Read Oku Jn 2 Bible Online

Jn 2 - Oku bible

Jn 2

¹Nɛy se lu ɛybam əbchii əbbua ɛ́ se yiɛ əbjen ɛ ntɛke Kana ɛ Galilee, nɛ no ə Jesus lu fo.

²Ɛ́ nè lô jaŋ sɛy Jesus ghene ghon-ɛyfɛl nə wene se əbjen fo.

³Nɛy se lu ka əmndukme nè laayenmen, no ə Jesus suuy se wen ge: Ghene bo ki wiy əmnduk.

⁴Jesus fise ge: No ə wom, wɛ̀ suuye ge mɛ jɛl lɛɛy? Əbliy ə wome bɛɛy ghàà kwɛn.

⁵No ə Jesus me suuy se ghel ghɛ ɛ́ nè fɛ́len ɛ ndaa fo ge: Ghɛn nɛɛy naa ghɛ kɛ əb suuy ge ghɛn nɛɛy.

⁶Ntonse moo nè tiy fo ntuufe, nɛ lu sɛ ghel ɛylake Juuse sɛɛ vii moo ɛ ten se yɛ suute əblik so ɛ ndee ɛylak. Ɛymok nè lòó ɛy fo moo ka əmtɛm əmbaa kene əmmtal.

⁷Jesus suuy se ghel ghɛ ɛ́ nè fɛ́len fo ge: Ghɛn lunse nton shin nɛ̀ moome. Ghene me vii moo se ten se lunke.

⁸Əb me suuy se ghene ge: Ghɛn sɛf əmlee è ndu è fo se wel ɛychia é əb mom. Ghene sɛfte è ndu so əb mom.

⁹Əb mom nɛ moo mi shi əmnduk. Əb jia se ke ghaa əmnduk nɛ̂ mi lòòn (nè ke kɛn ghel ghɛ ɛ́ nè tuun moome ten). Wel ɛychia vi me jaŋ lum jen,

¹⁰è suuy se wen ge: Wele sɛɛ loo əb chia mbiy è fo əmnduk əbjuŋ, ghele nəə è kul, nɛ əb geese fo mɛ nchɛke nchɛk. Wɛ̀ sɛy lɛm əmnduk əbjuŋ è fo nɛ lu ɛ leenen-a?

¹¹Kii nɛ̂ kine nè lu kenkɛɛte əbchəyte əbchio əbyúméné wɛ Jesus nè nɛɛyen. Əb nè nɛɛy ɛ Kana ɛ Galilee è din əbtaawe wen. Ghon-ɛyfɛl nə wene fó ɛytem se wen.

¹²Se ɛybame ten Jesus ghene no ə wen, nɛ̀ ghone-no wene, nɛ̀ ghon-ɛyfɛl nə wene me chio ɛ ntɛk yɛ Kabanaum è chii gho se əbchii se ɛylaay.

¹³Nɛy se lu nɛ ɛyyiɛ Kechii Ɛyboyse nə ghele Juuse se baksene, Jesus me kok se Jolesalem.

¹⁴Əb kok è lii ɛ ndaa-ɛykokse è yɛn nɛ ghele feene nase, nɛ̀ bvəyse njiɛ gese nɛ̀ əbnlale, gese nɛ̀ ghel ghɛ nɛ̀ kubsen əbkaa ka ɛ́ diom ɛ ghene əbtatan,

¹⁵əb me liɛ kfəə è báà ngwan ɛ ten è weefe ghel ghi è jum nase nɛ̀ bvəyse ghene, è fəyse se ndaa-ɛykokse è takse əbkaa ə ghɛ́ ɛykubsen əbkaa, è bvəŋse əbtatan ə ghen.

¹⁶Əb nɛɛy di è suuy se ghel ghɛ ɛ́ nè feenen əbnlal ge: Ghɛn liɛ è fəy so se fɛn! Ghàà ghɛn bense ndaa ə ba ə wom ge kelik əbwɛy!

¹⁷Ghon-ɛyfɛl nə wene kuume ge ɛ́ nè nyak ɛ ŋwaale-Feyin ge: “Feyine, shii wɛ mɛ kiin se ndaa nə wɛ̀ nɛɛye nɛ ɛytem ə yome lume se ŋaŋ.”

¹⁸Ghɛ́ mbiy nə ghele Juuse bif se Jesus ge: Əbchəyte wɛ wɛ̀ din se ghɛs lu ghɛ se din ge wɛ̀ ki əbtaawe se yɛ nɛɛy əbnəə nɛ̂ vin?

¹⁹Jesus fise ge: Ghɛn sakte ndaa-ɛykokse yin, é mɛ kase baklé se əbchii əbtal.

²⁰Ghɛ́ mbiy nə ghele Juus ghii me suuy se wen ge: Ɛ́ nè liɛ nguk njiose-ntuufe əmmkɛɛk se bàklè ndaa-ɛykokse yin, é wɛ̀ yɛ lu se kase se bàklè se əbchii əbtal-a?

²¹Dî nɛ ndaa-ɛykokse yɛ Jesus nè suuyen nè lu əbghun ə wen.

²²Naa se lu ka Jesus nè loolen se ɛykuo, ghon-ɛyfɛl nə wene me kuume kenəə nɛ̂ kin kɛ əb nè suuyen. Ghene me fo ɛytem se kenəə kɛ ŋwaale-Feyine suuyen gese nɛ̀ se giɛ sɛ Jesus nè suŋnen.

²³Jesus nɛy se lu ɛ Jolesalem ɛ əbliye ɛyyiɛ Kechii Ɛyboyse, ghele yɛn əbchəyte əbchio əbyúméné wɛ əb nè nɛɛyen, ghel se ɛydio me fo ɛytem se wen.

²⁴Dî Jesus jia samse ghene bek ge əb nè ke ghene naa ɛjim.

²⁵Əb nè báà se shii ge wel fekte kum wel əblee se yi bek ge əb nè ke teteme ghel ɛjim.