Read Oku Jn 20 Bible Online

Jn 20 - Oku bible

Jn 20

¹Nɛy se lu ɛ bvəse bvəse ɛ kechii kɛ mbiye se əbwɛy, Mɛɛle Magdalene gwiy ɛysɛy nɛ kebɛye bo fine, è yɛn nɛ ɛ́ chaksemen ɛytiy yɛ ɛ́ nè chiten əbchio ɛysɛy so.

²Əb me se nyiŋe nduu se suuy se Simon Bita ghene wan-ɛyfɛl wɛ Jesus nè koŋen vi, è suuy se ghene ge: Ɛ́ liɛmen ɛygvəne Báàba se ɛysɛy fɛy, ghɛse jia se ke ghàà ɛ́ lɛmen.

³Bita ghene wan-ɛyfɛl vi me fəy è ndu se ɛysɛy fɛy.

⁴Ghene se nduu nyiŋe nyiŋen, dî wan-ɛyfɛl vi nyiŋ è chia Bita è chin ɛ əbchio ɛysɛy se mbiy.

⁵Əb chin fo, è ngvəkte è kiy ɛməm ɛysɛy, è yɛn ndəyse, è jia lii se ɛysɛy.

⁶Simon Bita gwiy se ɛybam, è lii se ɛysɛy è yɛn nɛ ndəyse nyiŋ fo,

⁷gese nɛ̀ ndəy sɛ ɛ́ nè kulen ketuu ə Jesus so nɛ se wiy ɛ əbghune ndəyse fo, nɛ se nyiŋ əbchin se kaalen.

⁸Wan-ɛyfɛl vi wɛ əb kè chinen əbchio ɛysɛy se mbiy me lii sɛy, è yɛn è beeme.

⁹Ghene chèmè nè bɛɛy ghàà keele kenəə kɛ ɛ́ nè suuyen ɛ ŋwaale-Feyin ge: “Əb lu se loole se ɛykuo.”

¹⁰Ghon-ɛyfɛl ghii me kase fiile se ghene ndaase.

¹¹Mɛɛle me teem ɛ əbchio ɛysɛy fɛy è se diye. Əb se diye dì, è ngvəkte è kiy ɛməm ɛysɛy,

¹²è yɛn nchiyse-ndaa nə Feyine sebaa, nɛ se mak ndəy sefəfene è diom bene fɛ ɛygvəne Jesus nè nyiŋen, nɛ ɛylee diom ɛ ɛybee ketuu, ɛylee diom ɛ ɛybee ɛyshas.

¹³Se me bif ge: No ə wɛs, wɛ̀ diye ghɛ? Əb fise ge: Ɛ́ liɛmen ɛygvəne Báàba ə wom, mɛ jia se ke ghaa ɛ́ lɛmen.

¹⁴Əb suuy di è loo benle è me yɛn nɛ Jesus tiy fo, dî è jia se ke ge lu kɛn naa wen.

¹⁵Jesus bif se wen ge: No ə wom, wɛ̀ diye ghɛ? Wɛ̀ kɛŋe nɛ lu ndɛ? Mɛɛle me se kwaate ge lu wel wɛ əb nè fɛ́len ɛ ɛylom fɛy, è me suuy se wen ge: Babɛy, loo lu nɛ kè chakse wɛ̀ ɛygvəne Jesus, kiy wɛ̀, wɛ̀ din ghaa wɛ̀ kè lɛmen é mɛ ndu è liɛ ɛyghene.

¹⁶Jesus me toŋte wen ge: Mɛɛle! Mɛɛle benle è suuy se wen ɛ əblame Heblu ge: Labboni (nɛ lu ge Ndinte)!

¹⁷Jesus me suuy se wen ge: Ghàà kum mɛ bek ge mɛ bɛɛy ghàà kase kok se Bay. Ndu è suuy se ghone-no ə wome ge mɛ se fiile se wen wɛ luun Ba ə wom, wɛ luun sɛy Ba ə ghen, fiile se Feyine Fome, Fɛ luun sɛy Feyine ghen.

¹⁸Mɛɛle Magdalene fiile è ndu è suuy se ghon-ɛyfɛl nə Jesuse ge yi lu nɛ yi yɛn Báàba, è me fekte se ghene kenəə kejim kɛ Jesus kè suuyen se wen.

¹⁹Nɛy se lu ɛ likfəəy ɛ kechii kɛ mbiy kii, ghon-ɛyfɛl nə Jesuse chinten ɛ ndaa ɛymok è kum bek ka ghene nè fane ghɛ́ mbiye nə ghele Juuse. Jesus sasen è teem ɛ ghene məm è suuy ge: Əmnyiaŋ yɛ lu se ghɛn.

²⁰Əb suuy di è me din ɛghoo ə wen nɛ̀ ɛytii-ɛybee nə wene se ghene. Ghon-ɛyfɛle me se saŋle naa se ŋaŋ se yɛne Báàba.

²¹Jesus gese suuy se ghene ge: Əmnyiaŋe yɛ lu se ghɛn. Ka Bay nè tumen mɛ, lu ghɛɛ-ghɛɛ ka mɛ tumen ghɛn.

²²Əb suuy di è yioy se ghene ɛyghun è suuy ge: Ghɛn kiile Keyioy Kelanene.

²³Ghɛn lɛyse mbeese ghel naa ɛ leghɛ é Feyine lɛyse se ghene. Ghɛne tɛn se lɛyse mbeese ghel é Feyine jia lɛyse se ghene.

²⁴Jesus nè gwiy dì, nɛ əblee se ghon-ɛyfɛl ghɛ njio-sebaa wɛ Ntomas wiy fo. Ɛyghele əmnsum nə wene nè lu ge wan se ghɛ ɛbaa.

²⁵Ghene nɛ̂y me fiɛl se Ntomas ge: Ghɛs kè lô yɛn Báàba. Ntomas wɛ ɛ́ ko nɛ toŋten ge Wan se ghɛ ɛbaa me suuy se ghene ge: Buu ge mɛ yɛn əblase mbanse ɛ wen ɛghoo, è kum nɛ̀ ɛghoo ghome, è kum ɛytii-ɛybee nə wen nɛ̀ keghoo kome, é mɛ jia beeme.

²⁶Nɛ̂y se lu ɛybam əbwɛy əbful, ghon-ɛyfɛl nə Jesuse gese chinten ɛ ndaa, nɛ Ntomas lu ghene ghene, nɛ əbchio ndaa lu əbfenen, Jesus sasen è teem ɛ ghene məm è suuy ge: Əmnyiaŋe yɛ lu se ghɛn.

²⁷Əb suuy dì, è suuy se Ntomas ge: Lɛme ghon ɛghoo nə wɛ̀ fɛn, è kiy ɛghoo ghom, è nase keghoo kiɛ, è kum ɛytii-ɛybee nə mɛ so. Ghàà se maanen kenəə ghɛy, fó ɛytem se mɛ.

²⁸Ntomas fise se wen ge: Wɛ̀ lu Báàba wom, wɛ̀ lu Feyin ə fom.

²⁹Jesus bif se wen ge: Wɛ̀ beeme bek ka wɛ̀ yɛnen mɛ-a? Ke lu kejuŋ se ghel ghɛ ɛ́ foon ɛytem se mɛ nɛ ɛ́ báà yɛn mɛ.

³⁰Jesus nè lô se dine əbchəyte əbchio əbyúméné əblee naa se ɛydio wɛ ɛ́ báà nyak ɛ ŋwaale fɛn nɛ ghon-ɛyfɛl nə wene yɛne.

³¹Se lu nɛ ɛ́ nè nyak vine ka ghɛne bééme ge Jesus lu Vi wɛ Feyine nè Yiosen, nɛ lu wán ə Feyin. Ghɛn fó ɛytem se wen é ghɛn kiile ɛychii ɛyghel nə wen.