Read Oku Jn 11 Bible Online

Jn 11 - Oku bible

Jn 11

¹Wel əblee nè lô se yafe ɛ ntɛke Betani nɛ ɛ́ toŋte ge Lazalus. Betani nè lu ntɛke ghe Mɛɛle ghene wan-no ə wene Malta.

²Mɛɛle vin nè lu wel wɛ əb nè yiosen ɛvəə ə Báàba Jesus nɛ̀ keyióséne keləm kejuŋe è fikse nɛ̀ nəŋse ketuu nə wene. Nè lu wán-no ə wene Lazalus wɛ əb nè yafen.

³Jɛmtese wen shine tinse ntum se Jesus ge: Báàba, sun ə yiɛ yɛ wɛ̀ koŋen naa se ŋaŋe yafe.

⁴Jesus yio ntum yin è suuy ge: Ɛyyaf yine báà se lu yɛ́ ɛykuo. Ɛy lu kɛn se nɛɛy ge ɛ́ yɛn ka əbtaawe Feyine luun, è yɛ foo ɛykokse se wan ə Feyin.

⁵Jesus nè lô se koŋe Malta ghene wan-no ə wene Mɛɛle, nɛ̀ Lazalus.

⁶Se lu ka əb nè yion ge Lazaluse yafe, è me gok ghaa əb nè luun se əbchii əbbua,

⁷è nɛy me suuy se ghon-ɛyfɛl nə wene ge: Ghɛsen kase ndu se Judea.

⁸Ghon-ɛyfɛl nə wene bif se wen ge: Ndinte, əbtəme bɛɛy ghàà diaf ka ghele Juuse nè kɛŋen se yuytê wɛ̀ nɛ̀ ɛtiye, wɛ̀ kase se nduu fo lɛɛy?

⁹Jesus fise ge: Chuyse lɛ wiy nɛ̀ nchuy njio-sebaa ɛyvəm-a? Naa ndɛ wɛ əb jɛ́len nɛ̀ nchuy lu nɛ lòó əb jia diamten, bek ka əb yɛne ɛybane yɛ̂ mbi fɛne.

¹⁰Dî nɛ əb jɛle nɛ̀ ntəke, ə́b diamten bek ka ɛybane wiyen.

¹¹Jesus suuy dì è gese suuy ge: Bɛ ə wɛsen Lazalus buunemen, nɛ mɛ ndu è yɛm wen.

¹²Ghon-ɛyfɛl nə wene fise ge: Báàba, loo lu ge əb buune fene əb nɛ̂y bonen.

¹³Jesus nè suuy nɛ lu ge Lazalus kuomen, dî ghene sɛy yio ge əb buune buunen.

¹⁴Əb me loote suuy se ghene ge: Lazalus kuomen;

¹⁵dî nɛ mɛ saŋle ge mɛ kè báà se lu fo bek ghɛn, ka ghɛne fo ɛytem se mɛ; ghɛsen ndu yì è yɛn wen.

¹⁶Ntomas wɛ ɛ́ nè toŋten sɛy ge: Wan se ghɛ ɛbaa, me suuy se ghon-ɛyfɛl ɛlee ge: Ghɛsen ɛjim ndu ghɛsen nɛ̀ ndinte è kuo fo.

¹⁷Jesus nɛy chin fo è yɛn ge shi əbchii əbkɛɛk ka ɛ́ nè gvəəmen Lazalus.

¹⁸Betani nè baksene se Jolesalem, kɛn ka tetaŋ tebaa dì.

¹⁹Ghele Juuse nè lô gwiy se ɛydio se cham ɛykuo wan-no Malta ghene Mɛɛle nɛ̂ yin.

²⁰Malta yio ge Jesuse gwiye, è fəy se bɛy se fiisene wen, Mɛɛle gok kɛ wene ɛ ndaa.

²¹Malta se yɛne gwiye nɛ̀ Jesus, è suuy se wen ge: Báàba, wɛ̀ ne boy se yɛ lu fɛn, fene wan-no ə wom ne báà kuo.

²²Dî nɛ mɛ ke ge lòó Feyine fó naa ghɛ se wɛ̀ kɛ wɛ̀ bifen ɛ leenen.

²³Jesus suuy se Malta ge: Wan-no ə viɛ é kase loole se ɛykuo.

²⁴Malta fise ge: Mɛ ke ge əb náà loole se ɛykuo ɛ kechii kenləysen kɛ wel əbjime loolen.

²⁵Jesus suuy se wen ge: Lu mɛ wɛ mɛ losen ghel se ɛykuo gese foo ɛychii. Naa ndɛ wɛ əb foon ɛytem se mɛ, ka əb cheme yî kuo, lu nɛ əb yɛ ki ɛychii.

²⁶Nɛ naa ndɛ wɛ əb chiin nɛ əb fo ɛytem se mɛ jia yî kuo. Wɛ̀ lɛ lu nɛ wɛ̀ bééme kii nɛ̂ kine-a?

²⁷Malta fise ge: Ɛɛne Báàba. Mɛ lu nɛ mɛ beeme ge wɛ̀ lu Vi wɛ Feyine nè Yiosen, wán ə Feyin, wɛ əb nè luun se gwiy ɛ mbi fɛn.

²⁸Malta suuy di, è me ndu è chəmten se wan-no ə wene Mɛɛle ge: Ndinte lu fɛn nɛ əb suuy ge wɛ̀ gwiy.

²⁹Mɛɛle yio dî, è loole kaŋ ɛymok è ndu se yɛne wen.

³⁰Nè lu dî nɛ Jesus bɛɛy ghàà lii se məme ntɛk, nɛ əb bo bɛɛy bene fɛ Malta kè yɛnen wen.

³¹Ghele Juus ghɛ ɛ́ nè luun ɛ ndaa ghene ghe Mɛɛle, chəmsen wen yɛn ka əb tumen è loole è fəy, è me se nduu ɛ wen ɛybam, kwaate ge əb nduu əbghun ɛysɛy se yɛ diy fo.

³²Mɛɛle ndu è yɛn Jesus, è təm ɛləy ɛ wen ɛyshiɛ è suuy ge: Báàba, wɛ̀ ne boy se yɛ lu fɛn, fene wan-no ə wom ne báà kuo.

³³Jesus yɛn ka Mɛɛle diyen nɛ ghele Juus ghɛ ɛ́ kè gwiyen ɛ wen ɛybam diynen sɛy, ke kum ɛytem ə wen, è fo ngɛk se wen se ŋaŋ.

³⁴Əb bif se ghene ge: Ghɛn ne gvəəme wen ghááy? Ghene fise ge: Báàba, gwiye è yɛn.

³⁵Jesus diy.

³⁶Ghele yɛn è suuy ge: Ghɛn yɛn jii yɛ əb nè koŋen wen ɛ ten!

³⁷Ghel ɛlee suuy ge lɛ ne lòó wel wɛ əb nè yiasen ɛshiɛ kenfefe jia nɛɛy ge ghàà əb kuo-a?

³⁸Kenəə tene gese kum ɛytem ə Jesus naa se ŋaŋ, əb ndu əbchio ɛysɛy. Ɛ́ nè chuf ɛysɛye ten nɛ lu ɛyghok, è chite nɛ̀ ɛytiye.

³⁹Jesus suuy ge: Ghɛn chakse ɛytiy yi se əbchio ɛysɛy. Malta wɛ wán-no wel əbkuon suuy ge: Báàba, ɛ́ yɛ lu nɛ əb se ləme. Shi əbchii əbkɛɛk ka ɛ́ nè gvəəmen wen.

⁴⁰Jesus suuy se wen ge: Mɛ lɛ kè báà suuy se wɛ̀ ge wɛ̀ fo ɛytem se mɛ, é wɛ̀ nɛ̂y yɛn əbtaawe Feyin-a?

⁴¹Ghene chakse ɛytiy yi. Jesus kiy ɛyyio è suuy ge: Mɛ bɛ́ɛ̀lè wɛ̀ Bay ka wɛ̀ yion se mɛ.

⁴²Mɛ ke ge wɛ̀ lóó wɛ̀ yɛ yiote mɛ əbliy əbjim. Mɛ suuye kine bek ghel ghɛ ɛ́ luun fɛn, ka ghene fó ɛytem se wɛ̀, è beeme ge nè tum wɛ̀ mɛ.

⁴³Əb suuy di, è me jaŋ ɛ giɛ ɛytaa ge: Lazalus, fəy è gwiy!

⁴⁴Wel əbkuon vi fəy è gwiy, nɛ ɛ́ lim ɛghoo ə wen nɛ̀ ɛvəə ə wene nɛ̀ əbnsake ndəyse, è gese bal ɛykek ə wen nɛ̂ əbwaŋe ndəyse. Jesus suuy se ghene ge: Ghɛn yayte wen é əb yɛ ndu.

⁴⁵Ghel se ɛydio ghɛ ɛ́ nè gwiyen se chame ɛykuo se ghe Mɛɛle yɛn kenəə kɛ Jesus nè momen, è me fo ɛytem se wen.

⁴⁶Ghene ɛlee loo kɛ ghene è ndu se ghele kenone Falisee, è fekte kenəə kɛ Jesus kè nɛɛyen.

⁴⁷Ghele kenone Falisee ghene ghele mbiy se ghɛ́ ntaŋlee konen ghene ghele ndaa nsake è suuy ge: Ghɛsene jɛl lɛɛy? Yɛn əbnəə əbchio əbyúméné wɛ wel vine feken!

⁴⁸Ghɛsen loo lu è vəse ge əb yɛ nɛɛy ndu kɛn nɛ̀ əbnəə vine, é wel əbjim fo ɛytem se wen, é ghele Lûm nɛ̂y gwiy è sak ndaa-ɛykokse nə ghɛsen gese nɛ̀ ketume kɛ́sene.

⁴⁹Wel əblee ɛ ghene məm wɛ ɛ́ nè toŋten ge Kaiafas, wɛ nè luun ketuu se ghɛ́ ntaŋlee ɛ nguk fô suuy ge: Ghɛn lu əbyuŋ.

⁵⁰Ghɛne báà se ke ge ke jofe se ghɛn ge wel nɛ̂ vin əbmok kuo ɛ kelik nə ghele chia ka ɛ́ bese ketum kejim-a?

⁵¹Əb nè báà se suuy di se wene ngeŋ. Ka əb nè luun ketuu se ghɛ́ ntaŋlee ɛ nguk fô, lu nɛ əb nè teefe nɛ lu ntum ə Feyin ge Jesus nɛ̂y kuo se boyse ghele Juus.

⁵²Ke nè báà se lu ge Jesus nè kuo kɛn bek ghene. Əb nè lu se kuo se chintene ghele Feyin ghɛ ɛ́ saaken ɛ mbi.

⁵³Se kɛ̀ɛ̀tè se kechii fo, ghɛ́ mbiy nə ghele Juuse me se kɛŋe jii yɛ ɛ́ yúy Jesus ɛ ten.

⁵⁴Jesus jia gese se jɛle ɛ dɛɛne ɛ Judea. Əb nè lô ndu ɛ kelik nɛ ke baksene se əbkwak əbyume, è se chii ɛ ntɛk ɛylee nɛ ɛ́ toŋte ge Eflem, ghene ghon-ɛyfɛl nə wene.

⁵⁵Əbliy ɛyyiɛ Kechii Ɛyboyse, nɛy loo kwɛn ghel se ɛydio lòò ɛ ntɛkse è kok ɛ Jolesalem se lanse ngeŋse ghen ka ɛysake ghene kɛŋen, nɛ kechii keghakene gee se kwɛn.

⁵⁶Ghene ndu di, è se kɛŋe Jesus, è loo konen ɛ ndaa-ɛykokse è se kante se ghene ngeŋse ge: Ghɛne kwaate gee ghɛ? Əb lɛ gwiy ɛyyiɛ kechii kin-a?

⁵⁷Nè lu dî nɛ ghele mbiye se ghɛ́ ntaŋlee ghene ghele kenone Falisee fomen ɛysak ge naa ndɛ yɛn ghaa Jesus luun, əb din ɛ́ koo.