Read Oku Jn 10 Bible Online

Jn 10 - Oku bible

Jn 10

¹Jesus suuy ge: Mɛ suuy əbluuy se ghɛn ge wel wɛ əb báà lii ɛ kengɛye bvəyse jii əbchio kengɛy, è sɛy chia kok kengɛy è lii əmchin, lu əbchoŋ gese lu wel wɛ əb yuyen ghel fii əbfua.

²Wel wɛ əb liin nɛ lu jii əbchio kengɛy lu nchiy-bvəyse.

³Wel wɛ əb chiyen əbchio kengɛy lóó əb dise nɛ lu se wen, bvəyse wene yɛ yio giɛ ə wen, əb me yɛ jaŋe ghene ɛyghel ɛyghel me liɛ fəy so.

⁴Əb fəyse sejim, əb me yɛ nduu ɛ mbiy, nɛ se gwiye ɛ wen ɛybam, bek ge se ke giɛ wen.

⁵Lòó se jia yɛ nduu ɛ wel əbchin ɛybam. Lòó se yɛ nyiŋe wen nyiŋen bek ge se báà se ke giɛ ə wen.

⁶Jesus nè maa ngan yin se ghene, ghene cheme jia keele kenəə kɛ əb kɛŋen se suuy se ghene.

⁷Jesus me gese suuy se ghene ge: Mɛ suuy əbluuy se ghɛn ge mɛ lu əbchio kengɛy wɛ bvəyse chian ɛ ten.

⁸Ghel ɛjim ghɛ ɛ́ nè gwiyen se mbiy se mɛ lu ɛchoŋ gese lu ghɛ ɛ́ yuyen ghel fii əbfua, dî bvəyse jia yio ghene.

⁹Mɛ lu əbchio ə kengɛy, nɛ naa ndɛ chia jii ɛ mɛ əbghun è lii əb boy, è yɛ lii gese fəye kejuŋ kiile ɛyyiɛ.

¹⁰Əbchoŋe loo əb yɛ gwiy kɛn se choŋ, se yuy, gese nɛ se bese. Mɛ gwiy se nɛɛy ge ghene kiile ɛychii, è yɛ loote chii kejuŋ.

¹¹Mɛ lu nchiy-bvəyse ɛyjuŋ. Nchiy-bvəyse ɛyjuŋe sɛɛ lu kebaaten se kuo bek bvəyse wen.

¹²Wel wɛ ɛ́ laken wen laken, wɛ báà se lu loote nchiy-bvəyse, nɛ gese ki wiy wen bvəyse, yɛne báá nɛ ɛy gwiye, əb me nyiŋ è vəse bvəyse. Baa me koo bvəyse, è saŋse selee saŋsen.

¹³Wel wɛ ɛ́ laken laken nyiŋe dì, bek ka ɛ́ lak kɛn wen laken, nɛ əb ki wiy shii se bvəyse.

¹⁴Mɛ lu nchiy-bvəyse ɛyjuŋ. Mɛ ke bvəy ə som, nɛ bvəy ə some ke mɛ,

¹⁵kɛn ka ba ə wom keen mɛ, nɛ mɛ ke wen. Mɛ lu kebaaten se kuo bek bvəy ə som.

¹⁶Mɛ ki sɛy bvəy selee sɛ se bɛɛy ghàà yɛ lu ɛ ngoo fɛn. Mɛ lu se baaté seghene se gwiy so. Se nɛ̂y yɛ yio giɛ ə yom, me lu ngoo ɛymok, ki nchiy-bvəyse ɛymok.

¹⁷Baye koŋe mɛ bek ge mɛ lu nɛ mɛ fó ɛychii ə yom, ka mɛ nɛ̂y kase kiile.

¹⁸Wel wiy wɛ lòó əb fii ɛychii ə yom se mɛ. Foo mɛ se mɛ ngeŋ. Mɛ ki əbtaawe se fo ɛychii ə yom, nɛ mɛ gese ki əbtaawe se fii ɛybam. Lu ka ba ə wom làmen ge mɛ nɛɛy.

¹⁹Əbngiabsene gese fəy ɛ ghele Juus ghii məm bek kesuŋnene Jesus.

²⁰Ghel se ɛydio se suuye ge: Əb ki ɛyfim! Əb jake jaken! Ghɛne yióté kenəə kɛ əb suuyen bek ghɛ?

²¹Ghel ɛlee se suuye ge: Wel ɛyfim lòó əb jia yɛ suŋnen ɛ jii ghan. Lɛ lòó wel ɛyfim yiase ɛshiɛ ə kenfef-a?

²²Nè lu əbliye kenton, nɛ ɛ́ yiɛ kechii kɛ ɛ́ nè kuumen ka ɛ́ nè kasen dise ndaa-ɛykokse ɛ Jolesalem.

²³Jesus se ghanle ɛ kebaa ə ndaa kɛ ɛ́ nè toŋten ge kɛ Solomon, ɛ ndaa-ɛykokse.

²⁴Ghele Juuse me kaame ɛ wen ɛybee, è bif se wen ge: Wɛ̀ kɛŋe ge ghɛs yɛ lu nɛ̀ ɛymaanene se chin lɛɛy? Loo lu nɛ wɛ̀ lu Vi wɛ Feyine nè Yiosen, wɛ̀ suuy se ghɛs kelaanen.

²⁵Jesus fise ge: Mɛ suuymen, dî ghɛne jia fo ɛytem. Əbnəə wɛ mɛ nɛɛy ɛ əbtaawe nə ba ə wom dine wel wɛ luun mɛ;

²⁶dî ghɛne jia fo ɛytem se mɛ bek ka ghɛne báà se lu ɛ ngoo bvəyse nə mɛ.

²⁷Bvəy ə some yio giɛ ə yom. Mɛ ke ghene, nɛ ghene jumte mɛ.

²⁸Mɛ foo ɛychii yɛ ɛy jia yî mɛy se ghene, nɛ ghene jia yî kuo. Lòó wel jia dzək ghene se mɛ keghoo.

²⁹Ba ə wom wɛ əb foon ghene se mɛ chia kefaa kejim, nɛ lòó wel jia dzək ghene se wene keghoo.

³⁰Ghɛse ba ə wom lu kefaa kemok.

³¹Ghele Juus ghii gese biŋte ɛtiy se təmle Jesus so.

³²Əb suuy se ghene ge: Mɛ nɛɛymen əbnəə əbjuŋe se ɛydio ɛ ghɛne məm wɛ Bay nè foon ge mɛ nɛɛy. Ghɛne kɛŋe se təmle mɛ nɛ̀ ɛtiye bek ke kɛ?

³³Ghene fise ge: Ghɛse báà se kɛŋe se təmle wɛ̀ nɛ lu bek kenəə kejuŋe. Ghɛse təmle bek ka wɛ̀ besen ɛyghel ə Feyin. Wɛ̀ lu kɛn wel, dî kɛŋe se yɛ liɛ ge wɛ̀ lu Feyin.

³⁴Jesus fise ge: Ɛ́ nyak ɛ ghɛne ŋwaale tesak ge Feyine nè suuy ge: Ghɛn lu əmnyin.

³⁵Ghɛsen ke ge kenəə kɛ ŋwaale-Feyine suuyen lu əbluuy, nɛ lòó ke jia kubsen; nɛ Feyine nè lô toŋte ghel ghi ghɛ giɛ ə Feyin nè gwiyen se ghene, ge əmnyin.

³⁶Mɛ se lu naa wel wɛ Bay nè siysen è tum ɛ mbi fɛn. Ghɛn se suuy ge mɛ tɛyle Feyin bek ka mɛ suuyen ge mɛ lu wán ə Feyin lɛɛy?

³⁷Ghàà ghɛn fó ɛytem se mɛ ɛ lefɛ ghɛn yɛnen ge mɛ báà se nɛɛy əbnəə wɛ Ba ə wom kɛŋen ge mɛ yɛ nɛɛy.

³⁸Ka mɛ nɛɛyen əbnəə vin, nɛ ghɛn chèmè foo wiy ɛytem se mɛ, ghɛn ko fo ɛytem se əbnəə wɛ mɛ nɛɛyen, ka ghɛne keele se əbluuy ge Ba ə wom lu ɛ məm nə mɛ nɛ mɛ lu ɛ məm nə wen.

³⁹Ghene gese se mome ge ɛ́ koo Jesus, əb me fii əbghun.

⁴⁰Əb me gese lòò è diaŋ jio Joldan, è ndu se ghaa Joon nè yî fóon moo, è me se lu fo.

⁴¹Ghele se gwiye yɛne wen fo se ɛydio, suuye ge: Joon nè báà nɛɛy əbnəə əbchio əbyúméné, dî nɛ kenəə kejim kɛ əb nè suuyen kum wel vin lu əbluuy.

⁴²Ghel se ɛydio me fo ɛytem se Jesus ɛ kelik fo.