Read Oku Jn 16 Bible Online

Jn 16 - Oku bible

Jn 16

¹Mɛ suuymen əbnəə vin əbjim se ghɛn fɛ ɛybeeme yɛne shiken.

²Ghene nɛ̂y fɛɛse ghɛn se ngayse ɛyjem, nɛ əbliye gwiye wɛ wele nɛ̂y yɛ yuye wel se ghɛn, əb yɛ kwaate ge yi nɛɛy nɛ lu ɛyfɛl ə Feyin.

³Ghene nɛ̂y yɛ nɛɛy əbnəə nɛ̂ vin se ghɛn bek ka ghene bɛɛy ghàà yɛ ke Bay kene mɛ.

⁴Mɛ suuymen əbnəə vin se ghɛn ka əbliye nɛ̂y kwɛn é ghene loo nɛɛy é ghɛn kuume ge mɛ nè lô suŋnen se ghɛn kum əbghene. Mɛ nè báà suuy əbnəə vin se ghɛn se ɛyshaa ngàm bek ka mɛ nè bo bɛɛy ghɛsen.

⁵Se lu nɛ mɛ se nduu se wel wɛ əb nè tumen mɛ, wel se ghɛne chémè jia bif ge mɛ sɛ nduu ghááy-a?

⁶Se lu ɛ leenen wɛ mɛ suuymen əbnəə nɛ̂ vin se ghɛn, tetem ə tɛne me se foo ngɛk.

⁷Dî nɛ mɛ suuy əbluuy se ghɛn ge, ke lu kejuŋ se ghɛn ge mɛ ndu, bek ge mɛ jia ndu, é ngiamten jia nɛ̂y gwiy se ghɛn. Mɛ ndu, é mɛ me tinse wen se ghɛn.

⁸Əb nɛ̂y gwiy, è din se ghele mbii ge ghene kwaate nɛ̀ ɛybame kum mbeese ghen, kum ɛychii yɛ titiye, kum jii yɛ Feyine yî sak ghel ɛ ten.

⁹Əb nɛ̂y din ge ɛykwaate ə ghen kum mbee lu nɛ̀ ɛybame bek ka ghene báà fo ɛytem se mɛ,

¹⁰è din kum ɛychii yɛ titiye bek ge mɛ se fiile se Bay nɛ ghɛne jia bo nɛ̂y yɛ yɛne mɛ,

¹¹è gese din kenəə kɛ kum ɛysak bek ge Feyine nè sakmen wel wɛ əb saken mbi yin.

¹²Mɛ bo ki əbnəə se ɛydio se suuy se ghɛn, dî nɛ əb dio chia ka lòó ghɛn ghal ɛ leenen.

¹³Dî nɛ Keyioy kɛ ke dinen əbluuye nɛ̂y gwiy, è nɛɛy é ghɛn keele əbluuy əbnəə jii sejim. Əb jia nɛ̂y yɛ suŋnen se wene ngeŋ. Əb nɛ̂y yɛ suuy nɛ lu əbnəə wɛ əb yion, gese dine se ghɛn əbnəə wɛ əb bɛɛyen se nɛ̂y se yɛ lu.

¹⁴Əb nɛ̂y nɛɛy kenəə kɛ ke gwiyen nɛ̀ ɛykokse se mɛ bek ka əb nɛ̂y yɛ liɛ əbnəə wɛ wome suuye se ghɛn.

¹⁵Əbjim wɛ Bay kiin lu wome, ghɛy kenəə kɛ ke nɛɛyen mɛ suuy ge Keyioye nɛ̂y yɛ liɛ əbnəə wɛ wome suuye se ghɛn.

¹⁶Se moote kɛn lɛ é ghɛn jia bo yɛn mɛ ghɛy, é gese yɛ moote kɛn lɛ é ghɛn me kase yɛn mɛ.

¹⁷Ghon-ɛyfɛl nə wen ɛlee me se kante ge: Kɛ əb suuyen kin lu gee ghɛ? Əb suuy se ghɛsen ge: Se moote kɛn lɛ é ghɛn jia bo yɛn mɛ, é gese yɛ moote kɛn lɛ é ghɛn me kase yɛn mɛ, è gese suuy ge: Ke lu dî bek ka mɛ se nduun se Bay,

¹⁸è ko me se kante nduu ge: Kɛ əb suuyen ge: Se moote kɛn lɛ, lu gee ghɛ? Ghɛsen báà keele kenəə kɛ əb suuyen.

¹⁹Jesus keele ge ghene kɛŋe se bife kenəə se yi, è me suuy se ghene ge: Mɛ kè suuy ge: Se moote kɛn lɛ é ghɛn jia bo yɛn mɛ, nɛ ɛ́ gese yɛ moote kɛn lɛ é ghɛn me kase yɛn mɛ. Lɛ ghan kenəə kɛ ghɛne kanten se ghɛne ngeŋse-a?

²⁰Mɛ suuy əbluuy se ghɛn ge: Ghɛne nɛ̂y yɛ toŋ, buke, nɛ ghele mbii saŋlee. Ghɛne nɛ̂y kɛɛte è yɛ lu ɛysen ɛysen, se ɛybame ten é ghɛn yɛ saŋle.

²¹Əbvii sɛɛ loo lum, əb yɛ soo ketuu ka əbliy wɛ əb bii ɛ ten kwɛnenmen; əb bii, əb me lɛysen ɛyyaf yɛ əb kè yion bek ge əb se saŋle bek ka wel əbfɛɛ gwiyenmen se mbi.

²²Ghɛy ka ke luun se ghɛn; leenen lu nɛ ghɛn soo əbtuu, dî nɛ mɛ nɛ̂y kase yɛn ghɛn, é tetem ə tɛne lun nɛ̀ ɛysaŋle nɛ lòó wel jia fii se ghɛn.

²³Ɛ́ naa loo lu əbliy fo, é ghɛn jia bo yɛ bife kefaa nɛ lu se mɛ. Mɛ suuy əbluuy se ghɛn ge: Ba ə wome nɛ̂y fo naa ghɛ se ghɛn kɛ ghɛne bifen ɛ mɛ ɛyghel.

²⁴Se chin ɛ leenen lu nɛ ghɛne bɛɛy ghàà bif kefaa ɛ mɛ ɛyghel; ghɛn yɛ bif nɛ Feyine foo, ka ghɛne yɛ loote saŋle.

²⁵Mɛ suuymen əbnəə vin se ghɛn ɛ nganse, nɛ əbliye gwiye wɛ mɛ jia bo nɛ̂y yɛ suŋnen se ghɛn ɛ nganse, dî è yɛ suŋnen kelaanen kum Bay.

²⁶Ɛ́ naa loo lu əbliy fo, é ghɛn lon se wen ɛ mɛ ɛyghel. Mɛ báà se suuy ge lu mɛ se naa se yɛ lon se Bay ge əb fó se ghɛn,

²⁷bek ge Bay se wene ngeŋ koŋe ghɛn. Əb koŋe ghɛn bek ge ghɛne koŋe mɛ, nɛ ghɛne beeme ge mɛ nè lòò nɛ lu se Bay.

²⁸Mɛ nè lòò se Bay è gwiy ɛ mbi fɛn, se lu ɛ leenen nɛ mɛ se vəse mbi se kase se fiile se Bay.

²⁹Ghon-ɛyfɛl nə wene me suuy ge: Lɛɛ ɛ leenen wɛ wɛ̀ suŋnen kelaanen bo maa wiy nɛ lu nganse.

³⁰Lɛɛ ɛ leenen wɛ ghɛs keelenmen ge wɛ̀ ke əbnəə əbjim, nɛ shii báà se lu wɛ wel yɛ bife tebif se wɛ̀. Kii nɛ̂ kine nɛɛymen ghɛse beeme ge wɛ̀ nè lòò nɛ lu se Feyine.

³¹Jesus bif se ghene ge: Ghɛn beememen ɛ leenen-a?

³²Əbliye gwiye, nɛ əb se shi ɛ keghoo, wɛ ghɛn ghel ɛjime nɛ̂y takle é wel yɛ ndu ɛ wen ə ndaa é mɛ gok mɛ nyiŋ, dî nɛ mɛ báà se lu mɛ nyiŋ bek ge Bay lu ghɛse wen.

³³Mɛ suuymen əbnəə vin se ghɛn ka ghɛsene gok se kefaa kemok é ghɛn yɛ ki əmnyiaŋ. Ghɛne yɛne ngɛk ɛ mbi fɛn, dî nɛ ghɛn kul ɛytem bek ge mɛ taamen è chia mbi.