Read Oku Jn 17 Bible Online

Jn 17 - Oku bible

Jn 17

¹Jesus nɛy suuy əbnəə vin è mɛyse ɛ leghɛ è kiy ɛyyio, è suuy ge: Bay, əbliye kwɛnmen. Nɛɛy é wan ə viɛ kiile ɛykokse ka əb nɛɛy é wɛ̀ kiile ɛykokse.

²Wɛ̀ nè fomen əbtaawe se wen ge əb yɛ lu ɛ ketuu nə wel əbjim, ka əb yɛ foo ɛychii yɛ ɛy jia yî mɛy se ghel ghɛ wɛ̀ nè foon se wen.

³Ɛychii yɛ ɛy jia yî mɛy lu ge, wel keele wɛ̀ wɛ luun kɛn Feyine fɛ́ əbluuye, è gese keele mɛ wɛ Jesus Christ wɛ wɛ̀ nè tumen.

⁴Mɛ nɛɛymen wɛ̀ kiile ɛykokse ɛ ketuu ntiɛ ka mɛ mɛysen ɛyfɛl yɛ wɛ̀ nè foon se mɛ.

⁵Bay, nɛɛy é mɛ kiile ɛykokse ɛ leenen, ɛykokse yɛ ghɛsoo nè kiin se geese náà se bome mbi.

⁶Mɛ dinmen wɛ̀ se ghel ghɛ wɛ̀ nè fəysen ɛ məme mbi è fo se mɛ. Ghene nè lu ghel ə ghiɛ, wɛ̀ fo ghene se mɛ, se lu nɛ ghene nɛɛymen kenəə kɛ wɛ̀ suuyen.

⁷Leenen lu nɛ ghene keelemen ge əbnəə əbjim wɛ wɛ̀ nè foon se mɛ lu nɛ əb nè lòò se wɛ̀.

⁸Mɛ nè lô fo sakghɛ wɛ wɛ̀ nè foon ge mɛ fó, ghene fiisen, è se ke se əbluuy ge mɛ nè lòò se wɛ̀ gese ki ɛybeeme ge nè tum wɛ̀ mɛ.

⁹Mɛ báà se jeme nɛ lu se ghele ghɛ́ mbi fɛne, mɛ jeme se ghel ghɛ wɛ̀ nè foon se mɛ bek ge ghene lu ghel ə ghiɛ.

¹⁰Ghel ɛjim ghɛ mɛ kiin lu ghiɛ nɛ ɛjime ghɛ wɛ̀ kiin lu ghome, nɛ lu bek ghene wɛ əbghaake ə wome yɛnsen.

¹¹Kɛ́ leenene lu nɛ mɛ se fiile se wɛ̀ nɛ mɛ bo bɛɛy wiy se yɛ lu ɛ mbi fɛn dî nɛ ghene bɛɛy ɛ ten. Bay əblanen, ko ghal ghene nɛ̀ əbtaawe ɛyghel nə wɛ̀, yɛ wɛ̀ nè foon san ka ghene yɛ lu se kefaa kemok ghɛɛ-ghɛɛ ka ghɛsoo luun se kefaa kemok.

¹²Nè lu əbliy wɛ mɛ nè luun ghɛse ghene, nɛ mɛ ghale gese chiye ghene nɛ̀ əbtaawe ɛyghel nə wɛ̀ yɛ wɛ̀ nè foon se mɛ. Wel nè báà lɛy ɛ ghene məm buu kɛn wel wɛ ke nè luun ge əb lu se jase jii se lunse kenəə kɛ ŋwaale-Feyin suuyen.

¹³Kɛ́ leenene lu nɛ mɛ se gwiye se wɛ̀, nɛ mɛ suuye əbnəə vin bo bɛɛy ɛ mbi fɛn ka ghene loote kiile kechɛkle ə kom ɛ ghene məm.

¹⁴Mɛ nè lô fo sakghɛ wɛ wɛ̀ nè foon ge mɛ fó se ghene, ghele mbi se bane ghene bek ka ghene báà se chii ka ghɛ́ mbii. Lu sɛy ka mɛ nè báà se chii ka ghɛ́ mbii.

¹⁵Mɛ báà se suuy ge wɛ̀ chakse ghene chaksen se mbi fɛn, dî lone ge wɛ̀ tɛɛke ghene se wel vi wɛ ɛ́ toŋten ge wel əbbee.

¹⁶Ghene báà se lu ghele mbi, kɛn ka mɛ báà se lu wele mbi.

¹⁷Siyse ghene nɛ̀ əbluuy ə viɛ, giɛ ə shiɛ lu əbluuy.

¹⁸Ka wɛ̀ nè tumen mɛ se mbi lu ghɛɛ-ghɛɛ ka mɛ tumen ghene.

¹⁹Mɛ me siyse ngeŋ ə yom ka mɛ nɛɛy é ghene yɛ lu ɛ siysen se əbluuy.

²⁰Mɛ báà se jeme kɛn se ghene, mɛ jeme sɛy se ghii dii ghɛ ghene naa fekte kenəə ə Feyin se ghene é ghene fó ɛytem se mɛ.

²¹Mɛ jeme ge ghene ghel ɛjime yɛ lu se kefaa kemoke Bay, kɛn ka wɛ̀ luun ɛ məm nə mɛ nɛ mɛ lu ɛ məm nə wɛ̀. Nɛɛy é ghene yɛ lu sɛy ɛ məm nə ghɛsoo ka ghele mbii beeme ge nè tum kɛn naa wɛ̀ mɛ.

²²Mɛ fomen se ghene əbghaake wɛ wɛ̀ nè foon se mɛ ka ghene yɛ lu se kefaa kemok ka ghɛsoo luun se kefaa kemok.

²³Mɛ lu ɛ məm nə ghene nɛ wɛ̀ lu ɛ məm nə mɛ, ko nɛɛy é ghene ko yɛ loote lu se kefaa kemok ka ghele mbi keele ge nè tum wɛ̀ mɛ è se koŋe ghene kɛn ka wɛ̀ koŋen mɛ.

²⁴Bay, mɛ kɛŋe ge ghel ghɛ wɛ̀ nè foon se mɛ yɛ lu ghaa mɛ luun ka ghene yɛn əbghaake wom wɛ wɛ̀ nè foon san bek ka wɛ̀ nè koŋen mɛ se geese naa se bome mbi.

²⁵Bay wɛ əb nɛɛyen kɛn əbnəə wɛ titiye, ghele mbi báà se ke wɛ̀ dî nɛ mɛ ke wɛ̀ nɛ ghel ghine ke ge nè tum wɛ̀ mɛ.

²⁶Mɛ nè lô nɛɛy ghene se ke wɛ̀ nɛ mɛ yɛ ndu kɛn ɛ mbiy nɛɛye nɛ ghene keele wɛ̀ ka ɛykoŋ yɛ wɛ̀ kiin se mɛ yɛ lu sɛy ɛ ghene məm, nɛ mɛ se mɛ ngeŋ lu ɛ məm nə ghene.