Read Oku Jn 15 Bible Online

Jn 15 - Oku bible

Jn 15

¹Mɛ lu nkante əbteŋ nɛ ba ə wom lu wel wɛ əb toknen nɛ̀ ɛyleme tene.

²Əb yɛne əbtam wɛ əb báà se koom əmtam, əb fas se mɛ əbghun. Əb yɛne wɛ əb koom əbtam, əb siyse əb yɛ lu kejuŋ loote koom əmtam.

³Giɛ sɛ mɛ fekten se ghɛn nɛɛymen ghɛn se lu ɛlanen.

⁴Ghɛn balen è gok se mɛ əbghun, é mɛ gok ghɛsen. Lòó əbtame jia koom əmtam se ngeŋ buu ge əb balen ɛ əbghun əbteŋ. Lu ghɛɛ-ghɛɛ ka lòó ghɛn jia koom əmtam buu ge ghɛn balen è gok ɛ mɛ əbghun.

⁵Mɛ lu əbteŋ nɛ ghɛn lu ɛytame ten. Wel lòò è balen è gok se mɛ əbghun, mɛ gok ghɛse wen, é əb yɛ koom əmtam naa se ɛydio, bek ge buu mɛ é ghɛn jia nɛɛy kenəə.

⁶Naa ndɛ wɛ əb báà balen è gok se mɛ əbghun lu ka əbtam wɛ ɛ́ fasen, è maay, əb yum. Ɛ́ lóó ɛ́ chinten ɛytam ka yii nɛ̂ yine ɛ́ me mak se əbvəs, ɛy fuo.

⁷Ghɛn balen è gok se mɛ əbghun, giɛ ə some gok ɛ ghɛne tetem, ghɛne bif naa ghɛ kɛ ghɛne kɛŋen é Feyine fó.

⁸Ghɛne loo koom əmtam se ɛydio, Ba ə wom yɛ kiile ɛykokse, nɛ lu ɛ jii nɛ̂ ghan yɛ ghɛn luun ghon-ɛyfɛl nə mɛ.

⁹Mɛ koŋe ghɛn kɛn ka Baye koŋen mɛ. Ghɛn gok è yɛ lu ghɛsen nɛ mɛ koŋe ghɛn.

¹⁰Ghɛn lòò è yɛ nɛɛye kenəə kɛ mɛ suuyen, é mɛ yɛ koŋe ghɛn nduu kɛn ɛ mbiy. Lu ghɛɛ-ghɛɛ ka mɛ nɛɛyen kenəə kɛ Baye suuyen nɛ əb koŋe mɛ nduu kɛn ɛ mbiy.

¹¹Mɛ suuy əbnəə vin se ghɛn ka kechɛkle kɛ ke luun ɛ mɛ ɛyteme yɛ lu ɛ ghɛne tetem, é ghɛn me loote kiile kechɛkle.

¹²Nchil yɛ mɛ fóon se ghɛn lu ge, ghɛn yɛ koŋe ngeŋ ə sɛn kɛn ka mɛ koŋen ghɛn.

¹³Ɛykoŋ ɛytaa yɛ wel din se sunse wene báà chia ka əb kuo bek ghene.

¹⁴Ghɛne nɛɛye kenəə kɛ mɛ suuyen se ghɛn fene ghɛn lu sun ə som.

¹⁵Mɛ bo toŋte wiy ghɛn ge ghel ɛyfɛl nə mɛ ghɛy bek ge wel ɛyfɛle báà se ke kenəə kɛ ba-ɛyfɛle nɛɛyen. Mɛ dì toŋte ghɛn ge sun ə som bek ge mɛ suuymen əbnəə əbjim se ghɛn wɛ mɛ nè yion se Ba ə wom.

¹⁶Nè báà chok ghɛn mɛ, nè chok mɛ ghɛn è tum ge ghɛn ndu è yɛ koom əmtam naa se ɛydio nɛ lu əmtam mɛ əm jia yî mɛy. Ghɛn nɛɛy dì, è yɛ lon naa ghɛ se Bay ɛ mɛ ɛyghel, é əb fó se ghɛn.

¹⁷Kenəə kɛ mɛ suuyen se ghɛn lu ge: Ghɛn yɛ koŋe ngeŋ ə sɛn.

¹⁸Ghele ghɛ́ mbi loo bane ghɛn, ghɛn yɛ kuume ge ghene nè chia mbiy è se bane mɛ.

¹⁹Ghɛn kè boy se yɛ lu ghele mbi, fene ghene kè koŋe ghɛn ka ghel ə ghen. Se lu nɛ mɛ nè chok ghɛn ɛ məm nə ghele mbii, ghɛne jia gese se lu ghele mbi; ghɛy kenəə kɛ ghene banen ghɛn.

²⁰Ghɛn kuume kenəə kɛ mɛ nè suuyen se ghɛn ge: Wel ɛyfɛle báà se lu wɛ əb chian ba-ɛyfɛl nə wen. Ɛ́ nè lô nəkse mɛ, nɛ lu ghɛɛ-ghɛɛ ka ɛ́ luun se yɛ nəkse ghɛn. Ghene nè bóy se yɛ yio kenəə kɛ mɛ suuyen, é ghene yɛ yio sɛy kɛ ghɛne suuyen.

²¹Ghene nɛ̂y yɛ nəkse ghɛn ɛ jii ghan bek ka ghɛn luun ghel ə ghom, nəkse dì bek ge ghene báà se ke wel wɛ əb nè tumen mɛ.

²²Mɛ nè bóy se jia se gwiy se suŋnen se ghene fene ghene nè báà boŋ njio bek mbeese ghen. Se lu ɛ leenen nɛ lòó ghene jia suuy ge ghene nè báà se ke ge kenəə kɛ ghene nè nɛɛyen lu mbee.

²³Naa ndɛ wɛ əb banen mɛ bane sɛy ba ə wom.

²⁴Mɛ nè bóy se jia se gwiy ɛ ghene məm se nɛɛy əbnəə wɛ wel nè bɛɛy ghàà nɛɛy, fene ghene nè báà boŋ njio bek mbeese ghen. Se lu nɛ ghene yɛnmen əbnəə nɛ̂ vin, è ko se bane mɛ gese bane ba ə wom.

²⁵Ke nè gan dî se lunse kenəə kɛ ɛ́ nè nyaken ɛ ghene ŋwaale nchil ge: “Ghene nè bane mɛ se lólò.”

²⁶Dî nɛ mɛ nɛ̂y tum ngiamten se ghɛn nɛ lu Keyioy Kelanene nɛ ke lòò se Bay, nɛ lu wen wɛ əb dinen əbluuy. Əb nɛ̂y gwiy è suuy kenəə kɛ kum mɛ.

²⁷Ghɛne nɛ̂y yɛ suŋnen sɛy kum mɛ bek ka ghɛsen nè shiin se ɛyshaa ngam.