Read Oku Ɛyf 17 Bible Online

Ɛyf 17 - Oku bible

Ɛyf 17

¹Nɛy se lu ka ghene nè chianmen ɛ ntɛke Amfibolis ghene yɛ Abollonia, ghene me chin ɛ Tessalonika ghaa ngay ɛyjem nə ghele Juus ɛylee nè luun.

²Bool me ndu è lii ɛ ngay ɛyjem fo ka nchiine wen nè luun, è se lu fo se ɛywɛy ɛytal fekte əbnəə wɛ kum ŋwaale-Feyin se ghele əbchii ɛybam.

³Əb nè dinte kelaanen se ghene ɛ ŋwaale-Feyin ge ke nè lu ɛ shii ge Vi wɛ Feyine nè Yiosen yɛn ngɛk, è kuo è kase loole se ɛykuo. Jesus wɛ mɛ fekten se ghɛn kum wen lu wel nɛ̂ Vi wɛ Feyine nè Yiosen.

⁴Ghel ɛlee yio, è beeme, è chìntèn Bool ghene Silas. Ghele Glees naa se ɛydio ghɛ ɛ́ nè koksen Feyin ghene əbkiy ɛtaa chinten sɛy ghe Bool.

⁵Dî ghele Juus se ghɛke Bool ghene Silas è me baate ghondɛɛ ɛŋakene ghene ghene me lose əbchio əbtaa ɛ ntɛk. Ghene ndu è kol ndaa ə Jason ge ɛ́ kɛŋe Bool ghene Silas ge ɛ́ ndu è fo se ghele.

⁶Nɛy se lu ka ghene kɛŋen ghene è jia yɛn, ɛ leghɛ è me se gufe Jason ghene ghone-nyii ɛlee nduu so se ghɛ ɛ́ saken ɛ ntɛk fo, waame suuye ge: Ghel ghine losemen əbchio əblik əbjim, se lu nɛ ghene shi ɛ ghɛsene ntɛk ɛ leenen,

⁷Jasone fiisen ghene, è lɛm se wene ndaa. Ghene se kole nchilse Saesal suuy ge: Əbfon əblee lu nɛ ɛ́ toŋte ge Jesus.

⁸Ghele ghɛ́ ntɛke gese nɛ̀ ghɛ ɛ́ saken yio kii nɛ̂ kine, ke fó ngɛk se ghene.

⁹Ghene kan Jason ghene ghone-nyii ghii tio njio ɛ́ me vəse ghene.

¹⁰Əbtəke jiɛ ɛ leghɛ, ghone-nyii tinse Bool ghene Silas se Belea. Ghene ndu è chin, è me lii ɛ ngay ɛyjem nə ghele Juus ghɛ fóò.

¹¹Ghele Juus ghɛ́ Belea nè ki ɛykwaate ɛyjuŋe chia ghele ghɛ́ Tessalonika. Ghene nè lô se yióté nɛ̀ ɛyteme kenəə kɛ Bool ghene Silas nè fekten, gese kakse ɛ ŋwaale-Feyin kechii kejim ge ə́b kò lu ɛ titiy-a.

¹²Ghele nè lô fo ɛytem se Jesus fo se ɛydio, naa nɛ əbkiye Glees ɛtaa se ɛydio gese nɛ̀ ɛluumene Glees sɛy.

¹³Ghele Juus ghɛ ɛ́ nè luun ɛ Tessalonika nɛy yio ge Bool se fekte kenəə ə Feyin ɛ Belea, è me too fo, è bɛyse ghel ɛ́ se lose əbchio.

¹⁴Ghone-nyii me tinse Bool kaŋ ɛymok è ndu è chin ɛ əbghune jio ɛyghuy, Silas ghene Timoti gok nɛ lu ɛ Belea.

¹⁵Ghene ghe Bool diaŋ è chin naa ɛ Atens. Ghel ghii loo fiile se Belea, Bool me suuy ge ghene ndu è teefe se Silas ghene Timoti ge ghene gwiy è baksen yi chikiy chikiy.

¹⁶Nɛy se lu ka Bool nè chiyten Silas ghene Timoti ɛ Atens ɛytem ə wene se foo ngɛk se wen naa se ŋaŋ bek ge əb nè lô yɛn nɛ ntɛke ten lu kɛn lɛ əmnyin əmnyin.

¹⁷Əb nɛy me se nduu ɛ ngay ɛyjem nə ghele Juuse suŋnen se ghene gese nɛ̀ se ghele Glees ghɛ ɛ́ nè kokse Feyin fo. Əb nè lóó əb ndu sɛy ɛ əblik əbwɛy əbchii əbjim è yɛ suŋnen se ghel ghɛ ɛ́ luun fo.

¹⁸Ndinte sɛ́ kenon Ebikulean gese nɛ̀ sɛ́ kenone Stoik ko se beke mbek ghene ghene.[5] Ghene ɛlee bif ge: Fenkum əbchio fine kɛŋe se suuy ge ghɛ? Ɛlee fise ge: Ke fuosen di ka əb fekte kum əmnyine mɛ̂ əbtum. Ghene nè suuy dì bek ge Bool nè fekte kenəə kɛ kum Jesus gese fekte kum ka ghele náà yɛ loolè se ɛykuo.

¹⁹Ghene me liɛ Bool, ghene ghene ndu ɛ ndaa ɛydiome yɛ̂ ntɛk fo yɛ ɛ́ nè toŋten ge Aleobagus è suuy ge: Ghɛse kɛŋe se keele kum ɛyyíɛ́ke ə yiɛ ɛyfɛɛ yine.

²⁰Wɛ̀ suuy əbnəə nɛ ghɛs nè bɛɛy ghàà yi yio, ghɛs se kɛŋe ge wɛ̀ banse əbtuu ə wɛs kum əbnəə nɛ̂ vin ɛ leenen.

²¹Ghene nè bife di bek ge ghene ghɛ ghele Atens gese nɛ̀ ghel ghɛ ɛ́ nè gwiyen è se chii fo nè lóó ɛ́ yɛ chiase əbliy kɛn nɛ̀ əbnəə əbfɛɛ wɛ yɛ fiɛl gese yiote əbnəə wɛ ghele fiɛlen.

²²Bool me loole è teem ɛ fetetene Aleobagus ɛyshiɛ nə ghɛ ɛ́ saken ghii è suuy ge: Ghele Atens, mɛ yɛnmen ge ghɛne kokse əmnyin naa se ŋaŋ.

²³Mɛ suuy lɛ bek ge, mɛ nè kaale ɛ ntɛk fɛn, è yɛn əblik ɛykokse nə ghɛn. Mɛ nè lô yɛn naa ketatan kelee nɛ ɛ́ nyak ɛ ten ge: Kine lu kɛ Feyin fɛ ghɛse báà se ke. Fɛ ghɛne koksen, dî ke wiy, lu fe ghene fɛ mɛ fekten se ghɛn.

²⁴Feyin Fɛ Fe nè bomen mbi nɛ̀ əbfua wɛ əb luun ɛ ten əbjim, lu Bay ɛyyio ghene ntiɛ nɛ əb chii wiy ɛ ndaa sɛ baklen ghel,

²⁵nɛ əb kiye wiy ge wel fɛl se yi di-a ka əb shii kefaa ghɛy bek ge wen se wene ngeŋ nɛɛye nɛ ghele chii gese yioye nɛ əb gese foo əbfua əbjim se ghele.

²⁶Əb nè kɛɛte bom wel əbmok, tekfəə ghel tejim me fəy ɛ wele ten əbghun, è se chii ketuu ntiɛ kejim. Əb nè ghane ge yi bom dî nɛ əb siysemen əbliy wɛ naa ndɛ yî chii ɛ ten gese nɛ̀ əblike wɛ naa ɛykfəə ɛykɛ yî chii ɛ ten.

²⁷Feyine nè siyse əbfua əbjim dì, ka lòó ə́b yɛ́ kɛŋe wen, ge sɛ lòó ə́b yɛn-a? Dî nɛ əb chèmè wiy nɛ̀ əbtəme se ghɛsen.

²⁸Lu ghɛɛ-ghɛɛ ka wel əblee nè suuyen ge: “Nɛɛye Feyin nɛ ghɛsen geese yɛ chii, jɛle gese lu ka ɛ́ luun lɛ.” Ko lu sɛy ka ghele nyof nə ghɛn ɛlee nè yofen ge: “Ghɛsen lu kɛn naa ghon ə wen.”

²⁹Ke me se lu ge ka ghɛsen luun ghon ə Feyin, ghàà ghɛsen yɛ kwaate ge əb lu kefaa kelee kɛ ɛ́ fɛ́len fɛ́len nɛ̀ ɛghoo, ɛ ɛytian, kene ɛ kekas, kene ɛytiy.

³⁰Nè lu se əbməən, nɛ Feyine liɛ ge yi jia yɛ lii se əbnəə wɛ ghele nɛɛyen ke wiy, se lu ɛ leenen nɛ əb suuymen se ghel ɛjim ɛ əblik əbjim ge ghene kubsen tetem ə ghen.

³¹Ke lu dî bek ge əb nè lɛmmen kechii kɛ əb yî sak ghel ɛjim ghɛ ɛ́ luun ɛ ketuu ntiɛ ɛ ten ɛ jii yɛ̂ titiy. Əb nè chokmen wel wɛ ə́b nɛ̂y yɛ tenene nsakse. Əb nè dinmen se wel əbjim ge lu ŋwɛl bek ge əb nè losemen wele ten se ɛykuo.

³²Ghene yio ka Bool suuyen ge ɛ́ nè losemen wel əblee se ɛykuo, è me se buu wen buun, nɛ ghel ɛlee suuy kɛ ghene ge: Ghɛse kɛŋe ge wɛ̀ gese suŋnen kum kii nɛ̂ kine.

³³Bool me fəy se ghene məm.

³⁴Ghel ɛlee chinten wen è fo ɛytem se Jesus. Ghel ɛlee ghɛ ɛ́ nè chinten wen lu ghine ge: Dionisius wɛ nè luun wele ndaa nsak yɛ Aleobagus əblee, gese nɛ̀ əbvii əblee nɛ ɛyghele lu ge Damalis gese nɛ̀ ghel ɛlee se ɛydio.