ ə wen ka kefaa lólò, se bɛɛy kentam[2] ə wen se yɛ jɛl so ɛ mɛ ɛybam əbchii əbjim.

²⁴Bek ge naa ndɛ wɛ əb kɛŋen se babte ɛychii ə wene náà lɛy ɛyghene, nɛ naa ndɛ wɛ əb lɛyen ɛychii ə wen bek mɛ lu nɛ əb náà yɛ ki ɛychii.

²⁵Əb me gese bif ge: Wel lɛ chèmè kè ki mbi yin ɛyjim, è maay ngeŋ ə wen è lɛy se lólò, é njuŋe ten yɛ lu ghɛ se wen.

²⁶Naa ndɛ wɛ əb ghuumen mɛ gese ghuumen giɛ ə som lu vi di wɛ Wanwele yî ghuumen se wen ɛ əbliy wɛ əb gwiy ɛ wen əbghaake wɛ luun wɛ ba ə wen ghene nchiyse wene se lanene.

²⁷Dî nɛ mɛ suuy əbluuy se ghɛn ge, ghel ɛlee tiy ɛ ghɛn ɛ məm fɛn nɛ ɛ́ jia nɛ̂y kuo nɛ ɛ́ báà yɛn ɛysak ə Feyin.

²⁸Se lu ɛ ɛybam əbwɛy əbful ka Jesus suuyen əbnəə vin, əb me liɛ Bita nɛ̀ Joon, gese nɛ̀ Jɛms, ghene ghene kok ɛ kfən se jem.

²⁹Se lu ka Jesus nè jemen, ɛykek ə wene kubsen, ndəyse wene kubsen è se njante ka ɛyghuu ɛyliakene.

³⁰Ɛ́ loo chin ghele se suŋnen ghene ghe Jesus ɛbaa, nɛ lu Moses ghene Elija.

³¹Ghene nè yɛnsen fo nɛ̀ əbghaake wɛ ɛyyio è se suŋnen se Jesus kum ɛykuo yɛ əb nɛ̂y kuo ɛ Jolesalem, é kenəə kɛ Feyine nè lɛmen kwɛn.

³²Nè lu dî nɛ Bita ghene ngoo wen chiɛme chiɛmen nɛ̀ mbuunese. Ghene se kamkee è yɛn Jesus ɛ wen əbghaake, nɛ ghel ghii ɛbaa tiy ɛ wen ɛybee.

³³Ghel ghii ɛbaa se lòò ɛ leghɛ, Bita suuy se Jesus ge: Babɛy, ke lu kejuŋ ka ghɛs luun fɛn. Lame é ghɛs baklé əmtaa əmtal, viɛ nɛ̀ wɛ Moses gese nɛ̀ wɛ Elija, suuye dì, chèmè ke wiy kenəə kɛ əb suuyen.

³⁴Ka əb suŋnen dì ɛ leghɛ, mbàkse gvəm è chite ghene; se chite dì ghe Bita me se fane.

³⁵Giɛ ɛylee fəy gwiy ɛ məme mbàkse fo ge: Vin lu wan wom wɛ mɛ chokenmen, ghɛn yɛ yio se wen.

³⁶Ka giɛ yi ghusen ɛ leghɛ, ghene yɛn nɛ Jesus shi kɛn wen nyiŋ, è me gok ɛ chichi è jia nɛ̂y fiɛl kenəə kɛ ghene nè yɛ́nen nɛ̂ kin naa se nkan ɛ əmchii fo.

³⁷Nɛy se lu ka əbtəke yionmen, ghene chio se kfən ɛ leghɛ, ngose wel gwiy se yɛne Jesus.

³⁸Wel əblee ɛ məm nə ghel ghii toŋ ge: Ndinte, mɛ beŋte wɛ̀ ge wɛ̀ giamten wán ə wom vin bek ge lu kɛn mɛy mɛy wan əbluumen nə mɛ lɛ.

³⁹Kefaa lóó ke mak wen, əb toŋ ɛ giɛ ɛytaa, è yɛ tak, nɛ kefəfəye fəye əbchio. Ke báà se foo jii se wen se nkan, me mɛyse wen kɛn mɛysen.

⁴⁰Mɛ kè beŋtemen ghon-ɛyfɛl nə wɛ̀ ge ghene jum, ghene mom lolo.

⁴¹Jesus me suuy ge: Ghɛne ghɛ́ ntem fɛne báà fo ɛytem se Feyine, gese nduu nɛ̀ ɛybame. Ghɛne kɛŋe ge mɛ nɛ̂y yɛ lu ghɛsen se chin lɛɛy nɛ ghɛn geese beeme? Əb suuy dì è me suuy se ba ə wan vi ge: Gwiye nɛ̀ wan ə viɛ vi fɛn.

⁴²Ɛyfim yi ko me liɛ wán nɛ əb bo gwiye gwiyen è təm se ntiɛ, əb se take. Jesus me wam keyioy ɛyfime yɛ tene ke fəy se wan nɛ̂ vine əbghun, əb bonen, əb kase fo wen se ba ə wen.

⁴³Ghel ɛjime yɛn kembɛɛ əbtaawe nə Feyine, əbchio yum ghene. Se lu nɛ ghele bo bɛɛy nɛ̀ əbchíò əbyúméné kum əbnəə mbɛm əbjim wɛ Jesus nè nɛɛyen, əb suuy se ghon-ɛyfɛl nə wene ge:

⁴⁴Ghɛn loote yiote kenəə kɛ mɛ suuy se ghɛn. Ɛ́ nɛ̂y din Wanwel é ghele koo.

⁴⁵Ka Jesus suuyen dî ghene jia keele kenəə kɛ əb suuy, ka Feyine buksen fɛ ghene keele, ghene me se fane se chèmè se bif ge əb sɛ suuye gee ghɛ-a?

⁴⁶Ghon-ɛyfɛl nə Jesuse me se beke ge sɛ lòó yɛ lu ndɛ wel əbghaken ɛ ghene məm-a?

⁴⁷Jesus keele kenəə kɛ ghene kwaaten ɛ ghen ə tetem, è liɛ wán əbtɛlɛ è gwiy è tiyse ɛ wen ɛybee,

⁴⁸è me suuy se ghene ge: Naa ndɛ wɛ əb fiisen wán vin bek mɛ lu nɛ əb fiisen mɛ, nɛ̀ naa ndɛ wɛ əb fiisen mɛ lu nɛ əb fiisen wel wɛ əb nè tumen mɛ. Bek ge, naa ndɛ wɛ əb layten è ləysen ɛ ghɛne məm, lu wen wɛ əb ngaŋten è chia.

⁴⁹Joon me suuy ge: Ndinte, ghɛs ne lô yɛn wel nɛ əb jume ɛyfim nɛ̀ əbtaawe ɛyghel nə wɛ̀, è se suuy ge ghàà əb se mom bek ge əb ne wiy wele ngoo nə ghɛsen.

⁵⁰Jesus suuy se ghene ge: Ghàà ghɛn yɛ tun bek ge, wel wɛ əb baken wiy ghɛn lu nɛ əb toke ghɛn token.

⁵¹Se lu ka əbliye nè se kwɛnen ka Jesuse kase è kok se ɛyyio, əb me lɛm ge yi ko ndu se Jolesalem, è me lòò.

⁵²Əb nè lô tum ghel ge ɛ́ yɛ ndu se mbiy, ghene ndu è lii se ntɛk ɛylee ɛ Samalia è se siyse əbnəə se wen ka əb lóó gwiy.

⁵³Dî ghele ghɛ́ ntɛk foo jia beeme se fiisene wen, bek ge əb nè gwiye se chia se ndu nɛ lu ɛ Jolesalem.

⁵⁴Ghon-ɛyfɛl nə wen ghɛ Jɛms ghene Joon yɛn kenəə nɛ̂ kin è bif ge: Báàba, lɛ lòó ghɛs suuy é Feyine tinse əbvəs é əb nyok ghel ghin-a?

⁵⁵Jesus sɛ̂y benle è kɛy ghene kɛyen.

⁵⁶Ghene ghene me lòò è ndu ɛ ntɛk ɛychin.

⁵⁷Se lu ka ghene nè jɛ́len nduun ɛ jii, əbluumen əblee gwiy è suuy se Jesus ge: Mɛ yɛ jumte wɛ̀ naa ghááy ghaa wɛ̀ nduun.

⁵⁸Əb fise ge: Ndumse ki əbbuk ə ghen, nɛ əmnənme ki ndaase ə ghen, dî nɛ Wanwel ki wiy kelik kɛ əb nyiŋse ketuu ə wen ɛ ten è zəəle.

⁵⁹Jesus suuy se əblee ge: Gwiye é lòò. Əbluumen ten fise ge: Báàba, vəse é mɛ kase fiile è ndu, è náà gvəəme ba ə wom se geese gwiy.

⁶⁰Jesus fise ge: Vəse é ghii dii ghɛ ɛ́ lɛyenmen yɛ gvəəme ghel ə ghen ghɛ ɛ́ kuon, é kiɛ yɛ lu ge wɛ̀ ndu è yɛ fekte sakghɛ əbjuŋ kum ɛysak ə Feyin.

⁶¹Əblee ko gese suuy ge: Mɛ yɛ jumte gwiy nɛ̀ wɛ̀ Báàba, dî nɛ wɛ̀ vəse é mɛ kase ndu è suuy se ɛyshaa ndaa nə mɛ ge, ɛ́ yɛ bɛɛse.

⁶²Jesus fise se wen ge: Wel kɛɛte se yɛ jumte mɛ, è kase yɛ kiy ɛybam fene əb báà se lu kekwɛnten se yɛ fɛl ɛ məme ɛysak nə Feyine.