Read Oku Ɛyf 15 Bible Online

Ɛyf 15 - Oku bible

Ɛyf 15

¹Ghel ɛlee nɛy lòò ɛ Judea è chio Antiok è me se dinte se ghel ɛbeemene ge: Lòó Feyine jia náà boyse ghɛn buu ge ɛ́ nɛyte ghɛn ka ɛysak ə Moses dinen.

²Kii nɛ̂ kine nɛɛy ghene ghe Bool me se beke nɛ lu se mbek ketaan, ɛ́ me liɛ ge Bool ghene Balnabas gese nɛ̀ ghel ɛbeemene ɛlee kok ɛ Jolesalem è yɛn ghɛ́ ntum nə Jesus nɛ̀ ghele mbiye se ghel ɛbeemene kum kenəə ten.

³Ka kenchintene tumen ghene di, ghene loò è se tosen ɛ Foenisia ghene se Samalia fekte kum ka ghel əbtume béémen kenəə ə Feyin. Sakghɛ vin nɛɛy ghel ɛbeemene se saŋle naa se ŋaŋ.

⁴Ghene ndu è chin ɛ Jolesalem, kenchintene ghel ɛbeemene, nɛ̀ ghɛ́ ntum nə Jesus ghene ghele mbiye se ghel ɛbeemene fiisen ghene. Bool ghene Balnabas fekte se ghene əbnəə əbjim wɛ Feyine nè foon kediak ghene nɛɛy.

⁵Dî ghel ɛbeemene ɛlee ghɛ ɛ́ nè luun ɛ kenone Falisee teem ɛyyio è suuy ge: Ɛ́ lu se yɛ nɛyte ghel əbtum, nɛ ghene gese lɛme tesak ə Moses.

⁶Ghɛ́ ntum nə Jesus ghene ghele mbiye me diom se kiynen kenəə kɛ́ tene.

⁷Ghene gufnen se əbtəm, Bita me loole è suuy se ghene ge: Ghone-nyii, ké ghɛn ke ge nè lu ɛ kenkɛɛte, Feyine chok mɛ ɛ ghɛne məm ge mɛ fekte sakghɛ əbjuŋ se ghel əbtume é ghene yio è beeme se Báàba.

⁸Feyin wɛ əb keen ɛytem ə wel əbjim tinse Keyioy Kelanene se ghene kɛn ka Fe nè tinsen se ghɛsen, se din ge yi lu nɛ yi fiisen ghɛne.

⁹Əb nè báà din əmndun-ndun ɛ ghɛsen nɛ̀ ghene məm ɛ jii yɛ əb nè lɛyse mbeese ghen bek ka ghene nè foon ɛytem se Jesus.

¹⁰Se lu bek ghɛ wɛ ghɛne kɛŋen se momse Feyin nɛ̀ kembuŋ kɛ ghɛne kɛŋen se kokse se ghel ɛbeemene ghine ketuu, nɛ ke nè ghakmen ghɛsen nɛ̀ ɛbaa ɛbaa ə ghɛsen se bɛɛy?

¹¹Ɛngaŋ, kɛ ghɛsen beemen se ten lu ge, lu kɛn bek njuŋ yɛ Jesus nè nɛɛyen se ghɛsen wɛ Feyine boysen ghɛsen, ghɛɛ-ghɛɛ ka əb boysen ghene.

¹²Bita suŋnen dì, ndaa ghusen è se yióté ka Bool ghene Balnabas fɛkten əbnəə əbchio əbyúméné, nɛ̀ əbkanene wɛ Feyine nè foon kediak ghene se nɛɛye əbtume məm.

¹³Ghene suŋnen è mɛyse, Jɛms suuy ge: Ghone-nyii, ghɛn yióté se mɛ.

¹⁴Simon fiɛlmen se ghɛsen ka Feyine nè kɛɛten se yɛ kwaate əbtum, è chok ghel ɛ ghene məm ge yɛ lu ghii.

¹⁵Əbnəə wɛ ghɛ́ ntum nə Feyine nè suuyen lu nɛ əb kwɛnten ghene kinee, ka ɛ́ nè nyaken ge:

¹⁶“Ɛ́ yî yɛ lu ɛ kechii kelee é mɛ kase gwiy, è bàklè ndaa ə David yɛ ɛy nè fɛyenmen. Mɛ nɛ̂y kase siyse kensake ten, è nɛɛy é ɛy yɛ lu ka ɛy nè yi luun,

¹⁷Ka ghel ɛlee me yɛ mɛyse bììte Bay, dii ghel əbtum ɛjim ghɛ mɛ choktenmen ge ghome.

¹⁸Suuy Bay wɛ əb nè nɛɛyen ghele keele əbnəə nɛ̂ vin se əbməən.”

¹⁹Mɛ me se yɛne kome ge, ghàà ghɛsen yɛ jefse ghel əbtum ghɛ ɛ́ foon ɛytem se Feyine.

²⁰Ghɛsen nyak nɛ lu ŋwaale se ghene ge ghàà ghene yɛ yiɛ əbfua-əbyíɛ́ne wɛ ɛ́ besenmen, bek ka ɛ́ chiysenmen əmnyin so, è maay nchiine kenjaŋ, è yɛ lɛke nyam yɛ ɛ́ kamen kamen è yúyte, è gese yɛ lɛk əmnduŋ.

²¹Ɛ́ nyak kɛn dì bek ge ɛ́ nè se fekte tesak ə Moses ɛ ntɛk sejim naa se nguk gese jaŋe ɛ ngayse ɛyjim sejim ɛ əbchii ɛybam əbjim.

²²Ghɛ́ ntum nə Jesus ghene chɛɛse, gese nɛ̀ kenchintene ghel ɛbeemene, me liɛ ge ɛ́ chokte ghel ɛlee ɛ kenon è baksen se Bool ghene Balnabas è tum se Antiok. Ghene nè chok Judas wɛ ɛ́ nè toŋten sɛy ge Balsabbas, è gese chok Silas. Ghel ghɛ ɛbaa ghine nè lu ghele mbiy ɛ kenchinten.

²³Ɛ́ nè tum ghene nɛ̀ ŋwaale nɛ ɛy suuy ge: Ghɛs ghɛ ghon ɛnoo ə ghɛn, ghɛ ghɛ́ ntum nə Jesuse, gese nɛ̀ chɛɛse tinse ɛychakte se ghɛn ghɛ ghel ɛbeemene ghɛ luun əbtum chii Antiok, nɛ̀ se Silia gese nɛ̀ se Silisia.

²⁴Ghɛs nè lô yio ge ghel ɛlee lu nɛ ɛ́ fəy ɛ ghɛse məm nɛ ghɛse báà tum ghene, è ndu è se foo ngɛk se ghɛn, jefse tetof ə tɛn nɛ̀ əbnəə wɛ ghene suuyen.

²⁵Ghɛse me ghal ɛydiom è liɛ ge ɛ́ chokte ghel ɛlee è baksen se ghel ɛyjɛl nə ghɛsen ghɛ Balnabas ghene Bool è tum se ghɛn.

²⁶Ghel ghɛ ɛbaa ghine lu ghel ghɛ ɛ́ nè summen ɛykuo se yɛ fɛl se Báàba ə wɛsen Jesus Christ.

²⁷Ghɛse me tum Judas ghene Silas ge ghene ndu se ghɛn è teefe naa teefen kenəə kɛ ghɛs nyaken ɛ ŋwaale.

²⁸Keyioy Kelanene nɛɛy ghɛse yɛn ge ke báà jof ge ɛ́ kokse kediile ɛ ghɛne ketuu chia ge ghɛn yɛ lɛme tesak tin tɛ te luun ɛ shii:

²⁹Ghàà wel yi yiɛ kefaa nɛ ɛ́ chiysemen əmnyin so. Ghɛn yɛ lɛk əmnduŋ. Ghɛn yɛ lɛke nyam yɛ ɛ́ kamen kamen è yuyte. Ghɛn maay nchiine kenjaŋ. Ghɛne báàmè əbnəə vin fene ghɛne nɛɛy ɛ titiy. Ɛ́ yɛ bɛɛse.

³⁰Ɛ́ nyak dì è tinse ghel ghi, ghene chio se Antiok, è baate kenchintene ghel ɛbeemene, fo ŋwaale yi se ghene.

³¹Ghene jaŋ, è se saŋle bek ntef yɛ ɛy nè luun ɛ ten.

³²Judas ghene Silas ghɛ ko nè luun sɛy ghele ntum nə Feyine me se suuye əbnəə se ɛydio, tefe ghene gese foo kediak se ghel ɛbeemene.

³³Nɛy se lu ka ghene ghe ghone-nyii nè chiin se keleŋ əbliy, ɛ́ tinse ghene ge ghene jɛl kejuŋ, ghene kase fiile se ghel ghɛ ɛ́ nè tumen ghene.

³⁴(Dî Silas liɛ ge yi gok fo.)

³⁵Bool ghene Balnabas se lu Antiok se keleŋ əbliy, ghene ghel ɛlee se ɛydio se dinte əbnəə se ghele, fekte sakghɛ ə Báàba.

³⁶Nɛy se lu ɛ keleŋ əbliy kelee Bool suuy se Balnabas ge: Ghɛsoo kase fiile se ntɛk sejim sɛ ghɛsoo nè fekten kenəə Báàba ɛ ten è yɛn ge ghel ɛbeemene sɛ nɛɛy lɛɛy-a?

³⁷Balnabas me se kɛŋe ge ɛ́ liɛ Joon wɛ ɛ́ nè toŋten ge Mak.

³⁸Bool yɛn kɛ́ wene nɛ lu ge ke báà jof ge ɛ́ liɛ wen bek ka ghene ghene nè lômen ndu è chin ɛ Bamfilia, əb fiile è jia ndu ɛ mbiy nɛ̀ ɛyfɛl yɛ ghene ghene nè fɛ́len.

³⁹Ghene lòò è me bek kenəə ki ɛ jii ɛylee yɛ ɛ́ nè lòòn è giabsen giabsen. Balnabas liɛ Mak ghene wen diaŋ se Siblus.

⁴⁰Bool chok nɛ lu Silas, ghel ɛbeemene vii ghene se Báàba keghoo ge əb yɛ toknen nɛ̀ ghene.

⁴¹Ghene me lòò è se tosen ɛ Silia nɛ̀ Silisia, lose nduu nɛ̀ əbchintene ghel ɛbeemene.