Read Oku Ɛyf 2 Bible Online

Ɛyf 2 - Oku bible

Ɛyf 2

¹Kechii Bentekost[1] nɛy me kwɛn, nɛ ghele ngoo nə Jesuse chinten kelik kemok.

²Ghene sasen è yio ka kefaa səəken ɛ ɛyyio dəkse əblik, də̀mè ka əbfiɛf əbtaa, kefaa ki me lii è lun se ndaa yɛ ghene nè luun ɛ ten.

³Ghene loo kiy, è yɛn kefaa nɛ ke fuosen əbleeme əbvəs. Kefaa nɛ̂ kine giabsen, è kum ghene naa ghel ɛjim.

⁴Ka ke kumen dì ɛ leghɛ Keyioy Kelanene me lii è lun se ghene tetem, è fo əbtaawe se ghene, ghene me se suuye əbnəə telam tɛ ghene nè báà yi se suŋnene.

⁵Nè lu əbliy fo nɛ ghele Juus ghɛ ɛ́ nè loote koksen Feyine, chii ɛ Jolesalem. Ghene nè lòò naa əbtum əbjim ɛ ketuu ntiɛ fɛn.

⁶Se lu ka ghene nè yion ka kefaa kii buun, ghene me kaame ɛ ghele Jesus ghii ɛybee. Kenəə tene jefse ɛytof ə ghen bek ka ghene nè yion nɛ ghel ghii suuye əbnəə ɛ ghene telam.

⁷Əbchio yum ghene, wel se benle bife se wel ge: Ghel ghin ghɛ ɛ́ suŋnen lɛ, lɛ báà lòò ɛ Galilee-a?

⁸Ke gan lɛɛy ge ghɛsen yɛ yio nɛ ghene suŋnen əbnəə ɛ ghɛsen telam ɛylak?

⁹Ghɛsen ɛlee lòò ɛ Baltia, ɛlee lòò ɛ Media, gese nɛ̀ Elam. Ghel ɛlee gese lòò ɛ Mesobotamia, Judea gese nɛ̀ Kabadosia, ɛlee lòò ɛ Bontus gese nɛ̀ Asia.

¹⁰Ghel ɛlee ko gese lòò ɛ Fligia, Bamfilia gese nɛ̀ Ejibt, gese nɛ̀ se ɛybee Libia yɛ ɛy báksen se Silen, ghɛsen ɛlee lòò ɛ Lûm nɛ̀ lu ghele Juus, è gwiy ghan, nɛ̀ ɛlee ghɛ ɛ́ nè benle benlen se ghele Juus.

¹¹Ghɛsen ɛlee lòò ɛ Klete, ɛlee lòò Alabia, dî ghɛsen se yio ɛ ghɛsen telam ka ghel ghine suuyen əbnəə əbtaa wɛ Feyine nɛɛyen.

¹²Ka əbchio yumen ghene dî, ke gese jefse ɛytof ə ghen naa se ŋaŋ, wel se benle bife se wel ge, kine dine ge ghɛ?

¹³Ghel ɛlee sɛy se wɛyse wɛysen suuye ge: Ghene nəəmen əmnduk əm koo.

¹⁴Ghe Bita ghɛ ghɛ́ ntum nə Jesus ghɛ njio-sebaa ɛyvəm me lòòlè, Bita kɛɛte se suŋnen se kenone ghel kii ɛ giɛ ɛytaa ge: Ghele Judea, nɛ̀ ghɛn ghɛ ɛ́ chiin ɛ Jolesalem, ghɛn fó əbtuule ə wɛn san, é mɛ fekte ge kenəə kin kɛ ke ganen sɛ dine ge ghɛ-a?

¹⁵Əmndukme báà koo ghel ghin ka ghɛne kwaaten dî. Leenen bo bɛɛy kɛn chuy buumok bvəse bvəse.

¹⁶Ɛngaŋ, kenəə kin kɛ ke ganen ɛ leenen lu kenəə kɛ Joel wɛ wele ntum nə Feyine nè suuyen ge:

¹⁷“Feyine suuy ge, Ɛ́ nɛ̂y loo lu əmchii mɛ̂ kenləysen é mɛ giate Keyioy ə kom se wel əbjim é ghone ghɛne ɛluumene, nɛ̀ ɛkiye yɛ yio əbnəə se mɛ fektee. Mɛ nɛ̂y nɛɛy é kuumese yɛ koo wak nɛ ghene yɛne əbnəə ə wom, è gese nɛɛy é chɛɛse yɛ yɛne kɛ́ ghene nɛ lu ɛ jɛmse.

¹⁸Ɛ́ nɛ̂y yɛ lu əmchii fo, é mɛ fó Keyioy ə kom naa se ghel ɛyfɛl nə mɛ ɛluumene nɛ̀ ɛkiye, é ghene yɛ teefe ntum ə yom.

¹⁹Mɛ nɛ̂y din əbchio əbyúméné ɛyyio, è din əbchəyte ɛ ntiɛ. Ɛ́ yî yɛn əmnduŋ nɛ̀ əbvəse gese nɛ felike əbkiŋ-əbkiŋ.

²⁰Chuye yî liime, é əblike fin, é njoŋ benle è yɛ baŋ ka əmnduŋ, nɛ̀ kechii kɛ Baye gwiyen geese kwɛn kɛ luun kechii kekanene gese nɛ̀ keghakene.

²¹Nɛ ke lu ge naa ndɛ wɛ əb lonen se Bay lu nɛ əb yî yɛ ki ɛyboy.”

²²Bita me gese se suuye nduu ɛ mbiy ge: Ghele Islaele, ghɛn gese yiote: Jesuse wɛ̂ Nazalet nè lu wel wɛ Feyine nè dinen se ghɛn kelaanen ge tum yi wen. Ghɛn ke kɛn naa di bek ka Feyine foon əbtaawe se wen ge əb yɛ nɛɛy əbnəə əbtaa, nɛ̀ wɛ́ əbchio əbyúméné, gese nɛ̀ əbchəyte ɛ ghɛne məm.

²³Jesus nɛ̂ vin wɛ ɛ́ nè viin se ghɛne keghoo lu nɛ Feyine siysemen ka əb kɛŋen è se ke ge ghɛy ka ke yî gan. Lu wen wɛ ghɛn nè yuyen ka ghɛn nè foon se ghele mbee ɛ́ bante.

²⁴Feyine lose wen se ɛykuo, è boyse wen se ngɛk ɛykuo, bek ka ɛykuo nè báà se ki kediak se ghale wen ɛ ɛysɛy.

²⁵Ke lu dî nɛ əbfon wɛ David nè lô suŋnen kum kenəə Jesus kin ge: “Mɛ nè yɛn Bay Feyin, nɛ əb lu ghɛse wen əbliy əbjim, tiy ghɛse wen, ka lòó kefaa jia shik mɛ.

²⁶Mɛ me se ki ɛysaŋle ɛ mɛ ɛytem, yeme njàŋse chɛklee, naa nɛ əbghun ə wome yɛ chii, chiyte nkakma ə yiɛ, dî nɛ mɛ chiyte kɛn nkakma ə yiɛ.

²⁷Bek ge wɛ̀ wɛ Feyine jia nɛ̂y vəse keyioy ə kom ɛ ɛylak nə nkfəsayse, è jia vəse ge ɛygvən ə wel ɛyfɛl nə wɛ̀ əbjuŋ foy ɛ ɛysɛy.

²⁸Wɛ̀ lu nɛ wɛ̀ din jii yɛ lòó mɛ chia ɛ ten se geese boy. Ɛysaŋle nɛ̂y lun ɛ mɛ ɛytem, bek ge mɛ nɛ̂y yɛ lu ghɛsoo.”

²⁹Bita me gese suuy ge: Ghone-nyii, lòó mɛ yɛ suuy se ghɛn, maanen wiy maanen ge əbfon wɛ David wɛ nè luun ba ɛykfəə nə ghɛsen nè lô kuo, ɛ́ gvəəme wen, se lu nɛ ɛysɛy ə wene bo bɛɛy fɛn se kok se chin se lan.

³⁰David nɛ̂ vin nè lu wele ntum nə Feyine. Əb nè lô se ke nkakma yɛ Feyine nè kaken, è lek ge yi nɛ̂y nɛɛy é wel ɛykfəə nə wen əblee yɛ lu ka əbfon kɛn ka wen wɛ David nè luun.

³¹David me yaŋse yɛn kenəə kɛ ke nè nɛ̂y se gan, è me suŋnen kum ɛyloole yɛ Vi wɛ Feyine nè Yiosene nɛ̂y loole se ɛykuo ge: “Feyine jia yî vəse wen ɛ ɛylak nə nkfəsayse, ɛygvən ə wene jia yî foy ɛ ɛysɛy.”

³²Feyine nè lô lose Jesus nɛ̂ vin se ɛykuo, nɛ̀ ghɛs ɛjim lu ghel ɛyshiɛ se kenəə nɛ̂ fɛn.

³³Feyine nè lô gese kokse wen è lɛm ɛ wen ɛybee əbkoy əbtaa, è fo Keyioy Kelanene se wen ka əb nè kaken. Nɛ̀ əbnəə vin wɛ ghɛne yɛnen gese yio ɛ leenen lu bek Keyioy Kelanene kɛ Jesus nè giaten se ghel ə wene.

³⁴Nè báà kok David se ɛyyio nɛ̀ əbghun ə wene, dî nɛ əb nè suuy ge: Bay Feyin nè suuy se Báàba ə wom ge: “Diom fɛn ɛ mɛ əbkoy əbtaa,

³⁵è yɛ chiyte əbliy wɛ mɛ nɛ̂y nɛɛy é mbanen ə shiɛ yɛ lu ka əbgokten wɛ wɛ̀ yɛ tom ɛvəə ghiɛ ɛ ten.”

³⁶Bita se ləysen suuy ge: Ghɛn ghɛ ghele Islael ɛjim, ghɛn yɛ ke se əbluuy ge Jesus vin wɛ ghɛn nè banten lu wen wɛ Feyine nè ghalen ge Báàba, nɛ lu Vi wɛ Feyine nè Yiosen.

³⁷Ghel ghii yio əbnəə vi ɛghume kuo se ghene ɛyshas, ghene bif se Bita ghene kembɛke ghɛ́ ntum nə Jesus kɛ njio ɛymok ɛyvəm ge: Ghone-nyii, lòó ghɛs nɛɛy ghɛ ɛ leenen?

³⁸Bita fise ge: Ghɛn kubsen tetem ə tɛn naa ghel ɛjim, è fii moo ka ghel ghɛ ɛ́ beemenmen Jesus wɛ Mboyse, ka Feyine lɛyse mbee ə sɛn, è gese fo Keyioy Kelanene se ghɛn.

³⁹Feyine nè lɛm ɛykak yin se ghɛne ghone ghɛne, è gese kak sɛy əbtum wɛ əb luun ɛ əbtəm. Nkakma yin lu se ghel ɛjime ghɛ Feyine jaŋen ge ɛ́ gwiy se yi.

⁴⁰Bita me gese se suuye əbnəə əblee naa se ɛydio, tefe ghene ge: Ghɛn fəyse ngeŋ sɛn se ngɛk sɛ Feyine nɛ̂y mak se ghele ghɛ́ ntem fɛne ghɛ ɛ́ befen lɛ.

⁴¹Ghele yio ntef ə Bita yi, ndione bééme, è kubsen tetem ə ghen, ɛ́ fó moo se ghene. Se lu kɛn ɛ kechii fo ghel ka nkam setal chinten kenon ə ghon-ɛyfɛl nə Jesus.

⁴²Ghene fó ngeŋse ghen kɛn se əbnəə wɛ ghɛ́ ntum nə Jesus nè dinten, è me se jɛle kevəə kemok, yiɛ gese jeme kɛn se kefaa kemok.

⁴³Ghɛ́ ntum nə Jesus ghɛ njio-sebaa ɛyvəm ghii me se nɛɛye əbnəə əbkanene gese nɛ̀ əbnəə wɛ əb nè dinen əbtaawe Feyin. Ghele se yɛne kante kum ɛyfɛl ə Feyin.

⁴⁴Ghele beemene ɛjim me se jɛle kevəə kemok, nɛɛy əbnəə ghen se keghoo kemok, nɛ̀ əbfua ghene lu kɛn ɛ nchinten.

⁴⁵Ghene nè lóó əbliy əblee wel feene kefaa ə wen ka ɛylem, kene əbfua əblee è giate əbkaa ten se ghele ka ngɛk ə wel luun.

⁴⁶Ghene gese se konen ɛ ndaa-ɛykokse Feyin kechii nɛ̀ kechii, gese konen ɛ ghene ndaase, yiɛ se kefaa kemok, yiɛ dì giɛknene gese saŋle naa se ŋaŋ,

⁴⁷kokse Feyin. Ghele yɛn ndee ghen ɛyjuŋ, è se koŋe naa se ŋaŋ. Báàba Jesus me se boyse ghel kechii nɛ̀ kechii, nɛ ɛ́ chinten kenon ə wen.