Read Oku Jn 14 Bible Online

Jn 14 - Oku bible

Jn 14

¹Jesus suuy se ghene ge: Ghàà ɛytem ə yɛne yɛ foo ngɛk. Ghɛn fó ɛytem se Feyine, è fo sɛy se mɛ.

²Əblik əbchiine lu ɛ Ba ə wome ndaa se ɛydio; ke lɛ kè wiy dì fene mɛ ke suuye ge mɛ nduu se siyse kelik se ghɛn-a?

³Ɛ́ nɛ̂y loo lu nɛ mɛ ndumen è siyse kelik se ghɛn, é mɛ kase gwiy è liɛ ghɛn é ghɛsen yɛ lu ka ghɛne yɛ lu ghaa mɛ luun.

⁴Ghɛn ke jii yɛ ɛy nduun ɛ kelik kɛ mɛ nduun ɛ ten.

⁵Ntomas me suuy se wen ge: Báàba, ghɛse báà se ke ghaa wɛ̀ nduun, lòó ghɛs keele lɛɛy jii yɛ ɛy nduun gho?

⁶Jesus fise ge: Lu mɛ jii, nɛ lu mɛ əbluuy, nɛ lu mɛ ɛychii: Lòó wel jia ndu se Bay buu ge əb bɛ̀ɛ̀ mɛ.

⁷Əb gese suuy se ghene ge: Ghɛn ke mɛ fene ghɛn se ke Bay. Se kɛ̀ɛ̀tè ɛ leenen lu nɛ ghɛne keelemen wen è gese se yɛne wen.

⁸Filib suuy se wen ge: Báàba, dine Bay se ghɛs, ghɛy kɛn kenəə kɛ ghɛse shiin.

⁹Jesus fise ge: Mɛ nè shi ghɛsen se əbtəm, ko se lu nɛ wɛ̀ ke wiy mɛ-a Filib? Naa ndɛ wɛ əb yɛnen mɛ, yɛnmen Bay. Ke ghan lɛɛy ge ghɛn yɛ suuy ge mɛ din Bay se ghɛn.

¹⁰Ke dine ge wɛ̀ báà beeme ge mɛ lu ɛ məm nə Bay nɛ Bay lu ɛ məm nə mɛ-a? Giɛ sɛ mɛ fóon se ghɛn báà se lu kɛn some, se lòò se Bay wɛ əb luun ɛ məm nə mɛ nɛ mɛ lu ɛ məm nə wen, nɛ əb nɛɛye ɛyfɛl ə wen chia ɛ mɛ əbghun.

¹¹Ghɛn bééme se mɛ ka mɛ suuyen ge Bay lu ɛ məm nə mɛ nɛ mɛ lu ɛ məm nə wen, buu dî ghɛn ko beeme bek ɛyfɛl yin yɛ mɛ nɛɛyen.

¹²Mɛ suuy əbluuy se ghɛn ge naa ndɛ wɛ əb foon ɛytem se mɛ nɛ̂y yɛ nɛɛy əbnəə wɛ mɛ nɛɛyen, nɛɛy naa wɛ əb chian wɛ mɛ nɛɛyen bek ka mɛ se nduun se Ba ə wom.

¹³Ghɛn lon naa ghɛ ɛ mɛ ɛyghel é mɛ fó se ghɛn ka Baye kiile ɛykokse chia əbghun nə wan.

¹⁴Ghɛn bif naa ghɛ ɛ mɛ ɛyghel, é mɛ nɛɛy.

¹⁵Ghɛne koŋe mɛ, é ghɛn yɛ lɛme nchil ə som.

¹⁶Mɛ nɛ̂y lon é Bay fó ngiamten ɛylee yɛ ɛy yɛ lu ghɛne ghene əbliy əbjim.

¹⁷Ngiamten nɛ̂ yin lu Keyioy kɛ ke dinen əbluuy. Lòó ghele ghɛ́ mbii jia fiisen wen bek ka ghene báà se yɛne wen gese ke wiy wen. Dî nɛ ghɛn ke wen bek ge əb lu ghɛne ghene, nɛ əb nɛ̂y yɛ chii ɛ ghɛne məm.

¹⁸Mɛ jia nɛ̂y vəse ghɛn é ghɛn yɛ lu kɛn se ghɛne ngeŋse, mɛ nɛ̂y kase gwiy, se ghɛn.

¹⁹Se moote kɛn lɛ é ghele ghɛ mbii jia bo yɛ yɛne mɛ ghɛy, dî nɛ ghɛne yɛ yɛne mɛ, nɛ ka mɛ chiin lu nɛ ghɛne yɛ chii sɛy.

²⁰Ɛ́ náà loo lu ɛ kechii fo é ghɛn keele ge mɛ lu ɛ məm nə Ba ə wom nɛ ghɛn lu ɛ məm nə mɛ, nɛ mɛ lu ɛ məm nə ghɛn.

²¹Naa ndɛ wɛ əb keen nchil ə som lɛme, lu vi wɛ əb koŋen mɛ. Ba ə wome nɛ̂y yɛ koŋe naa ndɛ wɛ əb koŋen mɛ, nɛ mɛɛ mɛ yɛ koŋe wen, è din ngeŋ ə yom se wen.

²²Judas əblee nɛ wiy Iskaliot me bif ge: Báàba, lu bek ghɛ wɛ wɛ̀ nɛ̂y din ngeŋ ə yiɛ se ghɛs è jia din se ghɛ́ mbii.

²³Jesus fise ge: Naa ndɛ wɛ əb koŋen mɛ yɛ nɛɛy kenəə kɛ mɛ suuyen. Ba ə wome yɛ koŋe wen, nɛ ghɛse Ba ə wome gwiy è yɛ chii ghɛse ghene.

²⁴Naa ndɛ wɛ əb báà se koŋe mɛ báà se nɛɛy kenəə kɛ mɛ suuyen. Kenəə kɛ ghɛn yionmen báà se lu kome, ke lòò se Bay wɛ əb nè tumen mɛ.

²⁵Mɛ suuymen əbnəə nɛ̂ vin se ghɛn nɛ mɛ bo bɛɛy ghɛsen.

²⁶Dî nɛ ngiamten yɛ Keyioy Kelanene kɛ Baye nɛ̂y tum ɛ mɛ ɛyghel ko nɛ̂y dinte əbnəə əbjim se ghɛn, è nɛɛy é ghɛn kuume əbnəə əbjim wɛ mɛ suuyenmen se ghɛn.

²⁷Mɛ foo ɛytem ɛyzəətene se ghɛn, nɛ lu ɛynkii ɛytem yɛ mɛ kiin. Mɛ báà se foo nɛ lu yɛ ghɛ mbi fɛne foon. Ghàà ɛytem ə yɛne yɛ foo ngɛk se ghɛn, ghàà ghɛn yɛ fan.

²⁸Ghɛn lu nɛ ɛ́ yiomen ka mɛ suuyen ge, mɛ se lòò nɛ mɛ nɛ̂y kase gwiy se ghɛn. Ghɛn kè boy se yɛ loote koŋe mɛ fene ghɛn kè chɛkle ge mɛ se fiile se Bay bek ge əb chia mɛ.

²⁹Mɛ suuy əbnəə nɛ̂ vin se ghɛn ɛ leenen nɛ əb nɛ̂y geese gan ka əb nɛ̂y loo gan, é ghɛn fó ɛytem se mɛ.

³⁰Mɛ jia bo yɛ suŋnen se ghɛn nduu se əbtəm bek ge wel wɛ əb saken mbi yin shi se gwiy. Əb báà se ki əbtaawe se nɛɛye kenəə se mɛ, nɛ kooy naa ghɛ fene mɛ nɛɛy kɛn nɛ lu kenəə kɛ Ba ə wom suuyen ge mɛ nɛɛy,

³¹ka ghele mbi keele ge mɛ koŋe Bay, nɛ mɛ gese nɛɛy kɛn nɛ lu kii dii kɛ əb suuyen ge mɛ yɛ nɛɛy. Ghɛsen lòò se fɛn.