Read Oku Ɛyf 12 Bible Online

Ɛyf 12 - Oku bible

Ɛyf 12

¹Nè lu əbliy fo əbfon wɛ Helod se koote ghel ɛbeemene ɛlee ge yi yɛ nəkse.

²Əb nè lô chiase ɛysak ɛ́ yúy Jɛms wɛ wán-no ə Joon nɛ̀ fiak.

³Əb yɛn nɛ kenəə tene jofe ghele Juus è me suuy ɛ́ koo sɛy Bita. Kii nɛ̂ kine nè gan ɛ əbliy ɛyyiɛ Kechii Ɛyboyse.

⁴Ɛ́ koo Bita dì è vii se kengɛye nchak, è me lɛm ghel ɛyghoŋ ɛkɛɛk ɛkɛɛk əbleŋ əbkɛɛk ge ɛ́ yɛ chiye wen ka kechii kɛ ɛ́ yíɛ́ Kechii Ɛyboyse loo chia, é yi tiyse Bita ɛ ɛyshiɛ nə ghel ɛjime è sak wen.

⁵Ka ɛ́ viin Bita se nchak dì ghel ɛbeemene se jeme ketaan ge Feyine giamten wen.

⁶Nɛy se lu ɛ ntək wɛ Helod nè bvəsen se fəyse Bita ge ɛ́ sak, Bita se buune ɛ feteten nə ghel ɛyghoŋ ɛbaa nɛ ɛ́ kul wen nɛ̀ nchak sebaa. Nè lu dì nɛ ghel ɛyghoŋ ɛlee ɛbaa tiy ɛ əbchio kengɛye nchak.

⁷Nchiy-ndaa-Feyin tum è fəy fo, ndaa ban. Əb shikse Bita ɛ wen ɛytii-ɛybee, əb kamke, əb suuy se wen ge: Loole se ɛyyio chikiy chikiy. Nchakse me yayte se Bita ɛykoy.

⁸Nchiy-ndaa-Feyin yi me suuy se wen ge: Make ndəy ə shiɛ è tuŋte guose ɛvəə. Bita nɛɛy dì. Əb suuy se wen ge: Make ndəyse kenton nə wɛ̀ è gwiy ɛ́ loo.

⁹Bita me fəy è se nduu ɛ nchiy-ndaa-Feyin yi ɛybam, maanen ge əbnəə wɛ əb kooyen sɛ ko lu əbluuy-a! Əb nè kwaate ge koo kuumese yi.

¹⁰Ghene chia kenone ghele nchiy kɛ mbiye, è chia kɛ kenkumtene, è chin ɛ əbchio kengɛy wɛ əb kiyen ntɛk, nɛ ɛ́ fɛl nɛ̀ kekase. Əb dise se ngeŋ, ghene fəy. Ka ɛ́ fəyen è jɛte fentam nchiy-ndaa-Feyin yi me saame.

¹¹Ɛytof ə Bita me kase gwiy, əb suuy se ngeŋ ə wen ge: Mɛ keelemen se əbluuy ɛ leenen ge kè tum Feyin nchiy-ndaa nə wen ɛy gwiy è fəyse mɛ se Helod ə ketam, mɛ boy se kenəə kɛ ghele Juuse kè kwaaten se nɛɛy se mɛ.

¹²Ka Bita keelen kenəə kɛ ke ganen dî, è me lòò è ndu ɛ Mɛɛle wɛ no ə Joon Make ndaa. Nè lu dì nɛ ghele chintenmen fo se ɛydio, è se jeme.

¹³Əb kfənte əbchio ndaa wɛ bɛye, wan əbvii wɛ əb nè fɛ́len ɛ ndaa fo nɛ ɛ́ toŋte ge Loda gwiy se dise,

¹⁴è me keele giɛ Bita, ɛysaŋle lun ɛ wen ɛytem. Əb kase nyiŋ è ndu nɛ əb báà chèmè dise əbchio ndaa è jaŋ è suuy ge: Bita tiy ɛ əbchio ndaa.

¹⁵Ghene fise ge: Wɛ̀ jake jaken. Əb soote sooten ge Bita tiy ɛ əbchio ndaa. Ghene me fise ge: Fene dî lu nchiy ə wen.

¹⁶Bita ko se tiy kfənte əbchio ndaa, ghene loo dise è yɛn se əbluuy nɛ lu wen, əbchio yúm ghene.

¹⁷Əb lii, è chil ghene nɛ̀ keghoo ge ɛ́ ghusen, è me fiɛl ka Feyine kè fəysen wen se nchak, è gese suuy ge: Ghɛn fiɛl əbnəə vin se Jɛms ghene ghone-nyii ɛlee. Əb suuy dì è me lòò è ndu se kelik kelee.

¹⁸Əbtəke yio, ghel ɛyghoŋ ghii ghɛ ɛ́ nè chiyen Bita jia yɛn wen, ɛytof ə ghene bvəŋ, ghene me se kante ge sɛ gan ghɛ se wen-a?

¹⁹Helod chiase ɛysak ge ɛ́ kɛŋ Bita, ɛ́ kɛŋ è jia yɛn. Əb me bifte əbnəə se ghɛ́ nchiy ghii è me chiase ɛysak ge ɛ́ yúyté ghene. Əb nɛɛy dì è me lòò se Judea è ndu ɛ Saesalea è se moote fo.

²⁰Nè lu əbliy fo nɛ Helod yafse ɛytem se ghele ghɛ́ Taya ghene ghɛ́ Sidone. Ghene me baate se kenon è ndu se yɛne wen. Ghene ndu è chia mbiy è koo əbsun ghene ghe Blastus wɛ nè luun nchiy-ntok, è me yɛn Helod è se lone ge əb koosen ɛysen se ghene bek ge ɛylak ə ghene nè kiile əbfua-əbyíɛ́ne ɛ Helod ɛylak.

²¹Nɛy se lu ɛ kechii kɛ ghene nè siysen, Helod mak ndəyse tefon nə wen è kok kaba ə wen è se suŋnen se ghel ghii.

²²Ghel ghii kum fezəə ge: Suŋnene feyin felee, báà se suŋnen wel.

²³Kɛn se əbliy, nchiy-ndaa-Feyin me tɛl wen, teghoghoke yíɛ́ əbtoo ə wen, əb kuo bek ge əb nè báà chiase ɛykokse yɛ ɛ́ nɛ koksen wen nɛ lu se Feyine.

²⁴Kenəə ə Feyine ko se kuye nduu kɛn ɛ mbiy.

²⁵Balnabas ghene Sool nɛy mɛyse ɛyfɛl ə ghen è loo lòò se Jolesalem è liɛ Joon wɛ ɛ́ nè toŋten ge Mak.