Read Oku Ɛyf 22 Bible Online

Ɛyf 22 - Oku bible

Ɛyf 22

¹Ghone-nyii, nɛ̀ ɛbaa ə ghome, ghɛn yióté san é me yɛ lu se taŋle əbchio ə wom ɛ ghɛn ɛyhiɛ leenen.

²Ghene yio ka əb suŋnen se ghene əblame Heblu, è ghusen ge fiŋ, əb me suuy ge:

³Mɛ lu wele Juus, ɛ́ nè bii mɛ ɛ Talsus ɛ Silisia, dî è liy ɛ Jolesalem fɛn. Mɛ nè yiɛke ŋwaale se Gamaliel. Əb nè lô loote dinte se mɛ əbnəə wɛ kum tesak tɛ ɛbaa ghɛsene nè lɛmen. Mɛ me se taa ɛ kenəə ə Feyin kɛn ka ghɛne taan ɛ ten ɛ leenen.

⁴Mɛ nè lô se nəkse ghel ghɛ ɛ́ nè jumten jii ə Jesus nɛ̂ yin, gese yuyté ghene, koo əbkiy nɛ̀ ɛluumene vii se kengɛye nchak.

⁵Ketuu se ghɛ́ ntaŋlee gese nɛ̀ ghele ghɛ́ ndaa nsake ɛjim lòó ɛ́ bééme ge mɛ suuye əbluuy. Mɛ nè lô kiile ŋwaalese se ghene nɛ ghene nyak se ghele Juus nɛ̀ ghɛsen ɛ Damaskus, è me ndu fo, se koo ghele ten, se kul nɛ̀ nchakse, se gwiy so se Jolesalem ge ɛ́ nəkse.

⁶Nɛy se lu ka mɛ nè nduun baksen se Damaskus, ka nɛ ɛyteme nchuye di, ɛ leghɛ, ɛybane liak ɛ ɛyyio è kal mɛ è tas.

⁷Mɛ fɛy se ntiɛ, è yio giɛ ɛylee ge: Sool, Sool wɛ̀ nəkse mɛ bek ghɛ?

⁸Mɛ me bif ge: Lu wɛ̀ ndɛ, Báàba? Əb fise ge: Lu mɛ Jesus wɛ̂ Nazalet wɛ wɛ̀ nəksen.

⁹Ghel ghɛ ɛ́ nè luun ghɛse ghene yɛn ɛyban nɛ̂ yi, dî è jia yio giɛ ə wel wɛ əb kè suŋnen se mɛ.

¹⁰Mɛ me bif ge: Báàba lòó mɛ nɛɛy ghɛ? Báàba suuy san ge: Loole se ɛyyio, è ndu se Damaskus. Lu fo ghaa ɛ́ suuy əbnəə əbjim wɛ Feyine siysenmen ge wɛ̀ nɛɛy.

¹¹Mɛ se loole nɛ ɛyban yii nɛɛymen, mɛ fef, ghele ngoo nə mɛ ghal keghoo ə kom, è liɛ mɛ è lii so se Damaskus.

¹²Wel əblee nè lu ɛ ntɛk fo lɛme nchilse naa kejuŋ, nɛ ɛyghel ə wene lu ge Ananias, nɛ ghele Juus ɛjim ghɛ ɛ́ nè chin fo ngvəmle wen naa se ŋaŋ.

¹³Əb gwiy, è teem ɛ mɛ ɛybee è suuy ge: Wan-nyii wɛ Sool, kase yɛ yɛn əblike. Mɛ ko me yɛn wen kɛn se əbliy.

¹⁴Ananias me suuy san ge: Feyin fɛ ɛbaa ə ghɛsene koksen chokmen wɛ̀ ge wɛ̀ keele kenəə kɛ yi kɛŋen ge wɛ̀ nɛɛy, è gese nɛɛy ge wɛ̀ yɛn wel ɛyfɛl nə wene wɛ̂ titiy è yio ka əb suŋnen nɛ̀ əbchio ə wene.

¹⁵Wɛ̀ nɛ̂y yɛ fekte se wel əbjim ka Báàba luun, suuye əbnəə wɛ wɛ̀ yɛnen nɛ̀ wɛ wɛ̀ yion.

¹⁶Ka ke luun lɛ, wɛ̀ bo chiyte ghɛ? Loole se ɛyyio, é mɛ fó moo se wɛ̀, è jem se wen, é əb lɛyse mbee ə shiɛ.

¹⁷Nɛy se lu ka mɛ nè kasemen ndu se Jolesalem è loo jem ɛ ndaa-ɛykokse, kuumese koo mɛ,

¹⁸mɛ yɛn Báàba nɛ əb suuy se mɛ ge: Fiɛ́lé fiɛ́lén è fəy se Jolesalem bek ge ghele ghɛ fɛne jia nɛ̂y beeme kenəə kɛ wɛ̀ fekten kum mɛ.

¹⁹Mɛ me fise ge: Báàba, ghene ke naa kejuŋ ge mɛ nè lô se ghane ɛ ngayse ɛyjem, koo ghel ghɛ ɛ́ nè foon ɛytem se wɛ̀, tɛle vii se nchak.

²⁰Ɛ́ naa loo yuyté Stefen wɛ əb nè suŋnen se ghele kum wɛ̀, mɛ se tiy fo, tokte gese chiye ndəyse ghel ghɛ ɛ́ nè yuyen wen.

²¹Báàba me suuy se mɛ ge: Yɛɛ nduu, bek ge mɛ nɛ̂y tinse wɛ̀ naa əbtəm ɛ telak nə əbtume.

²²Ghel ghii se yióté əbnəə wɛ Bool nè suuyen əb nɛy suuy ge Feyine tum yi se əbtume ɛ leghɛ, ghene me se zəəme kɛn zəəmen ge: Ɛ́ mɛyse wel vin mɛysen se ketuu ntiɛ, ke báà se lu ɛ titiy ge əb yɛ chii.

²³Ghene se zəəme dì, jike ndəyse ghen, ŋwɛle kebvəl, waŋe nɛ ke loole ɛyyio.

²⁴Ketuu se ghɛ́ ɛyghoŋe yio, è lam ge ɛ́ liɛ wen è lii so se yi ndaa ɛyfɛl. Ɛ́ lii so əb lam ge, ɛ́ tɛl se keele kenəə kɛ ke nɛɛyen ghele Juus se buu wen.

²⁵Nɛy se lu ka ɛ́ nè kulenmen wen ge ɛ́ yɛ tɛl əb bif se wele mbiy ɛyghoŋ wɛ əb nè tiyen ɛ wen ɛybee ge: Nchil lɛ bééme ge wɛ̀ yɛ tɛle wel wɛ əb kiin əbtaawe ka wele Lûm, nɛ ɛ́ báà sak wen-a?

²⁶Wele mbiy ɛyghoŋ yio kii nɛ̂ kine, è ndu se ketuu ə ghene è bif se wen ge: Wɛ̀ kɛŋe se nɛɛy ghɛ kin. Wel vii di lu wele Lûm.

²⁷Ketuu ɛyghoŋ ki me chia è bif se Bool ge: Wɛ̀ lu wele Lûm-a? Bool bééme.

²⁸Əb me suuy ge: Mɛ nè yun nɛ̀ mbɛk əbkaa se geese yɛ lu wele Lûm. Bool suuy ge: Mɛ lu wele ketum kɛ Lûm kin se ɛybii.

²⁹Ghel ghɛ ɛ́ nè nɛy se yɛ bifte əbnəə se Bool me guf əbghun ɛybam chikiy, ketuu ɛyghoŋe se fane bek ge əb kè yɛnmen ge wel wɛ yi kè kulen nɛ̀ nchakse lu wele Lûm.

³⁰Əb ko se kɛŋe se keele ge ghele Juus sɛ toye Bool se ghɛ-a. Əbtəke yio, ɛ́ yayte nchakse se Bool ɛykoy, è jaŋte ghele mbiy se ghɛ́ ntaŋlee gese nɛ̀ ghɛ ɛ́ saken ge ɛ́ konen. Əb me gwiy nɛ̀ Bool ɛ ghene ɛyshiɛ.