Read Oku Ɛyf 20 Bible Online

Ɛyf 20 - Oku bible

Ɛyf 20

¹Ɛykum əbchio yi nɛy mɛy, Bool tooy ghel ɛbeemene, è tefte ghene è suuy ge, ɛ́ yɛ bɛɛse, è lòò è se nduu se Masedonia.

²Əb se chia ɛ ntaam fo, lumse tetem ə ghel ɛbeemene nɛ̀ giɛse ntefe naa se ɛydio, è me ndu è chin ɛ ngvən ə Glees,

³è chii fo se njoŋ setal. Əb nɛy se bááte ge yi diaŋ ɛ Silia, è me yio ge ghele Juus baate se yuye yi. Əb me liɛ ge yi kase fiile jii Masedonia.

⁴Əb nè jɛle ghene ghe Sobatel wɛ wán ə Billus wɛ̂ Belea, nɛ̀ Alistalkus ghene Sekundus ghɛ́ Tessalonika gese nɛ̀ Gaius wɛ́ Delbe, nɛ̀ Timoti nɛ̀ Taychikus ghene Tlofimus ghɛ́ Asia.

⁵Ghel ghine nè ndu se mbiy è se chiyte ghɛs ɛ Tloas.

⁶Ghɛs nɛy me lòò se Filibi kɛn ka əbchii ɛyyiɛ keban kɛ too ghàà feshik è kaŋ chian è se diaŋe, əbchii chia əbtan, ghɛs báksén ghene ɛ Tloas, ghɛse ghene chii fo se əbchii saamba.

⁷Nɛy se lu ɛ kechii kɛ́ mbiye se əbwɛy, ɛ́ konen se yiɛ keban, Bool suŋnen se ghene, è suŋnen è ndu è chin ɛ ɛyteme ntək, bek ka əb nè taŋen ge yi bvəs è lòò.

⁸Ghɛse ghene nè lu ɛybee ndaa yɛ ɛyyio, nɛ ɛ́ chək əbkaaken fo se ɛydio.

⁹Nè lu dì nɛ wándɛ nsum əblee nɛ ɛ́ toŋte ge Yutikuse diom ɛ ghundu, nɛ mbuunese yiike nduu nɛ̀ wen, nɛ Bool ko bo suŋnen nduu, əb loo chiɛme ndu nɛ̀ mbuunese, è nɛy lòò ɛybee ndaa yɛ ɛyyio yɛ əbleŋ əbtal è fɛy jii bɛy, ɛ́ bɛɛy nɛ əb kuomen.

¹⁰Bool me səəke fo, è ngvəkte ɛ wene ketuu, è baamé wen, è suuy ge: Ghàà ghɛn yɛ buk, əb bo bɛɛy əbtaa.

¹¹Ka əb taan di, Bool me kase kok, ghene ghel ɛbeemene yiɛ keban, è fiɛl kenfiɛl se chin ka əbtəke nè yion, əb me lòò.

¹²Ghele liɛ wándɛ nsum vi, ghene ghene se kfəəye nɛ əb lu əbtaa, kii nɛ̂ kine nɛɛy, ghene se ki ɛytem ɛyzəətene naa se ŋaŋ.

¹³Ghɛs me lii kenək keghuye è se diaŋe Assos, se mbiy bene fɛ ɛ́ nè nɛ̂y se liɛ Bool bek ge lu ghaa əb nè siysen ge ɛ́ nɛ̂y liɛ yi, è me lòò è se nduu nɛ̀ kevəə.

¹⁴Nɛy se lu ka əb gwiyen è baksen ghɛs ɛ Assos, è lii se kenək ghɛse ghene diaŋ se Mitilene.

¹⁵Ghɛs lòò se fo, è diaŋ è chin ɛ ɛyghaŋe ntɛk yɛ Chios nɛ əbtəke yiomen; se lu ɛybame kechii ghɛs ndu è chin ɛ Samos è se ghane ge ɛ́ chin ɛ Miletus nɛ shi ɛ kenkumtene kechii.

¹⁶Bool nè liɛ ge ɛ́ chia Ɛfesos ɛ ɛyghaŋ bek ge əb nè báà se koŋe se jefse əbliy ɛ Asia. Əb nè fiɛle dì ge kè lu ghɛɛ-ghɛɛ é yi ndu è chin ɛ Jolesalem ɛ kechii Bentekost.

¹⁷Ghɛs chin ɛ Miletus di, Bool me tinse ntum se ghele mbiye ɛ kenchintene ghel ɛbeemene kɛ́ Ɛfesose ge ghene gwiy.

¹⁸Nɛy se lu ka ghene nè gwiyenmen, əb suuy se ghene ge: Ghɛn se ghɛne ngeŋse ke ka mɛ nè chiin ɛ ghɛne məm əbliy əbjim se kɛ̀ɛ̀tè se kechii kɛ́ mbiye kɛ mɛ nè tomen kevəə se Asia.

¹⁹Mɛ nè lô se fɛle se Báàba nɛ mɛ liɛ ngeŋ ə yom naa ɛ ntiɛ è se səkse əmshiɛ, nɛ ngɛkse gwiye san, nɛ kale ghele Juus əmnaŋme ten.

²⁰Kéné ghɛn ke ge mɛ nè loo fekte kenəə ə Feyin è jia vəse naa kenəə kemok kɛ mɛ nè yɛnen ge lòó ke giamten ghɛn. Mɛ nè dinte əbnəə se ghɛn ɛ əbnchinten gese nɛ se ghɛne ndaase.

²¹Mɛ nè lô tef ghele Juus ghene ghel əbtume sɛy ketaan ge ghene kubsen tetem ə ghene è fiile se Feyine, fo ɛytem se Báàba ə wɛsen Jesus Christ.

²²Yɛn-a! Mɛ se nduu ɛ Jolesalem ɛ leenen ka Keyioy Kelanene nɛɛyen ge mɛ ndu, ke wiy kenəə kɛ ke gan se mɛ fo.

²³Kɛ mɛ keen lu kɛn ge, Keyioy Kelanene tefe mɛ naa ɛ ntɛk ɛykɛ yɛ mɛ nduun ɛ ten ge ɛ́ nɛy tinse mɛ se nchak, è nɛɛy é mɛ yɛ yɛne ngɛk.

²⁴Dî nɛ mɛ liɛmen ngeŋ ə yom ge kefaa lólò, è se kɛŋe kɛn se mɛyse ɛyfɛl yɛ Báàba Jesus nè foon se mɛ. Ɛyfɛl yɛ əb nè foon se mɛ lu se yɛ fekte sakghɛ əbjuŋ wɛ kum ka Feyine chamen ɛysen.

²⁵Ke me se lu nɛ kɛɛte ɛ leenen wɛ mɛ ghanenmen ɛ ghɛne məm è fekte kum ɛysak ə Feyin, wel se ghɛne jia bo yî yɛn mɛ.

²⁶Mɛ me se suuye se ghɛn lan ge: Wel se ghɛn lɛy, ɛ́ jia náà bif se mɛ.

²⁷Mɛ suuye lɛ bek ge mɛ nè báà buu ghàà yɛ fekte se ghɛn kum əbnəə əbjim wɛ Feyine luun se nɛɛy.

²⁸Ghɛn yɛ toknen nɛ̀ ngeŋ ə sɛne, toknen nɛ̀ kenon ə ghel kɛ Keyioy Kelanene viimen se ghɛne keghoo ka nchiyse. Ghɛn yɛ chiye kenchintene ghel ə Feyin kɛ Bay wɛ əb nè foon wán ə wen ka ngvəə ntaŋle se nɛɛy ge ke yɛ lu.

²⁹Mɛ ke ge mɛ nɛ̂y ben jim é báá setaa gwiy ɛ ghɛne məm, è yɛ foo ngɛk se ghɛn.

³⁰Ghel ɛlee náà fəy ɛ ghɛne məm, è yɛ yia əbbuam se liɛte ghon-ɛyfɛl ɛlee nɛ ɛ́ ndu ɛ ghene ɛybam.

³¹Ke me se lu ge ghɛn toknen, è yɛ kuume ge mɛ nè lô se kóme bàbàŋ nɛ̀ nchuy nɛ̀ ntəke, tefe ghel ɛjim se nguk setal.

³²Mɛ se vii ghɛn ɛ Feyine keghoo ɛ leenen gese suuye ge ghɛn yɛ yionen se sakghɛ wɛ kum ɛycham ɛysen nə Feyine. Sakghɛ nɛ̂ vin lòó əb baklé wel è nɛɛy é əb yɛ ki əbtik wɛ Feyine lɛmen se ghel ɛjim ghɛ ɛ́ laanen.

³³Mɛ nè báà yi semte əbkaa ə wel kene ndəyse ə wel.

³⁴Ghɛn se ghɛne ngeŋse ke ge mɛ nè fɛle nɛ̀ ɛghoo ə ghom ghine se geese yɛ kiile əbfua əbjim wɛ ghɛse ghele ngoo nə mɛ nè shiin.

³⁵Əbnəə əbjim wɛ mɛ nè nɛɛyen nè lu se din se ghɛn ge wel lu se yɛ fɛl ketaan ka əb yɛ giamtene ghel ɛbole, gese kuume kenəə kɛ Báàba Jesus se wen ə ngeŋ nè suuyen ge: Ke loote lu kejuŋ se wel wɛ əb fóon chia kɛ́ wel wɛ əb fíìn fíín.

³⁶Nɛy se lu ka Bool suuyen əbnəə vi è mɛyse, è təm ɛləy ghene ghene jem naa ɛjim.

³⁷Ghene me se toŋe, baamé wen, suuy ge əb jɛl kejuŋ.

³⁸Kenəə naa kɛ ke nè nɛɛyen ghene se lu ɛysen ɛysen lu kɛ əb nè suuyen se ghene ge ghene jia bo yî yɛn yi. Ghene me tinse wen è ndu so se kenək.