Read Oku Ɛyf 18 Bible Online

Ɛyf 18 - Oku bible

Ɛyf 18

¹Kii nɛ̂ kine chia, Bool loo se Atens è ndu ɛ Kolɛn.

²Əb ndu dì è yɛn wele Juus əblee nɛ̀ ɛyghele wene lu ge Akwuila, wel ɛylake Bontus. Ghene wiy ə wene Blisilla nè bɛɛy kɛn ka ɛ́ lòòn ɛ Itali è gwiy. Bek ge əbfon ə Lûm wɛ Klaudius nè chiasemen ɛysak ge ghele Juuse lòò se Lûm. Bool nɛy me shik ɛyghan se ghene.

³Əb shik dì, è me se chii ghene ghene, fɛle bek ka ghene nè tasen sɛy ndəy sɛ ɛ́ tamen əmntaa so, kɛn ka Bool.

⁴Nè loo lu ɛ kechii ɛybam kejim, əb ndu ɛ ngay ɛyjim, ghene ghele Juus gese nɛ̀ ghele Glees yɛ suŋnen kum kenəə ə Feyin nɛ əb nate ge ghene keele kenəə kɛ kum Jesus Christ kejim.

⁵Naa se lu əbliy wɛ Silas ghene Timoti nè lòòn se Masedonia è gwiy, Bool me se fekte kenəə ə Feyin əbliy əbjim, loote dine se ghele Juus ge Jesus lu Vi wɛ Feyine nè Yiosen.

⁶Ghene me tun ge ɛ́ jia bo yɛ yióté kenəə kɛ Bool nè suuy è gese se tɛyle wen. Bool me tɛte kebvəl se wen ə ndəyse è suuy se ghene ge: Ghɛn lɛy fene lu nsake yɛn. Mɛ báà se ki kenəə se ten. Se kɛ̀ɛ̀tè leenen mɛ yɛ ndu nɛ lu se ghel əbtume.

⁷Əb me lòò è ndu, è se chii ghene wele ketum nɛ ɛyghel ə wene lu ge Taytius Justus. Əb nè lu wel kokse Feyin, nɛ ndaa ə wen baksen se ngay ɛyjem.

⁸Klisbus wɛ nè luun wele mbiy se ngay ɛyjem ghene ɛyshaa ndaa nə wene fó ɛytem se Báàba. Ghele Kolɛne se ɛydio yio kenəə kɛ Bool nè suuyen è fo ɛytem se Feyine, ɛ́ fó moo se ghene.

⁹Kuumese koo Bool nɛ ntəke əblee ge yɛn ka Báàba suuyen se yi ge: Ghàà yɛ fan, yɛɛ fekte kenəə ə kom. Ghàà náà buu se yɛ fekte.

¹⁰Mɛ lu ghɛsoo, nɛ̀ lòó wel jia nɛɛy kenəə kebee se wɛ̀. Ghel ə ghome lu ɛ ntɛk fɛn se ɛydio.

¹¹Bool me se chii gho se nguk nɛ̀ njoŋ ntuufe, dinte kenəə ə Feyin se ghele.

¹²Nɛy se lu əbliy wɛ ɛ́ nè lɛmen Gallio ge Goveno wɛ̂ Akaia, ghele Juus me baate è koo Bool è liɛ, è ndu so se ndaa nsak,

¹³è se toye ge: Wel vine bense ghel ge ɛ́ yɛ kokse Feyin ɛ jii yɛ ɛysake báà beeme.

¹⁴Bool loo ge yi suŋnen, Gallio sɛ́y me suuy se ghele Juus ghii ge: Ghele Juus, ghɛn kè boy se yɛ suuy ge wel vin nɛɛy kenəə kebee kene ge əb kol nchil əbghoŋ, fene mɛ kè lô ghusen è yiote se ghɛn.

¹⁵Dî ka luun mbek kum giɛse nɛ̀ teghele gese nɛ̀ tesak tɛ ghɛne lɛmen, fene kó keele ghɛn ka ghɛne nɛ̂y siyse, lòó mɛ jia lii se ɛynkii əbnəə lɛ.

¹⁶Əb suŋnen dì, è me suuy ɛ́ jum ghene se ndaa nsak jumen.

¹⁷Ɛ́ me faŋ Sostenes wɛ wele mbiy se ngay ɛyjem ɛ əbchio ndaa nsak fɛy è tɛl. Kii nɛ̂ kii nè báà kum Gallio se kan.

¹⁸Ke gan dì, Bool chii ɛ Kolɛn se keleŋ əbliy, è nɛy lòò è vəse ghone-nyii, ghene ghe Blisilla nɛ̀ Akwuila è me diaŋten è ndu ɛ Silia. Ghene lòò è diaŋ è chin ɛ Senkleae, ɛ́ kwaa ketuu Bool fo bek ɛykak yɛ əb nè kakenmen se Feyine.

¹⁹Ghene nɛy chin ɛ Ɛfesos, Bool ghene Blisilla nɛ̀ Akwuila me giabsen. Bool lòò è lii ɛ ngay ɛyjem è se beke mbek ghene ghele Juus.

²⁰Ghene me se beŋte wen ge əb ko chiite ghene ghene se əbtəm, əb jia beeme,

²¹è sɛ́y loo lòò è suuy se ghene ge: Mɛ nɛ̂y fiile ɛ lefɛ Feyine koŋen. Əb suuy dì, è me lii kenək è lòò se Ɛfesos se nduu.

²²Əb diaŋ è chin ɛ Saesalea, è kok se Jolesalem è chakte kenchintene ghel ɛbeemene kɛ́ foo è me ndu se Antiok.

²³Ka əb nduun dî è chii fo se feleeŋese əbliy, è me lòò è se jɛle ntaam Galashia nɛ̀ Fligia, lumse tetem ə ghel ɛbeemene.

²⁴Wele Juus əblee naa me gwiy ɛ Ɛfesos nɛ ɛ́ toŋte ge Abollos nɛ ɛ́ nè bii wen ɛ Alesandlia. Əb nè lu wel loote ke se suŋnen, gese ke kenəə ə Feyin naa kejuŋ.

²⁵Ɛ́ nè lootemen dinte jii yɛ kum Báàba se wen. Əb se loote suŋnene naa shii fekte əbnəə wɛ kum Jesus se ghele. Dî nɛ əb nè ke kɛn kenəə moo nɛ lu mɛ Joon nè fóon.

²⁶Əb me kɛɛte se yɛ suŋnen ɛ ngay ɛyjem fane wiy ghɛy, Blisilla ghene Akwuila yio jii yɛ əb suŋnen ɛ ten, è me jaŋ wen ɛ ghene ndaa, è me nɛyte din jii yɛ kum Feyin se wen.

²⁷Əb nɛy loo lu se ndu ɛ Akaia, ghone-nyii me lumse ɛytem ə wen è nyak ŋwaale se ghone-nyii ghɛ́ Akaia ge ghene nɛ̂y fiisen wen. Əb nɛy ndu è chin, è se giamten ghel ghɛ Feyine nè chammenmen è nɛɛy ghene fó ɛytem se Jesus.

²⁸Əb nè lô se beke mbek ketaan ghene ghele Juuse kɛn ɛ dɛɛne, dine se ghene ɛ ŋwaale-Feyin ge Jesus lu Vi wɛ Feyine nè Yiosen.