Read Oku Jn 21 Bible Online

Jn 21 - Oku bible

Jn 21

¹Nɛ̂y se lu ɛ kechii kelee Jesus gese din ngeŋ ə wen se ghon-ɛyfɛl nə wen ɛlee əbghune jio ɛyghuy yɛ Tibelias. Lɛɛ ka ke nè ghan ge:

²Ghone ɛyfɛl nə wene nè lô chinten kelik kemok nɛ lu ghine ge: Simon Bita, Ntomas (wɛ ɛ nè toŋen ge Wan se ghɛ ɛbaa), Natanael wɛ̂ Kana ɛ Galilee, ghone Zebedee, gese nɛ̀ ghon-ɛyfɛl ɛlee ɛbaa.

³Simon Bita suuy se ghene ge: Mɛ́ shik ɛykoo səəse. Ghene suuy se wen ge: Ghɛsene shik. Ghene me lii se kenək, è shik, dî è jia koo naa kefaa ɛ ntək fo.

⁴Əbtəke nɛy loo yio, Jesus gwiy è teem ɛ əbghune jio, dî ghon-ɛyfɛl nə wen ghii jia keele ge lu wen.

⁵Əb bif se ghene ge: Sun ə some, ghɛne bɛɛy ghàà koo kefaa-a? Ghene fise ge: Ghɛse bɛɛy ghàà koo kefaa naa se nkan.

⁶Əb suuy se ghene ge: Ghɛn mak felam ɛ ɛybee kenəke yɛ əbkoy əbtaa é ghɛn koo səəse. Ghene mak, è me se mome lòlò se guf bek ge səəse nè lu ɛ ten naa se ɛydio.

⁷Wan-ɛyfɛl vi wɛ Jesus nè koŋen se ŋaŋ me suuy se Bita ge: Lu Báàba! Simon Bita yio ge lu Báàba, è mak ndəyse wen bek ka əb nè choken ndəyse se yɛ fɛl, è me chak se jio è se nduu.

⁸Ghon-ɛyfɛl ghɛ ɛ́ nè goken ɛ kenək me se jumte nduu se ɛybam, gufe nduu nɛ̀ felame nɛ səəse lun se ten, bek ka ghene nè báà se lu əbtəm se shife jio. Ghene nè báksen se shif ka ntam əbviɛ dì.

⁹Ghene fəy se jio è yɛn əbvəs ɛ shif nɛ əb ghɛye nɛ̀ səəse ɛ ten ka ɛ́ nyoken, nɛ̀ kebane se əbghune ten.

¹⁰Jesus suuy se ghene ge: Ghɛn gwiy nɛ̀ səə selee sɛ ghɛn koon.

¹¹Simon Bita lii ɛ məme kenək è guf felam è fəyse, nɛ səəse lun ɛ ten ghake ge, səə əbviɛ, nɛ̀ njio setale əmmtan. Chèmè lu ka səə shii nè dion di, felame nè báà teene.

¹²Jesus me suuy se ghene ge: Ghɛn gwiy è yiɛ əbfua-əbyíɛ́ne. Wel se ghene chèmè nè báà bif se Jesus ge: Sɛ lu wen ndɛ-a? Bek ka ghene nè keen ge lu Báàba.

¹³Jesus kokte è gwiy, è liɛ keban è giate se ghene, è giate sɛy səəse.

¹⁴Ke gan dì me se lu ge kaŋ ɛtal ka Jesus nè dinen ngeŋ ə wen se ghon-ɛyfɛl nə wene se kɛ̀ɛ̀tè ka əb nè loolen se ɛykuo.

¹⁵Ɛ́ nɛy yiɛ è mɛyse, Jesus toŋte Simon Bita è bif ge: Simon, wan ə Joon, wɛ̀ lɛ koŋe mɛ chia ghine-a? Əb fise ge: Ɛɛne Báàba; wɛ̀ ke ge mɛ koŋe wɛ̀. Jesus suuy se wen ge: Yɛɛ yiɛse ghone bvəyse njiɛ nə mɛ.

¹⁶Jesus gese bif se wen kaŋ ɛbaa ge: Simon, wan ə Joon, wɛ̀ lɛ koŋe mɛ-a? Əb fise ge: Ɛɛne Báàba, wɛ̀ ke ge mɛ koŋe wɛ̀. Jesus suuy se wen ge: Yɛɛ toknene nɛ̀ bvəyse njiɛ nə mɛ.

¹⁷Jesus gese bif se Simon ge kaŋ ɛtal ge: Simon, wan ə Joon, wɛ̀ lɛ koŋe mɛ-a? Bita me se soo ketuu bek ka Jesus nè bifen se wen kaŋ ɛtal ge əb sɛ koŋe yi-a? Əb me suuy se Jesus ge: Báàba, wɛ̀ ke əbnəə əbjim; wɛ̀ ke ge mɛ koŋe wɛ̀. Jesus suuy se wen ge: Yɛɛ yiɛse bvəy ə som.

¹⁸Mɛ suuy əbluuy se wɛ̀ ge nè lu ɛ əbliy wɛ wɛ̀ nè bɛɛyen wándɛ nsum, wɛ̀ nè loo wɛ̀ kul ndəy ə shiɛ è ndu naa ghááy ghaa wɛ̀ koŋen se ndu. Dî nɛ wɛ̀ náà dən è yɛ loo wɛ̀ nase keghoo ə kiɛ wel əbchin mak ndəyse se wɛ̀ əbghun è liɛ wɛ̀ è ndu so ghaa wɛ̀ báà se koŋe.

¹⁹(Əb nè suuy kii nɛ̂ kine se din ɛynkii ɛykuo yɛ Bita nè naa se kuo se fo ɛykokse se Feyine.) Əb suuy dì, è me suuy se wen ge: Yɛɛ jumte mɛ!

²⁰Bita benle è yɛn nɛ wan-ɛyfɛl wɛ Jesus nè koŋen se ŋaŋ gwiye ɛ ghene ɛybam; nɛ nè lu wen wɛ əb nè diom è baksen se Jesus ɛ əbliy wɛ ghene ghene nè yiɛn, è se bife se wen ge sɛ nɛ̂y se dine ndɛ wen ge ɛ́ koo-a?

²¹Əb nɛy yɛn wen è bif se Jesus ge: Báàba, kɛ vin wɛ wel lu gee ghɛ?

²²Jesus fise ge: Mɛ kè loo è yɛ koŋ ge əb gok è yɛ chii se chin ka mɛ kase gwiy, é kii nɛ̂ kii yɛ lu ghɛ se wɛ̀? Yɛɛ jumte mɛ!

²³Ghel ɛbeemene me se suuye kale ge wan-ɛyfɛl nɛ̂ vine jia yî kuo dî nɛ Jesus nè báà suuy nɛ lu ge əb jia yî kuo. Əb nè suuy kɛn ge: Mɛ kè loo è yɛ koŋ ge əb gok è yɛ chii se chin ka mɛ kase gwiy é kii nɛ̂ kine yɛ lu ghɛ se wɛ̀.

²⁴Lu wán-ɛyfɛl nɛ̂ vin wɛ əb nè yɛnen əbnəə vin əbjim è se fekte əbghene, è gese nyak; nɛ ghɛsen ke ge kenəə kɛ əb suuyen lu əbluuy.

²⁵Əbnəə əblee lu se ɛydio wɛ Jesus nè nɛɛyen. Kè lu ge ɛ́ nyak əbghene naa əbjim ɛ ŋwaale, é ketuu ntiɛ kejime jia kiile kelik kɛ ɛ́ lɛm ŋwaalese ten ɛ ten.