Read Oku Ɛyf 10 Bible Online

Ɛyf 10 - Oku bible

Ɛyf 10

¹Wel əblee nè lu ɛ Saesalea nɛ ɛ́ toŋte ge Kolnelius. Əb nè lu ketuu kenone ghel ɛyghoŋ əbviɛ kɛ ɛ́ nè toŋten ge kɛ́ Itali-e.

²Ghene ɛyshaa ndaa nə wene ɛyjime nè kokse Feyin, vəme wen. Əb nè giamten ghel ghɛ ɛ́ nè shiin naa kejuŋ gese jeme se Feyine əbliy nɛ̀ əbliye.

³Naa se lu ɛ kechii kelee ka chuy kasen è mak baŋ setal, kuumese koo Kolnelius nɛ nchiy-ndaa-Feyine toŋte wen ge: Kolnelius.

⁴Kolnelius me tuŋ ɛshiɛ ɛ wen əbghun nɛ̀ ɛyfane è bif ge: Lu ghɛ Báàba? Əb fise ge: Feyine yiomen ɛyjem ə yiɛ, è gese yɛn ɛyfɛl ə yiɛ ɛyjuŋe è kuume wɛ̀.

⁵Túm ghel se Jobba ɛ́ ndu è gwiy nɛ̀ Simon wɛ ɛ́ toŋten ge Bita.

⁶Əb chii ghene Simon wɛ əb taan guose, nɛ̀ ndaa ə wen lu əbghune jio ɛyghuy.

⁷Nchiy-ndaa-Feyin yi suŋnen dì è lòò, Kolnelius jaŋ ghel ɛyfɛl nə wen ɛbaa gese nɛ̀ wel ɛyghoŋ əblee wɛ əb nè koksen Feyin ɛ məme ghel ghɛ ɛ́ nè chiyen wen.

⁸Ɛ́ gwiy əb fekte se ghene kenəə kɛ ke ganen se wen è me tum ghene se Jobba.

⁹Əbtəke yio nɛ ghene ndumen è se bɛɛte ntɛke ten, Bita kok ɛ ketuu ndaa se jem nɛ shi ka nɛ̀ ɛyteme nchuye.

¹⁰Jeŋ lòò è se yafe wen, nɛ əb ki shii se yiɛ, nɛ ɛ́ bo fɛle əbfua-əbyíɛ́ne fɛ́len, mbuunese loo yiike wen, kuumese koo wen.

¹¹Əb yɛn ka əbchio ɛyyio disen, kefaa se səəke ɛ ten lu ka ketuu ndəyse nɛ ɛ́ ghal ɛ tebuulese tɛ tekɛɛke è se səkse se ntiɛ.

¹²Nè lu ɛ ten nɛ ɛynkii nyam sejime lu, nɛ̀ ɛynkii yiose sejim, gese nɛ̀ ɛynkii əmnən əmjim.

¹³Giɛ ɛylee me gwiy se wen ge: Loole Bita, è yuyte nyam shin è yɛ kfəl.

¹⁴Bita fise ge: Nyiamɛ Báàba, mɛ nè bɛɛy ghàà yiɛ kefaa nɛ ke ŋiile kene kɛ ke laanen wiy.

¹⁵Giɛ yi gese gwiy se wen ge: Ghàà yɛ toŋte kefaa kɛ Feyine suutenmen ge kɛ ke laanen wiy.

¹⁶Kenəə kin gan ge kaŋ ɛtal, kefaa ki me kase fiile se ɛyyio kɛn se əbliy.

¹⁷Se lu nɛ Bita bo kante ge kenəə kɛ yi yɛnen sɛ dine ge ghɛ-a, ghel ghɛ Kolnelius kè tumen ghi me bifte è gwiy nɛ̀ ndaa ə Simon è teem ɛ əbchio kengɛy.

¹⁸Ghene teem dì è jaŋ è bif ge: Wel ɛyghan lɛ lu fɛn nɛ ɛ́ toŋte ge Simon Bita-a?

¹⁹Ko se lu nɛ Bita bo kante kenəə ki, Keyioy Kelanene suuy se wen ge: Yɛn-a, ghele kɛŋe wɛ̀ ɛtal.

²⁰Loole, è səəke é ghɛne ghene yɛ ndu ghaa ɛ́ nduun nɛ ghaa yɛ sekte sekten bek ge tum mɛ ghene.

²¹Bita me səəke, è suuy se ghel ghii ge: Lu mɛ wel wɛ ghɛne kɛŋen, ghɛn gwiy gee ghɛ?

²²Ghene fise ge: Tum Kolnelius wɛ ketuu ɛyghoŋ ghɛs. Əb lu wel əbjuŋ ɛyshiɛ nə Feyine, nɛɛy ka Feyine kɛŋen, nɛ ghele Juus ɛjime suŋnene kejuŋ kum wen. Nchiy-ndaa-Feyin ne suuy se wen ge əb jaŋ wɛ̀ ɛ wen ə ndaa è yio kenəə kɛ wɛ̀ kiin se suuy.

²³Bita me liɛ ghel ghii ghene ghene chii. Əbtəke yio, ghene ghene lòò è se nduu, ghel ɛbeemene ɛlee ghɛ́ Jobba se nduu sɛy ghene ghene.

²⁴Ghene jɛl è chii, əbtəke yio, ghene me lii se Saesalea. Nè lu dì nɛ Kolnelius beemen ghel ɛykfəə nə wen gese nɛ̀ sunse ə wene, ghene ghene se chiyte ghe Bita.

²⁵Nɛy se lu ka Bita gwiyen è se lii ɛ ndaa, Kolnelius ngvəkte ɛ wen ɛyshiɛ se foo ɛyvəm se wen.

²⁶Bita ghal wen è se lose è suuye ge: Loole se ɛyyio. Mɛɛ mɛ lu sɛy wel.

²⁷Əb se suŋnene se Kolnelius di lii nduu ɛ ndaa, è me yɛn nɛ ngose wele bááte əbghun fo.

²⁸Əb suuy se ghene ge: Ghɛn loote ke ge nchil ə yɛse báà beeme ge wele Juus yɛ ki kenəə se nɛɛy ghene wele ketum, kene se shik ɛyghan se wen. Dî nɛ Feyine dinmen se mɛ ge ghàà mɛ liɛ wel ge wel əbbee kene ge wele lólò.

²⁹Ɛ́ ne jaŋ mɛ, mɛ gwiy nɛ mɛ báà bif kenəə. Mɛ me se bife se ghɛn ge ghɛn sɛ nè jaŋ mɛ ge ghɛ-a?

³⁰Kolnelius fise ge: Lan nɛɛye əbchii əbkɛɛk ka mɛ ne jemen ɛ mɛ ndaa ɛ keleŋe leenen nɛ chuye makmen mbàŋ setal, è sasen è yɛn wel nɛ əb tiy ɛ mɛ ɛyshiɛ nɛ əb mak ndəyse nɛ se liakte liakten.

³¹Əb suuy ge: Kolnelius, Feyine yiomen ɛyjem ə yiɛ è kuume ka wɛ̀ giamten ghɛ́ ketane.

³²Túm wel se Jobba é əb jaŋ Simon wɛ ɛ́ toŋten ge Bita. Əb chii ghene Simon wɛ əb sɛɛ taa guose əbghune jio ɛyghuy.

³³Ghɛy kenəə kɛ ke kè nɛɛyen mɛ tum ge ɛ́ jaŋ wɛ̀ kɛn se əbliy, ke me se lu kejuŋ ka wɛ̀ gwiyenmen. Ghɛs lu fɛn ghel ɛjim ɛ ɛyshiɛ nə Feyine se yio əbnəə əbjim wɛ Báàba suuyen ge wɛ̀ fekte se ghɛs.

³⁴Bita me kɛɛte se suŋnen, è suuy ge: Mɛ yɛnmen se əbluuy ge Feyine báà se dine əmndun-ndun.

³⁵Naa ndɛ wɛ əb vəmen Feyin, nɛɛy kenəə kɛ titiye, lu vi nɛ̂ vi wɛ Feyine koŋen, kene əb lòò naa ɛylak ɛykɛ.

³⁶Ghɛn ko nè lô yio sɛy ntum yɛ Feyine nè tinsen se ghele Islaele ge Jesus Christ nè gwiy se nɛɛy ge ghele yɛ chii kejuŋ ghene ghe Feyine. Jesus nɛ̂ vin lu Báàba ə ghel ɛjim.

³⁷Ghɛn ko ke kenəə kɛ ke nè ganen ɛ ɛylake Islael se kɛ̀ɛ̀tè ɛ Galilee, əbliy wɛ Joon nè foon moo se ghele.

³⁸Ghɛn ke ka Feyine nè siysen Jesus wɛ̂ Nazalet nɛ̀ Keyioy Kelanene gese nɛ̀ əbtaawe gese nɛ̀ ka əb nè jɛ́len nɛɛyen njuŋ, chuke ghel ghɛ Satan nɛ̀ nəksen. Əb nè nɛɛy əbnəə vin bek ge Feyine nè lu ghene wen.

³⁹Ghɛs nè lô yɛn əbnəə əbjim wɛ əb nè nɛɛyen ɛ Jolesalem gese nɛ̀ se ɛylak nə ghele Juus ɛyjim. Ghele Juuse naa lòò è yuy wen ɛ kentam.

⁴⁰Dî əbchii chin əbtal Feyine lose wen se ɛykuo è nɛɛy ghele yɛn wen.

⁴¹Feyine nè báà din wen se ghel ɛjime, əb nè din wen se ghɛs ghɛ əb nè chokenmen ge ɛ́ yɛn əbnəə əbjim wɛ əb nè chian. Ghɛs nè lô se yiɛ gese nəə ghɛse ghe Jesus se ka əb nè loolen se ɛykuo.

⁴²Əb nè suuy se ghɛs ge ghɛs yɛ fekte sakghɛ əbjuŋ se ghele, è gese yɛ suuy ge lu yi wɛ Feyine nè choken ge yi yɛ sake nsake ghel ghɛ ɛ́ bɛɛyen ɛtaa nɛ̀ ghɛ ɛ́ kuokenmen.

⁴³Ghele ntum nə Feyine nè lô suŋnen kum Jesus ge, naa ndɛ wɛ əb foon ɛytem se wen lu nɛ Feyine náà lɛyse mbeese wen ɛ əbtaawe ɛyghel nə Jesus.

⁴⁴Se lu nɛ Bita bo suŋnene dì, Keyioy Kelanene səəke è lun se tetem nə ghel ghɛ ɛ́ nè yioten sakghɛ əbjuŋ vi.

⁴⁵Ghel ɛbeemene ghɛ́ Judea ghɛ ghene ghe Bita nè lòòn ɛ Jobba se lu nɛ̀ əbchíò əbyúméné, ge Feyine lu nɛ əb fó fomɛ ə wen wɛ luun Keyioy Kelanene se ghel əbtume sɛy.

⁴⁶Əbchio nè yum ghene bek ge ghene nè loo chin nɛ ghel ghii se suŋnen telam tefɛɛ gese foo ɛykokse se Feyine. Bita me bif ge:

⁴⁷Ghel ghine kiilemen Keyioy Kelanene ghɛɛ-ghɛɛ ka ghɛsen nè kiilen. Lɛ lòó wel tun ge ghàà ɛ́ fó moo se ghene-a?

⁴⁸Əb me suuy ge ɛ́ fó moo se ghene əbtaawe ɛyghel nə Jesus Christ. Ghene me suuy ge Bita chii ghene ghene se əbchii.