Read Oku Jn 6 Bible Online

Jn 6 - Oku bible

Jn 6

¹Kii nɛ̂ kine chia, Jesus diaŋ jio ɛyghuye yɛ Galilee yɛ ɛ́ toŋten sɛy ge Tibelias è ndu ɛ njine vii.

²Feliɛ wele lòò ɛ wen ɛybam bek əbnəə əbchio əbyúméné wɛ əb nè nɛɛyen se ghel ɛyafkene nɛ ghene yɛne.

³Jesus ghene ghon-ɛyfɛl nə wene me lòò è kok ɛ kfən è diom.

⁴Nè lu dî nɛ əbliy wɛ ghele Juuse sɛɛ yiɛ Kechii Ɛyboyse se baksene.

⁵Jesus loo kiy è yɛn nɛ feliɛ wele gwiye, è bif se Filib ge: Lòó ghɛsen yun ghááy əbfua-əbyíɛ́ne əbkwɛnen wɛ yiɛse ghel ghin so?

⁶(Əb nè bife kine se mome Filib bek ge əb nè se ke kenəə kɛ əb nɛɛy.)

⁷Filib fise ge: Lòò è yɛ lu ge wel əbjime kiile kefaa se yiɛ fene lòó yun keban se əbkaa nɛ əb chia denalius ɛyviɛ ɛybaa[2].

⁸Wan-ɛyfɛl nə wen əblee wɛ Andole, wɛ nè luun wán-no ə Simon Bita suuy ge:

⁹Wan əbluumen əblee lu fɛn ki ntukse keban setan nɛ̀ səə sebaa, dî nɛ ə́b báà chin ka lòó ghel ghine yíɛ́.

¹⁰Jesus me suuy ge: Ghɛn lam é ghene diom ɛ ntiɛ. Nè lu dî nɛ əbgii dio fo ge. Ghel ɛjime me diom, nɛ ɛluumen lu ka nkam setan dì.

¹¹Jesus liɛ ntukse keban shi, è bɛ̀ɛ̀lè Feyin, è fo ɛ́ giate se ghel ghɛ ɛ́ nè diom, əb bɛɛle Feyin se səəse fɛy, è fo ɛ́ giate se ghele, wel əbjim yíɛ́ ka əb nè kɛŋen.

¹²Wel əbjim yíɛ́ è kul, Jesus suuy se ghon-ɛyfɛl nə wene ge: Ghɛn biŋte wɛ əb bɛɛsen fɛ kefaa lɛy se lólò.

¹³Ghene chinten əbmbɛkele əbfua-əbyíɛ́ne wɛ nè yiɛn ntukse keban sɛ setan shi əb bɛɛse, əb lun nkaase njio-sebaa ɛyvəm.

¹⁴Ghel ghii yɛn kenəə əbchio əbyúméné kɛ Jesus nɛɛyen è suuy ge: Vin lu kɛn naa wele ntum nə Feyine wɛ ŋwaale-Feyine dinen ge əb náà gwiy ɛ mbi fɛn.

¹⁵Jesus keele ge ghel ghii shi se koo yi se kokse ge əbfon, è me sosen è kase kok se kfən wen nyiŋ.

¹⁶Nɛy se lu ɛ likfəəy, ghon-ɛyfɛl nə Jesus chio è ndu əbchio jio ɛyghuy,

¹⁷è lii se kenək è kase diaŋ se Kabanaum. Kebɛye fin, nɛ Jesus bɛɛy ghàà baksen ghene.

¹⁸Əbfiɛf əbtaa me se chia, shikse jio nɛ moome loole.

¹⁹Nɛy se lu nɛ ghon-ɛyfɛl nə Jesuse jɛlmen ɛ məme jio ka tetaŋ tetal kene tekɛɛk dì, ghene yɛn Jesus nɛ əb jɛle ɛ ketuu moo baksen gwiye se kenək, è me se fane.

²⁰Jesus suuy se ghene ge: Ghàà ghɛn yɛ fan, lu mɛ Jesus.

²¹Ghene se koŋe se liɛ wen, è loo chin nɛ kenəke chinmen ɛ shif ghàà ghene nè nduun se fəy.

²²Əbtəke nɛy yio feliɛ wel fɛ fe nè goken ɛ njine jio yɛn ge lu kɛn kenək fo kemok, è me keele ge Jesus nè báà lii se kenək ghene ghon-ɛyfɛl nə wene, dii ge ghene ne lòò è vəse wen ɛ ɛybam.

²³Əbnək əblee ko nè lòò ɛ Tibelias, è gwiy ɛ əbchio jio bene fɛ Báàba nè liɛn ntukse keban, è bɛ̀ɛ̀lè Feyin, è yiɛse feliɛ wel so.

²⁴Ngose wel yi keele ge Jesus ghene ghon-ɛyfɛl nə wene báà se lu fo, è lii əbnək è diaŋ se Kabanaum, kɛŋe nduu nɛ̀ wen.

²⁵Ghene yɛn Jesus ɛ njine jio fɛy, è bif se wen ge: Ndinte, wɛ̀ kè gwiy fɛn ɛ leghɛ?

²⁶Jesus fise ge: Mɛ suuy əbluuy se ghɛn ge, ghɛne kɛŋe mɛ bek ka ghɛn ne yiɛn keban è kul nɛ báà se lu ge əbchəyte əbnəə əbchio əbyúméné wɛ mɛ nɛɛyen sɛ dine ghɛ-a?

²⁷Ghàà ghɛn yɛ fɛl bek əbfua-əbyíɛ́ne wɛ əb sɛɛ bef. Ghɛn sɛy yɛ fɛl nɛ lu se wɛ əb sɛɛ lu kɛn luun, gwiye nɛ̀ ɛychii yɛ ɛy jia yî mɛy, əbfua-əbyíɛ́ne nɛ̂ vine lu nɛ nɛ̂y fo Wanwel se ghɛn. Feyin wɛ Bay dinmen ge yi ke se ɛyfɛl yɛ əb fɛ́len.

²⁸Ghene me bif se wen ge: Lòó ghɛs jɛl lɛɛy se geese yɛ fɛl ɛyfɛl ə Feyin?

²⁹Jesus fise ge: Ɛyfɛl yɛ Feyine kɛŋen ge ghɛn yɛ fɛl lu ge: Ghɛn fó ɛytem se wel vi wɛ yi nè tumen.

³⁰Ghene bif ge: Kenəə əbchio əbyúméné kɛ wɛ̀ nɛɛy ka əbchəyte ge ghɛs yɛn è fo ɛytem se wɛ̀ lu ghɛ? Wɛ́ nɛɛy ghɛ?

³¹Ɛbaa ə ghɛsene nè yiɛ əbfua-əbyíɛ́ne wɛ ɛ́ nè toŋten ge manna[3] ɛ əbkwak, ghɛɛ-ghɛɛ ka ŋwaale-Feyine suuyen ge: Əb nè fo keban kɛ ke nè lòòn ɛ ɛyyio se ghene.

³²Jesus fise ge: Mɛ suuy əbluuy se ghɛn ge nè báà fo Moses əbfua-əbyíɛ́ne se ghɛn wɛ əb lòò ɛyyio. Nè fo Ba ə wom nkante əbfua-əbyíɛ́ne wɛ əb lòòn ɛ ɛyyio se ghɛn.

³³Əbfua-əbyíɛ́ne wɛ Feyine fóon lu vii wɛ əb lòòn ɛ ɛyyio è gwiy è se foo ɛychii se mbi.

³⁴Ghene yio è me suuy ge: Babɛy, yɛɛ foo əbfua-əbyíɛ́ne nɛ̂ vin se ghɛs əbliy əbjim.

³⁵Jesus me suuy se ghene ge: Mɛ lu əbfua-əbyíɛ́ne wɛ əb fóon ɛychii. Naa ndɛ wɛ əb gwiyen se mɛ jia bo yɛ yio jiŋ, nɛ̀ kendoŋe moo jia bo yɛ yume wel vi wɛ əb foon ɛytem se mɛ.

³⁶Dî nɛ mɛ nè lô suuy se ghɛn ge ghɛn lu nɛ ɛ́ yɛn mɛ, è jia fo ɛytem se mɛ.

³⁷Wel əbjim wɛ Ba ə wom foon se mɛ nɛ̂y gwiy se mɛ. Mɛ jia yî jum ghii dii ghɛ ɛ́ gwiyen se mɛ;

³⁸bek ge mɛ lòò ɛyyio è gwiy ɛ ntiɛ fɛn se yɛ nɛɛy kenəə kɛ wel wɛ əb nè tumen mɛ kɛŋen, nɛ wiy kɛ koŋen mɛ.

³⁹Kenəə kɛ wel wɛ əb nè tumen mɛ kɛŋen lu ge ghàà mɛ nɛɛy ge wel se ghii dii ghɛ əb nè foon se mɛ lɛy, nɛ mɛ yî lose ghene se ɛykuo ɛ kechii kenləysen.

⁴⁰Kenəə kɛ Ba ə wom kɛŋen lu ge wel əbjim wɛ əb yɛnen wan è fo ɛytem se wene náà kiile ɛychii yɛ ɛy jia yî mɛy, nɛ mɛ náà lose ghene se ɛykuo ɛ kechii kenləysen.

⁴¹Ghele Juus me kɛɛte è se vəke bek ka Jesus nè suuyen ge yi lu əbfua-əbyíɛ́ne wɛ əb səəken gwiy ɛ ɛyyio.

⁴²Ghene me se suuye ge: Wel vin lɛ báà se lu Jesus wɛ wán ə Josɛf-a? Ghɛsen ke ba ə wen ghene no ə wen. Lòó əb yɛ suuy lɛɛy ɛ leenen ge yi səəke gwiy nɛ lu ɛyyio?

⁴³Jesus fise ge: Ghàà ghɛn se vək se ghɛne ngeŋse.

⁴⁴Lòó wel jia gwiy se mɛ buu ge gufte Bay wɛ əb nè tumen mɛ ge əb gwiy san; nɛ mɛ náà lose wen se ɛykuo ɛ kechii kenləysen.

⁴⁵Ghele ntum nə Feyine nè nyak ge: “Feyine náà dinte əbnəə se ghel ghin əbjim.” Naa ndɛ wɛ əb yionmen è gese yiɛke kenəə kɛ Baye suuyen, gwiye se mɛ.

⁴⁶Kii nɛ̂ kine báà me se lu ge wel nè yɛnmen Bay. Lu kɛn vi di wɛ əb nè lòòn se Feyine wɛ əb nè yɛnenmen Bay.

⁴⁷Mɛ suuy əbluuy se ghɛn ge naa ndɛ wɛ əb foon ɛytem se mɛ se ki ɛychii yɛ ɛy jia yî mɛy.

⁴⁸Mɛ lu əbfua-əbyíɛ́ne wɛ əb foon ɛychii.

⁴⁹Ɛbaa ə ghɛne nè lô yiɛ manna[4] əbkwak è ko naa kuo.

⁵⁰Dî nɛ əbfua-əbyíɛ́ne wɛ əb lòòn ɛ ɛyyio lu ɛynkii əbfua-əbyíɛ́ne wɛ wel yiɛn, é əb jia yî kuo.

⁵¹Mɛ lu əbfua-əbyíɛ́ne wɛ əb lòòn ɛ ɛyyio nɛ lu wɛ əb foon ɛychii. Yiɛ naa ndɛ əbfua-əbyíɛ́ne nɛ̂ vin é əb yî yɛ chii ndu kɛn nduun. Əbfua-əbyíɛ́ne nɛ̂ vine lu əbghun ə wom wɛ mɛ nɛ̂y fo se boyse ghele ghɛ mbi fɛne.

⁵²Ghele Juus yio kine è me kɛɛte se yɛ beke mbek se ghene ngeŋse ge: Lòó wel vin fó lɛɛy əbghun ə wen ge ghɛsen yiɛ?

⁵³Jesus me suuy se ghene ge: Mɛ suuy əbluuy se ghɛn ge: Loo lu ghɛne jia yiɛ əbghun ə Wanwel, è gese nəə əmnduŋ mə wen, é ghɛn jia yɛ ki ɛychii ɛ məm nə ghɛn.

⁵⁴Naa ndɛ wɛ əb yiɛn əbghun ə wom, è nəə əmnduŋ mə mom se ki ɛychii yɛ ɛy jia yî mɛy, é mɛ náà lose wen se ɛykuo ɛ kechii kenləysen.

⁵⁵Ke lu dî bek ka əbghun ə wome lu nkante əbfua-əbyíɛ́ne, nɛ əmnduŋ mə mom lu nkante ɛynəə.

⁵⁶Naa ndɛ wɛ əb yiɛn əbghun ə wom, è nəə əmnduŋ mə mom lu nɛ əb gokmen ɛ mɛ məm, mɛ gok ɛ wene məm.

⁵⁷Bay wɛ əb foon ɛychii nè tum mɛ, se lu bek wen wɛ mɛ kiin ɛychii. Lu ghɛɛ-ghɛɛ ka yiɛn naa ndɛ əbghun ə wom é əb yɛ ki ɛychii bek mɛ.

⁵⁸Kii nɛ̂ kine lu əbfua-əbyíɛ́ne wɛ əb səəken gwiy ɛ ɛyyio. Ə́b báà se lu ka əbfua-əbyíɛ́ne wɛ ɛbaa ə ghɛne nè yiɛn è ko naa kuo. Wel yiɛ əbfua-əbyíɛ́ne nɛ̂ vin é əb jia bo yî kuo.

⁵⁹Jesus nè suuy əbnəə nɛ̂ vin ɛ ngay ɛyjeme yɛ Kabanaum ɛ əbliy wɛ əb nè dinten əbnəə se ghele.

⁶⁰Ghon-ɛyfɛl nə Jesuse yio kenəə kin kɛ əb nè suuyen, ndio wel ɛ ghene məm me se suuy ge: Ɛyyíɛ́ke yine taa naa se ŋaŋ. Lòó bééme ndɛ kenəə ten?

⁶¹Jesus ko me keele ge ghene vəke kesuŋnene ki è me suuy se ghene ge: Kii nɛ̂ kine taa se ghɛn se beeme-a?

⁶²Lɛ loo lu ghɛne yɛn Wanwel nɛ əb kase koke se ghaa əb nè luun se mbiy é ghɛn nɛɛy lɛɛy?

⁶³Kefaa kɛ ke fóon ɛychii lu Keyioy ə Feyin. Wel se wene ngeŋ lòó əb jia nɛɛy kenəə se kiile. Giɛ sɛ mɛ suŋnen se ghɛn lòò se Keyioy nɛ̂ kine nɛ lu sɛ se fóon ɛychii.

⁶⁴Dî nɛ ghɛn ɛlee báà fo ɛytem. Jesus nè suuy dì ka əb nè se keen ghel ghɛ ɛ́ báà fo ɛytem se wen, gese ke wel wɛ əb nɛ̂y feene wen.

⁶⁵Əb me gese suuy ge: Ghɛy kenəə kɛ ke nè nɛɛyen mɛ suuy se ghɛn ge lòó wel jia gwiy se mɛ buu ge nɛɛy Bay ge əb gwiy.

⁶⁶Se kɛ̀ɛ̀tè se əbliy fo ndionen ghon-ɛyfɛl nə Jesus me fiile ɛybam, è jia gese se jɛle ghene ghene.

⁶⁷Əb me bif se ghɛ́ ntume ghɛ njio-sebaa ɛyvəm ge: Lɛɛy se ghɛn! Ghɛne koŋe se vəse mɛ sɛy-a?

⁶⁸Simon Bita fise ge: Báàba, lòó ghɛs ndu se ndɛ? Wɛ̀ ki giɛ sɛ se fóon ɛychii yɛ ɛy jia yî mɛy.

⁶⁹Ghɛs lu nɛ ɛ́ fó ɛytem se wɛ̀ è se ke ge wɛ̀ lu wel əblanen vi wɛ əb lòòn se Feyine.

⁷⁰Jesus suuy ge: Mɛ lɛ nè báà chok ghɛn njio-sebaa ɛyvəm, wel əblee se lu kevəŋ-a?

⁷¹Əb nè suŋnen kum Judas wɛ wán ə Simon Iskaliot Judas nè lu wel əblee ɛ məme ghon-ɛyfɛl ghɛ njio-sebaa ɛyvəm. Lu wen wɛ əb nè feenen Jesus.