Read Oku Ɛyf 14 Bible Online

Ɛyf 14 - Oku bible

Ɛyf 14

¹Bool ghene Balnabas ndu Ikonium, è lii ɛ ngay ɛyjem nə ghele Juuse è se fekte kenəə ə Feyin ɛ jii yɛ ngose wel nè lô fo ɛytem se Jesus, nɛ lu ghele Judea gese nɛ̀ ghel əbtume.

²Dî ghele Juus ghɛ ɛ́ nè báà beeme bɛyse ghel əbtum, è bvəŋse ɛytof ə ghen, ghene se bane ghel ɛbeemene.

³Bool ghene Balnabas me chii ɛ ntɛk fo se əbtəm, fekte giɛse Feyin kum njuŋ yɛ əb nɛɛyen, fane wiy kefaa. Əb fo əbtaawe se ghene, ghene se nɛɛye əbnəə əbchio əbyúméné, nɛ̀ əbkanene wɛ əb nè dinen ge kenəə kɛ ghene fekten lu əbluuy.

⁴Ghele ghɛ́ ntɛk foo me giabsen, ɛlee se toke ghele Juus, nɛ ɛlee toke ghɛ ntum nə Jesus ghii.

⁵Ghele Juus ghii ghene əbtume me ndu è yɛn chɛɛ sɛ ntɛk foo, ghene ghene se taŋe ge ɛ́ nyable nɛ̀ ghɛ́ ntum nə Jesuse, è təmle ghene nɛ̀ ɛtiye.

⁶Ghene keele, è me nyiŋ, è ndu se ntɛke sɛ́ Likaonia sɛ luun Listla nɛ̀ Delbe gese nɛ̀ ntɛk sɛ se baksen,

⁷è se fekte sakghɛ əbjuŋ fo.

⁸Wel əblee nè lu ɛ Listla nɛ ɛ́ nè bii wen nɛ əb ləmmen, nɛ əb nè bɛɛy ghàà yi jɛl.

⁹Bool naa se fekte kenəə ə Feyin ɛ kechii kelee nɛ wel vi diom fo è se yiótée. Bool soo ɛyshiɛ ɛ wen əbghun è yɛn ge əb ki ɛybeeme ge lòó ɛ́ chuk yi,

¹⁰è suuy ɛ giɛ ɛytaa ge: Loolê, è teem ɛ ɛyyio. Əb me tum è chak, è kɛɛte se yɛ jɛl.

¹¹Ngose wel yɛn kenəə kɛ Bool nɛɛyen, è gwɛl fezəə ɛ ghene əblam ge: Əmnyinme səəkemen è gwiy se ghɛsen lu ka ghel.

¹²Ghene me toŋte Balnabas ge Feyin fɛ Zeus, fo yɛ́ Bool yɛ ɛyghel ge Feyin fɛ Helmes, bek ge lu wen wɛ əb nè foon kesuŋnen.

¹³Ndaa yɛ ɛ́ nè koksen feyin fɛ Zeus ɛ ten nè lu ɛyghaŋe ntɛk fo. Ba ntaŋle wɛ əb nè sɛɛ taŋle feyin fɛ Zeus me gwiy nɛ̀ na se luumene gese nɛ̀ əbbuse ɛ tenkii tenkii əbchio kengɛy, bek ge ghene ngose wel yi nè kɛŋe se nɛɛye ntaŋle se Bool ghene Balnabas.

¹⁴Balnabas ghene Bool yio kenəə kɛ ghel ghii kɛŋen se nɛɛy, è sayte ndəyse ghen è nyiŋ è too ɛ məme kenon fɛy è zəəme, è bif ge:

¹⁵Kine lu ghɛ kɛ ghɛne kɛŋen se fek? Ghɛs lu sɛy ghel ka ghɛn. Ghɛs lu fɛn fekte sakghɛ Feyin əbjuŋ se ghɛn ge ghɛn vəse əbnəə lólò vin wɛ ghɛne nɛɛyen, è fiile se Feyin fɛ fe chiin. Nè bom wen ɛyyio ghene ntiɛ, nɛ̀ jio ɛyghuy gese nɛ̀ əbfua əbjim wɛ əb luun ɛ ten.

¹⁶Nè lu se mbiy, əb vəse ghel ɛ́ se chii ka ɛ́ koŋen.

¹⁷Dî əb jia gok se yɛ nɛɛye əbnəə əbjuŋe se ghɛn wɛ əb dinen ge yi lu; əb foo ɛyghuu se ghɛn ɛ əbliy əbjuŋe, nɛ əbliye kwɛne nɛ əb foo ghɛn nɛ̀ əbfua-əbyíɛ́ne, nɛɛye nɛ ghɛn saŋlee.

¹⁸Chèmè lu ka Bool ghene Balnabas nè suŋnen dì, kii nɛ̂ kine nè báà yaŋse nɛɛy ge ghel ghii gok se yɛ momse se taŋle ghene.

¹⁹Ghele Juus ɛlee gwiy fo nɛ ɛ́ lòò Antiok ghene Ikonium è nɛɛy ngose wel se toke ghene ge ɛ́ yɛ bane ghe Bool. Ghene təmle Bool nɛ̀ ɛtiye, è guf è fəy so se ntɛk fo è maay wen se kelik, kwaate ge əb kuomen.

²⁰Ghel ɛbeemene nɛy me kaame ɛ wen ə ketuu, əb loole è kase fiile se ntɛk fo. Əbtəke bvəs è yio, ghene Balnabas lòò è ndu se Delbe.

²¹Nɛy se lu ka ghene fektenmen sakghɛ əbjuŋ ɛ ntɛk fo ghele bééme se ɛydio, ghene me fiile se Listla, nɛ̀ se Ikonium gese nɛ̀ se Antiok wɛ̂ Bisidia.

²²Ghene se fiile dì, lumse tetem ə ghel ɛbeemene, tefe ghene ge ghene yɛ tiy ketaan ɛ ghene ɛybeeme ke ge: Ghɛsen lu se naa se chia ɛ məme ngɛkse se ɛydio se geese lii se ɛysak nə Feyine.

²³Ghene se nduu ɛ kenchintene ghel ɛbeemene, chokte ghele mbiy, jeme, bame əbfua-əbyíɛ́ne gese vii ghene se keghoo nə Báàba Jesus, wɛ ghene foon ɛytem se wen.

²⁴Ghene me tosen ɛ Bisidia è ndu se Bamfilia,

²⁵è se fekte kenəə ə Feyin se ghele ntɛke Belga. Ghene mɛyse se fo è me chio se Attalia.

²⁶Ghene me lii se kenək è kase diaŋ se Antiok ghaa ɛ́ nè viin ghene se Feyine keghoo ge əb giamten ghene, é ghene yɛ fɛl ɛyfɛl yin yɛ ghene mɛysen.

²⁷Ghene diaŋ è chin fo, è baate kenchintene ghel ɛbeemene, è fekte se ghene əbnəə əbjim wɛ Feyine nè foon kediak ghene nɛɛy, gese nɛ̀ ka əb nè disen tetem ə ghele əbtum, ghene fó ɛytem se Jesus.

²⁸Ghene me chii ghene ghel ɛbeemene fo se əbtəm.