Read Oku Jn 9 Bible Online

Jn 9 - Oku bible

Jn 9

¹Jesus loo ghanle ndu è yɛn wel əblee nɛ ɛ́ nè bii nɛ əb fefmen.

²Ghon-ɛyfɛl nə wene bif se wen ge: Ndinte, nè nɛɛy ndɛ mbee nɛ ɛ́ geese bii wel vin nɛ əb fefmen? Nè nɛɛy wen moo, nè nɛɛy ba ə wen ghene no ə wen-a?

³Jesus fise ge: Ke wiy ge wel vin nè nɛɛy mbee, nɛ ke báà se lu ge ba ə wen ghene no ə wen nè nɛɛy mbee. Ɛ́ nè bii wen nɛ əb fefmen se nɛɛy ge ɛyfɛl ə Feyine yɛnsen ɛ wen ə əbghun.

⁴Ghɛsen tiy se yɛ nɛɛy ɛyfɛle wel wɛ əb nè tumen mɛ nɛ bo bɛɛy nɛ̀ nchuy. Ntəke gwiye wɛ lòó wel jia bo fɛl.

⁵Ka mɛ bo bɛɛyen ɛ mbi fɛn, lu nɛ mɛ lu kekaakene mbi.

⁶Əb suuy di è me tio ɛyliɛ ɛ ntiɛ, è toote kechiale nɛ̀ ɛyliɛ tene, è yiose ɛshiɛ ə wel vi so;

⁷è suuy se wen ge: Ndu è suu ɛshiɛ ə ghiɛ ɛ kechəme Siloam. (Ɛyghel yɛ Siloam yin lu ge: Ɛ́ tum tumen.) Wel vi ndu è suu ɛshiɛ ə wen è kase fiile nɛ əb se yɛne əblik.

⁸Ghel ghɛ chiin báksen se wen gese nɛ̀ ghel ghɛ ɛ́ nè yɛnen nɛ əb yese lonen fenloone me se kante ge: Vin lɛ báà se lu wel wɛ əb nè yese diom fɛn lone fenloone-a?

⁹Ghel ɛlee suuy ge: Lu wen. Ɛlee suuy ge: Əb fuosen wen fuosen. Wel vi se wene ngeŋ fise ge: Lu kɛn naa mɛ.

¹⁰Ghene bif se wen ge: Ke ghan lɛɛy ge wɛ̀ yɛ yɛn əblik?

¹¹Əb fise ge: Wel vi wɛ ɛ́ toŋten ge Jesus kè toote kechiale, è yiose ɛshiɛ ə ghom so, è suuy ge mɛ ndu è suu ɛ kechəme Siloam. Mɛ ndu è suu, è me se yɛne əblik.

¹²Ghene bif se wen ge: Wel nɛ̂ vi waay? Əb fise ge: Mɛ báà se ke ghaa əb luun.

¹³Ghene me liɛ wel wɛ nè yî luun kenfef vi è ndu so se ghele kenone Falisee.

¹⁴Nè lu dì nɛ Jesus nè toote kechiale è yìàse ɛshiɛ wel vi so nɛ lu ɛ kechii ɛybam.

¹⁵Ghele kenone Falisee ghii gese bif se wel vi ge əb sɛ ghan lɛɛy se geese yɛ yɛn əblik-a. Əb suuy se ghene ge: Əb kè yiose kechiale ɛ mɛ ɛshiɛ, mɛ ndu è suu ɛshiɛ ə ghom, è me se yɛne əblik.

¹⁶Falisee se ɛlee suuy ge: Wel wɛ əb kè nɛɛyen kenəə kine báà loo nɛ lu se Feyine, bek ge əb báà se bame ɛybam. Ghene ɛlee suuy kɛ́ ghene ge: Loo lɛɛye wele mbee yɛ nɛɛy əbnəə əbchio əbyúméné ka vin-a? Əbngiabsene me fəy ɛ ghene məm.

¹⁷Ghel ghii gese bif se wel vi ge: Ka wɛ̀ suuyen ge kè yiase wel nɛ̂ vi ɛshiɛ ə ghiɛ, wɛ̀ suuy kiɛ gee ghɛ kum wen. Əb fise ge: Əb lu wele ntum nə Feyine.

¹⁸Ghɛ́ mbiye nə ghele Juus ghii nè báà se koŋe se beeme ge wel vi nè lô se lu kenfef se geese yɛ yɛn əblik. Nɛ ghene geese beeme, ghene nè lô jaŋ ba ə wen ghene no ə wen,

¹⁹è bif se ghene ge: Vin lɛ lu wán ə wɛn wɛ ghɛne suuy ge ɛ́ nè bii wen nɛ əb fefmen-a? Ke ghan lɛɛy ge əb yɛ yɛn əblik ɛ leenen?

²⁰Ghene fise ge: Ghɛs ke ge əb lu wán ə wɛs, nɛ ghɛs ke ge ɛ́ nè bii wen nɛ əb fefmen.

²¹Dî nɛ ghɛse báà se ke ge əb sɛ ghan lɛɛy se geese yɛ yɛn əblik-a, gese ke wiy ge sɛ yiase ndɛ ɛshiɛ ə wen-a. Ghɛn bif se wen; ɛshiɛ ə wene yiomen, nɛ lòó əb fise se wene ngeŋ.

²²Ba ə wen ghene no ə wen nè suuy dì bek ge ghene nè fane ghɛ́ mbiye nə ghele Juuse ghi ghɛ ɛ́ nè lɛmenmen ge naa ndɛ beeme ge Jesus lu Vi wɛ Feyine nè Yiosen ɛ́ jum se ngay ɛyjem.

²³Ghɛy kenəə kɛ ke nè nɛɛyen ba ə wen ghene no ə wen suuy ge: Ɛshiɛ ə wene yiomen; ghɛn bif se wen.

²⁴Ghene gese jaŋ wel vi wɛ ɛ́ nè biin nɛ əb fefmen è suuy se wen ge: Kan ɛyghel ə Feyin ge wɛ̀ suuy əbluuy! Ghɛs ke ge wel vin wɛ əb kè chuken wɛ̀ lu wele mbeese.

²⁵Əb fise ge: Mɛ báà se ke ge əb sɛ lu wele mbee moo əb wiy-a. Kɛ mɛ keen lu ge mɛ nè lu kenfef, se lu ɛ leenen nɛ mɛ se yɛne əblik.

²⁶Ghene gese bif se wen ge: Əb kè nɛɛy ghɛ se wɛ̀? Əb kè yiasé lɛɛy ɛshiɛ ə ghiɛ?

²⁷Əb fise ge: Mɛ kè suuymen, nɛ ghɛn koŋe wiy se yiote. Ghɛne gese kɛŋe se yio se jɛl lɛɛy? Ghɛne kɛŋe se yɛ lu ghon-ɛyfɛl nə wen-a?

²⁸Ghene me tɛyle wen tɛylen è suuy ge: Wɛ̀ lu wán-ɛyfɛl nə biɛ nɛ̂ vi, nɛ̀ ghɛs lu kɛse ghon-ɛyfɛl nə Moses.

²⁹Ghɛs ke ge Feyine nè suŋnen se Moses, dî nɛ se biɛ vin lu nɛ ghɛs ke wiy ghaa əb lòòn.

³⁰Wel vi me suuy ge: Lu kenəə əbchio əbyúméné se mɛ! Ghɛn ke wiy ghaa əb lòòn, dî əb ko yiase ɛshiɛ ə ghom.

³¹Ghɛsen ke ge Feyine báà se yiote kenəə kɛ ghele mbee suuyen. Əb yiote nɛ lu se ghel ghɛ ɛ́ ngvəmlen wen, nɛɛy kenəə kɛ əb kɛŋen.

³²Naa ka mbi nè kɛɛten, wel nè bɛɛy ghàà yio ge wel kè yiase ɛshiɛ ə wel wɛ ɛ́ nè biin nɛ əb fefmen.

³³Buu ge wel vin lòò nɛ lu se Feyine, é əb jia nɛɛy ɛynkii kenəə ka kinee.

³⁴Ghene fise se wen ge: Ɛ́ nè bii wɛ̀ ɛ məme mbee, wɛ̀ kuy ɛ mbee, è se kɛŋe se yɛ dinte əbnəə se ghɛs-a? Ghene suuy di è me jum wen se ngay ɛyjem.

³⁵Jesus yio ge ɛ́ jummen wen se ngay ɛyjem è se yɛne gwiye nɛ̀ wen è bif ge: Wɛ̀ lɛ lu nɛ wɛ̀ fó ɛytem se Wanwel-a?

³⁶Əb fise ge: Babɛy, ko fekte wel wɛ luun wen, é mɛ fó ɛytem se wen!

³⁷Jesus suuy se wen ge: Wɛ̀ yɛnmen wen, nɛ lu wen wɛ əb suŋnen se wɛ̀ ɛ leenen.

³⁸Wel vi me suuy ge: Báàba, mɛ lu nɛ mɛ fó ɛytem se wɛ̀. Əb suuy di, è ngvəkte ɛ Jesus ɛyshiɛ è se foo ɛykokse se wen.

³⁹Jesus suuy se wen ge: Mɛ nè gwiy ɛ mbi fɛn se sake ghel, ka ghel ghɛ luun əbnfef yɛ yɛne əblik, é ghɛ ɛ́ yɛnen əblik fef.

⁴⁰Ghele kenone Falisee ɛlee ghɛ ɛ́ nè luun fo yio ka Jesus suuyen dî è bif se wen ge: Wɛ̀ kɛŋe se din ge ghɛs lu sɛ̂y əbnfef-a?

⁴¹Jesus fise ge: Ghɛn kè boy se yɛ lu əbnfef, fene ghɛn ki wiy njio. Dî nɛ ka ghɛne dinen ge ghɛne yɛne əblik-a, fene ghɛn ko bo ki njio.