Read Oku Jn 19 Bible Online

Jn 19 - Oku bible

Jn 19

¹Bailɛt me fo Jesus, ɛ́ tɛl.

²Ghel ɛyghoŋe nɛyte kefol nɛ̀ kenjoonjoŋe, è sooy se wene ketuu, è lafse wen nɛ̀ ndəyse tefone,

³è me se kokte gwiye buu wen ge: Ghɛse bune wɛ̀ əbfone ghele Juus. Wele bun dì, əb chia è saay keghoo ɛ wene kegiɛk.

⁴Bailɛt kase fəy ɛ bɛy è suuy se ngose wel yi ge: Yɛn-a! Mɛ́ fəy nɛ̀ wen fɛn se din ge mɛ báà yɛn kejase wen.

⁵Bailɛt suuy dì è me fəy è gwiy nɛ̀ Jesus, nɛ əb sooy kefole njoŋse è mak ndəyse tefon, è suuy se ghene ge: Yɛn-a! Lɛɛ wen!

⁶Ghele mbiy se ghɛ́ ntaŋlee ghene ghel ghɛ ɛ́ nè chiyen ndaa-ɛykokse yɛn Jesus, è me waame ketaan ge: Bante wen se kentam! Bante wen se kentam! Bailɛt suuy se ghene ge: Ghɛn liɛ wen è bante se kentam nɛ̀ keghoo kɛne. Mɛ báà yɛn kejase wen.

⁷Ghele Juus ghii toose ge: Ghɛs ki ɛysak yɛ ɛy dinen ge əb lu se kuo, bek ge əb liɛ ge yi lu wan ə Feyin.

⁸Bailɛt yio kenəə kɛ ghene suuyen, è me gese se fane naa se ŋaŋ.

⁹Əb kase fiile è lii se məme ntok è bif se Jesus ge: Wɛ̀ lòò naa ghááy? Jesus jia fise.

¹⁰Bailɛt suuy se wen ge: Wɛ̀ tɛne se suŋnen se mɛ-a? Wɛ̀ báà se ke ge mɛ ki əbtaawe se vəse wɛ̀, gese ki əbtaawe se suuy ge ɛ́ bante wɛ̀ se kentam-a?

¹¹Jesus fise ge: Lòó wɛ̀ jia yɛ ki əbtaawe se nɛɛy kenəə se mɛ buu ge əb lòò ɛyyio. Wel wɛ əb kè viin mɛ se wɛ̀ keghoo lu nɛ əb nɛɛy mbee ɛytaa.

¹²Bailɛt yio kii nɛ̂ kine è me se mome ketaan se vəse Jesus. Dî ghel ghii waame ketaan ge: Loo lu wɛ̀ vəse wen, fene wɛ̀ báà se lu sun ə əbfone Lûm. Naa ndɛ wɛ əb liɛn ge yi lu əbfon, lu nɛ əb se kɛŋe ɛvəə əbfone Lûm.

¹³Bailɛt yio kii nɛ̂ kine, è liɛ Jesus è fəy so se bɛy è diom ɛ ɛytiye nsak ɛ kelik kɛ ɛ́ nè toŋten ge: Ntetembɛy ɛyfeen, nɛ lu əblame Heblu ge: Gabbata.

¹⁴Nɛy se lu nɛ chuye tiysemen ɛ kechii kɛ ɛ́ nè baaten se bvəs se yɛ yiɛ Kechii Ɛyboyse, Bailɛt suuy se ghele Juus ge: Lɛɛ əbfon ə wɛn.

¹⁵Ghene gese waame ge: Mɛyse wen mɛysen! Mɛyse wen mɛysen! Bante wen se kentam! Bailɛt me bif se ghene ge: Ghɛne kɛŋe ge mɛ bante əbfon ə wɛn se kentam-a! Ghele mbiye se ghɛ́ ntaŋlee fise ge: Ghɛse báà se ki əbfon əblee chia Saesa.

¹⁶Bailɛt me fo Jesus se ghene ge ɛ́ bante wen se kentam. Ghel ɛyghoŋe me liɛ Jesus,

¹⁷è fəynen ntɛk so, nɛ əb bɛɛy kentam ə wen è ndu ɛ kelik nɛ ɛ́ toŋte ge kelike kevəfe ketuu, nɛ̀ lu əblame Heblu ge Golgota.

¹⁸Lu fo ghaa ɛ́ nè banten wen se kentam, è bante sɛy ghel ɛlee ɛbaa se əmntam, əblee se əbkoy əbtaa, nɛ̀ əblee se əbkoy əbkiye, nɛ̀ Jesus ɛ feteten.

¹⁹Bailɛt nè lô nyak kenəə kelee ɛ́ base se Jesus ə kentam. Əb nè nyak ge: Jesuse wɛ̂ Nazalet, əbfone Juus.

²⁰Ghele Juus se ɛydio nè lô se chia jaŋe kenəə kɛ tene bek ka kelik kɛ ɛ́ nè banten Jesus ɛ ten nè baksen se Jolesalem. Ɛ́ nè nyak kenəə ten əblame Heblu, nɛ̀ əblame Latin, gese nɛ̀ əblame Gleek.

²¹Ghele mbiy se ghɛ́ ntaŋlee ndu è suuy se Bailɛt ge: Wɛ̀ kè báà se lu se nyak ge əbfone Juus. Nyake nɛ lu ge: Wel vin ne suuye ge yi lu əbfone ə Juus.

²²Bailɛt fise ge: Kenəə kɛ mɛ nyaken lu kɛ mɛ nyaken.

²³Ghel ɛyghoŋe bante Jesus se kentam dì, è liɛ ndəyse wen è giate əblik əbkɛɛk ka ghene nè luun, wel se ki sɛ wene, è liɛ ndəyse kenton nə wen nɛ ɛ́ təm kɛn se ful nɛ ɛ́ báà tas tasen,

²⁴è me suuy se ngeŋse ghene ge: Ghàà ghɛsen sayte sayten, ghɛsen mak nɛ lu bɛl se yɛn ge sɛ liɛ ndɛ-a? Kii nɛ̂ kine nè gan se lunse kenəə kɛ ɛ́ nyaken ɛ ŋwaale-Feyin ge: Ghene nè liɛ ndəy ə som è giate, è liɛ ndəyse kenton nə mɛ è mak bɛl so. Me se lu keghene kɛ ghɛ́ ɛyghoŋe nè nɛɛyen.

²⁵Ghel ghɛ ɛ́ nè tiyen ɛ Jesus əbghune kentam nè lu no ə Jesus, nɛ̀ wan-no no ə Jesus, nɛ̀ Mɛɛle wɛ wiy ə Klobas gese nɛ̀ Mɛɛle Magdalene.

²⁶Jesus yɛn no ə wen è gese yɛn wán-ɛyfɛl nə wen wɛ əb nè koŋen se ŋaŋ nɛ ghene tiy fo, è suuy se no ə wen ge: No ə wan, dii wán ə viɛ.

²⁷È me suuy se wan-ɛyfɛl vi ge: Ghɛy no ə viɛ. Se kɛ̀ɛ̀tè se əbliy fo wan-ɛyfɛl vi me liɛ no ə Jesus ghene wen se chii ɛ wene ndaa.

²⁸Jesus nɛ̂y yɛn ge əbnəə əbjim wɛ yi nè luun se nɛɛy mɛymen, è me suuy ge: “Kendoŋe moo yúme mɛ.” Əb nè suuy dî se lunse kenəə kɛ ɛ́ nè nyaken ɛ ŋwaale-Feyin.

²⁹Keghen kelee nè lô se lu fo nɛ̀ kengiy əmnduke se ten ke lune. Ɛ́ me liɛ kuncha, è chəə se ten, è sooy se mbàŋ, è lose se wen ə əbchio.

³⁰Jesus nyioŋe əmnduk mi è suuy ge: Ke mɛymen! È me təŋse ketuu ə wen è me yioy kenləysene keyioy nə wen.

³¹Ka nè shiin kechii kɛ ɛ́ nè baaten se bvəs se yɛ yiɛ kechii ɛybam kɛ nè luun naa keghakene, nɛ ke nè báà se lu ɛ titiy ge ɛ́ vəse tegvəne ghel ɛ əmntam ɛ kechii ɛybam, ghele mbiye nə ghele Juuse me ndu è yɛn Bailɛt è lon ge əb vəse é ghene bvəkte ɛyfin ə ghel ghɛ ɛ́ nè banten ka ɛ́ yaŋse kuoke, ɛ́ chakse.

³²Ghel ɛyghoŋe me ndu è bvəkte ɛyfine wele wɛ̂ mbiy gese nɛ̀ yɛ wele wɛ̂ kenkumten wɛ ɛ́ nè banten ghene ghe Jesus.

³³Ghene gwiy se Jesus è yɛn ge əb kè kuomen è jia bvəkte ɛyfin ə wen.

³⁴Wel ɛyghoŋ əblee soo ɛytii-ɛybee nə Jesus nɛ̀ ɛyghoŋe, əmnduŋme ghene moome fəy ɛ ten kaŋ ɛymok.

³⁵Wel wɛ əb nè yɛnen ka əbnəə vine ganen, me se fiɛle ka ghɛne fo ɛytem se Feyine. Kenəə kɛ əb nè suuyen lu əbluuy, nɛ əb ke ge yi suuy əbluuy.

³⁶Əbnəə vin nè gan se lunse kenəə kɛ ɛ́ nè nyaken ɛ ŋwaale-Feyin ge: Ɛ́ jia nɛy bvək naa kevəf ə wen kemok ghɛy.

³⁷Nɛ ɛ́ gese nyak ɛ kelik kelee ɛ ŋwaale-Feyin ge: Ɛ́ nɛ̂y yɛ kiy wen wɛ ɛ́ soon nɛ̀ ɛyghoŋe.

³⁸Ka Jesus kuon dì Josɛf wɛ̂ Alimatea ndu se Bailɛt è lon ge əb vəse é yi chakse ɛygvən ə Jesus. Bailɛt bééme. Josɛf nɛ̂ vin nè lu wán-ɛyfɛl nə Jesus kɛn ɛybam-ɛybam bek ge əb nè fane ghɛ́ mbiye nə ghele Juuse.

³⁹Nikodemus wɛ əb nè lômen nyiake ndu se Jesus nɛ ntəke, me ndu sɛy ghene Josɛf, nduu dì ki nkfəŋ ɛyləkten ka kiluse əmmtan, kelɛye mee ghene kɛ aloe ka ɛ́ guon.

⁴⁰Ghene Josɛf me liɛ ɛygvən ə Jesus, è se lime nɛ̀ ndəyse kfəəle nɛ̀ nkfəŋ yi, ka ghele Juuse sɛɛ bááté ɛygvəne wel se gvəəme.

⁴¹Ɛylom ɛylee nè lu baksene se kelik kɛ ɛ́ nè banten Jesus ɛ ten, nɛ ɛysɛy ɛyfɛɛ ɛylee yɛ ɛ́ nè bɛɛy ghàà yi gvəəme wel ɛ ten lu fo.

⁴²Ka nè shiin kechii kɛ ɛ́ baaten se bvəs se yɛ yiɛ kechii ɛybam, gese nɛ̀ ka ɛysɛye tene nè baksen, ɛ́ me ndu è vii ɛygvən ə Jesus ɛ ten.