Read Oku Ɛyf 19 Bible Online

Ɛyf 19 - Oku bible

Ɛyf 19

¹Nɛy se lu ka Abollos nè luun ɛ Kolɛn, Bool lòò è chia jii məm ɛylake Asia è me ndu è chin ɛ Ɛfesos. Əb nè lô yɛn ghel ɛbeemene ɛlee fo,

²è bif se ghene ge: Keyioy Kelanene lɛ nè lô gwiy se ghɛn ɛ əbliy wɛ ghɛn nè foon ɛytem se Feyin-a? Ghene fise ge: Ɛngaŋ, ghɛs nè bɛɛy ghàà yi yio ge kelee lu Keyioy Kelanene.

³Bool bif ge: Ɛ́ fo moo se ghɛn ɛ shii ə ghɛ? Ghene fise ge: Ɛ́ fo moo se ghɛs bek kenəə kɛ Joon nè fekten.

⁴Bool me suuy ge: Joon nè foo moo se ghele se din ge ghene kubsenmen tetem ə ghen. Əb ko nè lô se suuy se ghele Islaele ge ghene fó ɛytem se wel vi wɛ əb nɛ̂y gwiy ɛ yi ɛybam. Wele ten lu Jesus.

⁵Ghel ghii yio kii nɛ̂ kine, è fii moo ɛyghel nə Báàba Jesus.

⁶Bool nɛy lɛm ɛghoo ɛ ghene əbtuu, Keyioy Kelanene gwiy se ghene, ghene se suŋnen telam ndun ndun gese teefe əbnəə wɛ Feyine suuyen se ghene.

⁷Ghel ghin ɛjim nè lu ka njio-sebaa ɛyvəm.

⁸Se lu se njoŋ setal, nɛ Bool nduu se ngay ɛyjem yɛ́ fó suŋnene se ghele fane wiy, beke mbek ghene ghene gese dinte se ghene ka ɛysake Feyine luun.

⁹Ghel ɛlee se yio tôŋè tôŋè è jia beeme, è sɛ́y se suuye əbnəə kum kenəə ə Feyin. Əb me lòò se fo, è liɛ ghel ɛbeemene ghene ghene ndu se ndaa ŋwaale nə Tilannus bene fɛ ghene ghele nè kfənten mbek kechii kejim.

¹⁰Kii nɛ̂ kine liɛ kelik se nguk sebaa, ghel ɛjim ghɛ ɛ́ nè chiin ɛ Asia, ghele Juus gese nɛ̀ ghel əbtume naa ɛjim yio kenəə kɛ kum Báàba.

¹¹Feyine nè lô nɛɛy Bool se nɛɛy əbnəə əbchio əbyúméné wɛ ndun.

¹²Ɛ́ nè liɛ naa kensase ndəyse kene ndəyse ɛyfɛl ɛ wen əbghun, è kum wel əbyafen so, əb me bonen. Ɛ́ liɛ dì ɛ́ ko me jum ɛyfim so.

¹³Ghele Juus ɛlee nè lu fo, ge ɛ́ ghane jume əbyioy əbbee. È loo jum di è me se toŋte ɛyghel ə Báàba Jesus suuye ge: Mɛ jume ghɛn ɛ əbtaawe ɛyghel nə Jesus wɛ Bool fekten kum wen.

¹⁴Ghel ghɛ ɛ́ nè nɛɛyen kenəə kin nè lu ɛluumen saamba, nɛ lu ghon ə Skeva wɛ wele Juus, nɛ lu wele mbiy se ghɛ́ ntaŋlee.

¹⁵Ghene suuy dì, keyioy kebee ki suuy ge: Mɛ ke Jesus gese ke wel wɛ luun Bool, ghɛn se lu kɛne ghe ndɛ?

¹⁶Wel wɛ əb nè kiin ɛyfim yi me lonen ɛ ghene əbghun è lɛmse ghene, è sayte ndəyse ghen, ghene nyiŋke è fəy se ndaa fo, tesas teyum nɛ̀ əblɛɛme se əbghun.

¹⁷Ghele Juus nɛ̀ ghel əbtum ghɛ ɛ́ nè chiin ɛ Ɛfesos yio kenəə ten è se fane, è me se vəme ɛyghele Báàba Jesus naa se ŋaŋ.

¹⁸Ghel se ɛydio ghɛ ɛ́ nè foon ɛytem se Jesus me se gwiye taŋle ɛychio ə ghen ɛ dɛɛne se əbnəə wɛ ghene nè momlen.

¹⁹Ghel se ɛydio ɛ məme ghel ghɛ ɛ́ nè nəəsen guose gwiy nɛ̀ ŋwaalese guose nə ghene se kelik kemok, è nyok ɛ ghele ɛyshiɛ, ɛ́ bekte əbkaa wɛ ɛ́ nè yunen guo nɛ̂ shin so əb se lu əbbuam əmmtan.

²⁰Kenəə ə Feyine me se saankene, bense teteme ghel ɛ əblik se ɛydio naa se ŋaŋ.

²¹Əbnəə vine chia ɛ leghɛ, Bool liɛ ɛ wen ɛytem ge yi tosen jii Masedonia nɛ̀ Akaia è me ndu se Jolesalem. Əb liɛ dì, è suuy ge: Mɛ nɛ̂y ndu è chin fo è ko yɛ lu se ndu se chin sɛy ɛ Lûm.

²²Əb me tinse Timoti ghene Elastus, nɛ lu se ghel ɛlee ghɛ ghene ghene nè fɛ́len, ghene lòò è ndu ɛ Masedonia. Əb me gese chiite ɛ Asia se keleŋ əbliy.

²³Ko se lu ɛ keleŋ əbliy fo əbchio loole naa ɛ jii ɛytaa Ɛfesos bek kenəə kɛ kum Báàba naa ɛ jii ɛytaa.

²⁴Ba-kelam əblee nè lu fo nɛ ɛ́ toŋte ge Demetlius, təye əbnfeksene ndaa ə feyin fɛ Altemis, nɛ ɛyfɛle tene loote foo sɛk se ghene ghel ɛyfɛl nə wene naa kejuŋ.

²⁵Əb naa me tooy ghel ɛyfɛl nə wen gese nɛ̀ ghel ghɛ ɛ́ nè fɛ́len ɛynkii ɛyfɛl nɛ̂ yi è suuy se ghene ge: Ghele ghome, ke ghɛn ke ge əbghaake ə wɛsene lòò nɛ lu ɛyfɛl ghan.

²⁶Ghɛn ko yɛne gese yio ka biɛ vin wɛ Bool bensenmen tetof ə ghel se ɛydio. Əb báà bense kɛn ɛ Ɛfesos fɛn, əb bensenmen ɛ ɛylake Asia ɛyjim suuye ge: Əbfeksene əmnyin wɛ ghele fɛlen báà se lu əmnyin ghɛy.

²⁷Ɛyfane me se lu ge báà se lu kɛn ɛyfɛl ə yɛ́sen yin yɛ lòó ɛy bef, ghele jia bo nɛ̂y yɛ yɛn ge ndaa-ɛykokse nɛ̀ Feyin fe taa fɛ Altemis bo bɛɛy kenəə. Ke gan di, fene ɛ́ choksenmen Feyin nɛ̂ fin fɛ ghele Asia nɛ̀ mbi ɛyjime koksen.

²⁸Ghene yio dì ɛ leghɛ, ke tɛn ghene, ghene me se zəəme ge: Altemis wɛ̂ Ɛfesos lu feyin fengaŋtene.

²⁹Ghene me zəəme kal nɛ kenəə tene ntɛk ɛyjim è me lòò kɛn se kenon è ndu ghal Gaius ghene Alistalkus è guf è ndu nɛ̀ ghene se ngay ɛyghuy yɛ̂ ntɛk fo. Gaius ghene Alistalkus nè lu ghele Masedonia jɛle ghene ghe Bool.

³⁰Bool se kɛŋe ge yi ndu è suŋnen se ghele tene, ghel ɛbeemene jia vəse ge əb ndu.

³¹Əbtuu wɛ́ ngvən Asia fo əblee wɛ nè luun sunse Bool tinse ntum se wen ge, əb yɛ ke se tome kevəə ə wen ɛ ngay fo.

³²Ɛ́ se lu fo nɛ ghele zəəme suuy əbnəə ndun ndun bek ge ndio ghele nè báà se ke kenəə kɛ ɛ́ nè luun fo bek keghene.

³³Ghel ɛlee yɛn ka ghele Juus tinten Alesanda se mbiy, è me se kwaate ge əb ke se kenəə kɛ ke ganen. Əb chil ghel è se kɛŋe se suuy ge keghoo ghele Juus wiy ɛ kenəə ten.

³⁴Ghene nɛy keele ge əb lu wele Juus, è me se zəəme kɛn zəəme ketaan ketaan naa se chuy sebaa suuy kɛn kenəə kemok ge: Altemis wɛ̂ Ɛfesos lu Feyin fetaa.

³⁵Wel əbnyakene wɛ́ ntɛk fo nɛy lòò è chil ghel ghi è suuy se ghene ge: Ghele Ɛfesose, wel lɛ lu wɛ əb maanen ge ki ntɛke Ɛfesos yin ndaa-ɛykokse feyin fɛ Altemis gese nɛ̀ ɛytiy ɛylanene yɛ ɛy nè fɛyen ɛ ɛyyio-a?

³⁶Ka ghɛn keen ge lòó wel jia tunse kii nɛ̂ kine, ghɛn yɛ lu nyiaŋ, è jia yɛ nɛɛy əbnəə se nchɛk

³⁷Ghɛn gwiy nɛ̀ ghel ghine fɛn nɛ ghene báà choŋ kefaa ɛ ndaase əmnyin, è jia tɛy feyin ə fɛsen.

³⁸Kè loo lu nɛ Demetlius ghene ghɛ́ kelame ki kenəə se toye wel so, fene əbchio ndaa nsake lu əbyii əbchii əbjim, nɛ ɛsakene lu fo sake nsakse. Kè lòó ghene ndu fo è sak kenəə ten.

³⁹Yɛ lu ge kenəə kelee lu chia kinee, fene ɛ́ nɛ̂y kiynen ɛ kechii kɛ ɛ́ sɛɛ ghal ɛydiome yɛ́ ntɛk ɛ ten.

⁴⁰Mɛ suuy lɛ bek ge mɛ fane ge tam ɛ́ nɛ̂y gham ghɛsen se əbchio fɛn lan, nɛ ke gan dì, é wel jia yɛ ki kenəə se suuy.

⁴¹Əb suŋnen dì è me lam ge ghele takle.