Read Oku Ɛyf 11 Bible Online

Ɛyf 11 - Oku bible

Ɛyf 11

¹Ghɛ́ ntum nə Jesuse ghene ghel ɛbeemene ghɛ́ Judea ɛjime yio ge ghel əbtume beememen kenəə ə Feyin sɛy.

²Bita nɛy kok ɛ Jolesalem, ghele ghɛ́ Judea ghɛ ɛ́ nè token ge ɛ́ yɛ nɛyte ghel əbtum se geese yɛ fiisene ghene ɛ kenon nə ghel ɛbeemene me se ghame Bita.

³Suuye ge: Ke nè ghan lɛɛy nɛ wɛ̀ lii se ndaa nə ghel əbtume se yɛ yiɛ ghɛne ghene, nɛ ghene sɛɛ jia nɛyte ɛluumen.

⁴Bita me kɛɛte ka ke nè kɛɛten è ŋif se ghene ge:

⁵Mɛ nè lu ɛ ntɛke Jobba jeme, kuumese koo mɛ ge kefaa səəke ɛyyio nɛ ke lu ka ketuu ndəyse nɛ ɛ́ ghal ɛ tebuulese tɛ tekɛɛk ke səəke gwiy ghaa mɛ nè luun.

⁶Mɛ kiy ɛ məme ten è yɛn tenkii nyam sejim tenkii yio sejim, tenkii əmnən əmjim.

⁷Giɛ ɛylee me suuy se mɛ ge: Loole Bita è yuyte nyam shin è yɛ kfəl.

⁸Mɛ fise ge: Nyiamɛ Báàba, mɛ nè bɛɛy ghàà yiɛ kefaa kɛ ke ŋiilen, kene kɛ ke laanen wiy.

⁹Giɛ yi gese suuy ge: Ghàà yɛ toŋte kefaa kɛ Feyine suutenmen, ge kɛ ke laanen wiy.

¹⁰Kenəə nɛ̂ kin kooy kaŋ ɛtal kefaa kɛ tene me kase fiile se ɛyyio.

¹¹Kɛn ɛ keleŋe əbliy fo ghele mii gwiy ɛ əbchio ndaa bene fɛ mɛ nè luun ɛtal nɛ ɛ́ tum ɛ Saesalea ge ɛ́ gwiy è jaŋ mɛ.

¹²Keyioy Kelanene me suuy se mɛ ge me ndu ghɛse ghene ghàà mɛ din əmndun-ndun. Ghɛse ghone-nyii ghɛ ntuufe ghɛ́ Jobba me lòò, è ndu è lii ɛ Kolnelius ə ndaa.

¹³Əb me fiɛl se ghɛs ka əb nè yɛnen nchiy-ndaa-Feyin ɛ wen ə ndaa, ɛy suuy se wen ge: Túm wel ɛ Jobba əb jaŋ wel wɛ ɛ́ toŋten ge Simon Bita.

¹⁴Əb nɛ̂y gwiy è fekte kenəə kɛ ke nɛɛy é ghɛn ɛyshaa ndaa nə wɛ̀ boy.

¹⁵Mɛ kɛɛte se suŋnen, Keyioy Kelanene me gwiy se ghene tetem ghɛɛ-ghɛɛ ka ke nè gwiyen se ghɛsen ɛ kenkɛɛte.

¹⁶Mɛ me kuume kenəə kɛ Báàba nè suuyen ge: Joon nè fóó moo se ghele dî nɛ ɛ́ nɛ̂y yɛ fo nɛ lu Keyioy Kelanene se ghɛn.

¹⁷Ka Feyine nè buken ghene nɛ̀ mbukma yɛ əb nè buken ghɛsen so əbliy wɛ ghɛsen nè foon ɛytem se Báàba ə wɛsen wɛ Jesus Christ, mɛ se lu ndɛ se yɛ tunse kenəə kɛ nɛɛyen Feyin?

¹⁸Ghene yio kii nɛ̂ kine è jia gese se ghame Bita, è me se kokse Feyin suuy ge: Feyine nɛɛymen ge ghel əbtume kubsen tetem ə ghen è kiile sɛy ɛychii.

¹⁹Ghel ɛbeemene nè saanken bek ngɛk yɛ ɛ́ nè fóon se ghene əbliy wɛ ɛ́ nè yuyten Stefen. Ghene ɛlee se nduu naa əblik ka Foenisia, nɛ̀ Siblus gese nɛ̀ Antiok fekte sakghɛ wɛ kum Jesus kɛn se ghele Juus.

²⁰Dî ghene ɛlee ghɛ nè luun ghele ghɛ́ Siblus gese nɛ̀ Silen ndu Antiok, è se fekte sakghɛ wɛ kum Báàba Jesus se ghel əbtume.

²¹Bay Feyin me giamten ghele se yio kenəə kɛ ghene fekten, nɛ ndio foo ɛytem se Báàba.

²²Ghel ɛbeemene ghɛ́ Jolesaleme yio sakghɛ ten è me tum Balnabas se Antiok fo.

²³Balnabas ndu è yɛn ka Feyine bosen ghene, è se saŋlee, è me tefte ghene ge ghene yɛ jumte Báàba Jesus nɛ̀ ɛyteme ɛyjime.

²⁴Balnabas nè lu wel əbjuŋ, nɛ Keyioy Kelanene lu ɛ wen ɛytem, nɛ əb gese loote samse Jesus. Ghele me se chinten kenone ghel ɛbeemene naa se ɛydio.

²⁵Balnabas me ndu è se kɛŋe Sool ɛ Talsus.

²⁶Əb kɛŋ è yɛn, ghene wen me ndu se Antiok, è me se lu ghene ghel ɛbeemene se nguk əbful, dinte əbnəə se ghele naa se ɛydio. Lu Antiok ghaa ɛ́ nè kɛɛten se toŋte ghon-ɛyfɛl nə Jesus ge Keetɛnse.

²⁷Nè lu əbliy fo ghele ntum nə Feyine ɛlee loo ɛ Jolesalem è chio Antiok.

²⁸Keyioy Kelanene lose ɛyteme Agabus wɛ wele ntum nə Feyine əblee, əb loole è suuy ge jeŋe nɛ̂y koo mbi ɛyjim. Ɛy nɛy me koo nɛ lu əbliy wɛ Klaudius nè saken ketum kɛ Lûm.

²⁹Ghon-ɛyfɛl nə Jesus ghɛ́ Antioke me siyse, wel se foo kefaa ka əb nɛ kiin, ɛ́ me chìntèn è tinse se ghone-nyii ghɛ ɛ́ nè chiin ɛ Judea.

³⁰Ghene nè baaté è tum Balnabas ghene Sool so, ghene ndu so è fo se chɛɛse.