Read Oku Jn 13 Bible Online

Jn 13 - Oku bible

Jn 13

¹Nɛy se lu ɛ kechii kɛ ke nè fóon se kechii kɛ ɛ́ nè yiɛn Kechii Ɛyboyse, nɛ Jesus keelemen ge əbliy wɛ yi vəse mbi yin è kase fiile se ba ə vi kwɛnmen. Əb nè se koŋe ghel ghɛ luun ghɛ́ wene ɛ mbi fɛn, əb ko me koŋ ghene dî è ndu è mɛyse.

²Nɛ̂y se lu əbliy wɛ ɛ́ yiɛ əbfua-əbyíɛ́ne ɛ likfəəy nɛ Satane liimen se Judas wɛ wán ə Simon Iskaliot ɛytem ge əb feene Jesus.

³Nè lu dî nɛ Jesus ko nè se ke ge Bay nè viimen əbnəə əbjim ɛ yi keghoo, gese ke ge yi nè lòò se Feyine nɛ yi kase fiile se Feyine;

⁴Ka ɛ́ yiɛn əbfua-əbyíɛ́ne dî əb me loole è chok ndəyse wene sɛ́ bɛye è liɛ kenfikse əbghun è chəŋ se wene əmkeŋkeŋ,

⁵è me bààtè moo se kekaŋ ɛysuu əbghun è me kɛɛte se suu ɛvəə ə ghon-ɛyfɛl nə wen, fikse nɛ̀ kenfikse əbghun kɛ ke nè luun ɛ wen əmkeŋkeŋ ki.

⁶Ka əb suun è gwiy chin ɛ Simon Bita ɛybee, əb bif se wen ge: Báàba, wɛ̀ kɛŋe se suu ɛvəə ə ghom-a?

⁷Jesus fise ge: Wɛ̀ báà se ke kenəə kɛ mɛ nɛɛyen kin ɛ leenen. Wɛ̀ nɛ̂y keele nɛ lu se ɛybam.

⁸Bita lek se Jesus ge: Lòó wɛ̀ jia suu ɛvəə ə wom naa se nkan! Jesus fise ge: Mɛ loo lu è jia suu ɛvəə ə ghiɛ, fene ghɛsoo bo ki wiy kenəə.

⁹Simon Bita fise ge: Báàba, ghàà suu kɛn nɛ lu ɛvəə ə wom! Suu sɛy ɛghoo ə wom ghene ketuu ə kome!

¹⁰Jesus fise ge: Wel wɛ əb suunmen əbghun shi əblanen, bo shii wiy ge ɛ́ suu əbghun ə wen əbjim, buu kɛn ɛvəə ə wen. Ghɛn ghel ɛjim shi ɛlanen, buu kɛn wel əbmok.

¹¹Jesus nè se ke wel wɛ əb nɛy feene wen; ghɛy kenəə kɛ əb nè suuyen ge: Báà se lu ghɛn ɛjim ghɛ ɛ́ luun ɛlanen.

¹²Jesus suu ɛvəə ə ghon-ɛyfɛl nə wen è mɛyse è me kase mak ndəyse wen è fiile se wene kelik bene fɛ ɛ́ nè yiɛn, è bif se ghene ge: Ghɛn lɛ ke kenəə kɛ mɛ nɛɛyen se ghɛn kin-a?

¹³Ghɛne toŋte mɛ ge ndinte gese toŋte ge Báàba, nɛ ke lu ɛ titiy di, bek ge ghɛy kefaa kɛ mɛ luun keghene.

¹⁴Ka mɛ wɛ Báàba ə wɛn nɛ̀ ndinte yɛn suunmen ɛvəə ə ghɛn lɛ, lu sɛy ka wel se ghɛn luun se yɛ suu ɛvəə əblee.

¹⁵Mɛ din nɛ lu əbchəyte se ghɛn, nɛ ghɛn lu se yɛ nɛɛy se ghel ɛlee kɛn ka mɛ nɛɛyen se ghɛn.

¹⁶Mɛ suuy əbluuy se ghɛn ge kekose lòó ke jia chia ba-ɛyfɛl nə wen, nɛ lòó wele ntum jia chia wel wɛ əb tumen wen.

¹⁷Ka ghɛn keelemen əbluuy nɛ̂ vin, ghɛn loo nɛɛy dì é ke yɛ lu kejuŋ se ghɛn.

¹⁸Mɛ báà se suŋnen kum ghɛn ghel ɛjim. Mɛ ke ghel ghɛ mɛ choken ge ghome. Dî nɛ kenəə kɛ ɛ́ nè nyaken ɛ ŋwaale-Feyin lu se kwɛn. Ɛ́ nè nyak ge: “Wel wɛ ghɛse wene yiɛn əbfua-əbyíɛ́ne nə mɛ kasemen è se kɛŋe ɛvəə ə wom.”

¹⁹Mɛ me se suuy kine se ghɛn ɛ leenen nɛ ke geese nɛ̂y se gan, ka ke nɛ̂y gan é ghɛn bééme ge mɛ lu vi wɛ mɛ luun əbghen.

²⁰Mɛ suuy əbluuy se ghɛn ge naa ndɛ wɛ əb fiisen vi wɛ mɛ tumen, fiisen nɛ lu mɛ, nɛ naa ndɛ wɛ əb fiisen mɛ, fiisen nɛ lu vi wɛ əb nè tumen mɛ.

²¹Jesus suuy əbnəə vin è mɛyse, ɛytem ə wene se foo ngɛk. Əb me suuy ɛ dɛɛne ge: Mɛ suuy əbluuy se ghɛn ge wel əblee ɛ ghɛne məme nɛ̂y feene mɛ.

²²Ghon-ɛyfɛl nə wene se kiynen ngeŋse ghen, lu nɛ̀ əbchíò əbyúméné ge əb sɛ suuye nɛ lu ndɛ-a!

²³Nè lu dî nɛ wan-ɛyfɛl wɛ Jesus nè koŋen se ŋaŋe diom è baksen se Jesus.

²⁴Simon Bita kwayte wán-ɛyfɛl vi, è suuy ge: Bif se wen ge əb sɛ suŋnene kum ndɛ-a?

²⁵Wan-ɛyfɛl vi kokte ndu è baksen se Jesus è bif ge: Lu ndɛ Báàba?

²⁶Jesus fise ge: Wel wɛ mɛ nɛ̂y bɛk keban è chək se moome mbas, è fo se wen lu wen. Əb me chək keban se moome mbas, è fo se Judas wɛ wán ə Simon Iskaliot.

²⁷Judas fii keban ki ɛ leghɛ, Satan me lii se wen ɛytem. Jesus suuy se wen ge: Yaŋse nɛɛy kenəə kɛ wɛ̀ luun se nɛɛy chikiy chikiy.

²⁸Ghon-ɛyfɛl nə wen ghɛ ghene ghene nè yiɛn, yio dî è jia keele ge əb sɛ suuy se wen di bek ghɛ-a?

²⁹Ka nè lɛmen Judas kebam əbkaa nə ghene, ghon-ɛyfɛl ɛlee me se kwaate ge Jesus tume wen ge əb ndu è yun əbfua wɛ ə́b nè luun ɛ shii se yiɛ ɛ kechii keghakene, kene ge əb fo kefaa se ghɛ́ ketane.

³⁰Judas fii keban ki è me fəy kaŋ ɛymok. Nè lu dî nɛ shi nɛ ntəke.

³¹Judas fəy dî, Jesus me suuy ge: Lɛɛ ɛ leenen wɛ əbghaake Wanwele yɛnsen. Əbghaake ə Feyine yɛnsen ɛ wene məm.

³²Ka Wanwele nɛɛyen kenəə kɛ ke koksen Feyin lu kɛn ghɛɛ-ghɛɛ ka Feyine nɛɛy kenəə kɛ ke kokse Wanwel, nɛ əb shi kɛn se nɛɛy.

³³Ghon ghine, mɛ bo bɛɛy se yɛ lu ghɛsen kɛn se feleeŋese əbliy. Ghɛne nɛ̂y yese è yɛ kɛŋe mɛ, nɛ mɛ suuy se ghɛn ka mɛ nè suuyen se ghɛ́ mbiye nə ghele Juus ge: Ghaa mɛ nduun lu nɛ lòó ghɛn jia gwiy.

³⁴Mɛ me se foo nchil ɛyfɛɛ se ghɛn ge: Ghɛn yɛ koŋe ngeŋ ə sɛn. Kɛn ka me koŋen ghɛn, lu kɛn ghɛɛ-ghɛɛ ka ghɛne yɛ koŋe ngeŋ sɛn.

³⁵Ghɛn lòò è yɛ koŋe ngeŋ ə sɛn, é wel əbjim me yɛ ke ge ghɛn lu ghon-ɛyfɛl nə mɛ.

³⁶Simon Bita me bif ge: Wɛ̀ nduu ghááye Báàba? Jesus fise ge: Mɛ nduu ɛ kelik nɛ lòó wɛ̀ jia ndu fo ɛ leenen, dî nɛ wɛ̀ nɛy jumte gwiy nɛ̀ mɛ nɛ lu se ɛybam.

³⁷Bita bif ge: Báàba, lu bek ghɛ wɛ lòó mɛ jia jumte wɛ ɛ leenen? Mɛ lu kebaaten se kuo bek wɛ̀.

³⁸Jesus fise ge: Wɛ̀ lɛ loote lu kebaaten se kuo bek mɛ-a? Mɛ suuy əbluuy se wɛ̀ ge: Lumngvəə nɛ̂y yɛ ghan ge yi toŋ nɛ wɛ̀ maamen mɛ kaŋ ɛtal.