Read Oku Jn 5 Bible Online

Jn 5 - Oku bible

Jn 5

¹Kii nɛ̂ kine chia, Jesus kase kok ɛ Jolesalem ɛ əbliy wɛ ghele Juuse nè yiɛn kechii keghakene nə ghen kelee.

²Kechəm kelee nè lu ɛ Jolesalem nɛ ɛ́ toŋte əblame Heblu ge Betzata, nɛ ke lu əbchio kengɛy wɛ ɛ́ toŋten ge wɛ bvəy njiɛ, nɛ əbnchəŋ əbghuye lu əbghune kengɛy fo əbtan.

³Feliɛ ghel ɛyafkene nè lóó fe yɛ lu əmtaa fo nɛ lu əbnfef, nɛ̀ ghel ɛləmmene gese nɛ̀ ɛkɛblene. [Ghene nè lóó ɛ́ yɛ chiyte ge jio shiŋ.

⁴Nè loo lu əbliy nɛ̀ əbliye, nchiy-ndaa Feyin səəke ɛ kechəm fo è shik jio. Ɛy nè shike dì naa wel əbyafen əbkɛ wɛ əb kɛɛten lii se kechəm fo, me bonen naa se ɛyyaf ɛykɛ yɛ ɛy kè yafen wen.]

⁵Nè lu ɛ məm nə ghel ɛyafkene ghɛ tene nɛ wel əblee lu nɛ əb yafmen se nguk njiose-ɛyfaame əmmtal.

⁶Jesus yɛn ka əb nyiŋen fo ɛ leghɛ, è keele ge əb yafmen se əbtəm əbdia, è me bif se wen ge: Lɛ lòó wɛ̀ yɛ koŋ se bonen-a?

⁷Əb fise ge: Babɛy, jio shiŋe, ghàà mɛ yɛ ki wel wɛ vii mɛ se ten. Mɛ lóò mom se lii se jio ɛ leghɛ, wel əbchin ko lii se mbiy.

⁸Jesus me suuy se wen ge: Loole se ɛyyio, è liɛ fegham ə fiɛ è yɛ jɛl.

⁹Wele ten me bonen kɛn se əbliy, è kaale fegham ə wen è se jɛle. Kenəə kin nè gan ɛ kechii ɛybam.

¹⁰Ghɛ́ mbiy nə ghele Juuse me suuy se wel wɛ ɛ́ kè chuken vi ge: Lan dì lu kechii ɛybam nɛ nchile báà beeme ge wel yɛ jɛl nɛ̀ feghame.

¹¹Əb fise ge: Di kè suuy wel wɛ əb kè chuken mɛ ge mɛ kaale fegham ə fom è yɛ jɛl.

¹²Ghene bif se wen ge: Wel nɛ̂ vi wɛ əb kè suuyen ge wɛ̀ kaale fegham ə fiɛ, è yɛ jɛl lu ndɛ?

¹³Wel wɛ ɛ́ kè chuken cheme jia se ke wel wɛ əb kè chuken wen bek ka Jesus kè lɛyenmen ɛ məme ngose wel yɛ ɛy nè luun fo.

¹⁴Se ɛybame ten Jesus yɛn wen ɛ ndaa-ɛykokse è suuy se wen ge: Yɛn-a, kiy ka wɛ̀ bonenmen. Ghàà gese yɛ nɛɛye mbee fɛ kenəə nɛ̂y gan se wɛ̀ chia kine.

¹⁵Wel vi nɛy lòò, è ndu è suuy se ghɛ́ mbiy nə ghele Juus ghii ge nè chuk Jesus yi.

¹⁶Ghɛ́ mbiy nə ghele Juuse me se nəkse Jesus bek ka əb kè chuken wel ɛ kechii ɛybam.

¹⁷Jesus suuy se ghene ge: Ba ə wom fɛle əbliy əbjim chəəke wiy nɛ mɛ ko yɛ fɛl sɛy əbliy əbjim.

¹⁸Kenəə kɛ əb nè suuyen nɛ̂ kin nɛɛy ghɛ́ mbiye nə ghele Juuse me vii viin ge ghene yuy wen nɛ wiy kɛn bek ka əb kè kolen nchile kechii ɛybam, nɛ lu sɛy bek ka əb nè toŋte Feyin ge Ba ə vi se din ge ghene Feyine lu ɛyghɛl.

¹⁹Jesus me suuy se ghene ge: Mɛ suuy əbluuy se ghɛn ge, lòó wan jia nɛɛy kenəə se wene ngeŋ. Əb lóó əb yɛ nɛɛy nɛ lu kɛn kenəə kɛ əb yɛnen nɛ ba ə wen nɛɛye, bek ge naa ghɛ kɛ Baye nɛɛyen lu keghene kɛ wane nɛɛyen.

²⁰Baye koŋe wan, dine əbnəə əbjim wɛ əb nɛɛyen se wen. Əb nɛ̂y din é wan yɛ nɛɛy əbnəə əbtaa wɛ əb chian vine, é ghɛn yɛ lu nɛ̀ əbchíò əbyúméné.

²¹Kɛn ka Baye losen ghel se ɛykuo, nɛɛye nɛ ghene kase chii, lu sɛy ka wan yɛnen ge yi nɛɛy se ghel ghɛ əb kɛŋen se nɛɛy se ghene.

²²Bay se wene ngeŋ báà se tenen nsake wel. Əb fomen əbtaawe nɛ lu se wan ge əb yɛ tenen;

²³ka wel əbjime yɛ ngvəmle wán ghɛɛ-ghɛɛ ka ɛ́ ngvəmlen Bay. Naa ndɛ wɛ əb báà se ngvəmle wan, lu nɛ əb báà se ngvəmle Bay wɛ əb nè tumen wen.

²⁴Mɛ suuye əbluuy se ghɛn ge naa ndɛ wɛ əb yion giɛ ə som, è fo ɛytem se vi wɛ əb nè tumen mɛ, se ki ɛychii yɛ ɛy jia yî mɛy. Ɛ́ jia bo yî sak wen. Əb boymen se ɛykuo è se ki ɛychii.

²⁵Mɛ suuye əbluuy se ghɛn ge: Əbliye gwiye, nɛ əb shi kɛn ɛ keghoo, nɛ lu əbliy wɛ ghel ghɛ ɛ́ kuonmen yio giɛ wan ə Feyine, nɛ naa ndɛ wɛ əb yio kiile ɛychii.

²⁶Kɛn ka ɛychii se lòòn se Bay, lu ghɛɛ-ghɛɛ ka Əb nɛɛymen ge ɛy yɛ lòò sɛy se wan.

²⁷Bay lu nɛ əb fomen sɛy əbtaawe se wan ge əb yɛ tenen nsakse, bek ge əb lu Wanwel.

²⁸Ghàà ghɛn yɛ lu nɛ̀ əbchíò əbyúméné bek kii nɛ̂ kine. Əbliye gwiye wɛ ghel ɛjim ghɛ ɛ́ nè kuomen nɛ̂y yio giɛ ə wen;

²⁹è loole se ɛykuo, é ghel ghɛ ɛ́ nè nɛɛyen njuŋ loole è yɛ chii, é ghel ghɛ ɛ́ nè nɛɛyen mbee loole è lii se ngɛk yɛ ɛy jia yî mɛy.

³⁰Lòó mɛ jia nɛɛy kenəə əbtaawe nə mɛ. Mɛ sake kɛn nsak ə wel ka Feyine dinen se mɛ. Ɛysak ə yome me se lu ɛ titiy bek ge mɛ báà se nɛɛye nɛ lu kenəə kɛ mɛ kɛŋen, mɛ nɛɛye kɛn nɛ lu kenəə kɛ wel wɛ əb nè tumen mɛ kɛŋen.

³¹Loo lu ge suuy mɛ ge lɛɛ wel wɛ mɛ luun əbghen, fene lòó wel jia beeme ge kenəə kɛ mɛ suuyen lu əbluuy.

³²Dî nɛ wel əblee lu wɛ əb suŋnen kum mɛ, nɛ mɛ ke ge kenəə kɛ əb suuyen lu əbluuy.

³³Ghɛn nè lô tum ghel se Joon se keele ge mɛ sɛ lu ndɛ-a, kenəə kɛ əb nè suuyen se lu əbluuy.

³⁴Kii nɛ̂ kine báà se lu ge mɛ yɛkte nɛ lu əbghune əbnəə wɛ ghele suuyen kum mɛ. Mɛ suuy lɛ kɛn ka ghɛne kiile ɛyboy.

³⁵Joon nè lu ka kekaaken kɛ ke baalen, bane, nɛ ghɛn nè lô se koŋe se yio əbjuŋ ɛyban nə wen se keleŋ əbliy.

³⁶Dî nɛ mɛ ki kenəə kum ngeŋ ə yom nɛ ke taa chia kɛ Joon nè fekten. Ɛyfɛl yɛ Ba ə wom tumen mɛ ge mɛ yɛ nɛɛy lu ɛyghene yɛ ɛy dinen ge nè tum Bay mɛ.

³⁷Bay wɛ əb nè tumen mɛ dine sɛy wel wɛ mɛ luun əbghen. Ghɛn nè bɛɛy ghàà yio giɛ ə wen, nɛ ghɛn nè bɛɛy ghàà yi yɛn wen.

³⁸Ghɛne báà ghal giɛse wen bek ka ghɛne báà fo ɛytem se vi di wɛ əb nè tumen.

³⁹Ghɛne yiɛke ŋwaale-Feyin naa ketaan kwaate ge lu ɛyghen yɛ lòó ɛy nɛɛy é ghɛn kiile ɛychii yɛ ɛy jia yî mɛy. Ŋwaale nɛ̂ yin dì suŋnene kum mɛ.

⁴⁰Ghɛne cheme jia se lu se gwiy se mɛ se kiile ɛychii yɛ ɛy jia yî mɛy.

⁴¹Shii ə wom báà se lu ge ghele yɛ bente mɛ.

⁴²Dî se kɛne lu nɛ mɛ ke ge ghɛne báà se koŋe Feyin.

⁴³Mɛ gwiy ɛ əbtaawe nə Ba ə wom, ghɛne jia fiisen, dî nɛ wel gwiy se wene ngeŋ, é ghɛn me fiisen wen.

⁴⁴Lòó ghɛn fó lɛɛy ɛytem se mɛ nɛ ghɛn koŋe ge ghele yɛ bente ghɛn, dî koŋe wiy se kiile ɛybente se vi di wɛ luun kɛn wen Feyin.

⁴⁵Ghàà ghɛn yɛ kwaate ge mɛ yî gham ghɛn ɛ ɛyshiɛ nə Bay. Wel wɛ əb yî gham ghɛn lu Moses wɛ ghɛn nè foon ɛytem se wen.

⁴⁶Lòò è yɛ lu ge ghɛn nè lô loote beeme kenəə kɛ Moses nè nyaken fene ghɛn beeme nɛ lu mɛ bek ge əb nè nyak kum mɛ.

⁴⁷Lòò lɛɛy ɛ́ ghɛn beeme kenəə kɛ mɛ suuyen nɛ ghɛn nè báà beeme kenəə kɛ Moses nè nyaken?