Read Oku Jn 4 Bible Online

Jn 4 - Oku bible

Jn 4

¹Jesus nɛy me keele ge ghele kenone Falisee yiomen ge yi kiile ghon-ɛyfɛl gese foo moo se ghene chia Joon;

²(Jesus se wene ngeŋ nè báà se foo moo se ghele, nè foo ghon-ɛyfɛl nə wen.)

³Əb keele dì è me lòò se ɛybee ɛylak yɛ ɛ́ toŋten ge Judea, è fiile se yɛ ɛ́ toŋten ge Galilee.

⁴Əb loo ndu, è se lu se tosen ɛ ɛylake Samalia.

⁵Əb ndu è chin ɛ ntɛke Samalia ɛylee nɛ ɛ́ toŋte ge Sika. Ɛy nè baksen se ɛylem yɛ Jakob wɛ ba ə ghone Islael nè foon se wan ə wene Josɛf.

⁶Ɛybee moo nə Jakob nè lu fo; se lu ka Jesus nè jɛlenmen è bol, əb nè lô diom ɛ əbghun ɛybee fo nɛ chuy se tiysee.

⁷Əbvii wɛ̂ Samalia əblee gwiy fo se tuu moo. Jesus suuy se wen ge: Fó mɛ nɛ̀ moo əmnəən.

⁸(Nè lu dì nɛ ghon-ɛyfɛl nə wene liimen è ndu ɛ ntɛk se yun əbfua-əbyíɛ́ne.)

⁹Əbvii vi fise ge: Wɛ̀ lu wele Juus, nɛ mɛ lu wele Samalia, ke ghan lɛɛy nɛ wɛ̀ yɛ lone moo əmnəən se mɛ? (Əb nè suuy dì bek ge ghele Juuse nɛ̀ ghele Samalia nè sɛɛ jia nɛɛy əbnəə konene.)

¹⁰Jesus fise ge: Wɛ̀ kè boy se yɛ ke kefaa kɛ Feyine foon, gese ke wel wɛ əb lonen moo se wɛ̀, fene wɛ̀ kè lô lon moo se wen, é əb fó nɛ lu moo mɛ əm lɛŋen se wɛ̀ əbliy əbjim.

¹¹Əbvii vi me suuy ge: Babɛy, wɛ̀ báà se ki kefaa moo, nɛ ɛybee moo gese sooye, lòó wɛ̀ liɛ ghááy moo mɛ əm lɛŋen lɛŋen?

¹²Wɛ̀ chia ba ə wɛse Jakob-a? Nè Fo wen ɛybee moo yin se ghɛs. Əb nè lô se nəə moo mɛ əm fəyen ɛ ten, nɛ ghon ə wene ghene nyamse wene nəə.

¹³Jesus fise ge: Wel nəə moo min é kendoŋe moo ko yɛ yume wen,

¹⁴dî nɛ wel nəə moo mɛ foon mɛ, é kendoŋe moo jia bo yî yum wen. Mi nɛ̂ min mɛ foon mɛ nɛ̂y yɛ lu ntoŋe jio ɛ wen əbghun yɛ ɛy fóon moo mɛ luun ɛychii yɛ ɛy jia yî mɛy.

¹⁵Əbvii vi me suuy ge: Babɛy, fó mɛ nɛ̀ mòò nɛ̂ min ka kendoŋe moo jia bo nɛ̂y yum mɛ, é mɛ jia bo nɛ̂y yɛ gwiy fɛn se tuu moo.

¹⁶Jesus suuy se wen ge: Ndu, è jaŋ lum ə viɛ, é ghɛne wen gwiy.

¹⁷Əb fise ge: Mɛ báà se ki lum. Jesus me suuy ge: Ke lu ɛ titiy ka wɛ̀ suuyen ge wɛ̀ báà se ki lum.

¹⁸Wɛ̀ nè ghalmen ɛlum ɛtan, nɛ wel wɛ ghɛne wen chiin ɛ leenen chèmè wiy lum ə viɛ. Kenəə kɛ wɛ̀ suuyen lu əbluuy.

¹⁹Əbvii vi me suuy ge: Babɛy, mɛ yɛne ge wɛ lu wele ntum nə Feyine.

²⁰Ɛbaa ə ghɛse nè kokse Feyin ɛ kfən fɛn, se lu nɛ ghɛn ghɛ Juuse suuye ge kelik kɛ ɛ́ luun se yɛ kokse Feyin ɛ ten lu kɛn ɛ Jolesalem.

²¹Jesus me suuy se wen ge: No ə wom, mɛ suuy əbluuy se wɛ̀ ge: Əbliye gwiye wɛ ghele jia bo nɛ̂y yɛ kokse Bay ɛ kfən fɛn kene ɛ Jolesalem.

²²Ghɛn ghɛ ghele Samalia báà se loote ke wel wɛ ghɛne koksen, dî nɛ ghɛs ke wel wɛ ghɛse koksen bek ge ɛyboye lòò nɛ lu se ghele Juus.

²³Dî nɛ əbliye gwiye, nɛ əb kwɛnmen, wɛ ghel ghɛ ɛ́ loote koksen Baye nɛ̂y yɛ kokse wen se Keyioy gese kokse nɛ̀ əbluuye. Lɛɛ ɛynkii ghel ghɛ Baye kɛŋen ge ɛ́ yɛ kokse wen.

²⁴Feyine lu Keyioy, nɛ ghel ghɛ ɛ́ koksen wen lu se yɛ kokse se Keyioy, gese kokse wen nɛ̀ əbluuye.

²⁵Əbvii vi me suuy ge: Mɛ ke ge Vi wɛ Feyine nè Yiosene nɛ̂y gwiy nɛ lu wel wɛ ɛ́ toŋten ge Christ. Əb nɛ̂y gwiy è fekte əbnəə əbjim se ghɛs.

²⁶Jesus suuy se wen ge: Mɛ wɛ mɛ suŋnen se wɛ̀ lu Christ nɛ̂ vi.

²⁷Se lu kɛn ɛ əbliy fo ghon-ɛyfɛl nə Jesuse me se gwiye, è yɛn nɛ əb suŋnene ghene əbvii, əbchio yúm ghene, dî wel jia bif se əbvii ten ge əb sɛ kɛŋe ghɛ-a, kene se Jesus ge əb sɛ suŋnen ghene wen bek ghɛ-a?

²⁸Əbvii vi me vəse fetɛme moo nə wen se fo, è fiile se ntɛk è suuy se ghele ge:

²⁹Ghɛn gwiy è yɛn wel wɛ əb suuyen əbnəə əbjim wɛ mɛ nè yimen nɛɛy. Lɛ lòó yɛ lu wen Vi wɛ Feyine nè Yiosen-a?

³⁰Ghene me lòò se ntɛk, è ndu se yɛne Jesus.

³¹Nè lu dî nɛ ghon-ɛyfɛl nə Jesuse kè se lone wen ge: Ndinte, kô yiɛ kefaa!

³²Əb sɛ́y suuy se ghene ge: Mɛ ki əbfua-əbyíɛ́ne wɛ ghɛne báà se ke.

³³Ghene me se kante ge: Lɛ lòó yɛ lu ge wel kè lô fo əbfua-əbyíɛ́ne se wen-a?

³⁴Jesus suuy se ghene ge: Əbfua-əbyíɛ́ne nə mɛ lu se yɛ nɛɛy kenəə kɛ wel wɛ əb nè tumen mɛ kɛŋen, se gese se mɛyse ɛyfɛl yɛ əb nè foon se mɛ.

³⁵Ghɛne lóó ɛ́ yɛ suuy ge: Bɛɛsemen njoŋ sekɛɛk é əbliy ɛydən ɛsaŋe kwɛn. Dî nɛ mɛ suuy se ghɛn ge ghɛn loote kiy è yɛn ka teleme keken. Ɛsaŋe biymen è kwɛn ɛydən.

³⁶Wel wɛ əb kaan əbfua kiile əblaake wen, nɛ əb baate əbfua wɛ əb kiilen nɛ lu ɛychii yɛ ɛy jia yî mɛy. Ke me se lu ge wel wɛ əb lemen ghene wel wɛ əb kaan nɛ̂y yɛ saŋle ghel ɛjim.

³⁷Ngan yɛ ge, wel əblee vii, nɛ wel əblee kaa, me se lu se əbluuy.

³⁸Mɛ tume ghɛn ge ghɛn kaa əbfua ghaa ghɛn nè báà lem. Ghel ɛchine nè lem fô, ghɛne me se yio əbjuŋ ɛyfɛl nə ghen.

³⁹Ghele Samalia se ɛydio ɛ ntɛk fô, fó ɛytem se Jesus bek ka əbvii vi nè suuyen ge: Əb kè fekte əbnəə əbjim wɛ mɛ nè yimen nɛɛy.

⁴⁰Ghene gwiy se Jesus, è lon wen ge əb ko moote ghene ghene. Jesus me chii fo se əbchii əbbua.

⁴¹Ghel ɛlee se ɛydio fó ɛytem se Jesus bek sakghɛ wɛ əb nè fekten;

⁴²è me suuy se əbvii vi ge: Ghɛs lu nɛ ɛ́ fó ɛytem ɛ leenen, nɛ wiy bek kenəə kɛ wɛ̀ kè suuyen. Ghɛs fo bek ka ghɛs se ghɛse ngeŋse yion wen, nɛ̀ ghɛs ke ge loote lu wen mboyse mbi.

⁴³Jesus chii fo se əbchii əbbua, è me ndu se Galilee.

⁴⁴Nè lu dì nɛ Jesus suuymen ge: Ɛ́ sɛɛ jia vəme wele ntum nə Feyine ɛylak yɛ əb lòòn ɛ ten.

⁴⁵Əb nɛy chin ɛ Galilee, ghele ghɛ fóò fiisen wen bek ge ghene nè lô ndu ɛ Jolesalem əbliy ɛyyiɛ Kechii Ɛyboyse, è yɛn əbnəə wɛ əb nè nɛɛyen fo ɛ keleŋ əbliy fo.

⁴⁶Jesus nɛy fiile se Kana ɛ Galilee ghaa əb nè bensen moo se əmnduk. Nè lu dî nɛ chɛɛ ɛytaa ɛylee yɛ ɛy nè chiin ɛ Kabanaum ki wán ə wen nɛ əb yafe.

⁴⁷Əb yio ge Jesus lòòmen se Judea, è gwiy ɛ Galilee, è me ndu è yɛn wen è se beŋte ge əb ko gwiy è chuk wán ə vi bek ka əb nè se kuon.

⁴⁸Jesus me suuy se wen ge: Buu ge ghɛn yɛn əbchəyte əbchio əbyúméné ghene əbnəə əbkanene ka mɛ nɛɛyen, é ghɛn jia fo ɛytem se mɛ.

⁴⁹Wel əbghaken vi fise kɛn ge: Babɛy, gwiy ɛ́ lóó buu dî, é wan ə wom kuo.

⁵⁰Jesus me suuy ge: Yɛɛ nduu, wan ə viɛ bonenmen. Əb fó ɛytem se kenəə kɛ Jesus suuyen è lòò.

⁵¹Əb loo ndu ghel ɛyfɛl nə wene báksén wen, è suuy se wen ge: Wan ə viɛ dì bonenmen!

⁵²Əb bif se ghene ge: Əb kè kɛɛte se yio əbfiɛf ɛ leghɛ? Ghene fise ge: Chî se lu ɛyyionén ka chuy kasen wɛ kenchɛme ne vəsen wen.

⁵³Əb me kuume ge lu kɛn ɛ əbliy nɛ̂ fo wɛ Jesus ne suuyen se yi ge: Wan ə viɛ bonen. Ghene ɛyshaa ndaa nə wene me fo ɛytem se Jesus ghel ɛjim.

⁵⁴Kine nè lu kenkumtene kenəə əbchio əbyúméné kɛ Jesus nè nɛɛyen se ka əb nè lòòn se Judea è ndu ɛ Galilee.