Read Oku Ɛyf 21 Bible Online

Ɛyf 21 - Oku bible

Ɛyf 21

¹Nɛy se lu ka ghɛse ghene giabsen, ghɛs lii kenək, è diaŋ ɛ titiy è chin ɛ Kos, se lu ɛ kenkumtene kechii ghɛs chin ɛ Lodes è lòò se fo è ndu ɛ Batala.

²Ghɛs yɛn kenək kelee fo nɛ ke nduu ɛ Foenisia è lii se ten è se diaŋe.

³Ghɛs chin nɛ ɛ́ se yɛne Siblus, è bàk è fo jii əbkoy əbkiye è se diaŋe ɛ Silia, è diaŋ è chin ɛ Taya, è fəy fo ghaa ɛ́ nè nɛy se fəyse əbfua se kenək.

⁴Ghɛs fəy dì, è kɛŋ è yɛn ghon-ɛyfɛl ɛlee, ghɛse ghene chii se əbchii saamba. Keyioy Kelanene nɛɛy ghene suuy se Bool ge ghàà əb tom kevəə se Jolesalem.

⁵Dî əbliy ə wɛse nɛy kwɛn, ghɛs lòò è se nduu. Ghon-ɛyfɛl ɛjim, nɛ̀ əbkiy ə ghene, gese nɛ̀ ghone tinse ghɛs è fəynen ntɛk. Ghɛse ghene chin ɛ əbchio jio, è təm ɛləy è jem, chakte ge ɛ́ yɛ́ bɛɛse.

⁶Ghɛs me lii se kenək è lòò, ghene me kase kfəəy.

⁷Ghɛs lòò se Taya dì, è diaŋ ɛ Bolemais è chakte ghone-nyii ghɛ́ foo, ghɛse ghene chii.

⁸Əbtəke yio, ghɛs lòò è ndu ɛ Saesalea, è ndu è lii ɛ ndaa nə Filib è chii. Filib nè lu wel ghane fekte sakghɛ əbjuŋ, nɛ lu wel əblee ɛ məme ghel ghɛ saamba ghɛ ɛ́ nè chokten ɛ Jolesalem ge ngiamtense.

⁹Əb nè ki ghon ə wen ɛkiye ɛkɛɛk nɛ ɛ́ bɛɛy ghàà yɛ ki ɛlum. Ghene nè lóó ɛ́ yɛ fekte kenəə ə Feyin.

¹⁰Se lu ka ghɛs nè chiin fo se əbchii, wele ntum nə Feyine əblee nɛ ɛ́ toŋte ge Agabus gwiy nɛ əb lòò ɛ Judea.

¹¹Ka əb gwiyen baksen ghɛs è me liɛ kekuy ə Bool è kul ɛyfin ə wen gese nɛ̀ ɛghoo wene se wene ngeŋ nɛ kekuy kii. Əb kul dî è me suuy ge: Keyioy Feyine suuy ge ghan ka ghele Juus ɛ Jolesaleme nɛɛy kul wel wɛ əb kiin kekuy kin è me vii se keghoo nɛ ghel əbtume.

¹²Ghɛse ghele ghɛ́ foo yio dì è se beŋte Bool ge ghàà əb ndu se Jolesalem.

¹³Bool me suuy ge: Lu bek ghɛ wɛ ghɛne toŋnen, gese tensen ɛytem ə yom. Mɛ dì báà se lu kɛn kebaaten ge ɛ́ kul mɛ, mɛ lu naa kebaaten se kuo ɛ Jolesalem bek Báàba Jesus.

¹⁴Ghɛs mom ketaan, əb jia kubsen, ghɛs yal è me suuy ge: Ghɛse jeme ge əbnəə əbjime jɛl kɛn ka Báàba kɛŋen.

¹⁵Ghɛs chiite fo, è baate əbfua ə wɛs è lòò se yɛ nduu se Jolesalem.

¹⁶Ghɛs loo ndu, ghon-ɛyfɛl ghɛ́ Saesalea ɛlee lòò ghɛse ghene, ɛ́ ndu, ghene ndu nɛ̀ ghɛs se Mnason ə ndaa, ghɛs se chii fo. Mnason nè lu wele wɛ̂ Siblus nɛ gese lu se ghon-ɛyfɛle ghɛ́ mbiye.

¹⁷Nè lu ka ghɛs nè nduunmen è chin ɛ Jolesalem ɛ leghɛ, ghel ɛbeemene loote fiisen ghɛs.

¹⁸Əbtəke yio, ghɛse ghe Bool ndu se yɛne Jɛms, nɛ ghele mbiye se ndaa Feyin ɛjim lu fo.

¹⁹Bool chakte ghene, è me fiɛl se ghene əbnəə əbjim wɛ Feyine nè nɛɛyen ɛ ghel əbtume məm chia ɛ wene ɛyfɛl

²⁰Ghene yio kii nɛ̂ kine, è kokse Feyin è me suuy se Bool ge: Wan-nyii, yɛn ka ghele Juuse foon ɛytem se Feyine ɛ nkamse ɛ nkamse è se lɛme tesak tejim naa kejuŋ.

²¹Ɛ́ nè suuymen se ghɛs ge wɛ̀ ghane dinte se ghele Juus ghɛ ɛ́ chiin ɛ əbtum ge ghene maay nchilse Moses, è jia yɛ nɛyte ghon ə ghen, è maay nchiine ə ghele Juus ɛyjim.

²²Ka ghene kó nɛ̂y yio ge wɛ̀ lu fo, lòó ghɛsen nɛɛy lɛɛy ɛ leenen?

²³Ke lu ɛ leenen ge, wɛ̀ nɛɛy kenəə kɛ ghɛse suuy se wɛ̀. Ghele lu fɛn ɛkɛɛk nɛ ɛ́ nè laamen kelek.

²⁴Se suu kensuu, ghɛne ghene jɛl kevəə kemok, è suu ngeŋ sɛn è yɛ laane ɛyshiɛ nə Feyine é wɛ̀ lak əbkaa ten, ka lòó ghene kwaa əbtuu ə ghen. Wɛ̀ nɛɛy dì, é wel əbjim yɛ ke ge əbnəə əbjim wɛ ghene yiomen ka ɛ́ suuyen ge wɛ̀ nɛɛye, wiy se əbluuy, è yɛ ke ge wɛ̀ nɛɛye nɛ lu əbnəə wɛ nchilse Mosese dinen.

²⁵Dî nɛ lu se ghel ɛbeemene ghɛ wiyen ghele Juus nɛ ghɛse tinsemen ŋwaale se ghene ge ghɛs liɛmen ge ghàà ghene yî yiɛ kefaa nɛ ɛ́ chiysemen əmnyin so, lɛke əmnduŋ, lɛke nyam yɛ ɛ́ kamen kamen se geese yuy, è maay nchiinen kenjaŋ.

²⁶Bool me liɛ ghel ghi, əbtəke yio, ghene ghene suu kensuu ki se laane ɛyshiɛ nə Feyine, è me ndu se ndaa-ɛykokse, se fekte kechii kɛ əbchii kensuu nɛy mɛy ɛ ten ɛ́ chiase ɛyfoo ə ghen se Feyine ɛ wele ketuu ɛ wele ketuu.

²⁷Əbchii ten wɛ əb nè luun saamba loo mɛy, ghele Juus ɛlee ghɛ ɛ́ nè lòòn ɛ ngvəne Asia yɛn Bool ɛ ndaa-ɛykokse, è bɛyse ngose wel, ɛ́ koo wen,

²⁸è se zəəme ge: Ghele Islaele, ghɛn gwiy è giamten ghɛs. Vin lu wel wɛ əb jɛ́len əblik əbjim, tefe ghel ge ɛ́ yɛ kiye ketum kin nɛ̀ nchilse Moses, gese nɛ̀ ndaa-ɛykokse yin lòlò. Se lu nɛ əb liimen naa nɛ̀ ghel əbtume se ndaa-ɛykokse fɛn è bese kelik kelanene kine so.

²⁹Ghene nè suuy dì bek ge ghene nè lô yɛn wele wɛ̂ Ɛfesos əblee wɛ Tlofimus nɛ ghene Bool lu ɛ ntɛk è se kwaate ge Bool nè liɛmen, ghene wen lii se ndaa-ɛykokse.

³⁰Ntɛk ɛyjim shiŋ, ghele nyiŋke è gwiy se kelik kemok, è faŋ Bool è se gufe fəye so se ndaa-ɛykokse ɛ leghɛ, ɛychio ndaa me tɛkte əbghun kaŋ ɛymok.

³¹Ghene se kɛŋe se yuye Bool, ɛ leghɛ ɛ́ tinse ntum se ketuu kenone ghele ɛyghoŋe kɛ́ Lûme ge ntɛke Jolesalem ɛyjim shiŋe.

³²Əb me liɛ ghel ɛyghoŋ gese nɛ̀ ghele mbiy nə ghene, ghene mii ghaa ngose wel nè luun. Ghel ghii yɛn ghene ghel ɛyghoŋ ghii, è yal se yɛ tɛle Bool.

³³Ketuu ɛyghoŋ kii chia è koo Bool è suuy ge ɛ́ kul wen nɛ̀ nchak sebaa, è me bif ge: Vin lu ndɛ, kenəə kɛ əb nɛɛyen lu ghɛ?

³⁴Ghene se waame suuye əbnəə ndun ndun, əb jia keele kenəə kɛ ke chian, è me suuy ge ɛ́ liɛ Bool è ndu so ghaa ghel ɛyghoŋe chiin.

³⁵Ghene ndu è chin naa əbghune mbuŋse, ghel ɛyghoŋe me bɛɛy wen bek jii yɛ ngose wel nè yafsen ɛ ten.

³⁶Ghele tene nè gwiye ɛybam, waame ge: Ɛ́ yuy wen yuyén.

³⁷Se lu ka ghɛ ɛyghoŋe nè se liin nɛ̀ Bool se ghaa ghene chiin, əb suuy se ketuu ɛyghoŋ kii ge: Lɛ lòó mɛ suuy kenəə se wɛ̀-a? Əb me bif se Bool ge: Wɛ̀ suŋnen əblame Gleek-a?

³⁸Ke fene wɛ̀ báà se lu wele Ejibt wɛ nè luun ɛ keleŋ əbliy kelee əb lose əbchio, è liɛ ghel ɛbee nkam sekɛɛk ghene ghene ndu è bɛ̀ɛ̀ əbkwak è se fəye yuytê ghel.

³⁹Bool fise ge: Mɛ lu wele Juus. Ɛ́ nè bii mɛ ɛ Talsus ɛ Silisia. Mɛ lu wán ə ntɛk ɛytaa. Kiy wɛ̀, fô jii é mɛ suŋnen se ghel ghine.

⁴⁰Ketuu ɛyghoŋe fô jii, Bool me teem ɛ mbuŋse, è chil ghel. Ghene ghusen, Bool suŋnen se ghene ɛ əblame Heblu ge: